1, 2. Kotea ʼae ʼe fakalotomalohiʼi ai tatou ia Hepeleo 13:4 ke tou fai?

ʼE TOU fiafia fuli ʼi te fakaʼapaʼapaʼi ʼo Sehova. ʼE tuha ia mo te fakaʼapaʼapa pea ʼe ina fakapapau ʼe toe fakaʼapaʼapa mai anai. (1 Samuele 2:30; Taaga Lea 3:9; Fakaha 4:11) Pea tahi, ʼe loto e Sehova ke tou fakaʼapaʼapa ki niʼihi, ohage la ko te hahaʼi ʼae ʼe natou gaue ki te Puleʼaga. (Loma 12:10; 13:7) Kae ʼe ʼi ai te faʼahi ʼe tonu ke tou fakaʼapaʼapa tafito ki ai. ʼE ko te nofo ʼohoana.

² Neʼe ui fenei e te apositolo ko Paulo: “Ke fakaʼapaʼapaʼi e te hahaʼi fuli ia te nofo ʼohoana, pea ke ʼaua naʼa ʼulihi ia te moeʼaga fakataumatuʼa.” (Hepeleo 13:4) Neʼe mole ko he fakatokaga feia pe ʼae neʼe fai e Paulo. Neʼe ina fakatotonu ki te kau Kilisitiano ke natou fakaʼapaʼapa ki te nofo ʼohoana, ko tona fakaʼuhiga, neʼe tonu ke maʼuhiga kia natou ia te nofo ʼohoana. ʼE feia koa ia tau faʼahiga manatu ʼo ʼuhiga mo te nofo ʼohoana, kae tafito ʼo ʼuhiga mo tou maʼuli fakataumatuʼa mo kapau foki kua ke ʼohoana?

3. Kotea te fakatotonu maʼuhiga ʼae neʼe fai e Sesu ʼo ʼuhiga mo te nofo ʼohoana? (Vakaʼi te ʼuluaki pāki.)

³ Kapau ʼe ke fakaʼapaʼapa ki te nofo ʼohoana, ʼe ke mulimuli ai ki te faʼifaʼitaki lelei tukupau ʼa Sesu. ʼI tona fakafehuʼi e te kau  Faliseo ʼo ʼuhiga mo te mavete, neʼe toe toʼo pe e Sesu ia te ʼu palalau ʼae neʼe fai e te ʼAtua ʼi te ʼuluaki ʼohoana. Neʼe ina ui fenei: “Koia, ʼe mavae anai te tagata mai tana tamai pea mo tana faʼe, ʼo nā liliu ai ko he kakano ʼe tahi.” Pea neʼe toe ui fenei e Sesu: “Ko te meʼa ʼae neʼe fakatahiʼi e te ʼAtua, ke ʼaua naʼa veteki e te tagata.”—Lau ia Maleko 10:2-12; Senesi 2:24.

4. Kotea ʼae neʼe loto ki ai Sehova ʼi tana fakatuʼutuʼu ia te nofo ʼohoana?

⁴ Koia neʼe fakaha ai e Sesu, ʼe ko te ʼAtua ʼae neʼe ina fakatuʼutuʼu te nofo ʼohoana pea neʼe tonu ke nofo ʼohoana he taumatuʼa ʼo talu ai. ʼI te temi ʼae neʼe fakatapuʼi ai e te ʼAtua ia Atama mo Eva, neʼe mole ina ui age ʼe feala pe hanā mavete. Kailoa ia, he ʼe ko te loto ʼo te ʼAtua ʼo ʼuhiga mo naua toko lua, ke “nā” maʼuʼuli fakatahi ʼi tonā maʼuli katoa.

