1-2. Kotea te ako neʼe taʼofi e he tagata ʼafeā ki te faʼahiga foaki ʼo he ʼu tokoni?

 KUA hili ki ai te ʼu taʼu, neʼe ʼaʼahi e te ʼu tagata ʼafeā ʼe toko lua ia he tuagaʼane kua fuafualoa tana puli ʼi te ʼu fono. Neʼe lau age e te tagata ʼafeā ʼae neʼe ina takitaki ia te ʼaʼahi ia he ʼu tuʼuga vaega ʼe ha ai te maʼuhiga ʼae ke kau ki te ʼu fono. Ki tana manatu, neʼe lelei ʼosi ia te fai ʼo te ʼaʼahi. Kae ʼi te muʼa ʼo tanā mavae, neʼe ui fenei age e te tuagaʼane: “ ʼE mole kolua mahino pe la pe kotea ʼae ʼe au lolotoga tau mo ia.” Neʼe foaki age e te ʼu tehina ia he ʼu tokoni kae neʼe mole nā fakalavelave age ki te tuagaʼane pe ʼe lelei pe. Koia, neʼe mole ko he tokoni ki te tuagaʼane.

² ʼI te manatuʼi e te tagata ʼafeā ʼae neʼe ina takitaki ia te ʼaʼahi ʼaia, neʼe ina ui fenei: “ ʼI te temi ʼaia, neʼe au manatu, neʼe mole fakaʼapaʼapa ia te tuagaʼane kia maua. Kae ʼi taku fakakaukauʼi te meʼa ʼae neʼe hoko, neʼe au teuteuʼi pe au he ʼu vaega kae neʼe mole hake ʼi taku manatu ke au fai te ʼu fehuʼi ʼae ʼe ʼaoga. Ke au fehuʼi fenei age: “ ʼE feafeaʼi ʼe ke lelei pe? ʼE ʼi ai la he tokoni ʼe feala ke ma foaki atu?” Neʼe taʼofi e te tagata ʼafeā ʼaia he ako maʼuhiga mai te ʼaʼahi ʼaia. ʼI te temi nei, ʼe ko he tagata ʼafeā faʼafai pea mo lotomahino.

3. Ko ai ʼi te kokelekasio ʼe feala ke ina foaki he ʼu tokoni?

 ³ ʼI tanatou gaue fakatauhi ovi, ʼe ko te maʼua ʼo te kau tagata ʼafeā ke natou foaki he ʼu tokoni moka ʼe ʼaoga. Kae ʼe feala ki ʼihi ʼi te kokelekasio ke natou foaki he ʼu tokoni. Ohage la, ʼe feala pe ki he tehina peʼe ko he tuagaʼane ke ina foaki he tokoni Fakatohi-tapu ki hona kaumeʼa. (Pes. 141:5; Taʼag. 25:12) Peʼe ko he tuagaʼane kua matuʼa, ʼe feala ke ina foaki he ʼu ‘tokoni ki he ʼu tuagaʼane kei finemuiʼ ʼo ʼuhiga mo  te ʼu aluʼaga ʼae ʼe tuʼu ia Tito 2:3-5. Pea ʼe feala ki te ʼu matuʼā ke natou foaki he ʼu tokoni ki ʼanatou fanau pea mo fakatonutonuʼi tanatou aga. Koia, logo la ʼe fakahagahaga tafito te alatike ʼaeni ki te kau tagata ʼafeā, kae ʼe lelei ke tou tahi vakavakaʼi ia tatou takitokotahi ʼo ʼuhiga mo te faʼahiga foaki ʼo he ʼu tokoni ʼe lelei, mo fakalotomalohi pea mo ina ‘fakafiafia te loto.ʼ​—Taʼag. 27:9.

4. Kotea ʼae ka tou vakaʼi ʼi te alatike ʼaeni?

⁴ ʼI te alatike ʼaeni, ʼe tou tali anai kia fehuʼi ʼe fa ʼe ʼi ai tona pikipikiga mo te ʼu tokoni: (1) Kotea ʼae ʼe tonu ke ina uga koe ke ke foaki he tokoni? (2) ʼE ʼaoga koa ke foaki ia te tokoni ʼaia? (3) Ko ai ʼae ʼe tuha ke ina foaki ia te tokoni ʼaia? (4) Kotea ʼae ʼe tonu ke ke fai ke fua lelei ia te tokoni ʼaia?

5. Ka tou lau 1 Kolonito 13:4, 7, kotea ʼae ʼe feala ke tokoni ki he tagata ʼafeā ke ina foaki he ʼu tokoni ʼe fakatupu fia logo?

