1. He koʼe ko te Kau Fakamoʼoni ʼa Sehova ʼe ko he hahaʼi fiafia? (Vakaʼi te ʼuluaki pāki.)

KO TE Kau Fakamoʼoni ʼa Sehova ʼe ko he hahaʼi fiafia. ʼI te ʼu temi fuli pe ʼae ʼe natou fakatahitahi ai ʼi te ʼu fono, ʼi te ʼu fakatahi lalahi, peʼe ʼi he kiʼi fakafiafia, ʼe natou faipalalau mo kokolo fakafiafia. He koʼe ʼe natou fiafia? Ko tona tupuʼaga tafito, he ʼe natou iloʼi ia Sehova, “te ʼAtua fiafia.” ʼE natou tauhi kia te ia pea mo natou faigaʼi ke natou faʼifaʼitakiʼi ia ia. (1 Timoteo 1:11; Pesalemo 16:11) ʼE loto e Sehova ke tou fiafia, mai tona aluʼaga ʼae ko ia ko te Matapuna ʼo te fiafia, pea ʼe ina foaki mai he ʼu tupuʼaga ke tou fiafia ai.—Tetelonome 12:7; Ekelesiasi 3:12, 13.

2, 3. (1) Kotea te fakaʼuhiga ʼo te fiafia? (2) He koʼe ʼe faigataʼa ʼi ʼihi temi ke tou maʼu te fiafia?

² Kae ʼe feafeaʼi kia koe? ʼE ke fiafia koa? Ko he tahi ʼe fiafia, ʼe logo lelei mo logo fimalie, pea ʼe fiafia ʼi te ʼu meʼa pe ʼae ʼe ina maʼu ʼi tona maʼuli, he ʼe toe lelesili ai tona fiafia. ʼE fakaha ʼi te Tohi-Tapu, ko natou ʼae ʼe tapuakinaʼi e Sehova ʼe natou fiafia moʼoni. Kae ia ʼaho nei, he koʼe ʼe faigataʼa ia te maʼu ʼo te fiafia?

 ³ ʼE faigataʼa tatatou maʼu te fiafia moka tou tau mo he ʼu aluʼaga ʼe fakatupu hoha. Ohage la ko te mate peʼe ko te fakamavae ʼo he tahi ʼi te kokelekasio ʼe tou ʼoʼofa ai, peʼe ko te mavete mo totatou ʼohoana, peʼe ko te mole kei maʼu ʼo hatatou gaue. ʼO toe feia pe mo kapau ʼe mole maʼu te tokalelei ʼuhi ko te ʼu tokakovi fakafamili, moka vaʼi tatou e ʼotatou kaugā gaue mo ʼotatou kaugā ako, peʼe moka fakatagaʼi mo pilisoniʼi tatou ʼuhi ko tatatou tauhi kia Sehova. Pea ʼe toe kau ai foki mo te mahaki, ʼe lagi ko he mahaki ʼe tou tau mo ia talu mai fualoa, peʼe ko te lotomamahi ʼaupito. Kae tou manatuʼi ko Sesu Kilisito, “te Pule ʼae ʼe fiafia pea mo tokotahi,” neʼe ina fia fakalotofimalieʼi mo fakafiafiaʼi te hahaʼi. (1 Timoteo 6:15; Mateo 11:28-30) ʼI tana Akonaki ʼi Te Moʼuga, neʼe talanoa ia Sesu ki he ʼu kalitate ʼe lava tokoni mai ke tou fiafia logo la te ʼu faigataʼaʼia ʼae ʼe tou tau mo ia ʼi te malama ʼaeni ʼa Satana.

4, 5. Kotea ʼae ʼe feala ke tou fai ke tou maʼu tuʼumaʼu te fiafia?

