1. Kotea ia te ʼu aluʼaga fakafiafia ʼae ʼe fakafealagia e te totogi maʼa tatou?

ʼAKI te sakilifisio faitotogi ʼa Sesu Kilisito, ʼe feala ke tou maʼu ai he ʼu tapuakina lahi. Ohage la, ʼe ina fakafealagia ki te ʼu fanau fuli ʼa Atama ʼae ʼe ʼoʼofa ki te faitotonu ke natou kau ki te famili ʼo te ʼAtua. Pea ʼe toe feala ai foki ke tou maʼuʼuli fiafia ki te heʼe gata. Kaʼe ʼe mole gata ai, he ʼe ʼi ai te pikipikiga ʼo te totogi mo te ʼu faʼahi maʼuhiga ʼaupito kia natou fuli ʼe maʼuʼuli ʼi te lagi pea mo te kele.—Hepeleo 1:8, 9.

2. (1) Kotea te ʼu aluʼaga maʼuhiga ʼaupito ʼi te lagi mo te kele neʼe faikole ki ai ia Sesu? (Vakaʼi te ʼuluaki pāki.) (2) Kotea ʼae ka tou vakaʼi anai ʼi te alatike ʼaeni?

² Ia teitei taʼu ʼe lua ʼi muʼa ʼo tona mate, neʼe akoʼi e Sesu ki ʼana tisipulo ke natou faikole fenei: “Ko tamatou Tamai ʼae ʼe ʼi selo, ke tapuha tou huafa. Ke hoko mai tou Puleʼaga. Ke fai tou finegalo ʼi te kele ohage ko selo.” (Mateo 6:9, 10) Tou vakaʼi pe ʼe kotea te pikipikiga ʼo te totogi mo te fakatapuha ʼo te huafa ʼo Sehova, mo te ʼafio ʼo te Puleʼaga ʼo te ʼAtua pea mo te fai ʼo tona finegalo.

3. Kotea ʼae ʼe fakata e te huafa ʼo Sehova? Neʼe lau kovi feafeaʼi ia Satana ki te huafa ʼo Sehova?

³ Neʼe ʼuluaki faikole ia Sesu ke fakatapuha ia te huafa ʼo Sehova, peʼe ke fakamaʼoniʼoni. Ko te huafa ʼo Sehova ʼe ina fakata ia ia totonu, ia tona ʼuhiga moʼoni. Pea ʼe ko Ia tokotahi pe ʼae ʼe mafimafi mo faitotonu ʼi te ʼatulaulau katoa. Neʼe toe fakahigoaʼi e Sesu ia Sehova ko te “Tamai Maʼoniʼoni.” (Soane 17:11) Ko Sehova ʼe maʼoniʼoni, koia ʼae ʼe maʼoniʼoni ai ia meʼa fuli mo te ʼu lao fuli ʼae ʼe ina fai. Kaʼe ʼi Eteni, neʼe fakafihiʼi e Satana ia te pule faʼitaliha ʼa te ʼAtua ʼae ke ina fai he ʼu lekula maʼa te tagata. Neʼe loi ʼo ʼuhiga mo Sehova, pea neʼe lau kovi ki te huafa ʼo te ʼAtua, mo ʼulihi tona matagafua.—Senesi 3:1-5.

4. Neʼe fakamaʼoniʼoni feafeaʼi e Sesu ia te huafa ʼo te ʼAtua?

⁴ Kaʼe ko Sesu, neʼe ʼofa moʼoni ki te huafa ʼo Sehova pea neʼe ina fai ia meʼa fuli moʼona fakatapuha. (Soane 17:25, 26) ʼO feafeaʼi? ʼAki tana aga mo ʼana akonaki, neʼe tokoni ia Sesu ki te hahaʼi ke natou mahino ki te ʼu lekula haohaoa ʼa Sehova pea ʼe fua lelei tuʼumaʼu anai kia natou te ʼu meʼa ʼae ʼe ina kole age ke natou fai. (Lau ia Pesalemo 40:9-11.) Maʼia ʼi te temi ʼae neʼe fakamamahiʼi ai e Satana pea hoko ai mo tona mate, neʼe nofo agatonu aipe ia Sesu. Neʼe ina fakaha ai ʼe feala ki he tagata haohaoa ke fakalogo katoa kia Sehova.

5. ʼE feafeaʼi hatatou fakamaʼoniʼoni ia te huafa ʼo Sehova?