⁵ ʼE ʼofa ia te tagata ʼafeā ki te ʼu tehina mo tuagaʼane. Pea ʼi ʼihi temi, ʼe ina fakaha tona ʼofa ʼaki tana foaki ia he tokoni ki he Kilisitiano ʼe ina fai he aga ʼe kovi. (Kal. 6:1) Koia, ʼi muʼa ʼo tana palalau ki te Kilisitiano ʼaia, ʼe ina fakakaukauʼi lelei ʼihi koga ʼo te ʼofa ʼae neʼe talanoa ki ai ia te apostiolo ko Paulo. “Ko he tahi ʼe ʼofa, ʼe kataki fualoa pea mo agalelei. . . . ʼE ina utakiʼi ia meʼa fuli, ʼe tui ia kia meʼa fuli, ʼe falala kia meʼa fuli pea ʼe ina katakiʼi ia meʼa fuli.” (Lau ia 1 Kolonito 13:4, 7.) Ko te metitasio ki te ʼu vaega ʼaeni, ʼe tokoni anai ki he tagata ʼafeā ke ina vakavakaʼi te ʼu tupuʼaga ʼo tana fia foaki he tokoni pea mo palalau ki te tehina peʼe ko te tuagaʼane ʼaki he faʼahiga manatu ʼe lelei. Kapau ʼe logoʼi e te Kilisitiano ʼaia ia te ʼofa ʼo te tagata ʼafeā, ʼe mahino ʼe faigafua anai tana tali ia tana tokoni.​—Loma 12:10.

6. Kotea te faʼifaʼitaki neʼe tuku mai e te apositolo ko Paulo?

⁶ Ko te apositolo ko Paulo ʼe ko he faʼifaʼitaki lelei ki te kau tagata ʼafeā. ʼI te temi ʼae neʼe ʼaoga ai he tokoni ki te ʼu tehina ʼi Tesalonika, neʼe lotolelei ʼo foaki he ʼu tokoni. Koia, ʼi tana ʼu tohi, neʼe ina foaki muʼa he ʼu fakamalo kia natou ʼi tanatou fakaha ia tanatou tui ʼaki he ʼu gaue, mo tanatou fakahoko he ʼu faiga ʼuhi ko tonatou ʼofa pea mo tanatou faʼa kataki. ʼI tana tokagaʼi tonatou aluʼaga, neʼe ina toe tokagaʼi ʼaki he lotoʼofa neʼe mole faigafua tonatou maʼuli pea neʼe natou tali ʼaki he faʼa kataki ia te fakataga. (1 Tes. 1:3; 2 Tes. 1:4) Neʼe ina ui ʼo ʼuhiga mo natou ko he ʼu faʼifaʼitaki ki ʼihi Kilisitiano. (1 Tes. 1:8, 9) Neʼe lagi malave loto te ʼu fakamalo ʼaia. ʼE ha mai ʼi heni, neʼe ʼofa mamahi ia Paulo ʼi ʼona tehina. Ko te tupuʼaga la ʼaia, ʼi tana ʼu tohi ʼe lua ki te kau Tesalonika, neʼe ina foaki he ʼu tokoni neʼe fua lelei ki muli age.​—1 Tes. 4:1, 3-5, 11; 2 Tes. 3:11, 12.

7. Kotea ʼae ʼe feala ke tupu ai he tali koviʼi ʼo he tokoni?

⁷ Kotea ʼe feala ke hoko moka ʼe mole lelei te faʼahiga foaki ʼo he tokoni? Neʼe tokagaʼi fenei e te tehina kua fualoa tana tagata ʼafeā: “Ko ʼihi ʼe natou tali koviʼi he tokoni, mole ʼuhi ko te tokoni ʼae ʼe foaki age, kae ʼuhi neʼe mole foaki ʼaki te ʼofa.” Kotea te ako ʼe tou taʼofi mai ai? ʼE faigafua ia te tali ʼo he tokoni ʼe foaki ʼaki ia te ʼofa kae mole ʼaki te ita.

8. Kotea te ʼu fehuʼi ʼe tonu ke fai e he tagata ʼafeā ʼi muʼa ʼo tana toʼo he tonu pe ʼe ina foaki he tokoni peʼe kailoa?