5. Kotea te ʼu fua ʼo te mate ki te nofo ʼohoana?

⁵ Kae, ʼi te temi ʼae neʼe agahala ai Atama, neʼe lahi ai leva te ʼu aluʼaga neʼe fetogi. Neʼe kamata mamate ai ia te hahaʼi pea neʼe ʼi ai ʼona nunuʼa ki te nofo ʼohoana. Neʼe fakamahino e te apositolo ko Paulo ki te kau Kilisitiano, ko te mate ʼe ina fakagata ia he nofo ʼohoana pea ʼe feala ki te tagata peʼe ko te fafine ʼohoana ʼae ʼe kei maʼuli ke toe ʼohoana?—Loma 7:1-3.

6. ʼE ha feafeaʼi ʼi te Lao ʼa Moisese ia te faʼahiga manatu ʼa te ʼAtua ʼo ʼuhiga mo te nofo ʼohoana?

⁶ ʼI te Lao ʼae neʼe foaki e te ʼAtua ki te kau Iselaele, neʼe maʼu ai he ʼu faʼahi ʼo ʼuhiga mo te ʼohoana. Ohage la, neʼe feala ki he tagata Iselaele ke maʼuli mo he ʼu fafine ʼe tokolahi. Neʼe ko he agaʼi fenua neʼe kua fai ʼi muʼa ʼo te foaki e te ʼAtua ia te Lao. Kae neʼe fakatuʼu ʼi te Lao ia he ʼu lekula moʼo puipui ia te hahaʼi fafine pea mo te ʼu fanau naʼa gaohi koviʼi. Ohage la, kapau neʼe ʼohoana he tagata Iselaele mo he fafine kaugana pea toe ʼohoana ki muli age mo he tahi fafine, neʼe tonu ke hoko atu ia tana foaki te ʼu meʼa ʼae neʼe ʼaoga ki tona ʼuluaki ʼohoana ohage pe ko tana fai mahani. Neʼe fakamaʼua e te ʼAtua ki te tagata ʼaia ke haga puipui pea mo tokaga ki tona ʼuluaki  ʼohoana. (Ekesote 21:9, 10) ʼE mole tou mulimuli ki te Lao ʼa Moisese ia ʼaho nei. Kae ʼe fakaha mai ai, ʼe maʼuhiga ʼaupito ia te nofo ʼohoana ki te ʼAtua. Pea ʼe mahino ia ʼe tokoni mai te faʼahi ʼaia ke tou fakamaʼuhigaʼi ia te nofo ʼohoana.

7, 8. (1) Kotea ʼae neʼe ui ʼi te Lao ʼo ʼuhiga mo te mavete ʼo mulimuli kia Tetelonome 24:1? (2) Kotea te manatu ʼa Sehova ʼo ʼuhiga mo te mavete?

⁷ Kotea ʼae ʼe ui ʼi te Lao ʼo ʼuhiga mo te mavete? Logo la ʼe mole he temi neʼe loto ai e Sehova ke mavete he taumatuʼa, kae neʼe fakagafua ʼi te Lao ke mavete he tagata Iselaele mo kapau neʼe ina maʼu “i tona ohoana he mea fakaufiufi.” (Lau ia Tetelonome 24:1.) Neʼe mole fakaha ʼi te Lao pe kotea te “mea fakaufiufi” ʼaia. Kae ʼe mahino ia neʼe ko he agahala mamafa pea neʼe mole tonu ke meʼa noaʼi. (Tetelonome 23:14) Meʼa fakaʼofaʼofa foki he ʼe ʼi te temi ʼo Sesu, tokolahi te hahaʼi tagata Sutea neʼe mavete mo ʼonatou ʼohoana “ ʼi he faʼahiga meʼa pe.” (Mateo 19:3) ʼE mahino papau ia, ʼe mole tou fia maʼu ia tanatou faʼahiga manatu.