⁵ ʼE feafeaʼi hatatou fakaha ʼe tou ʼoʼofa ki te huafa ʼo Sehova? ʼAki tatatou aga. ʼE fakamaʼua mai e Sehova kia tatou ke tou maʼoniʼoni. (Lau ia 1 Petelo 1:15, 16.) Ko tona fakaʼuhiga, ke tou tauhi ʼateaina pe pea mo tou fakalogo kia te ia ʼaki totatou loto katoa. Tatau aipe pe ʼe fakatagaʼi tatou, kaʼe tou faiga malohi ke tou maʼuʼuli ohage ko tona akoʼi mai e Sehova kia tatou. Tou fakaalu tahi totatou maʼuli mo te ʼu pelesepeto ʼa Sehova, pea ʼe tou fakakololiaʼi ai tona huafa. (Mateo 5:14-16) Pea ʼe tou fakamoʼoni ai ko te ʼu lao ʼa Sehova ʼe fua lelei kia tatou pea ko Satana ʼe gutu loi. ʼE mole tou haohaoa, koia ʼae ʼe tou fai pe anai he ʼu lakahala. Kaʼe ka tou fai he ʼu lakahala, tou fakahemala mo tou faiga ke tou fakagata te fai ʼo te ʼu meʼa ʼae ʼe fakalainoaʼi ai te huafa ʼo Sehova.—Pesalemo 79:9.

6. He koʼe ʼe feala ke tou faitotonu ia mata ʼo Sehova logo la totatou ʼuhiga heʼe haohaoa?

⁶ Tatau aipe pe ʼe ko tatou ko he kau fakanofo peʼe ko “ ʼihi atu ovi,” kaʼe ’e fakamolemole mai e Sehova ʼatatou agahala mo kapau ʼe tou tui ki te totogi. ʼE ina tali ia natou fuli ʼae ʼe natou foaki tonatou maʼuli kia te ia ko hana kau atolasio. Ia mata ʼo Sehova, kua faitotonu ia te kau Kilisitiano fakanofo ʼi tonatou ʼuhiga foha ʼo te ʼAtua. ʼO toe feia pe mo “ ʼihi atu ovi,” kua natou faitotonu ʼi tonatou ʼuhiga kaumeʼa ʼo te ʼAtua. (Soane 10:16; Loma 5:1, 2; Sakopo 2:21-25) Koia maʼia pe la ʼi te temi nei, ʼaki ia te totogi, ʼe feala ke tou maʼu he ʼu felogoʼi lelei mo tatatou Tamai pea ke tou fakatapuha ia tona huafa.

7. Kotea te ʼu tapuakina ʼae ʼe tou maʼu ʼaki te totogi?

⁷ ʼI tana faikole ko tamatou Tamai ʼae ʼe ʼi selo, neʼe ui fenei e Sesu: “Ke hoko mai tou Puleʼaga.” Kotea te pikipikiga ʼo te totogi mo te Puleʼaga ʼo te ʼAtua? Ko te Puleʼaga ʼo te ʼAtua, ʼe faʼufaʼu ʼaki ia Sesu mo te toko 144 000 ʼae neʼe filifili mai te kele. ʼAki te totogi, ʼe feala ke fakatuʼuake te hahaʼi ʼaia ki te lagi. (Fakaha 5:9, 10; 14:1) ʼE natou liliu anai ko he ʼu hau mo pelepitelo pea ʼe natou puleʼi fakatahi anai mo Sesu ia te kele ia taʼu ʼe afe. ʼAki te  totogi, lolotoga taʼu ʼe afe, ʼe toe fakaliliu anai e Sehova ia te kele ko he palatiso pea ʼe tokoni anai ki te hahaʼi fuli ke natou liliu ʼo haohaoa. Hili te ʼu aluʼaga ʼaia, ko te ʼu kaugana ʼa Sehova ʼi te lagi pea mo te kele, ʼe liliu anai ko he foʼi famili pe ʼe tahi. (Fakaha 5:13; 20:6) Pea ʼe pulihi anai e Sesu ia Satana mo te ʼu fihifihia fuli ʼae neʼe ina fakatupu.—Senesi 3:15.

8. (1) Neʼe tokoni feafeaʼi ia Sesu ki ʼana tisipulo ke natou mahino ki te maʼuhiga ʼo te Puleʼaga ʼo te ʼAtua? (2) ʼE feafeaʼi hatatou lagolago ki te Puleʼaga ia ʼaho nei?

