1. Neʼe feafeaʼi te aluʼaga ʼae neʼe tau mo te apositolo ko Soane ʼi te teitei taʼu 95 H.T.S.?

ʼI TE teitei taʼu 95 H.T.S., * neʼe tau ia Soane mo he aluʼaga faigataʼa ʼaupito. Neʼe kua matuʼa, mo pilisoni ʼi te motu ko Patemosi pea ʼe mahino ia neʼe ko te apositolo pe ʼaia neʼe kei maʼuli. (Fkha. 1:9) Neʼe ina iloʼi neʼe kakaʼi e te kau fakafeagai ia te ʼu kokelekasio ʼaki ʼanatou akonaki hala, pea natou fakatupu ai he ʼu maveuveu. ʼE gata ai anai koa te lotu Fakakilisitiano?—Suta 4; Fkha. 2:15, 20; 3:1, 17.

2. Ka tou lau ia Fakaha 7:9-14, kotea ʼae neʼe sio ki ai Soane ʼo ʼuhiga mo te ka haʼu? (Vakaʼi te pāki ʼo te takafi.)

² Lolotoga te tau ʼa Soane mo te aluʼaga faigataʼa ʼaia, neʼe ha age ki ai te meʼa mai te ʼAtua ʼo ʼuhiga mo te ka haʼu. ʼE sio ia Soane ki he ʼaselo ʼe ina fakatotonu ki he ʼu ʼaselo ʼe toko fa, ke natou taʼofi te ʼu matagi ʼo te fakaʼauha ʼo te mamahi lahi ʼo kaku ki te fakailoga fakaʼosi ʼo he kiʼi kutuga kaugana. (Fkha. 7:1-3) Ko te kiʼi kutuga ʼaia, ʼe ko te toko 144 000 hahaʼi ʼae ka kaugā hau mo Sesu ʼi te lagi. (Luka 12:32; Fkha. 7:4) Pea ʼe sio ia Soane ki he tahi kutuga. ʼE kaugā malie ʼaupito te kutuga ʼaia, koia ʼe ina ui fenei ai: “Koʼeni.” ʼE ina fakaʼaogaʼi te kupu ʼaeni moʼo fakaha ia tana punamaʼuli ki he aluʼaga neʼe mole ʼamanaki ki ai. Kae kotea koa ʼae ʼe sio ki ai ia Soane? ʼE sio ia ki “he toe hahaʼi tokolahi, neʼe mole feala ke lau e he tahi, mai te ʼu puleʼaga fuli, mo te ʼu telepi fuli, mo te ʼu lanu fuli pea mo te ʼu lea fuli, ʼe natou tutuʼu ia muʼa ʼo te hekaʼaga fakahau pea ia muʼa ʼo te Akeno.” (Lau ia Fakaha 7:9-14.) ʼE mahino ia, neʼe fiafia ʼaupito ia Soane ʼi tana iloʼi ʼae ʼe ʼi anai he toe hahaʼi tokolahi ʼi te tauhi moʼoni ʼi te ka haʼu.

3. (1) He koʼe ʼe toe fakamalohiʼi anai tatatou tui e te meʼa ʼae neʼe ha age kia Soane? (2) Kotea anai ka tou vakaʼi ʼi te alatike ʼaeni?

³ ʼE tou tui papau, neʼe toe malohi ai te tui ʼa Soane ʼi te meʼa ʼae  neʼe ha age kia ia. Kae ʼe tonu ke toe malohi age tatatou tui, koteʼuhi ʼe tou maʼuʼuli nei ʼi te temi ʼae ʼe hoko ai te aluʼaga ʼae neʼe sio ki ai Soane. ʼI totatou temi, kua tauhi te toko lauʼi miliona hahaʼi kia Sehova pea ʼe natou maʼu te ʼamanaki ʼae ke natou hao ʼi te mamahi lahi, pea ke natou maʼuʼuli ʼi te kele ʼo talu ai. ʼI te alatike ʼaeni, ʼe tou vakaʼi anai pe neʼe fakaha feafeaʼi e Sehova ki ʼana kaugana pe ko ai ʼae ʼe kau ʼi te toe hahaʼi tokolahi. Neʼe fakaha e Sehova te aluʼaga ʼaia kua hili nei ki ai taʼu ʼe 80 tupu. Pea ʼe tou vakaʼi anai mo te ʼu agaaga ʼe lua ʼo te toe hahaʼi ʼaia. ʼUluaki, ʼe natou kaugā malie ʼaupito, pea lua, ko te hahaʼi ʼae ʼe kau ai, ʼe ʼomai mai te ʼu potu kehekehe ʼo te malamanei. Ko te ʼu agaaga ʼaia, ʼe ina toe fakamalohiʼi anai ia te tui ʼa natou ʼae ʼe fia kau ki te kutuga ʼaia ʼe tapuakiʼi e Sehova.