⁸ ʼI te temi ʼo te polofeta ko Malakia, neʼe ko he agamahani te mavete ʼa he tagata mo tona ʼuluaki ʼohoana ke lagi toe ʼohoana mo he fafine ʼe kei finemui age kae mole tauhi kia Sehova. Kae neʼe fakaha lelei e te ʼAtua ia tana manatu ʼo ʼuhiga mo te mavete. Neʼe ina ui fenei: “ ʼE au fehiʼa ki te mavete.” (Malakia 2:14-16, MN) ʼE mole fetogi te manatu ʼa te ʼAtua ʼo ʼuhiga mo te nofo ʼohoana talu mai te kamataʼaga, ʼi tana ui ʼae ki te tagata ʼe “pipiki leva ia ia ki tona ohoana, pea e na liliu anai ko he sino e tahi.” (Senesi 2:24) Pea neʼe lagolago ia Sesu ki te faʼahiga manatu ʼa tana Tamai ʼo ʼuhiga mo te nofo ʼohoana ʼi tana ui fenei: “Ko te meʼa ʼae neʼe fakatahiʼi e te ʼAtua, ke ʼaua naʼa veteki e te tagata.”—Mateo 19:6.

9. Kotea te fakaʼuhiga ʼo te ʼu palalau ʼa Sesu ia Maleko 10:11, 12?

⁹ ʼE feala pe ke feuiʼaki fenei e ʼihi: ‘ ʼE ʼi ai koa he tupuʼaga ʼe gafua ai ke mavete he Kilisitiano pea mo toe ʼohoana?’ Tou fakatokagaʼi te ʼu palalau ʼaeni ʼa Sesu: “Ko te tagata ʼae ʼe mavete mo tona ʼohoana pea toe ʼohoana mo he tahi age, ʼe tono ia ki tona ʼuluaki ʼohoana, pea kapau leva ʼe mavete he fafine mo tona ʼohoana pea toe ʼohoana mo he tahi age, ʼe tono ia.” (Maleko 10:11, 12; Luka 16:18) ʼE ha lelei mai, neʼe fakaʼapaʼapa ia Sesu ki te nofo ʼohoana, pea neʼe loto ke toe fai feia ʼihi. Kapau neʼe mavete he tagata peʼe ko he fafine mo tona ʼohoana ʼae neʼe agatonu pea toe ʼohoana mo he tahi age, neʼe tono ia. Koteʼuhi, ko te mavete ʼe mole ina fakagata ia te nofo ʼohoana. Kia mata ʼo te ʼAtua, ko te taumatuʼa ʼaia ʼe heʼeki mavete pea ʼe ko he ‘kakano pe ia ʼe tahi.’ Neʼe toe ui e Sesu, kapau neʼe mavete he tagata mo tona ʼohoana ʼae neʼe agatonu, neʼe feala ke tupu ai he tono ʼa te fafine. ʼO feafeaʼi? ʼI te temi muʼa, neʼe feala pe ke manatu ia te fafine ʼae kua mavete ʼe tonu ke toe ʼohoana ʼuhi ko ʼona faigataʼaʼia. Kae kapau neʼe toe ʼohoana te fafine ʼaia, neʼe tatau ʼosi pe leva ia mo te tono.