⁸ ʼE mole tonu ke foaki fakavilivili e he tagata ʼafeā ia he tokoni. ʼE tonu ke ina fai  te ʼu fehuʼi ʼaeni: ‘ ʼE ʼaoga koa ke au palalau ki ai? ʼE au iloʼi papau koa neʼe fai e te Kilisitiano ʼaia he aga ʼe kovi? Neʼe talagataʼa koa ki he fakatotonu Fakatohi-tapu? Peʼe feia pe ʼe mole tatau ʼatatou manatu?ʼ ʼE tokoni anai te poto ki te kau tagata ʼafeā ke ʼaua naʼa vave fau ʼanatou palalau. (Taʼag. 29:20) Kapau ʼe lotolotolua, ʼe feala ke kole tokoni he tagata ʼafeā ki he tahi age tagata ʼafeā, ke feala ʼaki te ʼu pelesepeto Fakatohi-tapu ke ina iloʼi pe ʼe tonu ke ina foaki he tokoni.​—2 Tim. 3:16, 17.

9. Ka tou lau ia 1 Timoteo 2:9, 10, kotea te ako ʼe tou taʼofi mai ia Paulo ʼo ʼuhiga mo te faʼahiga foaki ʼo he tokoni ki te faʼahiga faiteuteu?

⁹ Kotou fakakaukauʼi age ʼe hoha he tagata ʼafeā ʼo ʼuhiga mo te faʼahiga teuteu ʼa he Kilisitiano. ʼE tonu anai ke ina fai te fehuʼi ʼaeni: ‘ ʼE ʼi ai koa he tupuʼaga Fakatohi-tapu ke kita palalau ai?ʼ ʼI tana loto ʼae ke fua lelei tana tokoni, ʼe feala ke ina kumi te manatu ʼa he tahi tagata ʼafeā peʼe ko he tehina kua fakapotopoto. Koia, ʼe feala ai ke nā vakaʼi fakatahi te ʼu tokoni neʼe foaki e te apositolo ko Paulo ʼo ʼuhiga mo te faʼahiga teuteu. (Lau ia 1 Timoteo 2:9, 10.) Neʼe palalau pe ia Paulo ki te ʼu koga tafito: ʼE tonu ki he Kilisitiano ke teu fakaʼapaʼapa, mo fakapoipoi pea mo fakapotopoto. ʼE mole ina tuku mai he lisi ʼo te ʼu teu ʼae ʼe feala ke kita tui mo ʼae ʼe mole tonu ke kita tui. ʼE ina tuku ki te tagata takitahi ke ina filifili ʼona teu ʼo mulimuli ki te ʼu tuʼakoi ʼe tuku mai ʼi te Tohi-Tapu. Koia, ke tou iloʼi pe ʼe ʼaoga ke foaki he tokoni, ʼe fai anai e te kau tagata ʼafeā te fehuʼi ʼae pe ʼe ha koa ʼi te faʼahiga teuteu ʼo ia ʼae ʼe ʼamanaki tokoniʼi ʼe fakapoipoi pea mo fakapotopoto.

10. Kotea ʼae ʼe tonu ke tou manatuʼi ʼo ʼuhiga mo te ʼu tonu ʼe toʼo e ʼihi Kilisitiano

¹⁰ Kotou manatuʼi, ʼe feala pe ki he ʼu Kilisitiano fakapotopoto ʼe toko lua ke kehekehe te meʼa ʼae ʼe nā filifili, kae ʼe lelei lualua. ʼAua naʼa tou fakamalohiʼi ʼotatou tehina mo tuagaʼane ke natou manatu tahi mo tatou ki te meʼa ʼae ʼe lelei mo ʼae ʼe kovi.​—Loma 14:10.

11-12. Kapau ʼe tonu ke foaki he tokoni, kotea te ʼu fehuʼi ʼe tonu ke fai e he tagata ʼafeā? Pea kotea tona tupuʼaga?

¹¹ ʼI te temi leva ʼae ʼe iloʼi ai ʼe tonu ke foaki he tokoni, ʼe tonu ke tou fehuʼi: Pe ʼe ko ai ʼae ʼe tuha ke ina foaki ia te tokoni ʼaia? Peʼe ko te tokoni ʼe fai ki he tuagaʼane kua ʼohoana peʼe ki he tahi he ʼe taʼu 18, ʼe lagi lelei anai ke palalau ia he tagata ʼafeā ki te pule famili, ke ina foaki te tokoni. * Peʼe ina fakaha age ki te tagata ʼafeā ʼe fia kau ki te ʼaʼahi moka ina foaki ia te tokoni. Pea,  ohage ko tona fakaha ʼi te  palakalafe 3, ʼe lelei anai ke foaki e he tuagaʼane kua fakapotopoto ia he tokoni ki he tuagaʼane kei finemui.

