ʼE ʼI AI koa he gaue ʼe ke fia fakahoko ʼi te kokelekasio, kae ʼi te temi nei ʼe mole heʼeki feala? ʼE lagi ʼe fakahoko ia te gaue ʼaia e he tahi age. Peʼe lagi ko he gaue neʼe ke fai ʼi muʼa atu, kae ʼe mole kei feala ke ke fakahoko ʼuhi ko tou taʼu, te mahaki, te ʼu fihifihia fakapaʼaga peʼe ko te ʼu maʼua fakafamili. Peʼe ʼuhi ko te ʼu fetogi ʼae neʼe hoko ʼi te kautahi ʼa Sehova, neʼe tonu ai ke ke fakafisi ki he gaue neʼe ke fakahoko talu mai fualoa. Tatau aipe te ʼu aluʼaga ʼae neʼe hoko kia koe, kae lagi ʼe ke manatu ʼe mole kei lahi te ʼu gaue ʼae ʼe ke fakahoko ʼi te temi nei ohage ko tau gaue ki muʼa atu. ʼI ʼihi temi, ʼe mole kovi mo kapau ʼe kita lotovaivai ʼuhi ko te ʼu aluʼaga ʼaia. Kae ʼe feafeaʼi hau tauʼi te ʼu aluʼaga ʼaeni, ʼo mole ke taupau ʼi tou loto? Ohage la ko te maʼu ʼo he ʼu manatu ʼe mole lelei, mo te lotovaivai pea mo te lotomamahi? ʼE feafeaʼi hau taupau te fiafia?

ʼE feala ke tou ako mai te faʼifaʼitaki ʼo Soane Patita ke tou fiafia tuʼumaʼu ai. Neʼe filifili ia Soane ke ina fakahoko he ʼu gaue makehe ʼi te tauhi kia Sehova. Kae neʼe hoko leva te ʼu aluʼaga ʼi tona maʼuli, neʼe mole ʼamanaki ki ai. Ohage la, neʼe mole manatu ʼe lahi age anai te temi ʼae ʼe nofo ai ʼi te pilisoni ʼi te temi ʼae ʼe ina fakahoko ai ʼana gaue. Logo la te ʼu aluʼaga ʼaia, kae neʼe fiafia tuʼumaʼu ia Soane ʼo kaku ki tana mate. Kotea ʼae neʼe tokoni ki ai? Pea ʼe feafeaʼi hatatou fiafia logo la ʼe tou felaveʼi mo he ʼu aluʼaga ʼe fakatupu lotomamahi?

ʼI te taʼu 29 H.T.S., * neʼe kamata fakahoko ai e Soane tana gaue ʼae ko te teuteuʼi ʼo te hahaʼi ki te haʼu ʼo te Mesia. Neʼe ina ui fenei: “Kotou fakahemala, he ʼe kua ovi mai te Puleʼaga ʼo selo.” (Mat. 3:2; Luka 1:12-17) Tokolahi te hahaʼi neʼe natou tali leleiʼi te logo lelei ʼaia. Neʼe kaugā malie ia natou ʼae neʼe ʼomai mai mamaʼo ʼo fakalogo kia ia. Pea ko ʼihi ia natou neʼe natou fakahemala pea mo papitema. Neʼe lototoʼa ia Soane koteʼuhi neʼe ina fakatokaga ki te kau takitaki lotu ʼe fakamauʼi anai natou mo kapau ʼe mole natou fetogi. Koteʼuhi ʼi tanatou manatu ʼe natou faitotonu age ʼi ʼihi. (Mat. 3:5-12) Pea ʼi te taʼu 29 pe, neʼe ko he ʼaho makehe ʼaupito ʼo te faifakamafola ʼa Soane koteʼuhi neʼe ina papitemaʼi ia Sesu. Pea ʼi te temi leva ʼaia, neʼe ina fakalotomalohiʼi te hahaʼi ke natou muliʼi ia Sesu, te Mesia ʼae neʼe fakapapauʼi mai.—Soa. 1:32-37.