⁴ Ko te ʼuluaki faʼahi ʼae neʼe talanoa ki ai ia Sesu ʼe maʼuhiga ʼaupito. Neʼe ina ui fenei: “Manuʼia ia natou ʼae ʼe natou mahino ʼe ʼaoga kia natou te ʼu meʼa fakalaumalie, koteʼuhi ʼe ʼa natou anai ia te Puleʼaga ʼo selo.” (Mateo 5:3) Kapau ʼe tou mahino ʼe ʼaoga kia tatou te ʼu meʼa fakalaumalie, ʼe tou fakamoʼoni ai ʼe ʼaoga ke tou iloʼi ia te ʼAtua pea ʼe ʼaoga kia tatou ia tana tokoni mo tana takitaki. ʼE feafeaʼi hatatou fakaha te faʼahi ʼaia? ʼAki tatatou ako te Tohi-Tapu, mo te fakalogo ki te ʼAtua, pea mo tou fakamuʼamuʼa ia tatatou tauhi kia te ia. ʼE tou fiafia anai mo kapau ʼe tou fai te ʼu faʼahi ʼaia. ʼE toe malohi age anai ia tatatou tui ki te ʼu fakapapau ʼae kua vave fakahoko anai e te ʼAtua. Pea ko “te ʼamanaki fakafiafia” ʼae ʼe tou maʼu ʼi te Tohi-Tapu, ʼe ina fakalotomalohiʼi tatou.—Tito 2:13.

⁵ Kapau ʼe tou fia maʼu te fiafia logo la ʼotatou faigataʼaʼia, ʼe tonu ke tou haga fakamalohiʼi tatatou fakakaumeʼa mo Sehova. Neʼe tohi fenei e te apositolo ko Paulo: “Kotou fakafiafia tuʼumaʼu ʼi te ʼAliki. ʼE au toe ui fenei atu: Kotou fakafiafia!” (Filipe 4:4) Ke feala hatatou liliu ko he kaumeʼa lelei ʼo Sehova, ʼe ʼaoga ke tou maʼu ia te poto ʼae ʼe haʼu mai ia te ia. ʼE ui fenei ʼi te Folafola ʼa te ʼAtua: “Manuia te tagata ae kua ina mau te poto, mo te tagata ae e ina mau te atamai! Ko he akau aia o te mauli kia natou ae e natou too ia, pea e manuia natou ae e natou kukumi mau ia.”—Taaga Lea 3:13, 18.

6. Kotea te tahi faʼahi ʼe maʼuhiga ke tou fai ke tou fiafia tuʼumaʼu?

⁶ Kae ʼe maʼuhiga ʼaupito ke tou haga maʼuliʼi te ʼu faʼahi ʼae ʼe tou ako ʼi te Tohi-Tapu, ke feala ai hatatou fiafia tuʼumaʼu. Neʼe fakaha e Sesu te maʼuhiga ʼo te faʼahi ʼaia ʼi tana ui fenei: “Kapau ʼe kotou iloʼi te ʼu faʼahi ʼaia, ʼe kotou fiafia mo kapau ʼe kotou fai.” (Soane 13:17; lau ia Sakopo 1:25.) ʼE maʼuhiga te faʼahi ʼaia, moka ʼe tou fia maʼu te ʼu meʼa  ʼae ʼe ʼaoga kia tatou ʼi te faʼahi fakalaumalie pea mo taupau totatou fiafia. Kae ʼe feafeaʼi hatatou maʼu te fiafia ʼi te malama ʼaeni ʼe lahi ai te ʼu aluʼaga ʼe feala ke puli ai totatou fiafia? Tou vakaʼi pe kotea te tahi faʼahi neʼe talanoa ki ai ia Sesu ʼi tana Akonaki ʼi Te Moʼuga.

7. ʼE feala ke fiafia feafeaʼi ia natou ʼae ʼe lotomamahi?

⁷ “Manuʼia ia natou ʼae ʼe lotomamahi, koteʼuhi ʼe fakafimalieʼi anai natou.” (Mateo 5:4) ʼE lagi tou feʼekeʼaki fenei: ‘ ʼE feafeaʼi kia natou ʼae ʼe lotomamahi hanatou fiafia?’ Neʼe mole palalau ia Sesu ʼo ʼuhiga mo natou fuli ʼae ʼe lotomamahi. Tokolahi te hahaʼi agakovi ʼe natou lotomamahi, ʼuhi ko te ʼu aluʼaga fakatupu mamahi ʼae ʼe felaveʼi mo natou ʼi te “ ʼu ʼaho fakamuli” ʼaeni ʼae ʼe “makehe pea mo faigataʼa.” (2 Timoteo 3:1) ʼE natou manatu pe kia natou kae mole kia Sehova. ʼE mole natou fakaovi kia te ia, pea koia ʼae ʼe mole natou fiafia ai. Neʼe talanoa ia Sesu ʼo ʼuhiga mo natou ʼae ʼe natou mahino ʼe ʼaoga kia natou te ʼu meʼa fakalaumalie. ʼE natou lotomamahi ʼuhi ko te haga ʼa te hahaʼi ʼo liʼaki ia te ʼAtua peʼe ko tanatou mole fai te finegalo ʼo te ʼAtua. ʼE natou toe mahino foki ki tonatou ʼuhiga agahala, mo natou toe sisio ki te ʼu aluʼaga fakamataku ʼae ʼe hoko ʼi te malama ʼaeni. Ko Sehova ʼe ina tokagaʼi te hahaʼi fakamalotoloto ʼaia ʼe lotomamahi, ʼo ina fakafimalieʼi natou ʼaki tana Folafola, pea mo ina foaki kia natou te fiafia mo te maʼuli.—Lau ia Esekiele 5:11; 9:4.

