1. Kotea ʼae neʼe fai e Sehova maʼa koe?

NEʼE feafeaʼi tau liliu ko he Fakamoʼoni ʼa Sehova? Neʼe lagi ke logo ki te logo lelei mai tau ʼu matuʼā, peʼe ʼi tau fale gaue, peʼe ʼi tau fale ako, peʼe ko he ʼu fakamoʼoni ʼa Sehova neʼe olo atu ki tou ʼapi. (Mko. 13:10) Hili ʼaia, neʼe fakaʼaogaʼi he tahi tona malohi mo tana temi moʼo fai tau ako. ʼI tau ako ʼaia, neʼe ke liliu ai ʼo ʼofa kia Sehova, pea neʼe ke iloʼi ai ʼe ʼofa ia koe. Neʼe taki mai koe e Sehova ki te moʼoni, pea ʼi tau liliu leva ʼae ko he tisipulo ʼa Sesu Kilisito, kua ke maʼu ai te ʼamanaki ke ke maʼuli heʼe gata. (Soa. 6:44) ʼE mahino ia, ʼe ke fakamalo kia Sehova, ʼi tana fakaʼaogaʼi he tahi ke ina akoʼi atu ia te moʼoni, pea mo tana tali ʼae ke ke liliu ko Hana kaugana.

2. Kotea ʼae ka tou vakaʼi ʼi te alatike ʼaeni?

² ʼI tatatou kua iloʼi leva ia te moʼoni, ʼe ko hotatou pilivilesio ia tatatou tokoni ki te hahaʼi ke natou haʼele tahi mo tatou ʼi te ala ʼae ʼe ina taki ki te maʼuli. ʼE lagi kua faigafua hatatou faifakamafola ʼi te ʼu ʼapi, kae ʼe faigataʼa hatatou fai ni ako Tohi-Tapu. ʼE ko tau manatu koa ʼaia? Kapau koia, ʼe lagi ke leleiʼia anai te ʼu tokoni ʼae ʼe foaki mai ʼi te alatike ʼaeni. ʼE tou vakaʼi anai pe ʼe kotea ʼae ʼe ina uga tatou ke tou fai ni tisipulo. ʼE tou toe vakaʼi anai pe ʼe feafeaʼi hatatou tauʼi he ʼu fihifihia ʼe tupu ai hatatou mole fia fai he ako Tohi-Tapu. Kae tou vakaʼi muʼa pe ʼe koʼe ʼe tonu ke tou fakamafola te logo lelei ki te hahaʼi, pea mo toe akoʼi natou.

3. He koʼe ʼe tou faifakamafola?

³ ʼI te kei nofo ʼa Sesu ʼi te kele, neʼe ina foaki age ki ʼana tisipulo ni gaue ʼe lua. Neʼe ina ʼuluaki ui age ke natou fakamafola  te logo lelei ʼo te Puleʼaga, pea mo fakaha age pe ʼe feafeaʼi tona fai. (Mat. 10:7; Luka 8:1) Ohage la, neʼe ina akoʼi age pe ʼe kotea ʼae ʼe tonu ke natou fai moka tali e te hahaʼi, peʼe moka natou fakafisi. (Luka 9:2-5) Neʼe ina toe fakakikite ko ʼana tisipulo ʼe natou faifakamafola anai ki ni hahaʼi tokolahi, pea ʼi he ʼu koga meʼa kehekehe, ʼi tana ui ʼae ʼe natou faifakamafola anai ki te atu puleʼaga. (Mat. 24:14; Gaue 1:8) Tatau aipe pe ʼe tali e te hahaʼi peʼe kailoa ia tatatou logo, kae neʼe fakatotonu e Sesu ki ʼana tisipulo ke natou palalau ki te hahaʼi ʼo ʼuhiga mo te Puleʼaga ʼo te ʼAtua, pea mo te ʼu gaue ʼae ka ina fakahoko anai.