4. Kotea te moʼoni Fakatohi-tapu neʼe mole mahino ki ai te ʼu lotu ʼae ʼe natou ui ko natou ko he kau Kilisitiano? Kae kotea ʼae neʼe mahino ki ai te kau Ako ʼo Te Tohi-Tapu?

⁴ ʼE ui ʼi te Tohi-Tapu, ʼe maʼuʼuli anai ʼo heʼe gata ia te hahaʼi ʼae ʼe fakalogo ki te ʼAtua. (2 Ko. 4:3, 4) ʼE lahi te ʼu lotu ʼe natou ui ko natou ko he kau Kilisitiano, ʼe mole natou akoʼi te moʼoni Fakatohi-tapu ʼaia. ʼE natou akoʼi, ko te hahaʼi agalelei fuli ʼe natou hake ki selo hili tanatou mamate. Kae, ko te kiʼi kutuga ʼo te kau Ako ʼo Te Tohi-Tapu, ʼae neʼe natou ta Te Tule Leʼo talu mai te taʼu 1879, neʼe mole natou manatu tahi mo te akonaki ʼaia. Koteʼuhi neʼe natou mahino, ʼe toe fakaliliu anai e te ʼAtua ia te kele ko he Palatiso pea ʼe maʼuʼuli anai ia te toko lauʼi miliona hahaʼi ʼae ʼe fakalogo ki te ʼAtua ʼi te kele, kae mole ʼi te lagi. Kae neʼe ʼaoga kia natou ia he temi feʼauga ke natou mahino lelei pe ʼe ko ai ia te hahaʼi fakalogo ʼaia.—Mat. 6:10.

5. Kotea ʼae neʼe mahino ki ai te kau Ako ʼo Te Tohi-Tapu ʼo ʼuhiga mo te toko 144 000?

⁵ Neʼe toe mahino ia te kau Ako ʼo Te Tohi-Tapu, ʼe ʼi ai anai ʼihi hahaʼi ʼe ‘totogi anai mai te kele,’ ke natou kaugā hau mo Sesu ʼi te lagi. (Fkha. 14:3) ʼE kau anai ʼi te kiʼi kutuga ʼaia, ia te toko 144 000 kau Kilisitiano faʼafai neʼe kua natou tauhi agatonu kia Sehova ʼi te kele. Kae ko ai ʼae ʼe kau anai ʼi toe hahaʼi tokolahi?

6. Kotea ʼae neʼe ui e te kau Ako ʼo Te Tohi-Tapu ʼo ʼuhiga mo te toe hahaʼi tokolahi?

⁶ Neʼe sio ia Soane ʼi te meʼa ʼae neʼe ha age kia ia ki te kutuga ʼaia, “ ʼe natou tutuʼu ia muʼa ʼo te hekaʼaga fakahau pea ia muʼa ʼo te Akeno.” (Fkha. 7:9) Koia neʼe manatu ai e te kau Ako ʼo Te Tohi-Tapu, ko te toe hahaʼi tokolahi ʼe natou maʼuʼuli anai ʼi te lagi ohage pe ko te toko 144 000. Kapau la ʼe olo anai te toko 144 000 pea mo te toe hahaʼi tokolahi ʼo maʼuʼuli ʼi te lagi, pea kotea anai te kehekehe ʼo te ʼu kutuga ʼaia ʼe lua? ʼI te manatu ʼa te kau Ako ʼo Te Tohi-Tapu, neʼe kau ʼi te toe hahaʼi tokolahi ia te kau Kilisitiano ʼae neʼe mole fakalogo katoa ki te ʼAtua ʼi tanatou kei ʼi te kele. Neʼe lagi ko he kau Kilisitiano neʼe mulimuli lelei ki te lekula ʼa te Tohi-Tapu, kae neʼe hoko atu pe tanatou kau ʼi te ʼu lotu ʼae ʼe natou ui ko natou ko he kau Kilisitiano. Neʼe ui ai e te kau Ako ʼo Te Tohi-Tapu, neʼe mole malohi te tauhi ʼa te kau Kilisitiano ʼaia ki te ʼAtua, koia neʼe mole feala ai hanatou kaugā ʼafio mo Kilisito. Neʼe mole malohi tonatou ʼofa ʼae ki te ʼAtua. Koia ʼae ʼe feala pe anai ki te toe hahaʼi tokolahi hanatou tutuʼu ia muʼa ʼo te hekaʼaga fakahau, kae ʼe mole natou heheka anai ʼi he ʼu hekaʼaga fakahau.