8. ʼE tokoni feafeaʼi mai te agamalū ke tou fiafia?

⁸ “Manuʼia ia natou ʼae ʼe agamalū, koteʼuhi ʼe natou maʼu anai ia te kele.” (Mateo 5:5) ʼE tokoni feafeaʼi mai te agamalū ke tou fiafia? Tokolahi te hahaʼi ʼe agakovi pea ʼe mole natou aga fakaʼapaʼapa, koia ʼae ʼe natou tau ai mo ni faigataʼaʼia. Kae ʼi te temi ʼae ʼe natou iloʼi ai te moʼoni, ʼe natou fai he ʼu fetogi mo natou kofuʼi “te ʼulugaaga foʼou.” ʼI te temi nei, kua natou fakaha “te ʼofa mamahi, mo te manavaʼofa, mo te agaʼofa, mo te agavaivai, mo te agamalū pea mo te kataki fualoa.” (Kolose 3:9-12) Koia kua natou maʼu ai ia he maʼuli tokalelei, ʼe natou felogoi lelei mo ʼihi, pea ʼe natou fiafia. Pea tahi, ʼe fakapapau mai ʼi te Folafola ʼa te ʼAtua ʼe natou “maʼu anai ia te kele.”—Pesalemo 37:8-10, 29.

9. (1) Kotea te fakaʼuhiga ʼo te ui ʼae e Sesu ʼe “maʼu anai ia te kele” e te kau agamalū? (2) He koʼe ʼe feala ke fiafia ia “natou ʼae ʼe fia kakai pea mo fia iinu ki te faitotonu”?

⁹ Kotea te fakaʼuhiga ʼo te ʼu palalau ʼae ʼa Sesu ʼe “maʼu anai ia te kele” e te kau agamalū? Ko te kau fakanofo ʼe natou maʼu anai te kele ʼi te temi ʼae ka natou puleʼi ai ʼi tonatou ʼuhiga hau pea mo pelepitelo. (Fakaha 20:6) Kae ko te toko lauʼi miliona hahaʼi ʼae ʼe mole natou maʼu te ʼamanaki ki te maʼuli ʼi selo, ʼe natou maʼu anai te kele ʼi te temi ʼae ka fakagafua ai ke natou maʼuʼuli ʼi ai ʼo talu ai. ʼE natou maʼuli haohaoa anai mo tokalelei pea mo fiafia. Koia ʼe fiafia ia te kau fakanofo pea mo ʼihi atu ovi, koteʼuhi ʼe natou “fia kakai pea mo fia iinu ki te faitotonu.” (Mateo 5:6) Ko tanatou fakaʼamu ʼaia ki te faitotonu, ʼe fakahoko anai e Sehova ʼi te temi ʼae ka ina pulihi ai te ʼu agakovi fuli. (2 Petelo 3:13) ʼI te malama foʼou, ʼe maʼuli fiafia anai te kau agatonu ʼaia kae ʼe mole natou toe lotomamahi anai ʼuhi ko natou ʼae ʼe natou fai te ʼu meʼa ʼae ʼe kovi.—Pesalemo 37:17.

