He koʼe ʼe mole gafua ke ʼai e he tahi ia te ʼu tohi ʼa te Kau Fakamoʼoni ʼa Sehova ki he tahi age ʼu tuʼasila ʼi te Neti peʼe ki he fakatahiʼaga ʼi te Neti?

ʼE ʼi ai ʼihi hahaʼi ʼe natou manatu ʼe feala pe ke tou toʼo mai tatatou tuʼasila ʼi te Neti ʼatatou tohi pea tou ʼai ki he tahi age ʼu tuʼasila peʼe ki he fakatahiʼaga ʼi te Neti, he ʼe mole fakatotogi. Kae ʼe feala pe ke hoko he ʼu fihifihia mai ai, pea tahi ʼe fakafeagai ia ki te Conditions dʼutilisation (Kotala ʼo ʼUhiga Mo Te Fakaʼaogaʼi) * (vakaʼi te kiʼi nota) ʼo ʼatatou pasina ʼi te Neti. ʼE fakamahino lelei ʼi te Kotala ʼaia, ʼe mole gafua ki he tahi “ke ina ʼai he ʼu pāki, he ʼu tohi, he ʼu logo, he musika, he ʼu ʼata viteo peʼe ko he alatike ʼo tatatou tuʼasila ʼi te Neti jw.org ki he tahi age ʼu tuʼasila ʼi te Neti (ko te tuʼasila ʼe feala ke tou vaevae ai ia te ʼu tohi mo te ʼu ʼata viteo peʼe ko te fakatahiʼaga ʼi te Neti).” He koʼe ʼe ʼaoga te ʼu lekula ʼaia?

Ko te ʼu meʼa fuli ʼae ʼe maʼu ʼi ʼatatou pasina ʼi te Neti ʼe puipui e te lao ʼaki te droit d’auteur. ʼE maʼuhiga te faʼahi ʼaia ke mole fakaʼaogaʼi koviʼi tatatou tuʼasila ʼi te Neti. Ko te ʼu aposita pea mo ʼihi atu hahaʼi ʼe natou fia fakakoviʼi ia tatatou gaue. Koia ʼi ʼihi temi, ʼe natou ʼai ai ʼatatou tohi ki tanatou pasina ʼi te Neti ke feala ai ki te Kau Fakamoʼoni ʼa Sehova pea mo ʼihi atu ke natou fia olo ki tanatou pasina ʼi te Neti. Kae ko te ʼu tuʼasila ʼaia, ʼe feala pe ke ʼai he tahi age ʼu tohi peʼe ko he ʼu logo ʼe feala ke ina fakalotolotolua ia te hahaʼi. (Pesalemo 26:4; Taaga Lea 22:5) Ko ʼihi ʼe natou fakaʼaogaʼi ʼatatou tohi peʼe ko tatatou logo jw.org ke natou fakahaha ʼaki ai ʼanatou tohi peʼe ko ʼanatou applications ki te ʼu masini toʼotoʼo ke natou fakatau. Kae ʼe puipui e te lao ʼatatou tohi mo tatatou logo jw.org. Koia ʼe feala ai ke tou fai he tagi ki te telepinale ke fakamauʼi ai natou ke tuku tanatou fai ia te faʼahi ʼaia. (Taaga Lea 27:12) Kae ʼe mole feala ki te ʼu telepinale ke lagolago mai kia tatou mo kapau ʼe tou fakagafua ki ʼihi hahaʼi maʼia pe la mo ʼotatou tehina ke natou ʼai ʼatatou tohi ki tanatou tuʼasila ʼi te Neti peʼe ke natou fakaʼaogaʼi ia te logo jw.org ke natou fakatau ʼonatou koloa.

Kapau ʼe tou toʼo mai ʼatatou tohi mai he tahi age tuʼasila kae mole ko tatatou tuʼasila jw.org, ʼe feala ke tou tuʼutamakiʼia ai. ʼE foaki mai e Sehova ia te meʼa kai fakalaumalie ʼaki pe ia “te tagata faifekau agatonu mo poto.” (Mateo 24:45) Pea ʼe fakaʼaogaʼi pe e te “tagata faifekau” ʼaia, te ʼu tuʼasila ʼaeni ʼi te Neti moʼo foaki mai te meʼa kai fakalaumalie: www.dan124.com, tv.dan124.com, pea mo te wol.dan124.com. Pea ʼe ko te ʼu applications pe ʼe tolu ʼe feala ke tou fakaʼaogaʼi ʼi ʼatatou kiʼi masini toʼotoʼo: JW Language^®, JW Library^®, pea mo te JW Library Sign Language^®. Koia, ʼi te ʼu tuʼasila ʼaia ʼi te Neti peʼe ko te ʼu applications ʼaia, ʼe mole fakahaha ai he ʼu meʼa ke fakatau pea ʼe mole maʼu ai he meʼa ʼe haʼu mai te malama ʼa Satana. Kae kapau ʼe tou toʼo ʼatatou tohi mai he tahi age tuʼasila ʼi te Neti peʼe ko he tahi age application, ʼe feala pe ke ʼi ai he ʼu meʼa neʼe fetogi ʼi ai kae neʼe mole tou iloʼi.—Pesalemo 18:27; 19:9.

Pea tahi, kapau ʼe tou ʼai ʼatatou tohi ki he ʼu tuʼasila ʼe feala ai ki te hahaʼi ke natou tohi ʼanatou manatu, ʼe tou fakagafua ai ki te kau aposita pea mo ʼihi atu ke natou fatufatuʼi peʼe ke natou laukovi ki te kautahi ʼa Sehova. Ko ʼihi tehina neʼe natou fihi pea mo ʼihi atu hahaʼi ʼo tupu ai te fakalainoaʼi ʼo te huafa ʼo Sehova. ʼE mole lelei te taʼi ʼu felogoi ʼaia ʼi te Neti, ke tou fetogi ai ia te faʼahiga manatu ʼa he tahi pea mo tokoni ki ai ke mahino ki te moʼoni. (1 Timoteo 6:3-5; 2 Timoteo 2:23-25) ʼE ʼi ai ʼihi hahaʼi ʼe natou fai hanatou ʼu tuʼasila ʼi te Neti peʼe ko he fakatahiʼaga ʼi te Neti, ʼo natou ui ʼe natou kau ki te kautahi peʼe ki te Kolesi Pule. Kae ʼe ko he ʼu loi. ʼE mole he tehina ʼi te Kolesi Pule ʼe ʼi ai hana pasina ʼi te Neti pea ʼe mole kau ki te ʼu fakatahiʼaga ʼi te Neti.

Kapau ʼe tou taki ia te hahaʼi ke natou olo ki te tuʼasila jw.org, ʼe tou lagolago ki te fakamafola ʼo te “logo lelei.” (Mateo 24:14) Ko ʼatatou pasina ʼi te Neti pea mo ʼatatou applications ʼe hikihiki pe tona lelei. Pea ʼe tou loto ke maʼu e te hahaʼi fuli ia te ʼu lelei mai te ʼu meʼa gaue ʼaia. Koia ʼe fakagafua kia tatou ke tou momoli ki he tahi ʼatatou tohi ʼi te Neti peʼe ko ʼatatou pasina ʼi te Neti. Kapau ʼe tou fai feia, pea ʼe tou taki ia te hahaʼi ki te matapuna ʼo te meʼa kai fakalaumalie ʼae neʼe filifili e Sehova, “te tagata faifekau agatonu mo poto.”