1-2. (1) He koʼe ʼe lelei ke hoko mai ia Alamaketone? (2) Kotea te ʼu fehuʼi ka tou vakaʼi anai ʼi te alatike ʼaeni?

TOKOLAHI te hahaʼi ʼe natou manatu ko “Alamaketone” ʼe ko he tau fakanukeleʼea, peʼe ko he tuʼutamaki fakanatula ʼe ina maumauʼi anai ia te kele katoa. Kae ʼe mole ko te manatu ʼaia ʼe tuʼu ʼi te Tohi-Tapu. ʼE ui ʼi te Tohi-Tapu kua vave hoko mai ia te tau, pea ʼe fua lelei anai tona ikuʼaga maʼa te hahaʼi. ʼE fakahigoa ʼi te Tohi-Tapu ia te tau ʼaia ko Alamaketone pea ʼe iku anai ia ki te fiafia. (Fkha. 1:3) ʼE mole pulihi anai te hahaʼi ʼi Alamaketone, kae ʼe haofaki ai anai natou. ʼO feafeaʼi?

² ʼE fakaha ʼi te Tohi-Tapu ʼe pulihi anai ʼi Alamaketone ia te ʼu puleʼaga fakatagata kae haofaki ia te malamanei. ʼE pulihi anai ia te kau agakovi ʼi te tau ʼaia, kae ʼe haofaki anai ia te kau faitotonu. ʼE toe puipui anai mo te kele ke ʼaua naʼa maumauʼi. (Fkha. 11:18) Ke feala hatatou mahino ki te ʼu aluʼaga ʼaia, ʼe tou vakaʼi anai ʼi te alatike ʼaeni fehuʼi ʼe fa: Kotea ia Alamaketone? Kotea te ʼu aluʼaga ʼe tonu ke hoko ʼi muʼa ʼo te hoko mai ʼo Alamaketone? Kotea ʼae ʼe tonu ke tou fai ke haofaki ai tatou ʼi Alamaketone? Kotea ʼae ʼe tonu ke tou fai ke tou nonofo agatonu ʼo kaku ki Alamaketone?

3. (1) Kotea te fakaʼuhiga ʼo te kupu Alamaketone? (2) Ka tou lau ia Fakaha 16:14, 16 he koʼe ʼe tou iloʼi ko Alamaketone ʼe mole ko he koga meʼa moʼoni ʼi te kele?

³ Lau ia Fakaha 16:14, 16. ʼE ha tuʼa tahi ia te kupu “Alamaketone” ʼi te Tohi-Tapu. Pea ʼe fakaʼuhiga te kupu ʼaia ʼi te Fakahepeleo ko “Moʼuga ʼo Mekito.” (Fkha. 16:16; nota.) Ko Mekito neʼe ko te kolo ʼo Iselaele ʼi te temi muʼa. (Sos. 17:11) Kae ko Alamaketone  ʼe mole ko he koga meʼa moʼoni ʼi te kele. ʼE fakaʼuhiga ia ki te aluʼaga ʼae ʼe fakatahitahi ai “te ʼu hau ʼo te kele katoa” moʼo fakafeagai kia Sehova. (Fkha. 16:14) ʼE toe fakaʼuhiga foki te kupu “Alamaketone” ki te tau ʼae ka hoko ʼi te hili pe ʼo te fakatahitahi ʼa te ʼu hau ʼo te kele. Kae ʼe tou iloʼi feafeaʼi ko Alamaketone ʼe mole ko he koga meʼa moʼoni ʼi te kele? ʼUluaki, ʼe mole he moʼuga ʼi te kele ʼe higoa ko Mekito. Lua, ʼe mole lahi ia te potu fenua ʼae ʼe tuʼu ai te kolo ko Mekito, koia ʼe mole feala ke fakatahitahi ai “te ʼu hau ʼo te kele katoa,” ʼo feia mo ʼanatou kautau pea mo ʼanatou mahafu tau. Tolu, ʼe kamata anai te tau ʼo Alamaketone ʼi te temi ʼae ʼe ʼohofi ai e te ʼu “hau” ia te hahaʼi ʼa te ʼAtua. Kae ʼe mavetevete te ʼu kaugana ʼa Sehova ʼi te kele katoa.