10. Kotea te fakaʼuhiga ʼo te manavaʼofa?

¹⁰ “Manuʼia ia natou ʼae ʼe manavaʼofa,  koteʼuhi ʼe fakaha age anai kia natou te manavaʼofa.” (Mateo 5:7) Ko he tahi ʼe manavaʼofa, ʼe ʼofa moʼoni, mo agalelei, mo agaʼofa, pea mo ʼofa mamahi kia natou ʼae ʼe lotomamahi. Kae ko te manavaʼofa ʼe mole ko he meʼa pe ʼe tou logoʼi ʼi ʼotatou loto. ʼE akoʼi mai ʼi te Tohi-Tapu, ko he tahi ʼe manaʼofa ʼe ina fai he ʼu gaue moʼo tokoni ki ʼihi.

11. Kotea ʼae ʼe tou ako mai te lea fakatata ʼo te tagata Samalitana agalelei?

¹¹ Lau ia Luka 10:30-37. ʼE ha lelei te fakaʼuhiga ʼo te manavaʼofa ʼi te lea fakatata ʼa Sesu ʼo ʼuhiga mo te tagata Samalitana agalelei. Neʼe manavaʼofa mo ʼofa mamahi ia te tagata Samalitana ki te tagata neʼe gaohi koviʼi pea neʼe tokoni ki ai. ʼI te ʼosi fakamatala e Sesu ia te lea fakatata ʼaia, neʼe ina ui fenei: “Alu la pea ke fai feia mo koe.” Koia tou fai te ʼu fehuʼi ʼaeni: ‘ ʼE au fai feia koa? ʼE au faʼifaʼitakiʼi koa te tagata Samalitana manavaʼofa? Moka lotomamahi he tahi, ʼe feala koa ke au tokoni ki ai? Kotea he tahi age ʼu faʼahi ʼe feala ke au fai moʼo tokoni ki ai? Ohage la, ʼe feala koa ke au tokoni ki he tahi kua vaivai matuʼa ʼi te kokelekasio, ki he tahi kua vitua, peʼe ki he tupulaga peʼe ko he finemui ʼe mole tauhi ʼana matuʼā kia Sehova? ʼE feala koa ke au “fai he ʼu palalau fakalotofimalie kia natou ʼae ʼe lotomamahi”?’—1 Tesalonika 5:14; Sakopo 1:27.

12. He koʼe ʼe tou fiafia moka ʼe tou manavaʼofa?

¹² He koʼe ʼe tou fiafia moka ʼe tou manavaʼofa? Ka tou manavaʼofa, ʼe ko hatatou faʼahiga foaki ʼaia ki ʼihi, pea ohage pe ko tona ui e Sesu ʼe tou fiafia moka tou foaki. Pea tahi, ka tou maʼu te kalitate ʼaia, ʼe tou iloʼi ʼe tou fakafiafiaʼi te loto ʼo Sehova. (Gaue 20:35; lau ia Hepeleo 13:16.) Ko te Hau ko Tavite neʼe ina ui fenei ʼo ʼuhiga mo ia ʼae ʼe manavaʼofa: “E taupau ia ia e [Sehova] pea e ina fakatologa tona mauli. E manuia ia ia i te kele.” (Pesalemo 41:2, 3) Kapau ʼe tou manavaʼofa mo agaʼofa ki ʼihi, ʼe toe manavaʼofa mai anai ia Sehova kia tatou pea ʼe tou fiafia anai ʼo talu ai.—Sakopo 2:13.

13, 14. He koʼe ʼe maʼuhiga ke tou ‘maʼa ʼi ʼotatou loto’?

¹³ Neʼe ui fenei e Sesu: “Manuʼia ia natou ʼae ʼe maʼa ʼonatou loto, koteʼuhi ʼe natou sisio anai ki te ʼAtua.” (Mateo 5:8) Ke maʼa ʼotatou loto, ʼe tonu ke maʼa ʼatatou manatu  pea mo te ʼu meʼa ʼae ʼe tou holi ki ai. ʼE maʼuhiga ʼaupito ia te faʼahi ʼaia mo kapau ʼe tou loto ke tali tatatou tauhi e Sehova.—Lau ia 2 Kolonito 4:2; 1 Timoteo 1:5.