4. Kotea te tahi gaue ʼe tonu ke tou fai ʼo mulimuli kia Mateo 28:18-20?

⁴ Kotea te lua gaue ʼae neʼe fakatotonu e Sesu ki ʼana tisipulo ke natou fai? Neʼe ina ui age kia natou ke natou akoʼi te hahaʼi ke natou mulimuli ki te ʼu meʼa fuli ʼae neʼe ina fakatotonu age. Kae ʼe lagi manatu anai ʼihi, neʼe fai pe e Sesu te fakatotonu ʼae ke faifakamafola pea mo akoʼi te hahaʼi ki ʼana ʼuluaki tisipulo. Kae ʼe moʼoni koa te faʼahi ʼaia? Kailoa. He neʼe ui e Sesu ko te gaue maʼuhiga ʼaia, ʼe hoko atu anai ʼo kaku ki totatou temi, “ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaeni.” (Lau ia Mateo 28:18-20.) Neʼe lagi foaki e Sesu te gaue ʼaia ʼi te temi ʼae neʼe ha ai ki te toko 500 tupu tisipulo. (1 Ko. 15:6) Pea ʼi te ʼu meʼa ʼae neʼe fakaha e Sesu kia Soane, neʼe ina ui lelei ai ko ʼana tisipulo fuli ʼe tonu ke natou akoʼi te hahaʼi ke natou iloʼi ia Sehova.—Fkha. 22:17.

5. ʼO mulimuli kia 1 Kolonito 3:6-9, kotea te fakata neʼe fakaʼaogaʼi e Paulo ke fakaha ai te pikipikiga ʼo te faifakamafola pea mo te akoʼi ʼo te hahaʼi?

⁵ Neʼe fakata e te apositolo ko Paulo ia te gaue ʼae ko te fai ʼo he ʼu tisipulo ki te tokaga ʼa he tahi ki te tuputupu ake ʼa he fuʼu ʼakau. Neʼe ina fakaha ai ko tatatou gaue ʼe mole gata pe ki te to ʼo te ʼu pulapula. Neʼe ina fakamanatuʼi fenei age ki te kau Kolonito: “Neʼe au to, pea neʼe fakavai e Apolose . . . Ko koutou ko te gaueʼaga ʼa te ʼAtua.” (Lau ia 1 Kolonito 3:6-9.) ʼI tatatou gaue ʼi “te gaueʼaga ʼa te ʼAtua,” ʼe tou to te pulapula moka tou faifakamafola. Pea ʼe mole gata ai, kae ʼe tou fakavai te ʼu pulapula ʼaia moka tou akoʼi te hahaʼi, pea mo vakaʼi tanatou tuputupu. (Soa. 4:35) Kae, ʼe tou iloʼi ʼe ko te ʼAtua ʼae ʼe ina fakatuputupu te pulapula, ko tona fakaʼuhiga, ʼe ko ia ʼae ʼe ina taki mai he tahi kia te ia.

6. Ka tou akoʼi te Tohi-Tapu ki te hahaʼi, kotea ʼae ʼe tonu ke tou fai?

⁶ ʼE tou kumi te hahaʼi ʼae ʼe “lelei ʼonatou loto ke natou maʼu te maʼuli heʼe gata.” (Gaue 13:48) Ke feala hanatou liliu ko ni tisipulo, ʼe tonu ke tou tokoni (1) ke natou mahino ki te ʼu meʼa ʼae ʼe natou ako ʼi te Tohi-Tapu, (2) ke natou tui ki ai, pea (3) ke natou maʼuliʼi. (Soa. 17:3; Kol. 2:6, 7; 1 Tes. 2:13) Ko te ʼu tehina mo tuagaʼane fuli ʼo te kokelekasio ʼe feala ke natou tokoni ki he ako ʼaki tanatou ʼoʼofa ʼae kia ia, pea mo fakatalitali ia ia ʼi te ʼu fono. (Soa. 13:35) Ko ia ʼae ʼe ina fai tana ako ʼe lahi anai hona temi pea mo tona malohi moʼo tokoni ki ai ke ina liʼaki he ʼu aga, mo he ʼu akonaki neʼe tui malohi ki ai. (2 Ko. 10:4, 5) ʼE lagi ʼe ʼaoga anai ni mahina moʼo tokoni ki ai ke ina fai te ʼu fetogi ʼaia, ia muʼa ʼo tona papitema. Kae ʼe fua lelei anai ki ai.