¹² ʼE tonu anai ke fai e he tagata ʼafeā ia te fehuʼi ʼaeni: ‘ ʼE tuha koa mo au ke au foaki te tokoni ʼaia peʼe tali leleiʼi anai ia mo kapau ʼe foaki e he tahi age?ʼ Ohage la, ʼe malave anai ki he tehina ia te tokoni ʼe foaki age e he tagata ʼafeā neʼe kua hoko ki ai te aluʼaga ʼaia. ʼE mahino ia, ʼe lagi lotomahino anai te tagata ʼafeā ʼaia pea ʼe faigafua anai ia te tali ʼo tana ʼu tokoni. Koia, ʼe ko te maʼua ʼo te kau tagata fuli ko te fakalotomalohiʼi ʼo te ʼu tehina mo tuagaʼane ke natou fai te ʼu fetogi ʼae ʼe tuku mai ʼi te Tohi-Tapu. Kae kapau ʼe tonu ke foaki he tokoni, ko te maʼuhiga, ke foaki ia te tokoni ʼaia.

13-14. He koʼe ʼe maʼuhiga ke poto ia he tagata ʼafeā ʼi te fagono?

¹³ Ke ke lotolelei ʼo fagono. ʼI te temi ʼae ʼe teuteu ai he tagata ʼafeā ke ina foaki he tokoni, ʼe tonu ke ina fai te ʼu fehuʼi ʼaeni: ‘Kotea ʼae ʼe au iloʼi ʼo ʼuhiga mo tona aluʼaga? Kotea ʼae ʼe hoko ʼi tona maʼuli? ʼE tau koa mo he ʼu fihifihia ʼe mole au mahino ki ai? Kotea ʼae ʼe ʼaoga tafito ki ai ʼi te temi nei?ʼ

¹⁴ Ko ʼae ʼe ina foaki he tokoni ʼe tonu ke mulimuli ki te pelesepeto ʼae ʼe tuʼu ia Sakopo 1:19. ʼE tou lau fenei ai: “ ʼE tonu ki te tagata fuli ke lotolelei ʼo fagono, ke tuai ʼi te palalau, mo tuai ʼi te ita.” ʼE feala pe ke manatu he tagata ʼafeā ʼe ina maʼu te ʼu fakamoʼoni fuli. Kae ʼe moʼoni koa te faʼahi ʼaia? ʼE fakamanatu mai ia Taʼaga Lea 18:13: “Ka palalau he tahi ki he aluʼaga kae mole fakalogo muʼa, ko he agavale mo fakaufiufi.” ʼE lelei ke kita fakalavelave tonu kia ia ʼae ka tokoniʼi. Ko tona fakaʼuhiga, ʼe tonu ke kita fagono ʼi muʼa ʼo takita palalau. Manatuʼi te ako neʼe taʼofi e te tagata ʼafeā ʼae neʼe tou palalau ki ai ʼi te kamata. Neʼe ina fakaha age ʼana fekumi, kae mole ina fai age te ʼu fehuʼi ʼaeni: “ ʼE feafeaʼi ʼe ke lelei pe?” “ ʼE ʼi ai la he tokoni ʼe feala ke ma foaki atu?” Ko te tagata ʼafeā ʼae ʼe fekumi lelei, ʼe feala ke ina foaki he tokoni ʼe lelei pea mo fakalotomalohiʼi te ʼu tehina mo tuagaʼane.

15. ʼE lava mulimuli feafeaʼi ia he tagata ʼafeā ki te pelesepeto ia Taʼaga Lea 27:23?

¹⁵ Ke ke liliu ko he tauhi ovi ʼe tokaga lelei ki te fagaovi. Ohage ko tona fakaha ʼi te kamata, ko te foaki ʼo he tokoni ʼe lelei, ʼe mole ko te lau pe ʼo he ʼu vaega pea mo fakaha age he manatu ʼe tahi peʼe lua. ʼE tonu ke logoʼi e te ʼu tehina mo tuagaʼane ʼe tou ʼoʼofa ia natou, ʼe tou mahino ki tonatou aluʼaga pea mo tou fia tokoni kia natou. (Lau ia Taʼaga Lea 27:23.) ʼE tonu ke fai e he tagata ʼafeā ia meʼa fuli ke felogoi lelei mo te ʼu tehina mo tuagaʼane.