4. He koʼe neʼe fakahigoa e te ʼAtua ia tana tau lahi fakaʼosi ko Mekito?

⁴ He koʼe neʼe fakahigoa e Sehova ia tana tau lahi fakaʼosi ko Mekito? Neʼe tuʼu ia te kolo ko Mekito ʼo ovi ki te potu fenua laulelei ko Siseleele. Pea neʼe lahi te ʼu tau neʼe hoko ʼi te koga meʼa ʼaia. Pea neʼe kua tokoni ia Sehova ki tana hahaʼi ke natou malo ʼi ʼihi ʼi te ʼu tau ʼaia. Ohage la, ko te tau ʼae neʼe hoko ovi ki “te vai o Mekito.” Neʼe tokoni te ʼAtua ki te tuʼi fakamau Iselaele ko Palaki ke malo ʼi te foʼi kautau Kanaane ʼae neʼe takitaki e Sisela. Neʼe fai leva e Palaki pea mo te fafine polofeta ko Tepola he fakamalo kia Sehova ki tana fakahoko he milakulo ke natou malo ai ʼi te tau. Neʼe nā hiva fenei: “Nee tau leva mai te atu lagi, . . . te u fetuu kia Sisela. Nee ave leva natou e te liua ko Kisoni.”—Tfm. 5:19-21.

5. Kotea ʼae ʼe kehekehe ai te tau ʼo Alamaketone pea mo te tau ʼae neʼe fai e Palaki?

⁵ Neʼe fakaʼosi fenei leva e Palaki pea mo Tepola tana hiva: “Ke mamate fena ou fili fuli, io [“Sehova,” MN]! Kae ko natou ae e oofa kia koe, ke natou hage ko te laa, i tana hopo ake i tona gigila katoa.” (Tfm. 5:31) Ka hoko anai ia Alamaketone, ʼe fetauʼaki anai te ʼu fili ʼo te ʼAtua pea mo natou fematematehiʼaki. Kae ʼe haofaki anai ia natou ʼae ʼe ʼoʼofa ʼi te ʼAtua. Kae ʼe ʼi ai pe te kehekehe ʼo te tau ʼae neʼe hoko ʼi te temi ʼo Palaki pea mo te tau ʼo Alamaketone. ʼE mole tau anai te hahaʼi ʼa te ʼAtua ʼi Alamaketone. Pea ʼe mole anai hanatou ʼu mahafu tau. ʼE mole natou hoha anai he ʼe natou falala kia Sehova pea mo tana foʼi tau ʼae ʼi te lagi.—Esa. 30:15; Fkha. 19:11-15.

6. Kotea ʼae ʼe feala ke fai e Sehova ke malo ai ʼi ʼona fili ʼi Alamaketone?

⁶ ʼE malo feafeaʼi anai ia Sehova ʼi ʼona fili ʼi Alamaketone? ʼE feala pe ke fakaʼaogaʼi e Sehova ia meʼa fuli ke malo ʼi ʼona fili. Ohage la ʼe feala ke ina fakahoko he ʼu mafuike, peʼe ko he ʼua maka peʼe ko te mana. (Sopo 38:22, 23; Esk. 38:19-22) ʼE toe feala pe ke ina uga ʼona fili ke natou fetauʼaki. (2 Klk. 20:17, 22, 23) ʼE feala pe ke ina fekauʼi ʼana ʼaselo ke natou olo ʼo matematehi te kau agakovi. (Esa. 37:36) Tatau aipe pe ʼe kotea ʼae ʼe fakaʼaogaʼi e te ʼAtua ki te tau, kae ʼe katoa anai tana malo. ʼE pulihi katoa anai ʼona fili, kae ʼe haofaki anai ia te kau agatonu fuli.—Taag. 3:25, 26.

7-8. (1) Ka tou lau ia 1 Tesalonika 5:1-6, kotea la te logo fakapunamaʼuli ʼe tala anai e te kau takitaki ʼo te ʼu puleʼaga? (2) He koʼe ʼe fakatupu tuʼutamaki ia te loi ʼaia?

