1. Kotea te ʼu tupuʼaga ʼo te logoʼi e ʼihi ʼae ʼe natou tauhi kia Sehova tanatou nonofo tokotahi?

ʼE FEALA ʼi ʼihi temi ke tou logoʼi ʼe tou nonofo tokotahi. ʼE ʼi ai ʼihi ʼe feala ke fualoa tanatou logoʼi tanatou nonofo tokotahi ʼaia, kae ʼe ʼi ai ʼihi leva ʼe mole fualoa ia. ʼE feala ke tou to lotolotoiga ʼo he hahaʼi kaugamalie, kae ʼe kita logoʼi pe takita nofo tokotahi. Ko ʼihi ka natou fetogi kokelekasio, ʼe faigataʼa hanatou maʼu honatou ʼu kaumeʼa. Ko ʼihi ʼe natou felogoi lelei mo tonatou kiʼi famili, pea ʼe natou logoʼi leva tanatou nonofo tokotahi moka natou mavae ʼo olo ki he tahi fenua. Pea ko ʼihi leva, ʼe natou lotomamahi he kua mate he tahi neʼe natou ʼofa mamahi ai. Pea tafito ia natou ʼae neʼe hoki natou maʼu ia te moʼoni, ʼe feala ke natou logoʼi tanatou nonofo tokotahi, he kua liʼakina natou e tonatou famili mo ʼonatou kaumeʼa, peʼe fakatagaʼi natou.

2. Ko te ʼu fehuʼi fea ʼae ka tali anai ʼi te alatike ʼaeni?

² Ko Sehova ʼe ina iloʼi pea mo mahino lelei kia tatou. Ka tou logoʼi tatatou nonofo tokotahi, ʼe ina tokagaʼi pea ʼe fia tokoni mai kia tatou. ʼE feafeaʼi tana tokoni mai? Kotea ʼe feala ke tou fai e tatou totonu moʼo tauʼi tatatou nofo tokotahi? Pea ʼe feafeaʼi hatatou tokoni kia natou ʼo tatatou kokelekasio ʼae ʼe nonofo tokotahi? ʼE tali anai ʼi te alatike ʼaeni ki te ʼu fehuʼi ʼaia.

3. Neʼe fakaha feafeaʼi e Sehova tana tokaga lelei kia Elia?

³ ʼE loto e Sehova ki ʼana kaugana fuli ke natou fiafia. ʼE nofo ovi ia tatou takitokotahi, pea ʼe ina tokagaʼi moka ʼe tou lotovaivai. (Pes. 145:18, 19) Ohage la, tou vakaʼi pe neʼe tokaga lelei  feafeaʼi ki tana polofeta ko Elia. Neʼe maʼuli te tagata agatonu ʼaia ʼi te temi faigataʼa ʼo Iselaele. Ko te kau pule ʼi Iselaele ʼae neʼe mole ʼoʼofa ia Sehova neʼe natou fakatagaʼi natou ʼae neʼe tauhi kia Sehova, pea neʼe natou fia matehi ia Elia. (1 Hau 19:1, 2) Pea neʼe toe manatu ia Elia, neʼe ko ia tokotahi pe ʼi te kau polofeta neʼe kei tauhi agatonu kia Sehova, pea neʼe lagi lotovaivai ai. (1 Hau 19:10) Neʼe tokagaʼi atu aipe e Sehova te manatu ʼaia ʼa Elia, ʼo ina fekauʼi ifo ki ai tana ʼaselo. Neʼe ina fakalotomalohiʼi ia Elia, pea neʼe ina ui age neʼe mole tokotahi, kae neʼe kaugamalie pe te kau Iselaele ʼae neʼe natou tauhi agatonu kia Sehova.—1 Hau 19:5, 18.

4. ʼE fakaha feafeaʼi ia Maleko 10:29, 30 ʼe tokaga lelei ia Sehova kia natou ʼae ʼe mole kei tokoni age tonatou famili pea mo ʼonatou kaumeʼa?