7. ʼI te manatu ʼa te kau Ako ʼo Te Tohi-Tapu, ko ai anai ʼae ka maʼuʼuli ʼi te kele lolotoga te ʼAfio ʼa Kilisito Ia Taʼu ʼe Afe? Pea neʼe kotea te manatu ʼa te kau Ako ʼo Te Tohi-Tapu ki te ʼu tagata agatonu ʼo te temi muʼa?

⁷ Kae, ko ai ʼae ka maʼuʼuli anai ʼi te kele? Neʼe manatu te kau Ako ʼo Te Tohi-Tapu, ʼe feala anai ki he toko lauʼi miliona hahaʼi ke natou maʼuʼuli ʼi te kele hili te fakatahiʼi ʼo te toko 144 000 pea mo te toe hahaʼi tokolahi ki te lagi. Pea ʼe maʼu anai e te toko lauʼi miliona hahaʼi ʼaia te ʼu tapuakina ʼo te ʼAfio ʼa Kilisito Ia Taʼu ʼe Afe. ʼI tanatou manatu, ʼe mole tauhi anai te toko lauʼi miliona hahaʼi ʼaia kia Sehova ʼi muʼa ʼo te kamata ʼo te ʼAfio ʼa Kilisito.  Neʼe manatu natou, ʼe akoʼi anai e te kutuga ʼaia ke natou fai te finegalo ʼo Sehova lolotoga te ʼAfio ʼa Kilisito Ia Taʼu ʼe Afe. Hili ia, ko natou ʼae ka fakaʼapaʼapa ki te ʼu pelesepeto ʼa Sehova ʼe natou maʼu anai te maʼuli heʼe gata ʼi te kele. Kae ko natou ʼae ka agatuʼu anai, ʼe pulihi anai natou. Neʼe toe manatu te kau Ako ʼo Te Tohi-Tapu, ko natou ʼae ʼe “pule” anai ki te kele lolotoga te ʼu Taʼu ʼe Afe, ʼe natou maʼu anai te fakapale ʼae ko te maʼuli heʼe gata ʼi te fakaʼosi ʼo te ʼu taʼu ʼaia. ʼE kau anai ʼi te ʼu “pule” ʼaia, ni “hahaʼi maʼuhiga ʼo te temi muʼa,” ko tona fakaʼuhiga ko he ʼu tagata agatonu neʼe mamate ʼi muʼa ʼo te mate ʼa Kilisito pea ʼe fakatuʼuake anai natou lolotoga te ʼu Taʼu ʼe Afe.—Pes. 45:17.

8. ʼI te manatu ʼa te kau Ako ʼo Te Tohi-Tapu, neʼe ʼi ai kutuga ʼe fia ʼi te fakatuʼutuʼu ʼa te ʼAtua? Pea ko ai ʼae neʼe kau ai?

⁸ Koia, neʼe manatu te kau Ako ʼo Te Tohi-Tapu, neʼe ʼi ai kutuga ʼe tolu: (1) ko te toko 144 000 ʼae ka kaugā ʼafio mo Sesu ʼi te lagi; (2) ko he toe hahaʼi tokolahi ʼe mole malohi tanatou tauhi ki te ʼAtua, ʼe natou tutuʼu anai ia muʼa ʼo te hekaʼaga fakahau pea ia muʼa ʼo te Akeno; pea (3) ko te toko lauʼi miliona hahaʼi ʼe natou ako anai ke natou fai te finegalo ʼo Sehova ʼi te kele lolotoga te ʼAfio ʼa Kilisito Ia Taʼu ʼe Afe. * Kae ki muli age, ʼaki te tokoni ʼa Sehova, neʼe mahino lelei age leva ia te kau Ako ʼo Te Tohi-Tapu ki te moʼoni Fakatohi-tapu ʼaia.—Taag. 4:18.

