1. Kotea te maʼua ʼae neʼe foaki e Sehova ki te ʼu matuʼā?

NEʼE fakatupu e Sehova ia te ʼuluaki taumatuʼa mo te loto ʼae ke maʼu hanā fanau. Koia ʼae ʼe ui fenei ai ʼi te Tohi-Tapu: “Ko ni foha [peʼe ko te ʼu fanau] ko he tofiga mai [“ia Sehova,” MN].” (Pes. 127:3) Kotea te fakaʼuhiga ʼo te ʼu palalau ʼaia? Kotou fakakaukauʼi age muʼa ʼe tuku atu e hokotou kaumeʼa lelei ia he toe falā lahi. Kotea anai ka kotou logoʼi? ʼE mahino ia, ʼe kotou logoʼi anai ia tana falala mo tana fakamaʼuhigaʼi koutou. Kae ʼe lagi kotou feʼekeʼaki anai pe ʼe feafeaʼi te taupau ʼo te toe falā ʼaia. Ko Sehova, totatou Kaumeʼa lelei, neʼe ina foaki ki te ʼu matuʼā ia he meʼa ʼe maʼuhiga age ʼi te falā. Neʼe ina foaki ki te ʼu matuʼā te maʼua ʼae ke natou tokakaga lelei ki te maʼuli fimalie mo fiafia ʼo ʼanatou fanau.

2. Kotea te ʼu fehuʼi ka tou tali anai ki ai ʼi te alatike ʼaeni?

² Ko ai ʼae ʼe ina toʼo te tonu ʼae pe ʼe maʼu fanau anai he taumatuʼa peʼe kailoa? Kapau koia, pea ko te temi fea anai? Pea kotea ʼae ʼe feala ke fai e te ʼu matuʼā ke maʼuli fiafia ai tanā fanau? Tou vakaʼi he ʼu pelesepeto Fakatohi-tapu ʼe feala ke tokoni ki te ʼu taumatuʼa ke natou toʼo he ʼu tonu fakapotopoto.

3. (1) Ko ai ʼae ka ina toʼo te tonu pe ʼe maʼu fanau anai he taumatuʼa? (2) Kotea te pelesepeto Fakatohi-tapu ʼae ʼe tonu ke manatuʼi e te ʼu kaumeʼa mo te famili ʼo he taumatuʼa?

³ ʼI ʼihi agaʼi fenua, ʼe manatu te hahaʼi ʼe tonu ki te ʼu taumatuʼa ʼae ʼe kei tupulaga ke natou foimo maʼu hanatou ʼu fanau. Pea ʼi ʼihi temi, ʼe fakakinauʼi natou e ʼonatou famili peʼe ko ʼonatou kaumeʼa ke natou maʼu hanatou ʼu fanau. Ko te tehina mai Asia ko Jethro ʼe ina ui fenei: “Ko ʼihi tehina mo tuagaʼane ʼae ʼe maʼu fanau  ʼi toku kokelekasio, ʼe natou uga te ʼu taumatuʼa ʼae ʼe hala fanau ke natou maʼu hanatou ʼu fanau.” Ko te tahi tehina mai Asia ko Jeffrey ʼe ina ui fenei: “ ʼE ui e ʼihi ki te ʼu taumatuʼa hala fanau ʼe mole ʼi ai anai he tahi ʼe tokaga kia natou moka kua natou vaivavai.” Kae ko te taumatuʼa pe ʼae ʼe tonu ke nā filifili pe ʼe nā maʼu fanau anai peʼe kailoa. Ko te maʼua ʼaia ʼa te taumatuʼa. (Kal. 6:5, nota.) ʼE moʼoni, mo kapau neʼe hoki ʼohoana age pe he taumatuʼa, ʼe fakaʼamu ʼonā kaumeʼa peʼe ko tonā famili ke nā maʼuli fiafia. Kae ʼe tonu ke natou mahino fuli ko te taumatuʼa pe ʼae ka nā filifili pe ʼe nā maʼu fanau anai peʼe kailoa.—1 Tes. 4:11.

4-5. Kotea te ʼu fehuʼi ʼae ʼe tonu ke faipalalau ki ai te ʼu taumatuʼa pea ʼi te temi fea? Kotou fakamahino.