16. Kotea ʼae ka tokoni anai ki he tagata ʼafeā ke ina foaki he ʼu tokoni ʼe faigafua anai tona tali?

¹⁶ ʼE mahino ia, ʼe mole fia liliu ia he  tagata ʼafeā ko he masini faitokoni, ke hoki palalau pe ki te ʼu tehina mo tuagaʼane moka tonu ke fakatonutonuʼi he aluʼaga. Kailoa, ʼe faipalalau tuʼumaʼu mo natou, pea ka natou tau mo he ʼu faigataʼaʼia, ʼe tokaga fakalelei kia natou. Neʼe fakatokagaʼi fenei e te tagata ʼafeā: “ ʼI tatatou fai te faʼahi ʼaia, ʼe tou maʼu ai he ʼu felogoi ʼe lelei. Pea ʼi te ʼaho ʼae ʼe kita foaki ai he tokoni, ʼe faigafua.” Kae kia ia ʼae ʼe foaki ki ai te tokoni, ʼe ina tali leleiʼi.

17. Ko te aluʼaga fea ʼe tonu ai ki he tagata ʼafeā ke kataki fualoa mo agalelei?

¹⁷ Ke ke kataki fualoa mo agalelei. ʼE tonu ke tou kataki fualoa mo agalelei moka mole tali leleiʼi he tokoni pea mole mulimuli ki ai. ʼI te aluʼaga ʼaia, ʼe mole tonu ki te tagata ʼafeā ke ita. Neʼe fakakikite fenei ʼi te Tohi-Tapu ʼo ʼuhiga mo Sesu: “ ʼE mole ina moloki anai te kaho ʼae kua mapelu, pea ʼe mole ina matehi anai te vavae malama ʼae ʼe mu veliveli.” (Mat. 12:20) ʼI tana ʼu faikole, ʼe feala ke kole e he tagata ʼafeā kia Sehova ke ina tapuakiʼi ia te Kilisitiano ʼaia, ke mahino ki te tupuʼaga ʼo te foaki age ʼo te tokoni pea mo ina maʼuliʼi. ʼE lagi anai ki te Kilisitiano ʼaia he temi ke ina fakakaukauʼi te tokoni ʼae neʼe foaki age. Kapau ʼe fakaha e te tagata ʼafeā ki ai te faʼa kataki pea mo te agalelei, ʼe mole ina taʼofi anai ia te faʼahiga foaki age ʼo te tokoni, kae ina tokagaʼi tona ʼaoga. ʼE fakatafito tuʼumaʼu anai he tokoni ki te Folafola ʼa te ʼAtua.

18. (1) Kotea ʼae ʼe tonu ke tou manatuʼi? (2) Kotea ʼae ʼe feala ke fai e te ʼu matuʼa?

¹⁸ Toʼo he ʼu ako mai te ʼu faʼahi neʼe ke totō ai. ʼUhi ʼae ʼe tou heʼe haohaoa, ʼe mole feala ke tou mulimuli agatonu ki te ʼu tokoni ʼe foaki mai ʼi te alatike ʼaeni. (Sakp. 3:2) ʼE feala ke tou faihala. Koia, tou taʼofi he ʼu ako mai ai. Pea tahi, kapau ʼe logoʼi e te ʼu tehina mo tuagaʼane ʼe tou ʼoʼofa ia natou, ʼe faigafua anai hanatou fakamolemole ki hatatou palalau peʼe ki he aga neʼe tou fai ʼo natou mamahi ai.​—Vakaʼi mo te ʼa takai “ He Tokoni Ki Te ʼu Matuʼā.”

19. ʼE tou lava ‘fakafiafiaʼi feafeaʼi te lotoʼ ʼo te ʼu tehina mo tuagaʼane?

¹⁹ Neʼe tou vakaʼi, ʼe mole faigafua ia he foaki ʼo he tokoni ʼe tali lelei ki muli age. ʼE tou heʼe haohaoa pea ʼe toe feia mo natou ʼae ʼe tou foaki ki ai te tokoni. Koia, manatuʼi te ʼu tokoni ʼae neʼe tou vakaʼi ʼi te alatike ʼaeni. Ka ke foaki he tokoni, tokaga ke ke fai ʼaki he ʼu manatu ʼe lelei. Fai te fehuʼi ʼae pe ʼe ʼaoga koa ia te tokoni pea ʼe tuha koa mo koe ke ke foaki ia te tokoni ʼaia. ʼI muʼa ʼo hau tokoniʼi he tahi, fai age he ʼu fehuʼi pea mo ke fakalogo fakalelei ke ke iloʼi pe kotea ʼae ʼe tau mo ia. Faiga ke ke mahino ki tana faʼahiga manatu. Ke ke agamalu pea mo ke fakakaumeʼa mo te ʼu tehina mo tuagaʼane. Manatuʼi ko te fakatuʼutuʼu ʼo te tokoni ke ina ‘fakafiafiaʼi tona lotoʼ kae ke mole fai pe ke ui neʼe fai.​—Taʼag. 27:9.