⁸ Neʼe tokoni ia Sesu ki ʼana tisipulo ke natou mahino ki te maʼuhiga ʼo te Puleʼaga ʼo te ʼAtua. ʼO feafeaʼi? ʼI te hili ʼo tona papitema, neʼe kamata fakamafola atu aipe e Sesu ia “te logo lelei ʼo te Puleʼaga ʼo te ʼAtua” ʼi te ʼu potu fuli pe neʼe alu ki ai. (Luka 4:43) Neʼe ina toe ui foki ki ʼana tisipulo ke natou fakamoʼoni ʼo ʼuhiga mo ia “ ʼo kaku ki te ʼu potu taupotu ʼo te kele.” (Gaue 1:6-8) Ia ʼaho nei, ʼe feala ke iloʼi e te hahaʼi pe ʼe kotea ia te totogi ʼaki te gaue faifakamafola ʼo te Puleʼaga. ʼE toe feala foki ke natou liliu ko he hahaʼi fakalogo ʼo te Puleʼaga ʼo te ʼAtua. ʼE tou fakaha ko tatou ko he hahaʼi fakalogo mo agatonu ʼo te Puleʼaga, ʼaki tatatou lagolago ki te kau fakanofo ʼo tou fakamafola te logo lelei ʼi te malamanei katoa.—Mateo 24:14; 25:40.

9. He koʼe ʼe tou tui papau ʼe fakahoko moʼoni anai e Sehova ia tana fakatuʼutuʼu maʼa te tagata?

⁹ Kotea te fakaʼuhiga ʼo te ʼu palalau ʼaeni ʼa Sesu: “Ke fai tou finegalo”? Ka talanoa ia Sehova ki he meʼa pea ʼe hoko moʼoni anai. (Esaia 55:11) Neʼe mole feala ke taʼofi e Satana ia te fakatuʼutuʼu ʼa Sehova ʼaki tana agatuʼu. Neʼe kotea koa te fakatuʼutuʼu ʼa Sehova ʼo ʼuhiga mo te kele? Neʼe loto ke fakafonu te kele ʼaki he ʼu fanau haohaoa ʼa Atama mo Eva. (Senesi 1:28) Kaʼe, ka na pau la neʼe mamate ia Atama mo Eva kaʼe neʼe mole maʼu hanā fanau, neʼe mole hoko te fakatuʼutuʼu ʼaia ʼa te ʼAtua. Koia ʼae neʼe fakagafua ai e Sehova ke maʼu hanā fanau. Pea ʼaki te totogi, ʼe feala ki te hahaʼi fuli ʼae ʼe tui ke natou liliu ʼo haohaoa pea mo maʼuʼuli ki te heʼe gata. ʼE ʼofa ia Sehova ki te hahaʼi pea ʼe loto ke tou maʼu te maʼuli taulekaleka ʼae kua ina fakatuʼutuʼu maʼa tatou.

10. ʼE fua lelei feafeaʼi ia te totogi ki te kau mate?

¹⁰ ʼE feafeaʼi ki te toko lauʼi miliale hahaʼi ʼae kua mamate kaʼe neʼe heʼeki natou iloʼi ia Sehova? ʼE loto e Sehova ke maʼuʼuli te hahaʼi fuli. Koia ʼe ʼi ai te fakatuʼuake anai ʼo natou ʼae kua mamate. Ko tonatou fakatuʼuake ʼe feala ʼuhi ko te totogi. Pea ʼe feala anai ke natou ako pe ʼe ko ai ia Sehova mo maʼuʼuli ʼo talu ai. (Gaue 24:15) Ko Sehova ʼe ko te Matapuna ʼo te maʼuli. Koia ʼe liliu anai ia Sehova ko te Tamai ʼo natou ʼae ka ina fakatuʼuake. (Pesalemo 36:10) ʼI tana faikole, neʼe ui e Sesu ko Sehova ko ‘tatatou Tamai ʼae ʼe ʼi selo.’ (Mateo 6:9) ʼE maʼuhiga te gaue ʼae neʼe foaki e Sehova kia Sesu ʼi te fakatuʼuake ʼo te kau mate. Neʼe ui fenei e Sesu: “Ko au te fakatuʼuake pea mo te maʼuli.”—Soane 6:40, 44; 11:25.