10. Kotea te tupuʼaga pe ʼe tahi ʼae ʼe feala ke mavete ai he Kilisitiano pea mo toe ʼohoana?

¹⁰ Neʼe akoʼi mai e Sesu, ʼe ʼi ai te tupuʼaga pe  ʼe tahi ʼe feala ke mavete ai he tahi. Neʼe ina ui fenei: “ ʼE au tala atu kia koutou, kapau ʼe mavete he tagata mo tona ʼohoana kaʼe neʼe mole fai e te fafine he ʼu felaveʼi fakasino heʼe ʼaoga, ʼe tono anai mo kapau ʼe toe ʼohoana.” (Mateo 19:9) Neʼe toe talanoa ʼo ʼuhiga mo te manatu ʼaia ʼi tana Akonaki ʼi Te Moʼuga. (Mateo 5:31, 32) ʼI te ʼu lakaga ʼaia, neʼe talanoa ia Sesu ʼo ʼuhiga mo te ʼu “felaveʼi fakasino heʼe ʼaoga,” pea ko te ʼu aga heʼe ʼaoga ʼaia, ʼe kau ki ai te tono, mo te ʼu agapaomutu, mo te ʼu felaveʼi fakasino ʼa he foʼi toko lua ʼe mole heʼeki ʼohoana, mo te faitagata mo te faifafine, pea mo te ʼu felaveʼi fakasino mo he manu. Ohage la, kapau ʼe fai e te tagata ia he aga heʼe ʼaoga, ʼe feala ke toʼo e tona ʼohoana te tonu ʼae ke mavete mo ia peʼe kailoa. Pea kapau leva ʼe mavete te fafine mo tona ʼohoana, kia mata ʼo te ʼAtua ʼe mole kei nā ʼohoana.

11. He koʼe ʼe feala ki he Kilisitiano ke ina filifili ke mole mavete logo la te felaveʼi fakasino heʼe ʼaoga ʼae neʼe fai e tona ʼohoana?

¹¹ Tou fakatokagaʼi neʼe mole ui e Sesu ʼe tonu ki te Kilisitiano ʼae ʼe agatonu ke mavete mo kapau neʼe fai e tona ʼohoana ia he ʼu felaveʼi fakasino heʼe ʼaoga. Ohage la, kapau ko he fafine, ʼe feala ke ina filifili ke mole mavete mo tona ʼohoana logo la te felaveʼi fakasino heʼe ʼaoga ʼae neʼe ina fai. Kotea tona tupuʼaga? ʼE lagi kei ʼofa pe ki tona ʼohoana. Peʼe lotolelei ke fakamolemole ki ai pea mo fia gaue fakatahi mo tona ʼohoana moʼo fakamalohiʼi tonā maʼuli fakataumatuʼa. Pea tahi, kapau ʼe mavete te fafine mo tona ʼohoana kae ʼe mole toe ʼohoana, ʼe tau anai mo he ʼu fihifihia. Ohage la, ʼe feafeaʼi anai hana maʼu te ʼu meʼa ʼae ʼe ʼaoga ki ai ʼi te faʼahi fakasino pea mo te faʼahi ʼo te ʼu felaveʼi fakasino? ʼE feafeaʼi anai mo kapau ʼe ina logoʼi tana nofo tokotahi? Kotea anai te ʼu nunuʼa ʼo te mavete ki ʼana fanau? ʼE toe lahi age anai koa tonatou akoʼi ʼi te moʼoni? (1 Kolonito 7:14) ʼE ha lelei mai, ko te tagata peʼe ko te fafine agatonu ʼae ʼe filifili ke mavete, ʼe feala ke tau mo he ʼu fihifihia.

12, 13. (1) Kotea ʼae neʼe hoko ʼi te maʼuli fakataumatuʼa ʼo Oseo? (2) He koʼe neʼe toe alu ia Oseo ʼo ʼaumai ia Komela ki fale, pea kotea ʼe feala ke tou ako mai te aluʼaga ʼaia?