⁴ Ko te taumatuʼa ʼae ʼe fia maʼu fanau, ʼe tonu ke nā fai te ʼu fehuʼi maʼuhiga ʼaeni ʼe lua: ʼUluaki, ko te temi fea ʼae ʼe hoki feala ai ke maʼu hatā fanau? Lua, ko tatā toko fia anai? Ko te temi fea ʼae ʼe lelei ai te faipalalau ʼo ʼuhiga mo te ʼu fehuʼi ʼaia? Pea he koʼe ʼe maʼuhiga te ʼu fehuʼi ʼaia?

⁵ ʼI te agamahani, ko ʼihi fakatuʼutuʼu ʼe fai e ʼihi ʼi muʼa ʼo tanatou ʼohoana. Ohage la, ko te toʼo ʼo te tonu ʼae pe ʼe natou maʼu fanau anai peʼe kailoa. Kotea tona tupuʼaga? Koteʼuhi ʼe maʼuhiga ke nā manatu tahi ki te aluʼaga ʼaia. Pea tahi, ʼe feala ai anai ke nā iloʼi pe ʼe nā lavaʼi anai te maʼua ʼae ko te maʼu fanau. Ko ʼihi taumatuʼa ʼe natou filifili ke hoki natou maʼu fanau hili he taʼu ʼe tahi peʼe lua ki tanatou kua ʼohoana, koteʼuhi ʼe ʼaoga ki ai he temi mo he malohi feʼauga. ʼI tanatou manatu, kapau ʼe natou atalitali muʼa, pea ʼe ko he faigamalie ʼaia ke natou feiloʼiʼaki lelei pea mo fakamalohiʼi ʼanatou felogoi fakataumatuʼa.—Efe. 5:33.

6. Kotea te tonu ʼae ʼe toʼo e ʼihi taumatuʼa ʼuhi ko te ʼu temi faigataʼa ʼaeni ʼe tou maʼuʼuli ai?

⁶ Ko ʼihi taumatuʼa ʼe natou fakatotonu ke natou faʼifaʼitakiʼi te ʼu foha ʼe toko tolu ʼo Noe pea mo ʼonatou ʼohoana. Neʼe mole natou maʼu fakavilivili hanatou ʼu fanau. (Sen. 6:18; 9:18, 19; 10:1; 2 Pet. 2:5) Neʼe fakatatau e Sesu totatou temi ki “te temi ʼo Noe.” Pea ʼe mahino papau ia, ʼe tou maʼuʼuli nei ʼi “he ʼu temi makehe pea mo faigataʼa.” (Mat. 24:37; 2 Tim. 3:1) Koia, ko ʼihi taumatuʼa ʼe natou ʼuluaki fakamuʼamuʼa tanatou tauhi ʼae kia Sehova pea hoki natou maʼu leva hanatou ʼu fanau.

7. ʼE tokoni feafeaʼi ki he taumatuʼa te ʼu pelesepeto ʼae ia Luka 14:28, 29 pea mo Taaga Lea 21:5?

⁷ Ka felogoi he taumatuʼa pe ʼe tonu ke maʼu hanā fanau peʼe kailoa pea mo fakafuafua pe ʼe toko fia anai, ʼe ko he aga fakapotopoto tanā mulimuli ki te pelesepeto ʼae ia Luka 14:28, 29 (Lau.) Ohage pe ko te tagata ʼae ʼe ina fia laga  he tule, ʼe fakafuafua anai e te taumatuʼa pe ʼe nā lavaʼi te aluʼaga ʼaia ʼi te faʼahi fakapaʼaga. Ko te ʼu matuʼā ʼae kua maʼu fanau ʼe natou ui ʼe mole ko te falā pe ʼae ʼe ʼaoga moʼo taupau ʼo te ʼu fanau. Kae ʼe toe ʼaoga foki ki ai he temi pea mo he malohi feʼauga. Koia ʼae ʼe maʼuhiga ai ki he taumatuʼa ke nā fai te ʼu fehuʼi ʼaeni: ‘ ʼE tonu koa ke ma gaue tokolua ke maʼu e toma kiʼi famili te ʼu meʼa ʼae ʼe ʼaoga ki ai? ʼE ma manatu tahi koa ʼo ʼuhiga mo te ʼu meʼa ʼae ʼe ʼaoga moʼoni ki toma kiʼi famili? Ko ai anai ka ina taupau ʼamā fanau mo kapau ʼe tonu ke ma gaue tokolua? Pea ko ai ʼae ka ina takitaki ʼanatou manatu mo ʼanatou aga?’ Ko te taumatuʼa ʼae ʼe faipalalau ki te ʼu fehuʼi ʼaia, ʼe nā mulimuli ki te ʼu palalau ʼae ia Taaga Lea 21:5.—Lau.