7. He koʼe ʼe tou faifakamafola ki te hahaʼi pea mo akoʼi natou?

⁷ He koʼe ʼe tou faifakamafola ki te hahaʼi pea mo akoʼi natou? ʼUluaki, he ʼe tou ʼoʼofa  ia Sehova. Pea ʼe ke fakaha tou ʼofa ʼaia, moka ʼe ke faiga ke ke fakalogo ki te fakatotonu ʼae ke ke faifakamafola pea mo fai ni tisipulo. (1 Soa. 5:3) Kae ʼe lagi neʼe mole faigafua ia tau fakalogo ki te fakatotonu ʼaia, he neʼe ke mataku ʼi tau fai tau ʼuluaki matapa. Kae neʼe ke iloʼi neʼe ko te gaue ʼaia neʼe loto e Sesu ke ke fai, pea neʼe ke fakalogo ki ai. ʼAki te temi, kua faigafua leva tau faifakamafola. Pea ʼe feafeaʼi moka ʼe tonu leva ke ke fai hau ako Tohi-Tapu? ʼE ke tuʼania anai koa? Mahalo ia. Kae kapau ʼe ke kole kia Sehova ke ina foaki atu te lototoʼa moʼo kamata hau ako Tohi-Tapu, ʼe ina fakalotomalohiʼi anai tau fia fai ni tisipulo.

8. ʼO mulimuli kia Maleko 6:34, kotea ʼae ʼe ina toe uga tatou ke tou akoʼi te hahaʼi?

⁸ Lua, ko te ʼofa ʼae ki te hahaʼi ʼe ina uga ai tatou ke tou akoʼi te moʼoni kia natou. Ohage la, ko Sesu mo ʼana tisipulo neʼe natou gaʼegagaʼe, he neʼe lahi tanatou faifakamafola, pea neʼe ʼaoga kia natou ke natou malolo. Kae neʼe muliʼi natou e te hahaʼi kaugamalie. Neʼe ʼofa ia Sesu ki te hahaʼi ʼaia, pea neʼe “lahi te ʼu meʼa” ʼae neʼe ina akoʼi kia natou. (Lau ia Maleko 6:34.) Logo la tona gaʼegaʼe kae neʼe hoko atu pe e Sesu tana gaue kinakina. Kotea tona tupuʼaga? Neʼe mahino ia Sesu ki te mamahi ʼo te hahaʼi, he neʼe mole he tahi moʼo fakafimalieʼi natou. Koia ʼae neʼe fia tokoni ai kia natou. ʼO toe feia pe mo te hahaʼi ʼi te temi nei. ʼE natou hage mai ʼe natou fiafia, kae ʼe natou hage ko ni ovi kua hehe, ʼe mole ʼi ai honatou tagata tauhi ovi moʼo takitaki ʼo natou. Neʼe ui e te apositolo ko Paulo, ko te ʼu hahaʼi ʼaia ʼe mole natou iloʼi ia te ʼAtua, pea ʼe mole honatou ʼamanaki. (Efe. 2:12) ʼE natou olo ʼi “te ala ʼae ʼe ina taki ki te fakaʼauha.” (Mat. 7:13) Ka tou fakakaukauʼi te ʼaoga ʼaupito ki te hahaʼi ke natou iloʼi ia te ʼAtua, ʼe uga ai tatou e totatou ʼofa, pea mo totatou manavaʼofa ke tou tokoni kia natou. Pea ʼe feala ke tou fai te faʼahi ʼaia, moka ʼe tou fai hanatou ako Tohi-Tapu.