⁷ ʼE tonu muʼa ke kalagaʼi e te hahaʼi “tokalelei pea mo fimalie” pea hoki hoko leva “te ʼaho ʼo Sehova.” (Lau ia 1 Tesalonika 5:1-6.) ʼE palalau ʼi te vaega ʼo 1 Tesalonika 5:2 ki te “ ʼaho ʼo Sehova,” pea ʼe fakaʼuhiga ia ki “te toe mamahi lahi.” (Fkha. 7:14) ʼE feafeaʼi hatatou iloʼi te temi ʼae ka kamata anai ia te mamahi lahi ʼaia? ʼE ui ʼi te Tohi-Tapu ʼe tou logo anai ki he logo fakapunamaʼuli, pea ʼe tou iloʼi ai kua vave kamata ia te mamahi lahi.

⁸ Neʼe kua tala fakatomuʼa ʼi te Tohi-Tapu, ʼe tala anai e te kau takitaki ʼo te kele kua maʼu ia te “tokalelei pea mo te fimalie.” Kae he koʼe ʼe  natou tala te faʼahi ʼaia? ʼE kau anai koa te kau takitaki lotu mo natou ʼaia ki te tala ʼo te logo ʼaia? ʼE mole tou iloʼi. Kae kua tou mahino ko te logo ʼaia ʼe ko he loi ʼe haʼu mai te kau temonio. Pea ʼe fakatupu tuʼutamaki, he ʼe tui anai te hahaʼi kua maʼu moʼoni ia te tokalelei, kae ʼe mole natou iloʼi natou, ʼe ʼamanaki kamata ia te toe mamahi neʼe heʼeki sio ki ai he tagata. ʼEi, “ ʼe hoko fakafokifa anai kia natou te fakaʼauha, ohage ko te ʼu mamahi fanau ʼa he fafine ʼe faitama.” Kae ʼe feafeaʼi ki te ʼu kaugana agatonu ʼa Sehova? ʼE lagi natou punamaʼuli anai ʼi te hoko fakafokifa ʼo te ʼaho ʼo Sehova, mai tona aluʼaga ʼae ʼe mole natou iloʼi te ʼaho ʼae ka kamata ai. Kae meʼa lelei he ʼe kua natou teuteu pea mo tokalelei ki te ʼaho ʼaia.

9. ʼE pulihi feafeaʼi anai e Sehova ia te malama ʼa Satana?

⁹ ʼE mole pulihi anai e Sehova ia te malama katoa ʼa Satana ʼi he temi ʼe tahi, ohage ko tana fai ʼi te temi ʼo Noe. ʼE ina ʼuluaki pulihi anai ia Papiloni Lahi, ia te ʼu lotu hala fuli. Hili ia, pea ʼe ina pulihi katoa leva ia te malama ʼa Satana, ʼae ʼe kau ai ʼana kautahi fakapolitike, mo ʼana foʼi kautau solia pea mo ʼana sosiete fakatau koloa. Tou vakavakaʼi te ʼu aluʼaga ʼaia ʼe lua ʼae ʼe tonu ke hoko.

10. Ka tou lau ia Fakaha 17:1, 6 pea mo te kapite 18:24, he koʼe ʼe pulihi anai e Sehova ia Papiloni Lahi?

¹⁰ “Te tautea ʼo te fafine paomutu.” (Lau ia Fakaha 17:1, 6; 18:24.) Neʼe mole fakaʼapaʼapa ia Papiloni Lahi ki te huafa ʼo te ʼAtua. Neʼe lahi te ʼu loi neʼe ina akoʼi ki te hahaʼi ʼo ʼuhiga mo te ʼAtua. Neʼe lagolago ki te kau faipolitike pea mo gaue fakatahi mo te kau takitaki ʼo te ʼu puleʼaga ʼo te kele. Neʼe ina fakapopulaʼi tana hahaʼi pea mo toʼo ʼonatou koloa. Neʼe lahi te hahaʼi neʼe mamate ʼuhi ko te ʼu lotu hala, pea neʼe mamate ai mo ni kaugana ʼa te ʼAtua. (Fkha. 19:2) Kae ʼe pulihi feafeaʼi anai e Sehova ia Papiloni Lahi?