8. Kotea te ʼu fihifihia ʼae ʼe feala ke tau mo te ʼu taumatuʼa Kilisitiano ʼae ʼe fia maʼu fanau? Pea kotea anai ka fai e he tagata ʼohoana ʼe ʼofa?

⁸ ʼE lahi te temi mo te malohi ʼae ʼe ʼaoga ke fakaʼaogaʼi e te tamai mo te faʼe moʼo taupau ʼanā fanau. Pea ʼe ko he maʼua ʼa te ʼu matuʼā ke natou tokakaga ki ʼanatou fanau. Kae kapau ʼe maʼu e he taumatuʼa hanā ʼu fanau ʼe vaha kovi ʼonatou taʼu, ʼe mole feala leva ke nā tokakaga lelei kia natou takitokotahi. Ko ʼihi matuʼā ʼae neʼe tau mo he aluʼaga feia, neʼe natou ui neʼe mole kei natou iloʼi pe ʼe kotea ʼae ʼe tonu ke natou fai. Pea ʼe feala pe ki he faʼe ke ogosia. ʼE ina maʼu anai koa he malohi feʼauga moʼo ako te Tohi-Tapu, mo faikole pea mo faifakamafola tuʼumaʼu? ʼE toe feala pe foki ke faigataʼa hana mulimuli ki te ʼu fono pea mo maʼu ai he ʼu fua lelei. Kae ʼe mahino ia, ko te tagata ʼohoana ʼae ʼe ʼofa, ʼe ina fai anai ia meʼa fuli ʼe ina lavaʼi moʼo tokoni ki te taupau ʼo ʼanā fanau ʼi te ʼu fono pea mo tonā ʼapi. Ohage la, ʼe feala pe ke ina fai te ʼu gaue ʼae ʼo te loto fale. Pea tahi, ʼe faiga malohi anai ke ina fai tuʼumaʼu he Ako Fakafamili ʼe fua lelei ki tona ʼohoana mo ʼana fanau. Pea ʼe faifakamafola tuʼumaʼu anai mo tona kiʼi famili.

9-10. Kotea ʼae ʼe tonu ke fai e te ʼu matuʼā moʼo tokoni ki ʼanā fanau?

⁹ ʼE feala ke akoʼi feafeaʼi e te ʼu matuʼā ʼanatou fanau ke natou ʼoʼofa kia Sehova? ʼE feafeaʼi hanatou puipui ʼanatou fanau mai te ʼu tuʼutamaki ʼo te malama agakovi ʼaeni? Tou vakaʼi he ʼu aluʼaga ʼe feala ke natou fai.

¹⁰ Kotou kole kia Sehova ke tokoni atu. Kotou fakatokagaʼi te meʼa ʼae neʼe fai e Manoa mo tona ʼohoana ʼi te temi ʼae neʼe nā iloʼi ai ʼe maʼu anai hanā fanau. Neʼe kole mamahi e Manoa kia Sehova ke ina foaki age he ʼu tokoni ʼo ʼuhiga mo te akoako ʼo tanā tamasiʼi.

11. Ka tou lau ia Tui Fakamaau 13:8, ʼe feala ke faʼifaʼitakiʼi feafeaʼi e te ʼu matuʼā ia Manoa?

¹¹ Ko Nihad mo Alma ʼe maʼuʼuli ʼi Bosnie-Herzégovine, neʼe nā faʼifaʼitakiʼi ia Manoa. ʼE nā fakamahino fenei: “Ohage pe ko Manoa, neʼe  ma kole mamahi kia Sehova ke ina akoʼi maua ke ma fakahoko lelei toma ʼuhiga tamai mo faʼe. Neʼe tali mai ia Sehova ki ʼamā faikole ʼaki te Tohi-Tapu, mo ʼatatou tohi, mo ʼatatou fono pea mo te ʼu fakatahi lalahi.”—Lau ia Tui Fakamaau 13:8.