9. ʼO mulimuli kia Filipe 2:13, ʼe feafeaʼi te tokoni atu ʼa Sehova?

⁹ ʼE lagi ʼe mole ke fia kole age ki he tahi ke fai hana ako, he ʼe ke iloʼi ʼe ʼaoga anai kia koe he temi moʼo teuteuʼi, pea mo fai te ako. Kapau koia, fakaha kia Sehova. (Lau ia Filipe 2:13.) Neʼe ui e te apositolo ko Soane ko te ʼAtua ʼe ina tali te ʼu faikole ʼae ʼe mulimuli ki Tona finegalo. (1 Soa. 5:14, 15) Koia, ke ke tui papau ʼe tokoni atu anai ia Sehova ke ke fia fai ni tisipulo.

10-11. Kotea ʼae ʼe feala ke faigataʼa ai hatatou fai he ako Tohi-Tapu?

¹⁰ ʼE tou iloʼi te maʼuhiga ʼae ke tou akoʼi te hahaʼi. ʼE lagi faigataʼa logo la tatatou loto ʼae ke lahi age tatatou kau ki ai. Kae ʼe tonu ke tou tauʼi te tahi ʼu faigataʼaʼia. Tou vakaʼi pe ʼe kotea te ʼu faigataʼaʼia ʼaia, pea mo feafeaʼi hatatou lava tauʼi.

¹¹ ʼE lagi tou manatu ʼe mole kei lahi te ʼu gaue ʼae ʼe feala ke tou fai. Ko ʼihi kau faifakamafola kua matutuʼa, peʼe kua mahahaki. Kapau ʼe ke tau mo he aluʼaga feia, tou vakaʼi te meʼa ʼae neʼe hoko ʼuhi ko te taʼi mahaki COVID-19. Neʼe tou iloʼi ai ʼe feala ke tou kamata he ʼu ako Tohi-Tapu, ʼaki te telefoni peʼe ko te ʼu kiʼi masini toʼotoʼo. Koia, ʼe feala ke ke kamata pea mo fai he ako Tohi-Tapu ʼi tou ʼapi, ʼae ʼe ke fimalie ai. Pea ko ʼihi ʼe natou fia ako te Tohi-Tapu, kae ʼe natou maʼumaʼua ʼi te temi ʼae ʼe olo age ai te ʼu tehina mo tuagaʼane ki ʼonatou ʼapi. Kae ʼe natou ava pe natou ʼi te pogipogi uhu, peʼe ʼi te afiafi. ʼE ko te tahi meʼa lelei la ʼaia he ʼe lagi feala ai ke ke fai he  ako Tohi-Tapu ʼi te ʼu temi ʼaia. Neʼe akoʼi e Sesu ia Nikotemo ʼi te poʼuli, he neʼe ko te temi ʼaia neʼe leleiʼia e Nikotemo.—Soa. 3:1, 2.

12. Kotea ʼae ka tokoni atu ke ke tui papau ai ʼe ke poto pe ʼi te fai he ako Tohi-Tapu?

¹² ʼE lagi tou manatu tatou ʼe mole tou maʼu he poto feʼauga moʼo fai he ako Tohi-Tapu. Kapau ko tau manatu ʼaia, tou vakaʼi ni faʼahi ʼe tolu ʼe tokoni atu ke ke lava fai he ako Tohi-Tapu. ʼUluaki, kia Sehova ʼe ke poto pe koe ʼi te taki he ako Tohi-Tapu. (2 Ko. 3:5) Lua, ko Sesu ʼae ʼe ina maʼu “te pule katoa ʼi te lagi pea mo te kele,” neʼe ina fakatotonu atu ke ke akoʼi te hahaʼi. (Mat. 28:18) Pea tolu, ʼe feala ke tokoni atu ia Sehova, pea mo ʼou tehina mo tuagaʼane. Neʼe tokoni Sehova kia Sesu ke ina iloʼi te ʼu palalau neʼe tonu ke ina fai. (Soa. 8:28; 12:49) Pea ʼe toe tokoni anai kia koe. ʼE feala ke ke kole ki te tehina ʼae ʼe ina taupau tau kutuga faifakamafola, peʼe ki he pionie, peʼe ko he tehina peʼe ko he tuagaʼane faiva ke tokoni atu ke ke kamata he ako Tohi-Tapu. ʼE feala ke ke kauga olo mo he tahi ia natou ʼaia ʼo fai hanatou ako Tohi-Tapu, ke feala hau liliu ko he faiako ʼe lelei age.

