1. Kotea ʼae ʼe feala ke fai e Sehova moʼo fakahoko ia tana fakatuʼutuʼu?

KO SEHOVA ʼe feala ke liliu ko meʼa fuli pe ʼe loto ki ai moʼo fakahoko ia tana fakatuʼutuʼu. Ohage la, neʼe liliu ko he Tagata Faiako, mo he Tagata Fakalotofimalie pea mo he Tagata Faifakamafola. Pea ʼe kei toe age la ʼihi tuʼulaga ʼa Sehova. (Esa. 48:17; 2 Ko. 7:6; Kal. 3:8) Kae ʼe ina tau fakaʼaogaʼi he hahaʼi moʼo fakahoko ʼana fakatuʼutuʼu. (Mat. 24:14; 28:19, 20; 2 Ko. 1:3, 4) ʼE toe feala kia Sehova ke ina foaki mai kia tatou takitokotahi ia te poto pea mo te malohi, ke tou liliu ko meʼa fuli ʼe loto ki ai moʼo fakahoko ia tona finegalo. Ko te ʼu faʼahi fuli ʼaia ʼe kau ki te fakaʼuhiga ʼo tona huafa. Pea ʼe alu tahi te fakaʼuhiga ʼaia mo te manatu ʼa ʼihi ʼi te kau sivi Tohi-Tapu.

2. (1) He koʼe ʼe feala ʼi ʼihi temi ke tou ui ʼe mole fakaʼaogaʼi tatou e Sehova? (2) Kotea anai ka tou vakaʼi ʼi te alatike ʼaeni?

² ʼE tou loto fuli ke fakaʼaogaʼi tatou e Sehova moʼo fakahoko tona finegalo. Kae ʼe feala pe ki ʼihi ke natou ui ʼe mole fakaʼaogaʼi natou e Sehova. ʼE lagi natou manatu feia he ʼe kua natou vaivai matuʼa, peʼe ko te ʼu aluʼaga ʼae ʼe hoko ʼi ʼonatou maʼuli peʼe mole kei natou fealagia. Kae ko ʼihi, ʼe lagi kua feʼauga pe tanatou gaue ʼae maʼa Sehova. Koia ʼae ʼe natou manatu ai ʼe mole ʼaoga ke toe lahi age ʼanatou gaue. ʼI te alatike ʼaeni, ʼe tou vakaʼi anai pe ʼe foaki feafeaʼi mai e Sehova kia tatou takitokotahi ia meʼa fuli ʼe ʼaoga moʼo fakahoko ia tana fakatuʼutuʼu. Pea ʼe tou vakaʼi anai he ʼu fakamatala Fakatohi-tapu ʼo he hahaʼi tagata mo fafine neʼe tauhi kia Sehova. Neʼe foaki e Sehova ki ʼana kaugana ʼaia ia te fakaʼamu pea mo te malohi moʼo fakahoko ia meʼa fuli ʼae ʼe ina leleiʼia. Hili ia, pea ʼe tou toe vakaʼi anai pe ʼe feafeaʼi hatatou tuku ke fakaʼaogaʼi tatou e Sehova.

3. ʼE feala ke tokoni feafeaʼi mai ia Sehova ke tou fakaʼamu ʼo fai tona finegalo ohage ko tana fakapapauʼi mai ia Filipe 2:13?

³ Lau ia Filipe 2:13. * ʼE feala ke foaki mai e Sehova ia te fakaʼamu moʼo fai tona finegalo. ʼO feafeaʼi? Ohage la, ʼe lagi tou iloʼi ʼe ʼaoga ki he tahi ʼi totatou kokelekasio he tokoni. Peʼe feala ke lau e te kau tagata ʼafeā he tohi mai te Petele ʼe fakaha ai, ʼe ʼaoga he tokoni ki ʼihi kokelekasio. ʼE feala ai leva ke tou fai te ʼu fehuʼi ʼaeni: ‘ ʼE au lava tokoni feafeaʼi?’ Pe neʼe tuku mai koa he gaue faigataʼa ke tou fai, kae ʼe tou tuʼania naʼa mole tou lavaʼi? Peʼe hili tatatou lau ni vaega Tohi-Tapu, ʼe lagi tou feʼekeʼaki fenei: ‘ ʼE feafeaʼi haku fakaʼaogaʼi te vaega ʼaeni moʼo tokoni ki niʼihi?’ ʼE mole fakakinauʼi anai tatou e Sehova ke tou fai he meʼa. Kae ʼe lelei ke tou vakavakaʼi te aluʼaga ʼo totatou maʼuli moʼo fakakaukauʼi te meʼa ʼae ʼe tou lavaʼi. Kapau ʼe tokagaʼi e Sehova ʼe tou lotolelei ʼo fai te faʼahi ʼaia, ʼe feala ke ina foaki mai kia tatou ia te fakaʼamu moʼo fai tona finegalo.