⁴ ʼE mahino kia Sehova ʼe lahi te ʼu meʼa ʼe tonu ke fakafisi ki ai ia natou ʼae ʼe fia tauhi kia te ia. Ohage la, ʼe mole kei tokoni age tonatou famili mo ʼonatou kaumeʼa ʼae mole tauhi kia Sehova. Neʼe lagi tuʼania ia te apositolo ko Petelo ʼi tana fehuʼi fenei age kia Sesu: “Kua matou tuku ia meʼa fuli kaʼe matou mulimuli ia te koe. Kotea ʼae ka matou maʼu ai?” (Mat. 19:27) Neʼe fakalotomalohiʼi e Sesu ʼana tisipulo ʼo ina ui age, ʼe natou kau anai ki he foʼi famili kaugamalie fakalaumalie. (Lau ia Maleko 10:29, 30.) Pea ko Sehova tatatou Tamai ʼae ʼi selo, ʼe ina fakapapau mai ʼe tokoni anai kia natou ʼae ʼe fia tauhi kia te ia. (Pes. 9:11) Koia, ʼe tokoni atu anai ia Sehova ke ke lava tauʼi tau lotomamahi ʼae ʼi tau nofo tokotahi. Kae ʼe lahi te ʼu meʼa ʼe feala ke ke fai ke ke maʼu ai tana tokoni.

5. He koʼe ʼe maʼuhiga ke tou fakakaukauʼi te ʼu meʼa fuli ʼae neʼe kua fai e Sehova maʼa tatou?

⁵ Fakakaukauʼi te ʼu meʼa ʼae neʼe kua fai e Sehova maʼa koe. (Pes. 55:23) ʼE tokoni atu anai ke ke iloʼi ʼe mole ke nofo tokotahi. ʼE ui fenei e te tuagaʼane ko Carol, * ʼe selipatea pea ʼe ko ia tokotahi pe ʼi tona famili ʼe tauhi kia Sehova: “Neʼe tokoni mai ia Sehova ke au lava tauʼi ni tuʼuga fihifihia. Ka au manatuʼi te faʼahi ʼaia, ʼe fakalotofimalieʼi ai au, he ʼe mole au tokotahi, kae ʼe nofo tuʼumaʼu pe ia Sehova mo au.”

6. ʼE fakalotomalohi feafeaʼi ia natou ʼae ʼe lotomamahi ʼi tanatou nonofo tokotahi ia te manatu ʼae ʼe tuʼu ia 1 Petelo 5:9, 10?

 ⁶ Manatuʼi e tokoni ia Sehova ki ʼana kaugana ʼae ʼe lotomamahi ʼi tanatou nonofo tokotahi. (Lau ia 1 Petelo 5:9, 10.) Ko te tehina ko Hiroshi ʼae ʼe ko ia tokotahi ʼe tauhi kia Sehova ʼi tona famili talu mai fualoa, ʼe ina ui fenei: “ ʼE mole he tahi ʼi te kokelekasio ʼe hala mo fihifihia. Kae ʼe tou tahi faiga ke tou tauhi kia Sehova.” Kapau ʼe tou tokotahi ʼi te moʼoni, ʼe feala ke fakalotofimalie te manatu ʼaia.

7. ʼE tokoni feafeaʼi atu te faikole?

⁷ Taupau tau ʼu agamahani fakalaumalie. ʼUluaki, faikole kia Sehova ʼo ke ui age te ʼu meʼa fuli ʼae ʼe ke logoʼi. (1 Pet. 5:7) ʼI te temi ʼae neʼe filifili ai e te tuagaʼane ko Massiel ke tauhi kia Sehova, neʼe ina logoʼi tana nofo tokotahi he neʼe mole he tahi ʼi tona famili neʼe kau ki te moʼoni. Neʼe ina ui fenei: “Kapau neʼe au lava katakiʼi taku nofo tokotahi, he neʼe au fakaha te ʼu meʼa fuli ʼae ʼi toku loto kia Sehova. Neʼe hage ia Sehova kia au ko haku Tamai. Pea neʼe au faikole tuʼa lahi ai kia te ia ʼi te ʼaho fuli.”