11. Kotea te finegalo ʼo te ʼAtua ʼo ʼuhiga mo te “toe hahaʼi tokolahi”?

¹¹ Neʼe toe ui fenei e Sesu: “Ko ʼae ʼe ina fai te finegalo ʼo te ʼAtua, ʼe ko ia ʼaia ko toku tehina, mo toku tuagaʼane pea mo taku faʼe.” (Maleko 3:35) ʼE ko te finegalo ʼo te ʼAtua ke liliu te hahaʼi ʼo te ʼu puleʼaga, mo te ʼu telepi pea mo te ʼu lea kehekehe ko hana kau atolasio. Ko “he toe hahaʼi tokolahi, neʼe mole feala ke lau e he tahi.” ʼE natou tui ki te totogi pea ʼe natou fia fakalogo ki te ʼAtua. Pea ʼe  natou vikiʼi fenei ia te ʼAtua: “ ʼE haʼu totatou haofaki mai totatou ʼAtua, ʼae ʼe heka ʼi te hekaʼaga fakahau, pea mai te Akeno.”—Fakaha 7:9, 10.

12. ʼI te faikole ʼa Sesu, kotea ʼe tou ako ai ʼo ʼuhiga mo te fakatuʼutuʼu ʼa Sehova maʼa te tagata?

¹² ʼAki te faikole ʼa Sesu, kua lahi te ʼu faʼahi kua tou iloʼi ʼo ʼuhiga mo Sehova pea mo tana fakatuʼutuʼu ki te tagata. ʼUluaki, ʼe tonu ke tou faiga malohi ʼo fakatapuha te huafa ʼo Sehova pea mo tou fakamaʼuhigaʼi ia ia. (Esaia 8:13) Pea ko te sakilifisio faitotogi ʼa Sesu ʼae ʼe feala ai totatou haofaki, ʼe ina toe fakamaʼuhigaʼi ia te huafa ʼo te ʼAtua. Ko te fakaʼuhiga ʼo te higoa ʼo Sesu “Ko Sehova ʼe Ina Haofaki.” Lua, ʼe fakaʼaogaʼi anai e Sehova ia tona Puleʼaga ke maʼu e te hahaʼi fakalogo ia te ʼu fua lelei ʼo te totogi. Pea tolu, ʼe tou tui papau ʼe mole he meʼa ʼe feala ke ina taʼofi te fakahoko e Sehova ia tona finegalo.—Pesalemo 135:6; Esaia 46:9, 10.

13. He koʼe ʼe tou papitema?

¹³ ʼE tou fakaha tatatou fakafetaʼi ki te totogi ʼo tou foaki totatou maʼuli kia Sehova pea mo papitema. Kapau ʼe tou fai feia, e tou fakaha ai ʼe tou tui ki te sakilifisio faitotogi pea kua “tou foaki ʼotatou maʼuli kia Sehova.” (Loma 14:8) Ka tou papitema, ʼe tou kole kia Sehova ke tou maʼu “he leʼo ʼo loto ʼe lelei.” (1 Petelo 3:21) Pea ko te ʼu fua lelei ʼo te totogi ʼe foaki mai anai e Sehova kia tatou. Koia ʼe tou tui papau ai ʼe tou maʼu anai ia meʼa fuli ʼae neʼe ina fakapapauʼi mai.—Loma 8:32.

14. He koʼe ʼe fakatotonu mai e Sehova ke tou ʼoʼofa ki ʼotatou tatau?

¹⁴ Ko meʼa fuli ʼae ʼe fai e Sehova, ʼe ina fai ʼaki tona ʼofa ia tatou. Pea ʼe loto ke faʼifaʼitakiʼi ia ia e tana hahaʼi pea ke natou feʼofaʼofani. (1 Soane 4:8-11) Ka tou ʼoʼofa ki te hahaʼi, ʼe tou fakaha ai ʼe tou fia liliu ko he ʼu “foha ʼo [tatatou] Tamai ʼae ʼe ʼi selo.” (Mateo 5:43-48) Pea koʼeni te ʼu fakatotonu lalahi ʼe lua: ʼuluaki, ke tou ʼoʼofa kia Sehova pea lua, ke tou ʼoʼofa ki ʼotatou tatau. (Mateo 22:37-40) ʼE tou fakaha totatou ʼofa ki te hahaʼi ʼaki tatatou akoʼi age ia te logo lelei ʼo te Puleʼaga ʼo te ʼAtua. Pea kapau ʼe tou fakalogo kia Sehova ʼo tou ʼoʼofa ki ʼotatou tatau tafito ʼotatou tehina, ʼe “katoa” anai totatou ʼofa ʼae kia te ia.—1 Soane 4:12, 20.