¹⁴ ʼE feala kia natou ʼae ʼe maʼa ʼonatou loto, ke natou maʼu he ʼu felogoi lelei mo Sehova, ʼae neʼe ina ui fenei: “Fiafia ia natou ʼae ʼe natou fo ʼonatou teu.” (Fakaha 22:14) Kotea te fakaʼuhiga ʼo te ʼu palalau ʼae ʼe natou “fo ʼonatou teu”? Ko tona fakaʼuhiga ki te kau Kilisitiano fakanofo, ʼe natou maʼa kia mata ʼo Sehova pea ʼe ina foaki anai kia natou te maʼuli tuputupua ʼi te lagi, mo natou maʼuli fiafia anai ʼo talu ai. Ko tona fakaʼuhiga ki te toe hahaʼi tokolahi ʼae ʼe natou maʼu te ʼamanaki ki te maʼuli ʼi te kele, ʼe fakagafua e Sehova ke natou liliu ko ʼona kaumeʼa koteʼuhi ʼe natou faitotonu kia te ia. ʼE ui ʼi te Tohi-Tapu, “neʼe natou fo ʼonatou teu pea mo fakahihina ʼi te taʼataʼa ʼo te Akeno.”—Fakaha 7:9, 13, 14.

15, 16. Kotea te fakaʼuhiga ʼo te ui ʼae ko natou ʼae ʼe maʼa ʼonatou loto ʼe feala ke natou ‘sisio ki te ʼAtua’?

¹⁵ Neʼe ui fenei e Sehova: “E mole feala ke sio te tagata kia au pea mauli.” (Ekesote 33:20) Kae ʼe feala feafeaʼi kia natou ʼae ʼe maʼa ʼonatou loto hanatou ‘sisio ki te ʼAtua’? Ko te kupu Fakakeleka ʼae neʼe fakaliliu ʼaki te kupu “sisio” ʼe feala ke fakaʼuhiga ki te fakakaukauʼi, mahino, peʼe iloʼi. Koia, ko natou ʼae ʼe ‘sisio ki te ʼAtua’ ko tona fakaʼuhiga ʼe natou mahino ki tona ʼuluagaaga pea mo ʼona kalitate. (Efeso 1:18) Neʼe faʼifaʼitakiʼi lelei e Sesu te ʼu kalitate ʼa te ʼAtua, koia ʼae neʼe feala ai ke ina ui fenei: “Ko ʼae kua sio kia te au, kua toe sio ia ki te Tamai.”—Soane 14:7-9.

¹⁶ Pea tahi, ʼe tou ‘sisio ki te ʼAtua’ moka ʼe tou tokagaʼi ia tana faʼahiga tokoni mai kia tatou. (Sopo 42:5) ʼE toe feala foki ke tou “sisio,” peʼe ke tou tokagaʼi tafito te ʼu aluʼaga fakaofoofo ʼae ʼe fakapapau e Sehova ke ina fai maʼa natou ʼae ʼe nonofo maʼa mo tauhi agatonu kia te ia. Kae ko te kau fakanofo ʼe natou sisio moʼoni anai kia Sehova ʼi te temi ʼae ka fakatuʼuake ai natou ʼi te lagi.—1 Soane 3:2.

17. He koʼe ʼe fiafia ia natou ʼae ʼe natou kumi ke natou tokalelei mo te hahaʼi?

¹⁷ Neʼe ui fenei e Sesu: “Manuʼia ia natou ʼae ʼe natou kumi ke natou tokalelei mo te hahaʼi.” (Mateo 5:9) ʼE tou fiafia moka tou fai he ʼu fakatuʼutuʼu ke tou tokalelei ai mo ʼihi. Neʼe tohi fenei e te tisipulo ko Sakopo: “Ko te fua ʼo te faitotonu ʼe nunusi ʼi te tokalelei maʼa natou ʼae ʼe natou kumi te tokalelei.” (Sakopo 3:18) Kapau ʼe faigataʼa hatatou felogoi lelei mo he tahi ʼi te kokelekasio peʼe ko totatou famili, tou faikole mamahi kia Sehova ke tokoni mai ke tou kumi ia te tokalelei. ʼE tou maʼu anai tona laumalie maʼoniʼoni, ʼae ka tokoni mai ke tou fakaha ia te ʼu kalitate Fakakilisitiano, pea ke tou fiafia ai. Neʼe fakaha e Sesu ia te maʼuhiga ʼae ke tou fai he ʼu fakatuʼutuʼu moʼo kumi te  tokalelei ʼi tana ui fenei: “Kapau ʼe ke ʼaumai tou molaga ki te ʼaletale pea mo ke manatuʼi ʼe mamahi tou tehina kia koe, tuku tou molaga ʼi te muʼa ʼaletale pea ke alu. Fakatokatoka muʼa mo tou tehina, hili ia, pea ke toe liliu mai ʼo momoli tou molaga.”—Mateo 5:23, 24.