13. He koʼe ʼe tonu ke tou mulimuli ki te ʼu fetogi foʼou ʼo ʼuhiga mo te fai ʼo he ako?

¹³ ʼE lagi faigataʼa kia tatou hatatou mulimuli ki te fetogi ʼo he ʼu faʼahiga fai ʼo te gaue ʼaki he ʼu meʼa gaue ʼe foʼou. Kua fetogi tatatou faʼahiga fai ʼo te ʼu ako Tohi-Tapu. ʼAki tatatou fakaʼaogaʼi te tohi ako foʼou Ke Ke Fiafia ʼo Heʼe Gata, ʼe fetogi ai tatatou faʼahiga teuteuʼi pea mo fai ʼo te ako Tohi-Tapu. ʼE mole kei lahi te ʼu palakalafe ʼae ʼe tou lau, kae ʼe lahi age tatatou faipalalau mo ia ʼae ʼe ako. ʼI tatatou fai te ako ʼe lahi age tatatou fakaʼaogaʼi te ʼu ʼata viteo, pea mo te meʼa gaue ohage ko te JW Library^®. Kapau ʼe mole faigafua tau fakaʼaogaʼi te ʼu meʼa gaue ʼaia, kole tokoni ki he tahi. ʼE moʼoni, ʼe faigataʼa te fetogi ʼo hatatou agamahani pea ke tou mulimuli ki he ʼu faʼahiga fai ʼe foʼou. Kae ʼaki te tokoni ʼa Sehova, pea mo te ʼu tehina mo tuagaʼane, ʼe feala anai hau fakamamahani mo te ʼu fetogi ʼaia. Pea ʼe lahi age anai tau fiafia ʼi te fai ʼo he ʼu ako Tohi-Tapu. Ohage ko tona ui e te tehina pionie, ko te faʼahiga fai ʼaia ʼo te ako, ʼe “fakafiafiaʼi ai ia ia ʼae ʼe ako, pea mo ia ʼae ʼe ina fai te ako.”

14. Kotea ʼe tonu ke tou manatuʼi moka ʼe tou maʼuʼuli ʼi he koga meʼa ʼe mole tali e te hahaʼi tatatou logo? Pea ʼe fakalotomalohiʼi feafeaʼi tatou ia 1 Kolonito 3:6, 7?

¹⁴ ʼE lagi ʼe tou maʼuʼuli ʼi he koga meʼa ʼe mole faigafua te kamata ʼo he ako Tohi-Tapu. ʼE lagi mole fia tokagaʼi e te hahaʼi te logo ʼae ʼe tou fakamafola, peʼe natou fakafeagai mai. Kotea ka tokoni mai ke mole tou lotovaivai? Ke ke manatuʼi ʼe feala pe ʼi he ʼaho, ke fetogi te aluʼaga ʼa te hahaʼi. (Mat. 5:3) Ko ʼihi ʼi te agamahani neʼe mole natou tali ʼatatou tohi. Kae ki muli age, neʼe natou tali leva hanatou ako Tohi-Tapu. Pea ʼe tou toe iloʼi ko Sehova ʼe ko te “Pule ʼo te taʼukai.” (Mat. 9:38) ʼE ina loto ke tou haga to pea mo fakavai, pea ʼe ko Ia leva ʼae ʼe ina fakatuputupu. (1 Ko. 3:6, 7) ʼE ko he meʼa fakalotomalohi hatatou manatuʼi logo la ʼe mole hotatou ako ʼi te temi nei, kae ʼe tapuakiʼi tatou e Sehova ʼuhi he ʼe ina tokagaʼi ʼatatou faiga. *

