KO HE tahi ʼe ina sivisivi te faʼahiga tuʼu ʼo te ʼaele, ʼe ina vakaʼi te pāki ʼi tana olotinatea. ʼE sio ai ki he afā fakamataku ʼe fakaovi fakavilivili ki he koga fenua ʼe hahaʼi ʼaupito. ʼE ina tuʼania ai ʼo ʼuhiga mo te maʼuli ʼo te hahaʼi. Koia ʼe ina fai ai ia meʼa fuli moʼo fakatokaga te hahaʼi ʼi muʼa ʼo te hoko mai ʼo te afā.

ʼE toe feia pe ia ʼaho nei, ʼe fakatokaga e Sehova te hahaʼi ʼi te kele kua vave hoko mai pe he aluʼaga ʼe feala ke tou fakahigoa ko he “afā.” Ko te “afā” ʼaia ʼe fakamataku age anai ia ʼi te ʼu tuʼutamaki fakanatula fuli ʼae ʼe feala ke fakatokagaʼi kia natou. ʼE fakatokaga feafeaʼi e te ʼAtua te hahaʼi? Pea he koʼe ʼe tou tui papau ʼe ina foaki anai he temi feʼauga ki te hahaʼi ke natou mulimuli ki ʼana fakatokaga? Ke feala hatatou tali ki te ʼu fehuʼi ʼaia, tou vakaʼi ʼihi fakatokaga ʼa Sehova neʼe ina foaki ʼi te temi muʼa.

ʼE feala ke tou fakatatau te ʼu fakamau ʼa te ʼAtua ki he ‘afā.’ ʼI te temi muʼa, neʼe fakato liuliuga e Sehova he ʼu ‘afā’ kia natou ʼae neʼe talagataʼa faʼifaʼitaliha ki ʼana fakatotonu. Kae ʼi te lakaga fuli pe, neʼe ina fai he ʼu fakatokaga kia natou. (Taag. 10:25; Sel. 30:23) ʼI te temi fuli pe, neʼe fakatokaga e te ʼAtua ia te hahaʼi talagataʼa lolotoga he ʼu lauʼi taʼu ʼi muʼa ʼo te fakahoko ʼo hana fakamau. Pea neʼe ina fakaha age kia natou pe ʼe kotea ʼae neʼe tonu ke natou fai ke natou fakalogo ai kia te ia. (2 Hau 17:12-15; Nee. 9:29, 30) Neʼe fia tokoni te ʼAtua ki te hahaʼi ʼae neʼe lotolelei ke natou fai he ʼu fetogi. Koia neʼe ina fekauʼi ai ʼana kaugana agatonu ʼi te kele ke natou tala ʼana fakamau pea mo fakamahino ki te hahaʼi ke ʼaua tanatou fakatuatuai.—Amo. 3:7.

Neʼe kau ia Noe ʼi te ʼu kaugana agatonu ʼaia. Lolotoga he ʼu taʼu, neʼe ina fakatokaga ki te hahaʼi, ʼe to anai he Tulivio ki te kele. Neʼe lototoʼa ia Noe, koteʼuhi ko te hahaʼi ʼo tona temi neʼe natou fai te ʼu aga heʼe ʼaoga pea mo agamalohi. (Sen. 6:9-13, 17) Neʼe ina toe fakaha kia natou pe ʼe kotea ʼae neʼe tonu ke natou fai ke natou hao mai te Tulivio. Ko te tupuʼaga la ʼaia ʼo tona fakahigoaʼi ki muli age, ko “te tagata faifakamafola ʼo te faitotonu.”—2 Pet. 2:5.

Logo la te ʼu faiga ʼa Noe, kae neʼe mole fakalogo te hahaʼi ʼo tona temi ki te ʼu fakatokaga ʼa te ʼAtua. Neʼe mole natou maʼu te tui. Koia neʼe natou mamate ai ʼi te “hoko mai ʼo te Tulivio pea neʼe ina ʼave ia natou fuli.” (Mat. 24:39; Hep. 11:7) Neʼe mole feala hanatou ui neʼe mole fakatokaga natou e te ʼAtua.