12. Kotea te faʼifaʼitaki neʼe tuku e Sosefo mo Malia ki tanā fanau?

¹² Kotou akoʼi ʼakotou fanau ʼaki takotou faʼifaʼitaki. ʼE moʼoni, ʼe maʼuhiga ʼakotou palalau. Kae ʼe malave tafito age ki ʼakotou fanau ia takotou aga. ʼE tou tui papau, neʼe tuku e Sosefo mo Malia he faʼifaʼitakiʼaga lelei ki ʼanā fanau, ʼo kau ai mo Sesu. Neʼe gaue kinakina ia Sosefo moʼo taupau tona famili. Pea tahi, neʼe fakalotomalohiʼi e Sosefo ia tona kiʼi famili ke natou fakamaʼuhigaʼi te tauhi ʼae kia Sehova. (Tet. 4:9, 10) Neʼe mole fakamaʼua ʼi te Lao ʼa Moisese ke ina ʼave tona famili ki Selusalemi ki te Pasikate. Kae neʼe ina ʼave pe tona famili ki Selusalemi ʼi “te taʼu fuli.” (Luka 2:41, 42) Neʼe lagi manatu ʼihi tamai ʼo tona temi, neʼe faigataʼa tanatou ʼave ʼonatou famili, koteʼuhi neʼe loaloaga pea neʼe totogi kovi. Kae neʼe maʼuhiga kia Sosefo te ʼu meʼa fakalaumalie, pea neʼe ina akoʼi tana fanau ke natou toe fai feia. ʼO toe feia aipe mo Malia, neʼe ina iloʼi lelei te Tohi Tapu. ʼE mahino ia, ʼaki ʼana palalau mo tana aga neʼe akoʼi e Malia ki ʼana fanau ke natou ʼoʼofa ki te Folafola ʼa te ʼAtua.

13. Neʼe faʼifaʼitakiʼi feafeaʼi e he taumatuʼa ia Sosefo mo Malia?

¹³ Ko Nihad mo Alma ʼae neʼe kua tou palalau ki ai, neʼe nā fia faʼifaʼitakiʼi ia Sosefo mo Malia. Neʼe tokoni feafeaʼi te faʼahi ʼaia ki te akoʼi ʼo tanā tama ke ʼofa pea mo tauhi ki te ʼAtua? ʼE nā fakamatala fenei: “ ʼAki toma faʼahiga maʼuli, neʼe ma faigaʼi ke ma fakaha ki tamā tama te ʼu fua lelei fuli ʼae ʼe tou maʼu moka ʼe tou fakaʼapaʼapa ki te ʼu pelesepeto ʼa Sehova.” Neʼe toe ui fenei e Nihad: “Kapau ko koe ko he tahi ʼe agalelei, ʼe mahino papau ia, ʼe toe agalelei anai mo tau fanau.”

14. He koʼe ʼe maʼuhiga ke iloʼi e te ʼu matuʼā te ʼu fakakaugā ʼo ʼanā fanau?

¹⁴ Kotou tokoni ki ʼakotou fanau ke natou filifili honatou ʼu kaumeʼa lelei. ʼE tonu ki te tamai mo te faʼe ke nā iloʼi te ʼu fakakaugā ʼo ʼanā fanau pea mo te ʼu meʼa ʼae ʼe natou fai. Koia ʼe tonu ke nā iloʼi pe ʼe ko ai ʼae ʼe faipalalau mo ʼanā fanau ʼi te fakatahiʼaga ʼi te Neti peʼe ko te telefoni toʼotoʼo. Ko te hahaʼi ʼaia ʼe feala pe ke natou fetogi te faʼahiga manatu pea mo te aga ʼo ʼanā fanau.—1 Ko. 15:33.

15. Kotea te ako ʼe feala ke taʼofi e te ʼu matuʼā mai te faʼifaʼitaki ʼo Jessie?

¹⁵ Kotea ʼae ʼe feala ke fai e te ʼu matuʼā ʼae ʼe mole popoto ʼi te fakaʼaogaʼi ʼo te olotinatea peʼe ko he masini toʼotoʼo? Ko Jessie, ko he pule famili ʼe maʼuli ʼi Philippines ʼe ina ui fenei: “Neʼe mole heʼeki ma iloʼi lelei pe ʼe kotea te ʼu masini toʼotoʼo. Kae neʼe ma fakatokaga pe ki ʼamā fanau te ʼu tuʼutamaki ʼae ʼe feala ke hoko ʼaki te ʼu masini toʼotoʼo.” Neʼe mole tapuʼi e Jessie ke fakaʼaogaʼi e ʼana fanau te ʼu masini toʼotoʼo ʼuhi pe ko tana mole poto ʼi tona fakaʼaogaʼi. Neʼe ina toe ui fenei: “Neʼe au fakalotomalohiʼi ʼaku fanau ke natou fakaʼaogaʼi ʼanatou masini toʼotoʼo moʼo ako ʼo he lea, moʼo teuteuʼi te ʼu fono pea mo lau te Tohi-Tapu ʼi te ʼaho fuli.” ʼI tatatou tuʼasila Fakafalani ʼi te Neti jw.org^®, ʼi te pasina ʼo te kau tupulaga “ Adolescents ” ʼe tou maʼu ai he ʼu tokoni fakapotopoto ʼo ʼuhiga mo te fefaitohiʼaki pea mo te feʼaveʼaki ʼo he ʼu pāki ʼi te Neti. Kapau ko koe ko he tamai peʼe ko he faʼe, neʼe kua kotou lau koa pea mo faipalalau ki ai mo ʼakotou fanau? Neʼe kua kotou sioʼi koa mo natou te ʼu ʼata viteo Te ʼu Masini Toʼotoʼo: Ko Ai ʼAe ʼe Pule? pea mo Fakaʼaogaʼi Fakapotopoto Te ʼu Fakatahiʼaga ʼi Te Neti. * Ko te ʼu tokoni mo te ʼu ʼata  viteo ʼaia, ʼe ʼaoga ki te akoʼi ʼo ʼakotou fanau ke natou fakaʼaogaʼi fakapotopoto te ʼu masini toʼotoʼo.—Taag. 13:20.