15. Kotea ʼae ʼe logoʼi e Sehova moka ʼe tali e he tahi ke fai hana ako Tohi-Tapu, pea mo ina maʼuliʼi te ʼu meʼa ʼae ʼe ina ako?

¹⁵ ʼE fiafia ia Sehova moka ʼe tali e he tahi te moʼoni, pea moka ʼe ina palalau ki te ʼu moʼoni  ʼaia ki ni ʼihi. (Taaga Lea 23:15, 16) ʼE fiafia ʼaupito ia Sehova ʼi tana sio mai ʼae ki tana hahaʼi ʼe natou faifakamafola pea mo faiako ʼaki he faʼafai. Ohage la, ʼi te taʼu 2020, logo la te taʼi mahaki kae neʼe ko ako Tohi-Tapu ʼe 7 705 765 neʼe fai ai. Pea ko te toko 241 994 hahaʼi neʼe natou papitema. Pea ko natou ʼaia neʼe papitema ʼe natou fai anai ni ako ʼa he ʼu hahaʼi ka toe papitema anai mo natou. (Luka 6:40) ʼE tou tui papau ʼe tou fakafiafia ia Sehova moka ʼe tou tokoni ki te hahaʼi ke natou liliu ko he ʼu tisipulo.

16. Kotea te fakatuʼutuʼu ʼe ke fai anai?

¹⁶ ʼE mole faigafua ʼo te fai ʼo ni tisipulo, kae ʼaki te tokoni ʼa Sehova, ʼe feala ke tou akoʼi te hahaʼi ke natou ʼoʼofa ki tatatou Tamai ʼae ʼi selo. ʼE feala koa ke tou fai te fakatuʼutuʼu ʼae ke tou kamata pea mo fai he ako Tohi-Tapu? ʼE lagi ʼe tou punamaʼuli anai moka ʼe tou kole ki te hahaʼi ʼae ʼe tou felaveʼi mo natou ke fai hanatou ako Tohi-Tapu. ʼE tou iloʼi papau ʼe tapuakiʼi anai e Sehova ʼatatou faiga.

17. Kotea ʼe tou logoʼi moka ʼe tou lava fai he ako Tohi-Tapu?

¹⁷ ʼE ko he toe pilivilesio hatatou faifakamafola pea mo akoʼi ki te hahaʼi te moʼoni. ʼE ko he gaue ʼe tou fiafia ai. Ko te apositolo ko Paulo neʼe tokoni ki te kau Tesalonika ʼe tokolahi ke natou liliu ko he ʼu tisipulo. Pea neʼe ina fakaha te meʼa ʼae neʼe ina logoʼi ʼi tana ui fenei: “Kotea koa tamatou ʼamanaki, peʼe ko tomatou fiafia, peʼe ko tomatou pale ʼae ʼe matou fiameʼameʼa ai ia muʼa ʼo totatou ʼAliki ko Sesu lolotoga tana ʼi heni? ʼE mole koa la ko koutou? ʼEi, ko koutou tomatou kololia pea mo tomatou fiafia.” (1 Tes. 2:19, 20; Gaue 17:1-4) Tokolahi ia ʼaho nei, ʼe natou toe fiafia mo natou. Ko te tuagaʼane ko Stéphanie pea mo tona ʼohoana, neʼe nā tokoni ki te tokolahi ke natou papitema. ʼE ina ui fenei: “ʼE mole he fakatatau ʼo takita fiafia moka ʼe tou tokoni ki te hahaʼi ke natou foaki tanatou maʼuli kia Sehova.”