ʼI ʼihi temi, neʼe fakatokaga e Sehova ʼihi hahaʼi ʼi he kiʼi temi siʼi pe ʼi muʼa ʼo te fakahoko ʼo tana fakamau. Kae neʼe tokaga pe ia Sehova ke maʼu e te hahaʼi ʼaia he temi feʼauga ke feala hanatou mulimuli ki ʼana fakatokaga. Ohage la, ʼi muʼa ʼo tana fakato takitahi te ʼu Tautea ʼae ʼe Hogofulu, neʼe ina fakatokaga te hahaʼi ʼo Esipito. Tou vakaʼi age muʼa te fitu tautea. Neʼe fekauʼi e Sehova ia Moisese mo Alone ke olo ʼo fakatokaga kia Falaone mo ʼana kaugana ʼe ʼamanaki to anai he ʼua maka fakamataku ʼo maumauʼi te fenua. ʼI te ʼaho ake, neʼe to ai leva te ʼua maka. ʼE feala koa ke tou ui neʼe tuku e te ʼAtua he temi feʼauga ke natou maʼu ai honatou holaʼaga pea mo hao ʼi te tautea ʼaia? ʼE ui fenei ʼi te Tohi-Tapu: “Ko natou ae i te u tagata faifekau a Falaone nee matataku leva ki te folafola a [“Sehova,” MN], nee natou fakaulu leva ki onatou fale anatou tagata faifekau mo anatou faga manu. Kae ko natou ae nee mole natou too fakamalotoloto te folafola a [“Sehova,” MN], nee natou tuku leva anatou tagata faifekau mo anatou faga manu i te u gaueaga.” (Eke. 9:18-21) ʼE ha lelei mai ai, neʼe foaki e Sehova ia he ʼu fakatokaga feʼauga kia natou. Pea ko natou ʼae neʼe fakalogo ki te ʼu fakatokaga ʼaia, neʼe natou hao mai te ʼu nunuʼa kovi ʼo te tautea ʼaia.

Neʼe toe maʼu e Falaone mo ʼana kaugana he ʼu fakatokaga ʼi muʼa ʼo te to ʼo te hogofulu tautea. Kae neʼe natou agavale ʼi tanatou mole mulimuli ki te ʼu fakatokaga. (Eke. 4:22, 23) Koia neʼe mamate ai ʼanatou ʼuluaki tupu tagata. Neʼe ko he aluʼaga fakaʼofaʼofa ʼaupito. (Eke. 11:4-10; 12:29) Neʼe natou maʼu koa he temi feʼauga ke natou mulimuli ai ki te ʼu fakatotonu?  ʼEi. Neʼe foimo fakatokaga e Moisese ia te kau Iselaele ʼo ʼuhiga mo te hogofulu tautea. Pea neʼe ina fakamahino pe ʼe kotea ʼae neʼe tonu ke natou fai moʼo haofaki ʼonatou famili. (Eke. 12:21-28) Kae ko te toko fia ʼae neʼe fakalogo ki te ʼu fakatotonu ʼa Moisese? ʼE fakafuafua ko te teitei toko tolu miliona hahaʼi ʼae neʼe hao mai te fakamau ʼa te ʼAtua pea neʼe natou mavae mai Esipito. Neʼe kau ai te kau Iselaele pea mo “he hahai kehe . . . kaugamalie,” ʼo te kau Esipito.—Eke. 12:38.

Ohage ko tona fakaha ʼi te ʼu faʼifaʼitaki ʼaia, neʼe tokaga tuʼumaʼu ia Sehova ke maʼu e te hahaʼi ia he temi feʼauga ke natou fakalogo ki ʼana fakatotonu. (Tet. 32:4) Kotea tona tupuʼaga? Neʼe fakamahino e Petelo, ‘ ʼe mole loto e Sehova ke fakaʼauha he tahi, kae ʼe loto ia ke kaku te hahaʼi fuli ki te fakahemala.’ (2 Pet. 3:9) ʼE ha lelei mai, neʼe tokaga tuʼumaʼu ia te ʼAtua ki te hahaʼi. Neʼe loto ia ke natou fakahemala pea ke natou fai he ʼu fetogi ʼi muʼa ʼo te hoko mai ʼo tana fakamau.—Esa. 48:17, 18; Loma 2:4.