11. Ko ai ia te “manu fekai lanu kula”? Pea ʼe fakaʼaogaʼi feafeaʼi anai e Sehova ia te manu fekai ʼaia moʼo fakahoko tona finegalo kia Papiloni Lahi?

¹¹ ʼE fakaʼaogaʼi anai e Sehova ia te ʼu “tala ʼe hogofulu” ʼo te “manu fekai lanu kula” moʼo fakaʼauha ia “te fafine paomutu.” Ko te manu fekai ʼaia ʼe mole ko he manu moʼoni. ʼE ina fakata ia te Kautahi ʼo te ʼu Puleʼaga (ONU). Kae ko te  ʼu “tala ʼe hogofulu” ʼe natou fakata ia te ʼu puleʼaga ʼae ʼe natou lagolago ki te kautahi ʼaia. ʼE ʼohofi anai e te ʼu puleʼaga ʼaia ia Papiloni Lahi ʼi te temi ʼae neʼe fakatuʼutuʼu ki ai e te ʼAtua. ʼE natou “toʼo anai ʼana meʼa fuli pea mo tuku telefua ia ia,” ko tona fakaʼuhiga ʼe natou toʼo fakamalohi anai ʼona koloa pea mo fakaha ʼana gaue kovi fuli. (Fkha. 17:3, 16) ʼE punamaʼuli anai ia natou fuli ʼae ʼe lagolago ki ai, ʼuhi ko te hoko fakafokifa ʼo tona fakaʼauha, ohage pe neʼe hoko ʼi he ʼaho pe ʼe tahi. Talu mai fualoa mo te ui fenei e te fafine paomutu ʼaia: “ ʼE au ʼafio ohage ko he fineʼaliki, ʼe mole au vitua, pea ʼe mole au lotomamahi anai ʼi he temi.”—Fkha. 18:7, 8.

12. Kotea ʼae ʼe mole fakagafua anai e Sehova ke hoko ki tana hahaʼi? Pea kotea tona tupuʼaga?

¹² ʼE mole tuku anai e te ʼAtua ke pulihi e te ʼu puleʼaga tana hahaʼi. ʼE natou fiameʼameʼa ʼi te fua ʼo te huafa ʼo te ʼAtua pea ʼe natou fakalogo ki tana fakatotonu ʼae ke natou feholaki mai Papiloni Lahi. (Gaue 15:16, 17; Fkha. 18:4) ʼE natou faiga malohi ke natou tokoni ki te hahaʼi ke natou mavae mo natou mai Papiloni Lahi. Koia ʼe mole maʼu anai e te ʼu kaugana ʼa Sehova “he koga ʼo ʼona tautea.” Kae ʼe ʼahiʼahiʼi anai tanatou tui.

13. (1) Ko ai ia Koke? (2) Ka tou lau ia Esekiele 38:2, 8, 9, ko te temi fea ʼae ʼe kaku ai anai ia Koke ki te aluʼaga ʼae ʼe higoa ko Alamaketone?

¹³ Te ʼohofi ʼo Koke. (Lau ia Esekiele 38:2, 8, 9.) Ka pulihi anai te ʼu lotu hala fuli, ʼe kei toe pe anai he lotu ʼe tahi. ʼE hage pe anai te hahaʼi ʼa te ʼAtua ko he fuʼu ʼakau ʼe tuʼu tokotahi ʼi te hili ʼo he afā lahi. Pea ʼe kovi anai te ita ʼo Satana. Koia ʼe ina uga anai ia te kau temonio ke natou fai he ʼu loi peʼe ko he ʼu “folafola ʼuli” ke fakatahitahi ai te ʼu puleʼaga moʼo ʼohofi ia te ʼu kaugana ʼa Sehova. (Fkha. 16:13, 14) Ko te fakatahitahi ʼaia ʼo te ʼu puleʼaga ʼe fakahigoa ko ‘Koke mai te fenua ʼo Makoke.ʼ Ko te temi leva ʼae ʼe natou ʼamanaki ʼohofi ai te hahaʼi ʼa te ʼAtua, kua natou kaku leva ki te aluʼaga ʼae ʼe higoa ko Alamaketone.—Fkha. 16:16.