4. ʼE foaki feafeaʼi mai e Sehova ia te malohi moʼo fai ia tona finegalo?

⁴ ʼE toe feala pe foki ke foaki mai e Sehova kia tatou ia te malohi moʼo fai ia tona finegalo. (Esa. 40:29) ʼO feafeaʼi? ʼE feala ke ina foaki mai ia tona laumalie maʼoniʼoni ke toe lelei age ʼotatou fealagia. (Eke. 35:30-35) ʼE feala kia Sehova ke ina fakaʼaogaʼi ia tana kautahi moʼo akoʼi ʼo tatou ki te fai ʼo he ʼu gaue. Kapau ʼe mole ke iloʼi lelei te faʼahiga fakahoko ʼo he gaue, ʼe lelei ke ke kole tokoni. Pea tahi, ʼi te temi fuli pe ʼe feala ke ke kole ki tatatou Tamai lotofoaki ʼae ʼi selo ia “te malohi makehe.” (2 Ko. 4:7; Luka 11:13) ʼE lahi te ʼu faʼifaʼitaki ʼi te Tohi-Tapu ʼo he ʼu tagata mo fafine neʼe foaki kia natou e Sehova ia te fakaʼamu mo te malohi ke natou fai ia tona finegalo. ʼI tatatou vakaʼi ʼihi ʼi te ʼu faʼifaʼitaki ʼaia, fakakaukauʼi pe ʼe feala ke fakaʼaogaʼi feafeaʼi koe e Sehova ohage pe ko tana fai mo natou.

5. Kotea ʼae ʼe tou ako ʼo ʼuhiga mo te temi ʼae neʼe fakaʼaogaʼi ai e Sehova ia Moisese moʼo haofaki Tana hahaʼi?

⁵ Tou vakaʼi te faʼifaʼitaki ʼa Moisese. Neʼe tokoni ia Sehova kia Moisese ke liliu ko he tagata haofaki maʼa te kau Iselaele. Kae ko te temi fea ʼae neʼe ina fakaʼaogaʼi ai ia Moisese? Neʼe ko te temi koa ʼae neʼe manatu ai ia Moisese kua feala tana fakahoko te aluʼaga ʼaia hili tona “akoʼi age . . . ia te poto katoa ʼo te kau Esipito”? (Gaue 7:22-25) Kailoa ia. Neʼe hoki fakaʼaogaʼi e Sehova ia Moisese ʼi tana kua ʼosi tokoni ki ai ke liliu ko he tagata agavaivai mo agamalū. (Gaue 7:30, 34-36) Neʼe tokoni ia Sehova kia Moisese ke ina maʼu te lototoʼa moʼo palalau ki te tagata maʼuhiga ʼaupito ʼo Esipito. (Eke. 9:13-19) Kotea ʼae ʼe tou ako ʼo ʼuhiga mo te temi pea mo te faʼahiga fakaʼaogaʼi e Sehova ia Moisese? ʼE fakaʼaogaʼi e Sehova ia natou ʼae ʼe natou faigaʼi ke natou faʼifaʼitakiʼi ʼona kalitate. ʼO toe feia pe kia natou ʼae ʼe falala kia te ia ke natou maʼu ia te malohi.—Flp. 4:13.