ʼE toe feia pe ia ʼaho nei, ʼe tonu ki te hahaʼi fuli ke natou fakalogo ki he fakatokaga maʼuhiga ʼe lolotoga tala ʼi te malamanei katoa. ʼI te kei nofo ʼa Sesu ʼi te kele, neʼe ina fakamafola ʼe maumauʼi anai te tuʼu ʼo te ʼu faʼahiga meʼa ʼaeni lolotoga “he toe mamahi lahi.” (Mat. 24:21) Neʼe ina foaki mai ia he lea fakapolofeta ʼo ʼuhiga mo te fakamau ʼaia. ʼE fakamatala lelei ʼi te lea fakapolofeta ʼaia pe ʼe kotea anai ka hoko ki ʼana tisipulo pea mo natou sisio ki ai ʼi muʼa ʼo te hoko mai ʼo te toe mamahi lahi. Neʼe fakamahino lelei ai e Sesu ia te ʼu aluʼaga maʼuhiga ʼae ʼe lolotoga hoko ia ʼaho nei.—Mat. 24:3-12; Luka 21:10-13.

ʼE fakalotomalohiʼi e Sehova ia te hahaʼi fuli ke natou filifili ke natou tauhi mo fakalogo kia te ia, ʼo mulimuli pe ki te lea fakapolofeta ʼaia. ʼE loto ia ke maʼu e te hahaʼi fakalogo ʼi te temi nei ia he maʼuli fiafia ʼo toe feia mo te ʼu tapuakina ʼi te malama foʼou faitotonu. (2 Pet. 3:13) ʼE fia tokoni ia Sehova ki te hahaʼi ke natou tui ki ʼana fakapapau. Koia ʼe ina fakaha ai kia natou ia he logo ʼe ina haofaki anai ʼonatou maʼuli. Ohage pe ko tona ui e Sesu, ʼe ko te ‘logo lelei ʼo te Puleʼaga ʼae ka fakamafola anai ʼi te kele katoa ko he fakamoʼoni ki te ʼatu puleʼaga.’ (Mat. 24:14) Neʼe fakatuʼutuʼu e te ʼAtua ʼana kau atolasio moʼoni ke natou tala ia tana logo. Pea ʼe natou tala te logo ʼaia mai te ʼAtua ia fenua ʼe teitei 240. ʼEi, ʼe loto e Sehova ke fakalogo he hahaʼi kaugā malie ki ʼana fakatokaga pea ke natou hao mai te ‘afā’ peʼe ko tana fakamau faitotonu ʼi te ka haʼu.—Sofo. 1:14, 15; 2:2, 3.

Koia, ʼaua tatatou feʼekeʼaki ʼae pe ʼe foaki e Sehova ki te hahaʼi ia he temi feʼauga ke natou mulimuli ai ki ʼana fakatotonu. Ohage pe ko tatatou kua vakaʼi, ʼe ko he faʼahi ia ʼe ina fai tuʼumaʼu. Kae, koʼeni te faʼahi ʼae ʼe maʼuhiga ke fakakaukauʼi: Pe ʼe mulimuli anai koa te hahaʼi ki te ʼu fakatokaga ʼa te ʼAtua lolotoga te ʼu temi faigamalie ʼaeni? Ko tatou ko he kau ʼave logo ʼa te ʼAtua. Koia ʼofa pe ke tou hoko atu tatatou tokoni ki he hahaʼi kaugā malie ke natou hao ʼi te fakaʼosi ʼo te tuʼu ʼo te ʼu faʼahiga meʼa ʼaeni.