18, 19. He koʼe ʼe feala ke fiafia te kau Kilisitiano moka fakatagaʼi natou?

¹⁸ “Manuʼia ia koutou moka laukoviʼi pea mo fakatagaʼi koutou e te hahaʼi pea moka natou loi mo palalau kovi ʼo ʼuhiga mo koutou ʼuhi ko au.” Kotea ʼae neʼe fia ui e Sesu? Neʼe ina toe ui fenei: “Kotou fakafiafia lahi koteʼuhi ʼe lahi tokotou fakapale ʼi selo, he neʼe feia te fakatagaʼi ʼo te kau polofeta ʼi te temi muʼa.” (Mateo 5:11, 12) ʼI te ʼosi pe ʼo tonatou ta pea mo fakatotonu age ke fakagata tanatou faifakamafola, ‘neʼe mavae ai te kau apositolo ʼi te Sanetualio ʼi te fiafia.’ ʼE moʼoni, ʼe mole natou fiafia ʼuhi ko tonatou ta. Kae neʼe natou fiafia “he neʼe ko he pilivilesio kia natou tonatou fakalainoaʼi” ʼuhi ko te huafa ʼo Sesu.—Gaue 5:41.

¹⁹ ʼI te temi nei pe la, ʼe katakiʼi e te hahaʼi ʼa Sehova ʼaki he lotofiafia ia tonatou fakatagaʼi ʼuhi ko te huafa ʼo Sesu. (Lau ia Sakopo 1:2-4.) Ohage pe ko te kau apositolo, ʼe mole tou fiafia moka fakamamahiʼi peʼe fakatagaʼi tatou. Kae kapau ʼe tou nonofo agatonu kia Sehova, ʼe tokoni mai anai ke tou katakiʼi te ʼu aluʼaga ʼaia ʼaki he lototoʼa. Tou vakaʼi pe kotea ʼae neʼe hoko kia Henryk Dornik pea mo tona tehina. ʼI ʼAukusito 1944, neʼe ʼave ia naua ki he lotoʼa fakamamahi. Neʼe ui fenei e te kau fakafeagai: “ ʼE mole tou lava fakalotoʼi naua ke nā fai he meʼa. ʼE nā fiafia ʼi tonā gaohi koviʼi.” Neʼe fakamahino fenei e Henryk: “Neʼe mole au loto ke gaohi koviʼi au, kae neʼe au fiafia he neʼe ko he pilivilesio taku tali mamahi ʼaki he lototoʼa ke au nofo agatonu kia Sehova.” Neʼe ina toe ui fenei: “ ʼAki ʼaku kole mamahi neʼe au fakaovi ai kia Sehova, pea neʼe liliu ai ko hoku Tokoni.”

20. He koʼe ʼe tou fiafia ʼi te tauhi ki “te ʼAtua fiafia”?

²⁰ Tatau aipe pe ʼe tou tau mo te fakataga, te fakafeagai ʼo te famili, te mahaki peʼe ko te vaivai matuʼa, kae ʼe tou fiafia he ʼe tou maʼu te ʼofa ʼo Sehova “te ʼAtua fiafia.” (1 Timoteo 1:11) ʼE tou toe fiafia he ʼe lahi te ʼu aluʼaga fakaofoofo neʼe fakapapauʼi mai e totatou ʼAtua, “ ʼae ʼe mole feala ke loi.” (Tito 1:2) ʼI te temi ʼae ka fakahoko ai e Sehova ʼana fakapapau, ʼe mole tou toe manatuʼi anai te ʼu faigataʼaʼia ʼae ʼe tou tau nei mo ia. ʼI tona fakahagatonu, ko te ʼu tapuakina ʼae ka tou maʼu anai ʼi te Palatiso ʼe fakalaka maumau anai ia ʼi te ʼu faʼahi fuli ʼae neʼe feala ke tou fakakaukau ki ai. ʼEi, ʼe tou “fiafia lahi [anai] i te tokalelei.”—Pesalemo 37:11.