15. (1) Kotea te ʼu tapuakina ʼe tou maʼu ʼi te temi nei mai ia Sehova? (2) Kotea te ʼu tapuakina ʼae ka tou maʼu anai ʼi te ka haʼu?

¹⁵ ʼE fakapapauʼi mai e Sehova ʼe ina “molehi” anai ʼatatou agahala, koteʼuhi ʼe tou falala ki te totogi. Pea ʼe feala ke ina fakamolemole ʼo talu ai. (Lau ia Gaue 3:19-21.) Ohage pe ko tatatou talanoa ki ai ʼi te kamata, ʼaki ia te totogi, ʼe feala kia Sehova ke ina vaheʼi ʼihi hahaʼi ke natou liliu ko ʼona foha ʼi te lagi. Ko natou ʼaia, ko te kau fakanofo. (Loma 8:15-17) Pea ʼe fakaafe e Sehova ia natou ʼae ko “ ʼihi atu ovi” ke natou kau ki tona famili ʼi te kele. Hili tanatou liliu ʼo haohaoa, ʼe ʼahiʼahiʼi fakaʼosi anai natou. Pea kapau ʼe natou nonofo agatonu kia Sehova, ʼe ina toe vaheʼi anai mo natou ko ʼana fanau. (Loma 8:20, 21; Fakaha 20:7-9) Ko Sehova ʼe ʼofa tuʼumaʼu anai ki ʼana fanau fuli. Pea ʼe toe hoko atu pe anai te ʼu tapuakina ʼaki ia te totogi ʼo heʼe gata. (Hepeleo 9:12) Neʼe foaki e Sehova ia te meʼa ʼofa ʼaia kia tatou, pea ʼe mole feala ki he tahi ke ina toe toʼo kehe mai ia tatou.

16. ʼE tokoni feafeaʼi mai ia te totogi ke tou ʼateaina?

¹⁶ Kapau ʼe tou fakahemala ki ʼatatou agahala, pea ʼe mole feala te ʼu faiga ʼa te Tevolo ke taʼofi ai tatatou kau ki te famili ʼo Sehova. Ko Sesu neʼe mate “tuʼa tahi ʼo talu ai.” Koia neʼe ina foaki ia te totogi ke heʼe gata. (Hepeleo 9:24-26) Neʼe tou mamate ʼaki ia Atama, kaʼe ʼaki te sakilifisio ʼa Sesu ʼe tou maʼuʼuli anai ʼo talu ai. ʼE fakaʼateainaʼi tatou e te totogi mai te malama ʼa Satana pea mo te mataku ki te mate.—Hepeleo 2:14, 15.

17. Kotea te fakaʼuhiga ʼo te ʼofa ʼo Sehova kia koe?

¹⁷ ʼE fakahoko tuʼumaʼu e te ʼAtua ʼana fakapapau. Ohage pe ko te ʼu lao ʼae neʼe ina fai ki te natula, ʼe mole fetogi anai ʼi he ʼaho, ʼo toe feia pe ʼe mole fetogi ia Sehova ʼi he temi. Pea ʼe mole ina fakalotomamahiʼi tatou ʼi he temi. (Malakia 3:6) ʼE mole gata ʼaki pe ia tana foaki mai ia te maʼuli, kaʼe ʼe ina toe foaki mai foki mo tona ʼofa. “Kua tou iloʼi pea mo tui ʼe ʼofa te ʼAtua ia tatou.” (1 Soane 4:16) ʼE ina fakahoko tuʼumaʼu ʼana fakapapau. Kua vave liliu pe ia te kele ko he palatiso taulekaleka. ʼE faʼifaʼitakiʼi anai e te hahaʼi maʼuʼuli fuli ia Sehova pea ʼe natou feʼofaʼofani anai. Pea ko ʼana kaugana fuli ʼi te lagi mo te kele ʼe natou ui fakatahi fenei anai: “Ke maʼu e totatou ʼAtua te fakavikiviki, mo te kololia, mo te poto, mo te fakafetaʼi, mo te fakaʼapaʼapa, mo te mafimafi pea mo te malohi ʼo talu ai. Ameni.”—Fakaha 7:12.