8. ʼE tokoni feafeaʼi atu tau lau te Tohi-Tapu pea mo metitasio ki ai?

⁸ Pea ke ke lau tuʼumaʼu ia te Tohi-Tapu, mo ke metitasio ki te ʼu fakamatala ʼae ʼe fakaha ai e ʼofa Sehova ia koe. Ko Bianca, ko te tuagaʼane neʼe ina katakiʼi te ʼu palalau fakalotomamahi ʼo tona famili. ʼE ina ui fenei: “Ko te meʼa ʼe tokoni lahi kia au, ko taku lau te ʼu hisitolia Fakatohi-tapu, pea mo metitasio ki ai, ʼo feia mo te ʼu fakamatala ʼa ʼihi tehina mo tuagaʼane neʼe tatau tonatou fihifihia mo au.” Pea ko ʼihi tehina mo tuagaʼane ʼe natou ako fakaʼatamai he ʼu vaega Fakatohi-tapu moʼo natou fakalotomalohi. Ohage ko te Pesalemo 27:10 pea mo Esaia 41:10. Pea ko ʼihi leva ʼe natou fakalogo te ʼu meʼa ʼae kua ʼosi puke ʼi tatatou tuʼasila ʼi te Neti, pea ʼe siʼisiʼi ai tanatou logoʼi ʼe natou tokotahi.

9. ʼE tokoni feafeaʼi atu tau kau ki te ʼu fono?

⁹ Pea ke ke kau tuʼumaʼu ki te ʼu fono. ʼE fakalotomalohiʼi ai koe ʼuhi ko te ʼu meʼa ʼae ʼe ke ako ai, pea ʼe ke fakaovi ai ki ʼou tehina mo tuagaʼane. (Hep. 10:24, 25) ʼE ui fenei ʼe te tuagaʼane ko Massiel ʼae neʼe kua tou ʼosi palalau ki ai: “Logo la neʼe au umiuminoa, kae neʼe au kau tuʼumaʼu pe ki te ʼu fono, pea mo fai ai haku tali. Neʼe au logoʼi ai taku kau ki te kokelekasio.”

10. He koʼe ʼe maʼuhiga ke tou fakakaumeʼa mo he ʼu tehina peʼe ko he ʼu tuagaʼane fakalaumalie?

¹⁰ Ke ke fakakaumeʼa mo he ʼu tehina peʼe ko he ʼu tuagaʼane. Ke ke kaumeʼa mo natou ʼae ʼi te kokelekasio ka tokoni lahi atu anai kia koe. Filifili hou kaumeʼa ʼe tupulaga peʼe matuʼa age  ia koe, peʼe ko hou ʼu kaumeʼa ʼe kehekehe tanatou agaʼi fenua mo koe. ʼE ui ʼi te Tohi-Tapu ʼe maʼu te poto “i te kau matua.” (Sopo 12:12) Pea ʼe toe feala pe ki te kau matutuʼa ke natou ako he ʼu meʼa mai te kau tupulaga. Ko Tavite neʼe tupulaga age ia Sonatane, kae neʼe nā kaumeʼa lelei. (1 Sam. 18:1) Neʼe nā fetokoniʼaki pe ke hoko atu tanā tauhi kia Sehova, logo la te ʼu fihifihia. (1 Sam. 23:16-18) ʼE ui fenei e te tuagaʼane ko Irina, ʼae ʼe heʼeki he tahi ʼi tona famili ʼe tauhi kia Sehova: “ ʼE feala ke tou maʼu ʼi te kokelekasio hatatou ʼu matuʼā, peʼe ko hotatou ʼu tehina mo tuagaʼane fakalaumalie. ʼE feala ke fakaʼaogaʼi e Sehova ia natou ʼaia moʼo fakalotofimalieʼi tatou.”