6. Kotea ʼae ʼe tou ako mai te faʼahiga fakaʼaogaʼi e Sehova ia Palesilai moʼo tokoni ki te Hau ko Tavite?

⁶ ʼI ni lauʼi taʼu ʼe teau ki muli age, neʼe fakaʼaogaʼi e Sehova ia Palesilai moʼo tokoni ki te Hau ko Tavite ʼi tana hola mai tona foha ko Apesalone. Ko Tavite pea mo te hahaʼi neʼe ‘fia kakai, mo gaʼegagaʼe, pea mo fia iinu.’ Neʼe kua vaivai matuʼa ia Palesilai, kae neʼe ina tali ke tuʼutamakiʼia tona maʼuli pea mo ʼihi. Neʼe natou foaki kia Tavite pea mo natou ʼae neʼe ʼomai mo ia, ia te ʼu meʼa ʼae neʼe ʼaoga kia natou. Neʼe mole manatu ia Palesilai ʼe mole toe fakaʼaogaʼi anai ia ia e Sehova koteʼuhi kua vaivai matuʼa. Kae neʼe lotofoaki pea mo tokoni ki te ʼu kaugana ʼa Sehova ʼae neʼe faigataʼaʼia. (2 Sam. 17:27-29) Kotea te ako kia tatou? Tatau aipe pe ʼe tou taʼu fia, kae ʼe feala ke fakaʼaogaʼi tatou e Sehova moʼo tokoni ki ʼotatou tehina mo tuagaʼane. Ohage la, ko natou ʼae ʼe masisiva ʼe natou maʼuʼuli  ovi mai peʼe ʼi he tahi fenua. (Taag. 3:27, 28; 19:17) ʼE lagi mole feala ke tou tokoni fakahagatonu kia natou. Kae ʼe feala ke tou lagolago ki tatatou gaue fakamalamanei ʼo tou foaki he ʼu meʼa ʼofa. Kapau ʼe tou fai feia, ʼe ʼi ai anai he falā maʼa natou ʼae ʼe ʼaoga ki ai he tokoni, tatau aipe pe ʼe kofea ʼae ʼe natou maʼuʼuli ai.—2 Ko. 8:14, 15; 9:11.

7. Neʼe fakaʼaogaʼi feafeaʼi e Sehova ia Simeone? Pea he koʼe ʼe ko he fakalotomalohi kia tatou?

⁷ Neʼe fakapapauʼi e Sehova kia Simeone, ʼe mole mate anai kae heʼeki sio ki te Mesia. Ko Simeone, neʼe ko he tagata agatonu kua vaivai matuʼa pea neʼe maʼuli ʼi Selusalemi. Neʼe atalitali ia ia ki te Mesia lolotoga ni lauʼi taʼu. Koia ʼe mahino ia, neʼe ko he fakapapau fakalotomalohi ʼaia kia ia. Neʼe fakapale e Sehova ia Simeone ʼuhi ko tana tui pea mo tana faʼa kataki. ʼI te tahi ʼaho, “ ʼaki te malohi ʼo te laumalie,” neʼe alu ai ki te fale lotu. Neʼe sio ai ki te kiʼi toe meamea ko Sesu. Pea neʼe fakaʼaogaʼi ia ia e Sehova moʼo tala ia he lea fakapolofeta ʼo ʼuhiga mo te kiʼi toe ʼaia ʼae ka liliu ko te Kilisito. (Luka 2:25-35) Neʼe mate ia Simeone kae neʼe mole lagi sio ki te fakahoko e Sesu tana minisitelio ʼi te kele. Kae neʼe lotofakafetaʼi ki te pilivilesio ʼae neʼe ina maʼu mai ia Sehova. Pea ʼe kei toe age la te ʼu meʼa lelei ʼae ka ina maʼu ʼi te ka haʼu. ʼI te malama foʼou, ʼe sio anai te tagata agatonu ʼaia ki te tapuakinaʼi e Sesu te ʼu famili fuli ʼi te kele ʼaki tana takitaki. (Sen. 22:18) ʼE toe feia pe mo tatou, ʼe tou lotofakafetaʼi kia Sehova, tatau aipe pe ʼe feafeaʼi tana faʼahiga fakaʼaogaʼi ʼo tatou.