16. Kotea ʼae ʼe fai e ʼihi matuʼā, pea kotea ʼona fua lelei?

¹⁶ Tokolahi te ʼu matuʼā, ʼe natou faigaʼi ke fakatahi ʼanatou fanau mo he ʼu tehina mo tuagaʼane ʼe ko he ʼu faʼifaʼitakiʼaga lelei. Neʼe fai feia te taumatuʼa ko N’Déni mo Bomine, ʼae ʼe maʼuli ʼi Côte d’Ivoire. Neʼe nā fakaʼapi tuʼumaʼu te taupau ʼo te siliko. ʼE fakamahino fenei e N’Déni: “Neʼe fua lelei ʼaupito ki tamā tama. Neʼe liliu ʼo pionie pea ʼi te temi nei ko te tehina fetogi ʼo te taupau ʼo te siliko.” ʼE toe feala koa mo koe ke ke tokoni feia ki ʼau fanau?

17-18. Ko te temi fea ʼae ʼe tonu ke kamata akoʼi ai e te ʼu matuʼā ʼanatou fanau?

¹⁷ Kotou akoʼi tautonu ʼakotou fanau. Kapau ʼe kotou akoʼi tautonu ʼakotou fanau, ʼe fua lelei anai kia natou. (Taag. 22:6) Kotou manatuʼi ia Timoteo, ʼae neʼe kaugā faifolau ʼi ʼihi temi mo Paulo. Ko tana faʼe ia Enise mo tana kui ko Loise, neʼe nā akoʼi ia ia ‘talu mai tana kei meamea.’—2 Tim. 1:5; 3:15.

¹⁸ Ko Jean-Claude mo Peace, ko te tahi pe taumatuʼa mai Côte d’Ivoire ko ʼanā fanau ʼe toko ono. Ia ʼaho nei, ko ʼanā fanau ʼaia ʼe toko ono ʼe ʼoʼofa pea mo tauhi kia Sehova. Kotea ʼae neʼe tokoni ki te taumatuʼa ʼaia ke nā maʼu te ʼu fua lelei ʼaia? Neʼe nā faʼifaʼitakiʼi ia Enise mo Loise. Neʼe nā ui fenei: “Neʼe ma akoʼi te Folafola ʼa te ʼAtua ki ʼamā fanau talu mai tanatou kei meamea, hili pe tanatou tutupu.”—Tet. 6:6, 7.

19. Kotea te fakaʼuhiga ʼo te akoʼi ʼo te Folafola ʼa te ʼAtua ki ʼakotou fanau?

¹⁹ Kotea te fakaʼuhiga ʼo te “akoʼi” ʼo te Folafola ʼa te ʼAtua ki ʼakotou fanau? Ia Tetelonome 6:6, 7, ko te kupu Fakahepeleo ʼae neʼe fakaliliu ʼaki te kupu “ako,” ʼe fakaʼuhiga ki te “akoʼi peʼe ko te fakahu ʼo he ʼu manatu ki te ʼatamai ʼo he tahi pea ʼe fai liuliuga ke ʼaua naʼa galoʼi.” Koia ʼe tonu ki te ʼu matuʼā ke natou fakatahi tuʼumaʼu mo ʼanatou fanau moʼo akoʼi kia natou te Folafola ʼa te ʼAtua. ʼI ʼihi temi, ʼe feala pe ke lotovaivai te ʼu matuʼā ʼuhi ko tanatou palalau liuliuga ki he ʼu manatu. Kae ʼe tonu ke natou manatuʼi ʼe ko he faigamalie ʼaia ke natou tokoni ke mahino pea ke maʼuliʼi e ʼanatou fanau te Folafola ʼa te ʼAtua.