9. (1) ʼE feafeaʼi he tutuʼu ʼa te toe hahaʼi tokolahi “ia muʼa ʼo te hekaʼaga fakahau pea ia muʼa ʼo te Akeno” kae ʼe natou ʼi te kele? (2) He koʼe ʼe fakapotopoto te fakamahino foʼou ʼo Fakaha 7:9?

⁹ ʼI te taʼu 1935, neʼe mahino lelei ai leva ia te Kau Fakamoʼoni ʼa Sehova pe ʼe ko ai ʼae ʼe kau ʼi te toe hahaʼi tokolahi ʼae neʼe sio ki ai ia Soane. Neʼe natou mahino, ʼe mole ʼaoga ke hake te toe hahaʼi tokolahi ki te lagi ke natou “tutuʼu ia muʼa ʼo te hekaʼaga fakahau pea ia muʼa ʼo te Akeno.” Kae ʼe ko he ʼu palalau fakata pe ia. Tatau aipe pe ʼe maʼuli anai te toe hahaʼi tokolahi ʼi te kele, kae neʼe feala hanatou tutuʼu “ia muʼa ʼo te hekaʼaga fakahau” ʼaki tanatou tali ia te takitaki ʼa Sehova pea mo natou fakalogo ki tana pule faʼitaliha. (Esa. 66:1) Neʼe feala hanatou tutuʼu “ia muʼa ʼo te Akeno” ʼaki tanatou tui ki te totogi ʼae neʼe ina foaki. ʼE toe ui foki ia Mateo 25:31, 32, ko “te ʼatu puleʼaga” ʼo kau ai mo te kau agakovi, ʼe natou ‘fakatahi anai ia muʼa’ ʼo Sesu ʼae ʼe heka ʼi tona hekaʼaga fakahau fakakololia. Pea ʼe ha lelei mai, ko te ʼatu puleʼaga ʼaia, ʼe mole ʼi te lagi kae ʼi te kele. ʼE ko he fakamahino foʼou fakapotopoto ʼaia ʼo ʼuhiga mo te toe hahaʼi tokolahi. Kua tou mahino lelei leva pe koʼe ʼe mole ui ʼi te Tohi-Tapu ʼe mole hake anai te toe hahaʼi tokolahi ki te lagi. ʼE ko te kutuga pe ʼe tahi ʼae neʼe fakapapauʼi ki ai te maʼuli heʼe gata ʼi te lagi. Ko te toko 144 000 ʼae ʼe “tonu ke natou [kaugā] hau ki te kele” pea mo Sesu.—Fkha. 5:10.

10. He koʼe ʼe tonu anai ke ako e te toe hahaʼi tokolahi ke natou fai te finegalo ʼo Sehova ʼi muʼa ʼo te kamata ʼo te ʼu Taʼu ʼe Afe?

¹⁰ Talu mai te taʼu 1935, neʼe mahino ai te Kau Fakamoʼoni ʼa Sehova pe ʼe ko ai ia te toe hahaʼi tokolahi ʼae neʼe sio ki ai ia Soane. ʼE ko he kutuga ʼo he kau Kilisitiano agatonu ʼe natou maʼu te ʼamanaki ʼae ke natou maʼuʼuli ʼi te kele ʼo talu ai. ʼE tonu anai ki te kau Kilisitiano ʼaia ke natou ako ke natou fai te finegalo ʼo Sehova ʼi muʼa ʼo te kamata ʼo te ʼu Taʼu ʼe Afe, ke feala hanatou hao ʼi te mamahi lahi. ʼE tonu anai ke natou maʼu he tui ʼe malohi ke natou “hao ʼi te ʼu meʼa fuli ʼaia ʼe tonu ke hoko mai” ʼi muʼa ʼo te ʼAfio ʼa Kilisito Ia Taʼu ʼe Afe.—Luka 21:34-36.