8. ʼE lava fakaʼaogaʼi feafeaʼi tatou e Sehova ohage ko tana fakaʼaogaʼi ia Palenapa?

⁸ ʼI te temi ʼo te kau apositolo, ko he tagata lotofoaki ʼe higoa ko Sosefo neʼe lotolelei ke fakaʼaogaʼi ia ia e Sehova. (Gaue 4:36, 37) Neʼe fakahigoaʼi ia ia e te kau apositolo ko Palenapa, ko tona fakaʼuhiga “Foha ʼo Te Fakafimalie.” ʼE mahino ia, neʼe lagi ina maʼu te fealagia ʼae ke ina fakalotofimalieʼi niʼihi. Ohage la, ʼi te liliu ʼae ʼa Saulo ko he Kilisitiano, tokolahi te ʼu tehina neʼe matataku ia ia, koteʼuhi neʼe ina fakatagaʼi te ʼu kokelekasio Fakakilisitiano. Kae neʼe tokoni mo fakalotofimalieʼi ia ia e Palenapa. ʼE mahino papau ia, neʼe malave ʼaupito kia Saulo ia tana agalelei. (Gaue 9:21, 26-28) Ki muli age, neʼe fia fakalotomalohiʼi e te kau tagata ʼafeā ʼo Selusalemi ia te ʼu tehina ʼe maʼuʼuli mamaʼo ʼi Atiokia ʼo Silia. Ko ai ʼae neʼe natou fekauʼi? Ko Palenapa. Neʼe natou toʼo he tonu ʼe lelei. ʼE fakamahino ʼi te Tohi-Tapu, neʼe “fakalotomalohiʼi [e Palenapa] ia natou fuli ke natou nonofo agatonu ki te ʼAliki ʼaki he loto moʼoni.” (Gaue 11:22-24) ʼE toe feia pe ia ʼaho nei, ʼe feala ke tokoni mai ia Sehova ke tou liliu ko he ʼu “foha ʼo te fakafimalie” maʼa ʼotatou tehina mo tuagaʼane. Ohage la, ʼe feala pe ke ina fakaʼaogaʼi tatou moʼo fakafimalieʼi ia natou ʼae kua mate he tahi neʼe natou ʼoʼofa mamahi ai. Peʼe feala ke ina uga tatou ke tou fakalotomalohiʼi he tahi ʼe mahaki peʼe lotomamahi ʼaupito ʼaki ʼatatou palalau. Ohage la, ʼe feala ke tou olo ʼo fakasiosio peʼe ke tou telefoni ki ai. ʼE ke tuku anai koa ke fakaʼaogaʼi koe e Sehova ohage pe ko tana fakaʼaogaʼi ia Palenapa?—1 Tes. 5:14.

9. Kotea ʼae ʼe tou ako mai te tokoni ʼa Sehova ki te tehina ko Vasily ke liliu ko he tagata tauhi ovi lelei?

⁹ Neʼe tokoni ia Sehova ki he tehina ʼe higoa ko Vasily ke liliu ko he tagata tauhi ovi lelei. Neʼe fakanofo ia Vasily ko he tagata ʼafeā ʼi tona taʼu 26. Kae neʼe tuʼania naʼa mole feala ke tokoni ki te ʼu tehina mo tuagaʼane ʼo tona kokelekasio ʼi te faʼahi fakalaumalie. Tafito la, ia natou ʼae ʼe tau mo he ʼu faigataʼaʼia. Kae neʼe tokoni mo akoako leleiʼi ia ia e he kau tagata ʼafeā faiva, pea neʼe kau ki te Ako ’o Te Minisitelio ’o Te Pule’aga. Neʼe tuputupu ia Vasily ʼi te faʼahi fakalaumalie, he neʼe ina fai he ʼu faiga. Ohage la, neʼe ina tohi ʼana kiʼi fakatuʼutuʼu ke ina fakahoko. Pea ʼi tana fakahoko takitahi ʼana kiʼi fakatuʼutuʼu ʼaia, neʼe feala ai ke ina tauʼi ʼona tuʼania. ʼE ina ui fenei ia ʼaho nei: “Kua au fiafia ʼaupito ʼi te temi nei ʼi te fakahoko ʼo te ʼu meʼa ʼae neʼe au tuʼania ki ai ʼi muʼa atu. Ka tokoni mai ia Sehova ke au maʼu ia te vaega ʼae ʼe ʼaoga moʼo fakafimalieʼi he tehina peʼe ko he tuagaʼane ʼo te kokelekasio, ʼe au fiafia ʼaupito ai.” ʼU tehina, kotou faʼifaʼitakiʼi ia Vasily ʼo kotou lotolelei ke fakaʼaogaʼi  koutou e Sehova. Kapau ʼe kotou fai feia, ʼe tokoni atu anai ia Sehova ke toe lahi age te ʼu gaue ʼae ʼe kotou lava fakahoko ʼi te kokelekasio.