¹² ʼI te ʼu aluʼaga ʼae neʼe hoko ki te polofeta ko Oseo, ʼe tou iloʼi ai pe kotea te manatu ʼa te ʼAtua ʼo ʼuhiga mo te ʼohoana. Neʼe fakatotonu e te ʼAtua kia Oseo ke alu ʼo ʼohoanaʼi he fafine ʼe higoa ko Komela. ʼE fai anai e te fafine ʼaia ni “felaveʼi fakasino heʼe ʼaoga” pea ʼe ina maʼu anai ‘ni fanau taka.’ Neʼe maʼu e Komela pea mo Oseo ia tanā tama. (Oseo 1:2, 3, MN) Ki muli age, neʼe lagi fanau ia Komela ki he tahi tagata, ʼo ina maʼu ai tana taʼahine pea mo tana tahi tama. Kae logo la te tuʼa lahi ʼo tana hala ki tuʼa, neʼe nofo aipe ia Oseo mo ia. Pea neʼe ina liʼaki leva ia Oseo ʼo liliu ai ko he kaugana. Kae neʼe toe totogi pe ia ia e Oseo. (Oseo 3:1, 2) ʼAki ia tana polofeta ko Oseo, neʼe fakaha e Sehova pe neʼe feafeaʼi ia tana fakamolemole liuliuga ki te puleʼaga ʼo Iselaele ki tana mole nofo agatonu kia te ia pea mo tana tauhi ki ʼihi ʼatua. Kotea te ako ʼe feala ke tou taʼofi mai te maʼuli fakataumatuʼa ʼo Oseo?

¹³ Kapau ʼe fai e he Kilisitiano kua ʼohoana ia he ʼu felaveʼi fakasino heʼe ʼaoga, ʼe maʼua ki tona ʼohoana ʼae neʼe agatonu ke ina toʼo he tonu. Neʼe ui e Sesu, ʼe feala ke mavete pea mo toe ʼohoana. Kae ʼe toe lelei pe foki la mo kapau ʼe fakamolemole ki tona ʼohoana. Neʼe toe alu ia Oseo ʼo ʼaumai ia Komela ki fale. Pea hili ia, neʼe ui age e Oseo kia ia ke mole toe momoe mo he tahi tagata. Ko Oseo mo Komela neʼe ‘mole nā toe fai he ʼu felaveʼi fakasino’ lolotoga he temi. (Oseo 3:3, MN) Kae ki muli age, neʼe toe momoe ia Oseo mo tona ʼohoana.  Neʼe fakata e te aluʼaga ʼaia ia te lotolelei ʼa te ʼAtua ke toe liliu age te kau Iselaele ʼo tauhi kia te ia pea ke natou toe maʼu he ʼu felogoi lelei pea mo ia. (Oseo 1:11; 3:3-5) Kotea ʼe tou ako mai te aluʼaga ʼaia ʼo ʼuhiga mo te ʼohoana ia ʼaho nei? Kapau ʼe toe momoe te fafine peʼe ko te tagata agatonu mo tona ʼohoana ʼae neʼe hala ki tuʼa, ʼe ina fakaha ai kua fakamolemole ki ai. (1 Kolonito 7:3, 5) ʼE mole kei ina maʼu he tupuʼaga ke mavete ai. Pea hili ia, ʼe tonu anai ki te taumatuʼa ke nā gaue fakatahi pea nā fetokoniʼaki ke nā maʼu te manatu ʼa te ʼAtua ʼo ʼuhiga mo te nofo ʼohoana.

14. ʼO mulimuli kia 1 Kolonito 7:10, 11, kotea ʼae ʼe feala ke hoko ʼi he maʼuli fakataumatuʼa?

¹⁴ ʼE tonu ki te kau Kilisitiano fuli ke natou fakaʼapaʼapa ki te nofo ʼohoana ohage pe ko Sehova pea mo Sesu. Kae, ʼi ʼihi temi ʼe mole fai e ʼihi ia te faʼahi ʼaia, koteʼuhi ʼe tou agahala fuli. (Loma 7:18-23) Koia ʼe mole tou punamaʼuli ai ʼo ʼuhiga mo te ʼu faigataʼaʼia ʼae neʼe tau mo te kau ʼuluaki Kilisitiano ʼi ʼonatou maʼuli fakataumatuʼa. Neʼe tohi fenei e te apositolo ko Paulo: “Ke mole mavae te fafine mai tona ʼohoana.” Kae neʼe ʼi ai pe ʼihi ia natou neʼe tahi nofo.—Lau ia 1 Kolonito 7:10, 11.