11. He koʼe neʼe manatu ʼihi kau Ako ʼo Te Tohi-Tapu ʼe hake anai ni hahaʼi ki te lagi hili te ʼu Taʼu ʼe Afe?

¹¹ Kae ʼe feafeaʼi ki te manatu ʼae ko ʼihi kaugana agatonu ʼa te ʼAtua ʼe natou hake anai ki selo ʼi te ʼosi ʼo te ʼu Taʼu ʼAe ʼe Afe? Neʼe talanoa Te Tule Leʼo ʼo Maio 1913 ki te manatu ʼaia. Neʼe feala pe ke feuiʼaki  fenei e ʼihi: ‘He koʼe ko ʼihi tagata agatonu ʼo te temi muʼa ʼe natou maʼu pe anai te ʼamanaki ʼae ko te maʼuli ʼi te kele? Kae he koʼe ʼe maʼu anai e he kau Kilisitiano ʼe mole malohi tanatou tauhi kia Sehova ia te ʼamanaki ʼae ko te maʼuli ʼi selo?’ Neʼe fakatafito te manatu ʼaia kia manatu hala ʼe lua: (1) ko te toe hahaʼi tokolahi ʼe natou maʼuʼuli anai ʼi te lagi pea (2) ʼe kau anai ʼi te toe hahaʼi ʼaia ia he kau Kilisitiano ʼe mole malohi tanatou tauhi kia Sehova.

12-13. Kotea ʼae ʼe iloʼi e te kau fakanofo mo te toe hahaʼi tokolahi ʼo ʼuhiga mo tonatou fakapale?

¹² Ohage pe ko tatatou kua vakaʼi, kua mahino ia te Kau Fakamoʼoni ʼa Sehova talu mai te taʼu 1935 pe ʼe ko ai ʼae ʼe kau ʼi te toe hahaʼi tokolahi ʼae neʼe sio ki ai Soane. ʼE ko natou ʼae ka hao anai ʼi Alamaketone. ʼE natou ‘ ʼomai anai mai te mamahi lahi’ ʼae ka hoko ʼi te kele, pea ʼe natou kalaga leʼo lahi anai, ʼo natou ui fenei: “ ʼE haʼu totatou haofaki mai totatou ʼAtua, ʼae ʼe heka ʼi te hekaʼaga fakahau, pea mai te Akeno.” (Fkha. 7:10, 14) Pea tahi, ʼe akoʼi mai ʼi te Tohi-Tapu ko natou ʼae ka fakatuʼuake ki te maʼuli ʼi te lagi, ʼe natou maʼu “he meʼa ʼe lelei age” ʼi te hahaʼi tagata mo fafine ʼo te temi muʼa. (Hep. 11:40) Neʼe kamata fakaafe fakafiafia ai e ʼotatou tehina mo tuagaʼane ia te hahaʼi, ke natou tauhi kia Sehova ʼaki te ʼamanaki ʼae ke natou maʼuʼuli ʼi te kele ʼo talu ai.

¹³ ʼE fiafia ʼaupito ia te toe hahaʼi tokolahi ʼo ʼuhiga mo tanatou ʼamanaki. ʼE natou mahino, ko Sehova ʼae ʼe ina fili te koga meʼa ʼae ka tauhi ai ʼana kaugana kia te ia, pe ʼe ʼi te lagi peʼe ʼi te kele. Pea ʼe iloʼi e te kau fakanofo mo te toe hahaʼi tokolahi, ʼe natou maʼu tonatou fakapale ʼuhi pe ko te ʼofa makehe ʼa Sehova. ʼE fakafealagia te faʼahi ʼaia e te totogi ʼae neʼe foaki e Sesu Kilisito.—Loma 3:24.

14. Hili te taʼu 1935, he koʼe neʼe kei feʼekeʼaki e ʼihi pe ʼe hoko feafeaʼi anai te lea fakapolofeta ʼo ʼuhiga mo te toe hahaʼi tokolahi?