10. Kotea ʼae neʼe fai e Apikaile? Pea kotea ʼae ʼe ke ako mai tana faʼifaʼitaki?

¹⁰ Ko Tavite mo ʼona kaumeʼa neʼe tuli natou e te Hau ko Saulo, pea neʼe ʼaoga kia natou he tokoni. Neʼe kole leva e te ʼu kaumeʼa ʼo Tavite ki he tagata koloaʼia ʼe higoa ko Napale ke ina foaki age hanatou meʼa kai, te meʼa pe ʼae ʼe ina fealagia. Neʼe mole natou tuʼania ʼi te kole meʼa kai kia Napale, koteʼuhi neʼe natou puipui ʼana faga manu ʼi te toafa. Kae ko Napale neʼe ko he tagata neʼe manatu pe kia ia totonu. Neʼe mole ina fia foaki he meʼa kia natou. Neʼe ita leva ia Tavite pea neʼe ina fakatotonu ke matehi ia Napale mo ʼana tagata gaue fuli. (1 Sam. 25:3-13, 22) Kae neʼe ʼi ai te ʼohoana ʼo Napale ʼe higoa ko Apikaile, neʼe ina maʼu te fakasiosio tonu pea mo finemui. Neʼe lototoʼa, koteʼuhi neʼe alu ʼo fakafelaveʼi mo Tavite. Pea neʼe tulolo ifo ia muʼa ʼo Tavite mo ina kolekole age ke ʼaua naʼa ina liligi noa te toto ʼo ina matehi ia Napale mo ʼana tagata gaue. ʼAki he fakaʼeteʼete, neʼe ina kole kia Tavite ke ina tuku ia te aluʼaga ʼaia kia nima ʼo Sehova. Neʼe malave ʼaupito leva ʼana palalau pea mo tana aga fakapotopoto kia Tavite. Neʼe mahino ai ia Tavite ko Sehova ʼae neʼe ina fekauʼi mai ia Apikaile kia ia. (1 Sam. 25:23-28, 32-34) ʼE ha mai ai, neʼe maʼu e Apikaile ia he ʼu kalitate neʼe feala ai ke fakaʼaogaʼi ia ia e Sehova. ʼE toe feia pe, ʼe feala ke fakaʼaogaʼi e Sehova ia te ʼu tuagaʼane ʼae ʼe natou maʼu te fakaʼeteʼete pea mo te fakasiosio tonu. Ohage la, ʼe feala ke fakaʼaogaʼi natou e Sehova moʼo fakalotomalohiʼi ʼonatou famili pea mo tonatou kokelekasio.—Taag. 24:3; Tito 2:3-5.