20. Kotou fakamahino pe ʼe feala ke fakaʼuhiga feafeaʼi ia Pesalemo 127:4 ki te akoʼi ʼo te ʼu fanau.

²⁰ Kotou iloʼi lelei ʼakotou fanau. ʼE fakatatau ʼi te Pesalemo 127 ia te ʼu fanau ki he ʼu kauʼi nahau. (Lau ia Pesalemo 127:4.) ʼE mole tatau te  ʼu kauʼi nahau fuli, tona faʼahiga faʼu pea mo te ʼu meʼa ʼae neʼe faʼu ʼaki. ʼE toe feia pe, ʼe mole tatau te ʼu fanau fuli. Koia, ʼe tonu ke iloʼi e te ʼu matuʼā te faʼahiga ako ʼae ʼe ʼaoga ki ʼanā fanau takitokotahi. Ko he taumatuʼa ʼe maʼuli nei ʼi Iselaele mo ʼana fanau ʼe toko lua ʼe natou tauhi kia Sehova. Kotea ʼae neʼe tokoni ki te taumatuʼa ʼaia? ʼE nā ui fenei: “Neʼe ma fai te ʼu ako Tohi-Tapu ʼo ʼamā fanau, kae neʼe mole fai fakatahi ʼanā ako.” ʼE moʼoni, ʼe fakalogo pe ki te ʼu pule famili pe ʼe feala peʼe ʼaoga ke mole fai fakatahi te ʼu ako ʼo ʼana fanau.

21. Kotea te tokoni ʼe feala ke maʼu e te ʼu matuʼā mai ia Sehova?

²¹ ʼI ʼihi temi, ʼe manatu te ʼu matuʼā ʼe faigataʼa fau te akoʼi ʼo te ʼu fanau. Kae ʼe tonu ke natou manatuʼi ko te ʼu fanau ʼe ko he meʼa ʼofa mai ia Sehova. Pea ʼe lotolelei tuʼumaʼu ia Sehova ke tokoni ki te ʼu matuʼā. ʼE lotolelei ʼo fagono ki ʼanatou faikole. Pea ʼe tali ki ʼanatou faikole ʼaki te Tohi-Tapu pea mo ʼatatou tohi. ʼE ina toe fakaʼaogaʼi foki he ʼu matuʼā kua fakapotopoto ʼi te kokelekasio, ʼe natou foaki he ʼu tokoni ʼe lelei pea mo natou tuku he faʼifaʼitaki lelei.

22. Kotea te ʼu meʼa ʼae ʼe lelei tukupau ʼe feala ke foaki e te ʼu matuʼā ki ʼanatou fanau?

²² ʼE ui e ʼihi matuʼā, ʼe ʼaoga taʼu ʼe 20 moʼo taupau ia he fanau. Kae ʼe tou fakahoko totatou ʼuhiga tamai mo faʼe ʼi totatou maʼuli katoa. Ko te ʼu matuʼā ʼe natou fia foaki te meʼa ʼae ʼe lelei tukupau ki ʼanatou fanau. ʼE natou ʼuluaki ʼoʼofa anai ki ʼanatou fanau, mo foaki tonatou temi pea mo akoʼi natou ʼo mulimuli ki te Tohi-Tapu. ʼE mole tali fuli anai e te ʼu fanau tonatou faʼahiga akoʼi. Kae tokolahi ia natou ʼae neʼe akoʼi e he ʼu matuʼā ʼe tauhi kia Sehova, ʼe manatu tahi mo te tuagaʼane ʼe maʼuli ʼi Asia ko Joanna Mae. ʼE ina fakamahino fenei: “ ʼE au lotofakafetaʼi lahi ki ʼaku matuʼā ʼo ʼuhiga mo tanā akoʼi au. Pea ʼe toe fakamalo ki tanā akoʼi au ke au ʼofa kia Sehova. Neʼe mole nā foaki mai pe te maʼuli, kae neʼe nā foaki mai ia he maʼuli ʼe ʼi ai tona ʼuhiga.” (Taag. 23:24, 25) ʼE feala pe ke toe manatu feia te toko lauʼi miliona kau Fakamoʼoni ʼa Sehova.