14. Kotea ʼae ka mahino anai ki ai ia Koke?

¹⁴ ʼE falala anai ia Koke ki tona “nima kakano,” ko tona fakaʼuhiga ʼe falala anai ki ʼana foʼi  kautau. (2 Klk. 32:8) Kae kia tatou, ʼe tou falala tatou kia Sehova totatou ʼAtua, tatau aipe pe ʼe manatu e te ʼu puleʼaga ʼe mole ko he tonu ʼe fakapotopoto. Kotea tona tupuʼaga? Koteʼuhi logo la te malohi ʼo Papiloni Lahi, kae ʼe mole feala anai ke puipui ia ia e ʼona ʼatua mai te “manu fekai” pea mo ʼona “tala ʼe hogofulu.” (Fkha. 17:16) Koia ʼe manatu anai e Koke ʼe faigafua anai tana ʼohofi ia te hahaʼi ʼa Sehova, ohage pe “ko he ao ae ka ina uufi anai te fenua.” (Esk. 38:16) Kae kua vave pe te mahino ʼa Koke neʼe to ia ki he hele. ʼE mahino anai kia ia neʼe tau ia mo Sehova, ohage pe ko Falaone ʼi te Tai Kula.—Eke. 14:1-4; Esk. 38:3, 4, 18, 21-23.

15. Kotea anai ka fai e Sesu ʼi Alamaketone?

¹⁵ ʼE haʼu anai ia Kilisito pea mo ʼana ʼaselo ʼo puipui ia te hahaʼi ʼa te ʼAtua pea mo fakaʼauha ia te ʼu foʼi kautau ʼa Koke. (Fkha. 19:11, 14, 15) Kae ʼe feafeaʼi leva kia Satana, te fili lahi ʼo Sehova? Kotea ʼae ka hoko anai kia ia ʼae neʼe ina fai he ʼu fasituʼu ke fakatahitahi ai te ʼu puleʼaga ki Alamaketone? ʼE li anai e Sesu ia ia pea mo ʼana kau temonio ki te vanu, pea ʼe ina fakamaʼu anai natou ʼi ai lolotoga taʼu ʼe afe.—Fkha. 20:1-3.

16. (1) ʼE feafeaʼi tatatou fakaha ʼe tou “iloʼi te ʼAtua”? (2) He koʼe ʼe lelei ke iloʼi tatou e Sehova ʼi Alamaketone?

¹⁶ ʼE feala pe ke haofaki ia tatou fuli ʼi Alamaketone, pe ʼe kei tou foʼofoʼou peʼe kua fualoa tatatou ʼi te moʼoni. ʼO feafeaʼi? ʼE tonu ke tou fakaha ʼe tou “iloʼi te ʼAtua” pea mo tou “fakalogo ki te logo lelei ʼo ʼuhiga mo totatou ʼAliki ko Sesu.” (2 Tes. 1:7-9) Ka tou iloʼi te ʼAtua, ʼe tou iloʼi ʼana lao, mo te ʼu meʼa ʼae ʼe ina leleiʼia pea mo te ʼu meʼa ʼae ʼe fehiʼa ki ai. ʼE tou toe iloʼi te ʼAtua moka ʼe tou ʼoʼofa, mo fakalogo pea mo atolasio ʼateaina pe kia te ia. (1 Soa. 2:3-5; 5:3) Ka tou fakaha ʼe tou iloʼi te ʼAtua, ʼe tou maʼu ia te pilivilesio ʼae ke ‘iloʼi tatou e te ʼAtua,’ pea ʼe haofaki anai tatou ʼi Alamaketone. (1 Ko. 8:3) Kotea tona tupuʼaga? Koteʼuhi, ka ‘iloʼi e te ʼAtua ia he tahi,’ ko tona fakaʼuhiga ʼe ʼofa ia ia.