11. Kotea ʼae neʼe fai e te ʼu ʼofafine ʼo Salume? Pea ko ai ʼae ʼe mulimuli ki tanatou faʼifaʼitaki ia ʼaho nei?

¹¹ ʼI ni taʼu ʼe lauʼi teau ki muli age, neʼe fakaʼaogaʼi e Sehova ia te ʼu ʼofafine ʼo Salume ke natou kau ki te toe laga ʼo te ʼu kaupa ʼo Selusalemi. (Nee. 2:20; 3:12) Neʼe ko he gaue faigataʼa pea neʼe feala pe ke tuʼutamaki ai ʼonatou maʼuli. Kae neʼe natou lotolelei ke natou fakahoko te gaue logo la ko tanatou tamai neʼe ko he tama ʼaliki. (Nee. 4:15-18) Neʼe mole natou hage ko te ʼu tagata maʼuhiga ʼo Tekoa, ʼae neʼe mole natou fia fakamalalo ʼo kau ki te ʼu gaue. (Nee. 3:5) ʼE mahino ia, neʼe fiafia ʼaupito te ʼu ʼofafine ʼo Salume ʼi te ʼosi ʼo te laga ʼo te ʼu kaupa ia ʼaho pe ʼe 52. (Nee. 6:15) Ia ʼaho nei, tokolahi te ʼu tuagaʼane ʼe natou lotolelei mo fiafia ʼi te kau ki te ʼu faʼahiga gaue makehe maʼa Sehova. Ohage la, ko te laga pea mo te taupau ʼo te ʼu fale ʼae neʼe foaki maʼa Sehova. Ko ʼonatou fealagia, mo tonatou fiafia pea mo tanatou agatonu, ʼe ʼaoga ki te lelei ʼo te ʼu gaue ʼaia.

12. ʼE feala ke fakaʼaogaʼi feafeaʼi koe e Sehova ohage pe ko tana fakaʼaogaʼi ia Tapita?

¹² Neʼe uga e Sehova ia Tapita ke “lahi ʼana gaue lelei” pea ke “ina fai he ʼu tuʼuga meʼa ʼofa” tafito ki te ʼu fafine vitua. (Gaue 9:36) Neʼe ko he fafine lotofoaki pea mo agalelei. Koia ʼae neʼe tokolahi ia natou ʼae neʼe fetagihi ʼi tana mate. Kae neʼe natou fiafia ʼaupito leva ʼi te temi ʼae neʼe fakatuʼuake ai ia ia e te apositolo ko Petelo. (Gaue 9:39-41) Kotea ʼae ʼe tou ako mai te faʼifaʼitaki ʼa Tapita? ʼE feala mo tatou ke tou foaki he tokoni ʼaoga ki ʼotatou tehina mo tuagaʼane. ʼE feala te faʼahi ʼaia, tatau aipe pe ʼe kei tou tupulaga, peʼe kua tou vaivai matuʼa, pe ʼe tou tagata peʼe fafine.—Hep. 13:16.

13. Neʼe fakaʼaogaʼi feafeaʼi e Sehova te tuagaʼane umiuminoa ko Ruth? Pea kotea ʼae neʼe ina ui?

¹³ Ko he tuagaʼane ʼe higoa ko Ruth ʼe umiuminoa, kae neʼe fia kau ki te selevisi misionea. ʼI tana kei veliveli, neʼe faifakamafola ʼi te ʼu ʼapi pea neʼe fealuʼaki fakavilivili ʼo tufa he ʼu kiʼi pepa lotu. Neʼe ina ui fenei: “Neʼe au leleiʼia ʼaupito te gaue ʼaia.” Kae neʼe faigataʼa ʼaupito ia tana palalau ki te hahaʼi ʼi te ʼu matapa pea mo fakaha age te logo ʼo te Puleʼaga. Neʼe pionie katoa ia Ruth ʼi tona taʼu 18, logo la tana umiuminoa. ʼI te taʼu 1946, neʼe kau ʼi te Ako Tohi-Tapu ’o Kileate ʼa te Watchtower pea ki muli age, neʼe fekauʼi ki Hawaii pea mo Saponia. Neʼe fakaʼaogaʼi e Sehova ia ia ʼi hona aluʼaga fakaofoofo moʼo fakamafola te logo lelei ʼi te ʼu  fenua ʼaia. Hili tana faifakamafola ia teitei taʼu ʼe 80, neʼe ui fenei e Ruth: “Neʼe foaki tuʼumaʼu mai e Sehova ia te malohi. Neʼe tokoni mai ke au lava tauʼi taku umiuminoa. Pea ʼe au tui papau ʼe feala ke fakaʼaogaʼi e Sehova ia natou fuli ʼae ʼe falala kia te ia.”