Neʼe makehe ʼaupito te gaue ʼa Soane, koia neʼe ui  fenei ai e Sesu: “Ia natou ʼae neʼe tutupu mai he ʼu fafine, ʼe mole he tahi ʼe lahi age ia Soane Patita.” (Mat. 11:11) ʼE mahino ia, neʼe fiafia ia Soane ʼi te ʼu tapuakina ʼae neʼe ina maʼu. ʼO toe feia pe ia ʼaho nei, ʼe fiafia te tokolahi ʼuhi ko ʼonatou tapuakina. Ohage la, ko te tehina ʼe higoa ko Terry. Ko ia pea mo tona ʼohoana ʼae ko Sandra neʼe nā kau ʼi te selevisi temi katoa ia taʼu ʼe 50 tupu. ʼE ina fakamatala fenei: “Neʼe lahi ʼoku pilivilesio neʼe au maʼu ʼi taku tauhi kia Sehova. Neʼe au pionie, mo Petelite, mo pionie makehe, mo taupau ’o te siliko, mo taupau ’o te tisitilike. Pea ʼi te temi nei, kua au toe pionie makehe.” Ka lahi ʼatatou gaue ʼi te kautahi ʼa Sehova, pea ʼe toe lahi ai mo totatou fiafia. Kae ʼe tou ako anai mai te faʼifaʼitaki ʼo Soane, ʼe ʼaoga ke tou fai he ʼu faiga moʼo taupau totatou fiafia moka hoko he ʼu fetogi ʼi totatou maʼuli.

Neʼe taupau e Soane Patita tona fiafia, koteʼuhi neʼe lotofakafetaʼi ki te ʼu gaue fuli ʼae neʼe fakagafua age e Sehova ke ina fakahoko. Ohage la, tou vakaʼi te aluʼaga ʼaeni. Hili te papitema ʼo Sesu, neʼe tokosiʼi leva te ʼu tisipulo ʼa Soane kae kaugā malie age te ʼu tisipulo ʼa Sesu. Neʼe tuʼania ai te ʼu tisipulo ʼa Soane ʼo natou olo ʼo ui fenei age ki ai: “Koʼeni ʼe lolotoga faipapitema ia [Sesu], pea ʼe olo fuli te hahaʼi kia te ia.” (Soa. 3:26) Neʼe tali fenei ia Soane: “Ko ʼae ʼe ina maʼu te fafine ʼohoana ʼe ko te tagata ʼohoana. Kaʼe ko te kaumeʼa ʼo te tagata ʼohoana, ʼi tana tuʼu pea mo logo ki ai, ʼe fiafia lahi ai ʼuhi ko te leʼo ʼo te tagata ʼohoana. Koia, kua katoa toku fiafia.” (Soa. 3:29) Neʼe mole fia fakataupiepie ia Soane mo Sesu. Pea neʼe mole manatu ia Soane neʼe mole kei maʼuhiga ia tana gaue koteʼuhi neʼe kua maʼuhiga age te gaue ʼae ʼa Sesu. Kae neʼe fiafia tuʼumaʼu pe ia, koteʼuhi neʼe ‘kaumeʼa ia ia mo te tagata ʼohoana.’ Pea neʼe maʼuhiga ʼaupito te aluʼaga ʼaia kia ia.

Tatau aipe pe neʼe mole faigafua ia tana gaue ʼae neʼe hinoʼi ki ai, kae neʼe ina taupau ia tona fiafia ʼuhi ko tana faʼahiga manatu. Ohage la, ko Soane neʼe ko he Nasilea talu tana tupu, koia ʼae neʼe mole tonu ai ke ina inu he moʼi vino. (Luka 1:15) Neʼe ui fenei e Sesu ʼo ʼuhiga mo te maʼuli fakafeʼauga ʼo Soane: “Neʼe haʼu ia Soane, neʼe mole kai pea neʼe mole inu.” Kae ko Sesu mo ʼana tisipulo neʼe mole maʼua ia ke natou mulimuli ki te ʼu tapu ʼaia. Neʼe natou maʼuʼuli ohage pe ko te hahaʼi fuli. (Mat. 11:18, 19) Pea tahi, neʼe mole fakahoko e Soane ia he milakulo. Kae neʼe ina iloʼi, neʼe maʼu te fealagia ʼaia e ʼihi ia natou ʼae neʼe mulimuli ia te ia ʼi te kamata, pea mo te ʼu tisipulo ʼa Sesu. (Mat. 10:1; Soa. 10:41) Neʼe maʼumaʼua aipe ia Soane ʼi te gaue ʼae neʼe ina maʼu mai ia Sehova. Koia ʼae neʼe mole tuʼu tana fakakaukau ʼi te kehekehe ʼo ʼana tisipulo mo ʼae ʼa Sesu.