15, 16. (1) Kotea te fakatuʼutuʼu ʼe tonu ke fai e he taumatuʼa moka nā felaveʼi mo he ʼu faigataʼaʼia fakataumatuʼa, pea kotea tona tupuʼaga? (2) ʼE toe fakaʼuhiga koa te pelesepeto ʼae neʼe tohi e Paulo ki he Kilisitiano ʼe ʼohoana mo he tahi ʼe mole tauhi kia Sehova?

¹⁵ Neʼe mole fakamahino e Paulo pe kotea ʼae neʼe tupu ai te tahi nofo ʼa ʼihi taumatuʼa. Kae ʼe tou iloʼi, neʼe mole hoko te aluʼaga ʼaia ʼuhi ko he fihifihia ohage la ko he aga heʼe ʼaoga neʼe fai e te tagata. Ka na ʼaua la, neʼe maʼu e te fafine ia he tupuʼaga ke mavete ai pea mo toe ʼohoana. Neʼe tohi e Paulo, ko te fafine ʼae ʼe mavae mai tona ʼohoana ʼe tonu “ke nofo tokotahi peʼe ke toe fakatokatoka mo tona ʼohoana.” Koia kia mata ʼo te ʼAtua ʼe kei nā ʼohoana pe. Neʼe ui e Paulo, tatau aipe pe kotea te ʼu faigataʼaʼia ʼae ʼe tau mo he taumatuʼa, kae kapau neʼe mole fai e he tahi ia naua he ʼu felaveʼi fakasino heʼe ʼaoga, ʼe tonu ke nā fakatuʼutuʼu ke nā fakatokatoka ʼonā fihifihia pea ke nā maʼuʼuli fakatahi. ʼE feala hanā kole tokoni ki te kau tagata ʼafeā. Pea ʼe mole tonu anai ki te kau tagata ʼafeā ke natou kau ki te tagata peʼe ki te fafine, kae ʼe natou foaki anai kia naua he ʼu tokoni Fakatohi-tapu ʼe ʼaoga.

¹⁶ Kae, ʼe feafeaʼi mo kapau ʼe ʼohoana he Kilisitiano mo he tahi ʼe mole tauhi kia Sehova? Ka hoko he ʼu fihifihia ʼi tonā maʼuli fakataumatuʼa, ʼe feala koa ke nā tahi nofo? Ohage pe ko tatatou kua vakaʼi, ʼe ui ʼi te Tohi-Tapu ʼe feala ke mavete he taumatuʼa mo kapau neʼe fai e he tahi ia naua he ʼu felaveʼi fakasino heʼe ʼaoga. Kae ʼe mole fakaha mai ʼi te Tohi-Tapu ia te ʼu tupuʼaga ʼae ʼe feala ai ke tahi nofo  ia he taumatuʼa. Neʼe tohi fenei e te apositolo ko Paulo: “Kapau ko he fafine ʼe mole tui tona ʼohoana, pea mo lotolelei ia te tagata ʼaia ke nā nonofo, ke mole mavae te fafine mai tona ʼohoana.” (1 Kolonito 7:12, 13) Ko te ʼu palalau ʼaia ʼe kei ʼaoga pe ia ʼaho nei.

17, 18. He koʼe neʼe filifili e ʼihi Kilisitiano ke natou nonofo mo ʼonatou ʼohoana logo la ʼonatou faigataʼaʼia?