¹⁴ Neʼe maʼu e te ʼu kaugana ʼa Sehova ia he fakamahino foʼou ʼo ʼuhiga mo te toe hahaʼi tokolahi ʼi te taʼu 1935. Kae neʼe kei feʼekeʼaki pe e te tokolahi pe ʼe liliu feafeaʼi anai ia natou ʼae ʼe ʼamanaki ki te maʼuli ʼi te kele, ʼo kaugā malie ʼaupito. Tou vakaʼi te faʼifaʼitaki ʼo Ronald Parkin ʼae neʼe kei taʼu 12 ʼi te temi ʼae neʼe maʼu ai te fakamahino foʼou ʼo ʼuhiga mo te toe hahaʼi tokolahi. ʼE ina ui fenei: “ ʼI te temi ʼaia, neʼe ʼi ai teitei kau faifakamafola ʼe toko 56 000 ʼi te malamanei. Pea ko te tokolahi ia natou ʼaia neʼe lagi ko he kau fakanofo. ʼE hage ia neʼe mole kaugā malie ia natou ʼae neʼe kau ʼi te toe hahaʼi tokolahi.”

15. Neʼe feafeaʼi te tanaki ʼo te toe hahaʼi tokolahi?

¹⁵ Kae, ʼi te ʼu taʼu ki muli mai, neʼe fekauʼi te ʼu misionea ki he ʼu fenua kehekehe, pea neʼe kaugā malie ai te ʼu Fakamoʼoni ʼa Sehova. Pea ʼi te taʼu 1968, neʼe kamata ai te polokalama ako Tohi-Tapu ʼaki te tohi La vérité qui conduit à la  vie éternelle. Neʼe faigafua te fakamahino ʼo te ʼu akonaki Fakatohi-tapu. Pea neʼe fia ako ai e te hahaʼi agavaivai ia te moʼoni ʼo laka age ʼi muʼa atu. Ia taʼu ʼe fa, neʼe papitema ai te toko 500 000 tupu. ʼAki te temi, neʼe fakaalu leva ke lavaki te ʼu ʼEkelesia Katolika ʼi Amelika Latina, mo ʼihi fenua. Pea neʼe kua gafua leva tatatou gaue ʼi te Potu Esite ʼo Eulopa pea mo ʼihi potu fenua ʼo Afelika. Neʼe toe papitema ai te toko lauʼi miliona hahaʼi. (Esa. 60:22) ʼE mole heʼeki faʼa fualoa ki ai, neʼe foaki leva e te kautahi ʼa Sehova te tahi ʼu meʼa gaue ʼe fua lelei ʼaupito moʼo tokoni ki te hahaʼi ke natou ako pe ʼe kotea ʼae ʼe akoʼi mai ʼi te Tohi-Tapu. ʼE mahino papau ia, ʼe lolotoga tanaki e Sehova ia he toe hahaʼi tokolahi, ʼae kua toko valu miliona tupu ʼi te temi nei.

16. ʼE ʼomai maifea te toe hahaʼi tokolahi?

¹⁶ ʼI te tohi ʼae e Soane te meʼa ʼae neʼe ha age ki ai, neʼe ina ui, ko te toe hahaʼi tokolahi ʼe ʼomai anai “mai te ʼu puleʼaga fuli, mo te ʼu telepi fuli, mo te ʼu lanu fuli pea mo te ʼu lea fuli.” Neʼe fakaha fakatomuʼa e te polofeta ko Sakalia ia he aluʼaga feia. Neʼe ina tohi fenei: “I te u aho aia, e too anai e ni tagata e toko hogofulu mai te u lea kehekehe fuli o te atu puleaga he tagata Sutea e toko tahi i te tapatapa o tona kofu, o ui: E matou olo anai mo koe, koteuhi kua matou iloi e nofo te Atua mo koutou.”—Sakl. 8:23.