Kapau ʼe maʼuhiga kia tatou ia te selevisi makehe ʼae ʼe tou fakahoko nei ohage ko Soane, ʼe tou fiafia tuʼumaʼu anai. Ko Terry ʼae kua tou talanoa ki ai, ʼe ina ui fenei: “Neʼe au faiga malohi ʼi te ʼu selevisi makehe takitahi ʼae neʼe au fakahoko.” Ka toe manamanatu ia ia ki tona maʼuli ʼae neʼe ina fakaʼaogaʼi ki te selevisi temi katoa, ʼe ina ui fenei: “ ʼE mole au fakahemala tuʼa tahi, kae ʼe lahi te ʼu aluʼaga fakafiafia ʼe au taupau maʼu ʼi toku loto.”

Ko te faʼahi ʼae ʼe maʼuhiga moʼoni ai ia he selevisi makehe peʼe ko he gaue, ko tatatou “kaugā gaue mo te ʼAtua.” (1 Ko. 3:9) Ka tou metitasio ki te pilivilesio ʼaia, ʼe tou toe fiafia ʼi tatatou tauhi ki te ʼAtua. Ohage la, kapau ʼe tou taupau leleiʼi ia he meʼa maʼuhiga neʼe foaki mai kia tatou, pea ʼe tologa anai ia. ʼO toe feia pe, tou metitasio ki te toe pilivilesio ʼae ko tatatou kaugā gaue mo te ʼAtua. Koteʼuhi kapau ʼe tou fai feia, ʼe mole tou tuku anai ke pulihi totatou fiafia e he ʼu manatu ʼe mole lelei. ʼE mole tou fia fakatatau anai ʼatatou faiga mo te ʼu faiga ʼae ʼe fai e ʼihi. Pea ʼe mole tou manatu anai ʼe maʼuhiga age te gaue ʼae ʼe foaki e Sehova ki ʼihi ʼi te gaue ʼae ʼe ina foaki mai kia tatou.—Kal. 6:4.

Neʼe lagi iloʼi e Soane ʼe mole fualoa anai ia tana minisitelio. Kae ʼe mahino ia, neʼe mole ʼamanaki ʼe tuku fakapunamaʼuli anai ia tana minisitelio. (Soa. 3:30) ʼI te taʼu 30 H.T.S., neʼe pilisoniʼi ia Soane e te Hau ko Helote. Neʼe hoko te aluʼaga ʼaia hili mahina ʼe ono ki te papitema ʼo Sesu. Kae neʼe hoko atu e Soane ia tana palalau ʼo ʼuhiga mo te ʼAtua. (Mko. 6:17-20) Kotea ʼae neʼe tokoni ki ai ke ina taupau tona fiafia logo la te ʼu fetogi ʼaia? Neʼe tokaga tafito ki te ʼu meʼa ʼae neʼe maʼuhiga kia Sehova.