¹⁷ Kae, ʼi ʼihi temi ko te tagata ʼohoana ʼae “ ʼe mole tui” ʼe ina fakaha ʼe mole “lotolelei” ke nofo mo tona ʼohoana. Ohage la, ʼe lagi fakamataku ia tana agamalohi, ʼo manatu ai ʼe feala pe ke tuʼutamaki tona maʼuli. ʼE lagi mole fia tokaga ʼo taupau tona ʼohoana mo tana fanau ʼi te faʼahi fakasino, peʼe ina taʼofi tana tauhi ki te ʼAtua. ʼI te taʼi ʼu aluʼaga ʼaia, ʼe feala ke manatu he fafine Kilisitiano ʼe mole “lotolelei” ke nofo tona ʼohoana mo ia pea ʼe tonu ke mavae mai ia ia tatau aipe pe ʼe mole ui age e tona ʼohoana ke alu. Kae ʼe ʼi ai ʼihi fafine Kilisitiano ʼe tau mo he aluʼaga feia, neʼe natou filifili ke natou nonofo mo ʼonatou ʼohoana. Neʼe natou faʼa kataki pea mo faigaʼi ke natou fakamalohiʼi ʼanatou felogoi fakataumatuʼa. He koʼe neʼe natou fai te faʼahi ʼaia?

¹⁸ Kapau ʼe tahi nofo he taumatuʼa ʼi he aluʼaga feia, ʼe kei nā ʼohoana pe pea ʼe nā felaveʼi anai mo te ʼu faigataʼaʼia ʼae neʼe tou talanoa ki ai ʼi muʼa atu. Neʼe foaki mai e te apositolo ko Paulo ia te tahi tupuʼaga ke nonofo fakatahi ai he taumatuʼa. Neʼe ina tohi fenei: “Ko te tagata ʼae ʼe mole tui ʼe maʼoniʼoni ia ʼuhi ko tona ʼohoana, pea ko te fafine ʼae ʼe mole tui ʼe maʼoniʼoni ia ʼuhi ko te tehina, pea ʼe feala ai ke maʼoniʼoni ʼakotou fanau kaʼe mole natou heʼe maʼa.” (1 Kolonito 7:14) Tokolahi te kau Kilisitiano neʼe natou filifili ke natou nonofo mo ʼonatou ʼohoana ʼae ʼe mole tauhi kia Sehova logo la ʼonatou faigataʼaʼia. Pea neʼe fiafia tafito ʼihi ʼi tanatou fai te sakilifisio ʼaia he ʼe ki muli age, neʼe liliu ʼonatou ʼohoana ko he ʼu Fakamoʼoni ʼa Sehova.—Lau ia 1 Kolonito 7:16; 1 Petelo 3:1, 2.

19. He koʼe ʼe kaugā malie te kau Kilisitiano ʼae ʼe fua manuʼia ʼonatou maʼuli fakataumatuʼa?

¹⁹ Neʼe foaki mai e Sesu ia he ʼu tokoni ʼo ʼuhiga mo te mavete pea neʼe foaki mai e Paulo ia he ʼu tokoni ʼo ʼuhiga mo te tahi nofo. Neʼe nā loto ke fakaʼapaʼapa te ʼu kaugana fuli ʼa te ʼAtua ki te nofo ʼohoana. Ia ʼaho nei ʼi te malamanei katoa, ʼe kaugā malie te kau Kilisitiano ʼae ʼe natou fiafia ʼi ʼonatou maʼuli fakataumatuʼa. ʼE mahino ia ʼe lahi te ʼu taumatuʼa ʼe ke iloʼi ʼe maʼuli fiafia ʼi tou kokelekasio. Ko he ʼu tagata ʼe natou ʼoʼofa ki ʼonatou ʼohoana pea mo he ʼu fafine ʼe natou fakaʼapaʼapa ki ʼonatou ʼohoana. Ko natou fuli ʼaia, ʼe natou fakaha ʼe feala ke tologa pea mo fakaʼapaʼapaʼi ia te nofo ʼohoana. Pea ʼe tou fiafia he ʼe fakamoʼoni ia te ʼu toko lauʼi miliona taumatuʼa ki te ʼu palalau ʼaeni ʼa te ʼAtua: “Koia, ʼe mavae anai te tagata mai tana tamai pea mo tana faʼe pea ʼe pipiki anai ki tona ʼohoana, ʼo nā liliu ai ko he kakano ʼe tahi.”—Efeso 5:31, 33.