14. Ka tou lau ia Kolose 1:29, kotea ʼae ʼe tonu ke tou fai mo kapau ʼe tou loto ke fakaʼaogaʼi tatou e Sehova?

¹⁴ ʼI te temi fuli pe, neʼe fakaʼaogaʼi e Sehova ʼana kaugana ʼi he ʼu aluʼaga kehekehe. ʼE fakaʼaogaʼi feafeaʼi anai koutou e Sehova? ʼE fakalogo tafito ki takotou faiga malohi. (Lau ia Kolose 1:29.) Kapau ʼe kotou lotolelei ke fakaʼaogaʼi koutou e Sehova, ʼe feala ke tokoni atu ke kotou liliu ko meʼa fuli ʼe loto ki ai moʼo fai tona finegalo. Ohage la, ʼe feala ke kotou liliu ko he kau faifakamafola faʼafai, mo faiako lelei, mo faiva ʼi ʼakotou gaue pea mo te fakafimalieʼi ʼo niʼihi, mo kotou liliu ko he ʼu kaumeʼa ʼe tuha mo te falala.

15. Kotea ʼae ʼe tonu ke kole mamahi e te kau tupulaga kia Sehova ʼo mulimuli kia 1 Timoteo 4:12, 15?

¹⁵ Kae kotea ʼae ʼe feala ke kotou fai, mo kapau ko koutou ko he ʼu tehina kua vave fotufotuʼa? ʼE ʼaoga lahi he ʼu tehina malolohi pea mo lotolelei ke natou tokoni ki te kokelekasio ʼo natou liliu ko he kau tagata faifekau fakaminisitelio. ʼE lahi te ʼu kokelekasio, ʼe kaugā malie age te kau tagata ʼafeā ʼi te kau tagata faifekau fakaminisitelio. ʼE feala koa ke kotou fakaʼamu ke kotou gaue lahi age ʼi tokotou kokelekasio? ʼI ʼihi temi, ʼe ui fenei e ʼihi tehina: “ ʼE au fiafia ʼi taku faifakamafola pea ʼe feʼauga ai pe ia.” Kapau ʼe kotou maʼu te manatu ʼaia, kotou faikole mamahi kia Sehova ke tokoni atu ke kotou fia liliu ko he kau tagata faifekau fakaminisitelio. Pea kotou toe faikole kia te ia ke ina foaki atu te malohi ʼae ke kotou fai ia meʼa fuli ʼe kotou lavaʼi moʼo tauhi kia te ia ʼi te ʼofa. (Ekl. 12:3) ʼE ʼaoga kia matou ia takotou tokoni.—Lau ia 1 Timoteo 4:12, 15.

16. Kotea ʼae ʼe tonu ke tou kole kia Sehova? Pea kotea tona tupuʼaga?

¹⁶ ʼE feala ke tokoni atu ia Sehova ke kotou liliu ko meʼa fuli ʼe loto ki ai moʼo fakahoko tona finegalo. Koia, kotou kole kia Sehova ke ina foaki atu te fakaʼamu moʼo fai tona finegalo. Pea kotou toe kole kia te ia ke ina foaki atu te malohi ʼae ʼe ʼaoga atu kia koutou. Pe ʼe kei kotou tupulaga peʼe kua kotou matuʼa, kotou fakaʼaogaʼi tokotou temi, tokotou malohi moʼo fakakololiaʼi ia Sehova ʼi te temi nei. ʼE mole gata ai, ʼe toe feala ke kotou fakaʼaogaʼi ʼokotou fealagia pea mo ʼokotou koloa. (Ekl. 9:10) ʼE lagi kotou maʼu te fealagia maʼuhiga ʼae ke kotou gaue lahi age maʼa Sehova. Kae ʼaua naʼa kotou fakafisi atu aipe, ʼo kotou manatu ʼe mole kotou lavaʼi te ʼu gaue ʼaia. ʼE ko he toe pilivilesio lahi tatatou fai ia meʼa fuli ʼe tou lavaʼi maʼa Sehova, koteʼuhi ʼe tuha ia mo ia ke tou fakakololiaʼi.