17. Kotea ʼe tonu ke tou fai ke tou “fakalogo ki te logo lelei ʼo ʼuhiga mo totatou ʼAliki ko Sesu”?

¹⁷ Ko “te logo lelei ʼo ʼuhiga mo totatou ʼAliki ko Sesu” ʼe ko te ʼu moʼoni fuli ʼae neʼe akoʼi e Sesu pea ʼe tohi ʼi te Tohi-Tapu. ʼE tou fakalogo ki te  logo lelei ʼaia moka tou maʼuliʼi ʼana akonaki. Koia ʼe tonu ai ke tou fakamuʼamuʼa ia te Puleʼaga ʼo te ʼAtua, mo tou maʼuliʼi ʼana lao pea mo fakamafola te logo ʼo tona Puleʼaga. (Mat. 6:33; 24:14) ʼE tonu foki ke tou toe tokoni ki te ʼu tehina fakanofo ʼo Kilisito, ʼae ʼe natou fakahoko ʼanatou gaue maʼuhiga.—Mat. 25:31-40.

18. ʼE fakaha feafeaʼi anai e te ʼu tehina fakanofo ʼa Kilisito tonatou ʼofa ki te tahi ʼu ovi?

¹⁸ Kua vave hoko mai te temi ʼae ʼe toe liufaki anai e te ʼu kaugana fakanofo ʼa te ʼAtua ia te manavaʼofa ʼae neʼe fakaha age e “ ʼihi atu ovi” kia natou. (Soa. 10:16) ʼO feafeaʼi? ʼI muʼa ʼo te kamata ʼo te tau ko Alamaketone, ʼe fakatahitahi anai ia te toko 144 000 ʼi selo. ʼE natou liliu anai ko he ʼu laumalie tuputupua ʼe mole feala anai ke natou toe mamate. ʼE natou kau fakatahi anai mo te ʼu foʼi kautau ʼae ʼi te lagi ʼae ka natou pulihi anai ia Koke pea mo haofaki ia te “toe hahaʼi tokolahi.” (Fkha. 2:26, 27; 7:9, 10) ʼEi, ʼe ko he meʼa lelei te tokoni ʼa te hahaʼi tokolahi ki te ʼu kaugana fakanofo ʼa Sehova ʼi te temi ʼae ʼe kei natou nonofo ai ʼi te kele.

19-20. ʼE feafeaʼi hatatou lava nofo agatonu ʼo kaku ki Alamaketone, logo la ʼotatou faigataʼaʼia?

¹⁹ ʼI te ʼu ʼaho fakamuli pea mo faigataʼa ʼaeni, tokolahi te hahaʼi ʼa Sehova ʼe natou tau mo ni faigataʼaʼia. Kae logo la te faʼahi ʼaia ʼe natou faʼa kataki pe ʼaki he lotofiafia. (Sakp. 1:2-4) Koia ʼe ʼaoga ke tou haga faikole fakamalotoloto ke feala ai hatatou faʼa kataki. (Luka 21:36) ʼE mole tonu pe ke tou faikole, kae ʼe tonu ke tou ako ia te Tohi-Tapu ʼi te ʼaho fuli pea mo metitasio ki ai. ʼE lelei ke tou ako mo te ʼu lea fakapolofeta ʼae ʼe tonu ke hoko ʼi totatou temi. (Pes. 77:13) Kapau ʼe tou fai te ʼu faʼahi ʼaia pea mo lagolago lelei ki te gaue faifakamafola, ʼe malohi tuʼumaʼu anai tatatou tui pea mo tatatou ʼamanaki ki te ka haʼu.

²⁰ Tou fakakaukauʼi age muʼa te toe fiafia ʼe tou logoʼi moka pulihi anai ia Papiloni Lahi pea moka ʼosi anai ia Alamaketone. ʼE toe lahi age anai ia totatou fiafia he kua fakatapuha leva ia te huafa ʼo te ʼAtua pea mo fakalakatonuʼi ia tana pule faʼitaliha. (Esk. 38:23) ʼEi, ko natou fuli ʼae ʼe natou iloʼi ia te ʼAtua, mo natou fakalogo ki tona ʼAlo pea mo natou faʼa kataki ʼo kaku ki te fakaʼosi, ʼe natou fakaʼamu lahi ke hoko mai la ia Alamaketone.—Mat. 24:13.