17. Kotea ʼae neʼe fakatuʼutuʼu moʼo tokoni ki te hahaʼi mai te ʼatu puleʼaga pea mo te ʼu lea kehekehe?

¹⁷ ʼE mahino te Kau Fakamoʼoni ʼa Sehova ʼe  tonu ke fakamafola te logo lelei ʼi he ʼu lea kehekehe pea hoki feala ke fakatahiʼi ai he hahaʼi tokolahi mai he ʼu lea kehekehe. Kua taʼu 130 tupu nei te fakaliliu ʼo te ʼu tohi Fakatohi-tapu. Kae ia ʼaho nei, kua fakahoko te faifakaliliu ia lea ʼe lauʼi teau, pea ʼe ko he aluʼaga neʼe mole heʼeki hoko talu mai. ʼO ha mai ai, ʼe lolotoga fakahoko nei e Sehova ia te milakulo ʼaeni: ko te fakatahiʼi ʼo he toe hahaʼi tokolahi mai he ʼu puleʼaga kehekehe. Logo la tanatou ʼomai mai te ʼu fenua kehekehe, kae ʼe natou tauhi ki te ʼAtua ʼi te logo tahi, koteʼuhi kua fakaliliu te Tohi-Tapu mo te ʼu tohi Fakatohi-tapu ia lea kehekehe. Pea ʼe iloa te hahaʼi ʼa Sehova ʼuhi ko tanatou faʼafai ʼi te faifakamafola mo tonatou ʼofa fakatautehina. Ko te ʼu aluʼaga fuli ʼaia, ʼe fakamalohiʼi ai tatatou tui.—Mat. 24:14; Soa. 13:35.

18. (1) Ka tou lau ia Esaia 46:10, 11, he koʼe ʼe mole tou punamaʼuli ki te fakahoko e Sehova te lea fakapolofeta ʼo ʼuhiga mo te toe hahaʼi tokolahi? (2) Kotea te manatu ʼa te toe hahaʼi tokolahi ʼo ʼuhiga mo tanatou ʼamanaki?

¹⁸ ʼE lahi te ʼu tupuʼaga ʼe feala ke tou fiafia ai ʼo ʼuhiga mo te lea fakapolofeta ʼo te toe hahaʼi tokolahi. ʼE mole tou punamaʼuli ki te fakahoko e Sehova te lea fakapolofeta ʼaia ʼi hona aluʼaga fakaofoofo. (Lau ia Esaia 46:10, 11.) ʼE lotofakafetaʼi te toe hahaʼi tokolahi kia Sehova ki te ʼamanaki ʼae ʼe natou maʼu mai ia te ia. ʼO toe feia pe, ʼe mole natou manatu ʼe mole maʼuhiga tanatou ʼamanaki, ʼuhi he ʼe mole fakanofo natou ʼaki te laumalie ʼo te ʼAtua pea ʼe mole natou kaugā hau anai mo Sesu ʼi te lagi. ʼE fakamatala ʼi te Tohi-Tapu, ko te ʼu tagata mo te ʼu fafine tui ʼe tokolahi, neʼe takitaki natou e te laumalie maʼoniʼoni, kae neʼe mole natou kau ki te toko 144 000. Neʼe kau ia natou ʼaia ia Soane Patita. (Mat. 11:11) Neʼe toe kau ai mo Tavite. (Gaue 2:34) ʼE fakatuʼuake anai ia Soane, mo Tavite pea mo ʼihi atu ʼo natou maʼuʼuli ʼi te kele ʼo talu ai. Ko natou fuli ʼaia mo te toe hahaʼi tokolahi, ʼe natou maʼu anai te fealagia ʼae ke natou fakaha kia Sehova ʼe natou fia nonofo agatonu kia te ia pea mo lagolago ki tana pule faʼitaliha.

19. Kotea anai ka tou fai mo kapau ʼe tou mahino ki te meʼa ʼae neʼe ha kia Soane ʼo ʼuhiga mo te toe hahaʼi tokolahi?

¹⁹ Ko te hoki hoko ʼae ʼi te hisitolia ʼo te tagata te fakatahiʼi e te ʼAtua te toko lauʼi miliona hahaʼi, mai te ʼu puleʼaga kehekehe ke natou tauhi fakatahi kia te ia. Pe ʼe tou maʼu te ʼamanaki ki te maʼuli ʼi te lagi peʼe ʼi te kele, ʼe tonu ke tou tokoni ki he hahaʼi kaugā malie ke natou kau ki te toe hahaʼi tokolahi ʼo “ ʼihi atu ovi.” (Soa. 10:16) Kua vave fakahoko pe e Sehova ia te mamahi lahi ʼae ka pulihi ai te ʼu puleʼaga pea mo te ʼu lotu ʼae ʼe natou fakamamahiʼi te hahaʼi. Ko te toe hahaʼi tokolahi katoa ʼe natou maʼu ia he toe pilivilesio fakaofoofo. ʼE natou tauhi anai kia Sehova ʼi te kele ki te heʼe gata.—Fkha. 7:14.