Neʼe maʼu logo ia Soane ʼi te pilisoni ʼo ʼuhiga mo te ʼu fua lelei ʼo te minisitelio ʼa Sesu. (Mat. 11:2; Luka 7:18) Neʼe tui papau ia, ko Sesu neʼe ko te Mesia. Kae neʼe lagi feʼekeʼaki pe ʼe fakahoko feafeaʼi anai e Sesu ia meʼa fuli ʼae neʼe ui ʼi te ʼu Tohi Taputapu ʼo ʼuhiga mo te Mesia. Neʼe iloʼi e Soane ʼe fakanofo hau anai ia  te Mesia, koia neʼe lagi feʼekeʼaki ai pe ʼe kua vave fakanofo hau ia Sesu. Neʼe lagi toe feʼekeʼaki pe ʼe fakaʼateainaʼi anai ia ia e Sesu mai te pilisoni. Koia, ʼi tana fia iloʼi pe ʼe kotea ʼae ka fai anai e Sesu, neʼe ina fekauʼi leva ʼana tisipulo ʼe toko lua kia Sesu. Neʼe tonu ke nā fai te fehuʼi ʼaeni kia Sesu: “ ʼE ko koe koa ia Ia ʼae ʼe tonu ke haʼu, peʼe tonu koa ke matou fakaatalitali ki he tahi age?” (Luka 7:19) ʼI tanā toe liliu mai, ʼe mahino ia neʼe fagono lelei ia Soane kia naua. Neʼe nā fakamatala age ko Sesu neʼe ina fakamalolo fakamilakulo te hahaʼi. Pea neʼe fekauʼi mai naua e Sesu kia Soane mo te logo ʼaeni: “Kua sisio te kau kivi, kua haʼele te kau ketu, kua fakamaʼa te kau kilia, kua logo te kau tuli, kua fakatuʼuake te kau mate pea kua tala ia te logo lelei ki te kau masisiva.”—Luka 7:20-22.

ʼE mahino ia, neʼe ko he ʼu logo fakalotomalohi ʼaia kia Soane. Pea neʼe ko he ʼu fakamoʼoni ʼaia ʼe lolotoga fakahoko e Sesu ia te ʼu lea fakapolofeta ʼo ʼuhiga mo te Mesia. Logo la te kua haʼu ʼa Sesu ki te kele, kae neʼe mole tupu ai te fakaʼateainaʼi ʼo Soane mai te pilisoni. Kae neʼe iloʼi e Soane neʼe mole vaʼiganoa ia tana minisitelio. Logo la te aluʼaga ʼae neʼe tau mo ia, kae neʼe lahi te ʼu tupuʼaga ke fiafia ai.

Kapau ʼe tou tokakaga tafito ki te ʼu meʼa ʼae ʼe maʼuhiga kia Sehova ohage ko Soane, ʼe tou katakiʼi anai ʼotatou fihifihia ʼaki te fiafia mo te kataki fualoa. (Kol. 1:9-11) ʼO feafeaʼi? Tou lau mo metitasio ki te Tohi-Tapu. Pea ʼe tokoni mai anai te faʼahi ʼaia ke tou manatuʼi ko meʼa fuli ʼe tou fai maʼa te ʼAtua ʼe maʼuhiga. (1 Ko. 15:58) ʼE ui fenei e Sandra: “ ʼI te ʼaho fuli, ʼe au lau ia he kapite ʼe tahi ʼo te Tohi-Tapu pea ʼe au fakaovi ai kia Sehova. Pea ʼe ko he faʼahi ʼe tokoni mai ke au manatu tafito kia te ia kae mole kia au.” ʼE toe ʼaoga foki ke tou iloʼi ia te ʼu fua lelei ʼo te faifakamafola ʼi te malamanei. Koteʼuhi ʼe mole tou manatu pe anai kia tatou kae ki te ʼu gaue ʼae ʼe fakahoko e Sehova. ʼE toe ui fenei e Sandra: “Ko te ʼu ʼata viteo ʼae ʼe fai ʼi te polokalama JW ʼi te mahina fuli, ʼe tokoni mai ke tou nonofo ovi ki te kautahi ʼa Sehova pea ke tou fiafia tuʼumaʼu ʼi tatatou selevisi makehe.”

Lolotoga te temi nounou ʼae neʼe faifakamafola ai ia Soane Patita, neʼe ina fai ʼaki “te malohi ʼo Elia.” Pea ohage ko Elia, “neʼe ko he tagata neʼe tatau te ʼu meʼa ʼae neʼe ina logoʼi mo te ʼu meʼa ʼae ʼe tou logoʼi.” (Luka 1:17; Sakp. 5:17) Tou faʼifaʼitakiʼi ia Soane Patita ʼo tou fakaha tuʼumaʼu tatatou lotofakafetaʼi pea mo tou fakamuʼamuʼa tafito tatatou tauhi ʼae kia Sehova. Koteʼuhi ʼe tou fiafia tuʼumaʼu anai ʼi tatatou tauhi ʼae kia Sehova logo la te ʼu aluʼaga ʼae ʼe feala ke hoko kia tatou.