11. Kotea ʼae ʼe tonu ke ke fai ke ke maʼu ai hou ʼu kaumeʼa lelei?

¹¹ ʼE mole faigafua he maʼu ʼo hotatou ʼu kaumeʼa tafito la moka ʼe tou umiuminoa. Ko te tuagaʼane ko Ratna, ʼe umiuminoa ʼaupito, pea neʼe tau mo he fakafeagai ʼi tana iloʼi ia te moʼoni. ʼE ina ui fenei: “Neʼe au mahino leva neʼe tonu ke au kumi te tokoni ʼo ʼoku tehina mo tuagaʼane ʼi te kokelekasio.” ʼE moʼoni ʼe mole faigafua te fakaha age ki he tahi te ʼu meʼa ʼae ʼe ke logoʼi. Kae kapau ʼe ke fai te faʼahi ʼaia, ʼe liliu anai ko hou kaumeʼa lelei. Ko tou ʼu kaumeʼa ʼe natou fia fakalotomalohi pea mo tokoni atu kia koe. Kae ʼe tonu foki ke ke fakaha age te ʼu meʼa ʼae ʼe tonu ke natou fai.

12. Kotea ʼae ʼe feala ke toe tokoni atu ke ke maʼu hou ʼu kaumeʼa ʼe lelei?

¹² ʼE toe feala ke tou maʼu hotatou ʼu kaumeʼa moka tou faifakamafola mo ʼotatou tehina mo tuagaʼane. ʼE ui fenei e te tuagaʼane ko Carol, ʼae neʼe kua tou ʼosi palalau ki ai: “Neʼe au kaumeʼa lelei mo he ʼu tuagaʼane, he neʼe matou faifakamafola, pea mo fai te tahi age ʼu gaue maʼa Sehova. ʼAki te temi, neʼe fakaʼaogaʼi e Sehova ʼoku kaumeʼa ʼaia moʼo ʼoku fakalotomalohiʼi.” ʼE lelei kia tatou ke tou kaumeʼa mo he kau Kilisitiano agatonu. ʼE feala ai ke fakaʼaogaʼi e Sehova ʼou kaumeʼa ʼaia moʼo fakalotomalohiʼi koe tafito la, ʼi te ʼu temi ʼae ʼe ke logoʼi ai tau nofo tokotahi.—Taag. 17:17.

13. Kotea te maʼua ʼae ʼe maʼu e te kau Kilisitiano fuli?

¹³ ʼE maʼua ki te kau Kilisitiano fuli ʼo te kokelekasio ke natou faiga ke maʼu te tokalelei ʼi ai pea ke natou feʼofaʼaki. ʼI tanatou fai te faʼahi ʼaia, ʼe mole logoʼi ai e he tahi tana nofo tokotahi. (Soa. 13:35) ʼE feala ke lahi tatatou fakalotomalohiʼi ʼotatou tehina mo tuagaʼane ʼaki ʼatatou palalau, pea mo te ʼu meʼa ʼae ʼe tou fai maʼa natou. ʼE ui fenei e he tuagaʼane: “ ʼI taku iloʼi ʼae ia te moʼoni, neʼe liliu leva ia te kokelekasio ko toku famili. Ka na la tanatou tokoni mai, neʼe mole feala ke au liliu ko he Fakamoʼoni ʼa Sehova.” Kotea ʼae ʼe feala ke ke fai ke logoʼi ai e natou ʼae ʼe mole kau tonatou famili ʼi te moʼoni tonatou ʼofainaʼi?

14. Kotea ʼae ʼe feala ke ke fai ke ke kaumeʼa mo natou ʼae ʼe foʼofoʼou mai ki te kokelekasio?

¹⁴ Ke ke fakakaumeʼa mo natou ʼae ʼe foʼofoʼou mai ki te kokelekasio. ʼE feala ke ke fakatalitali fakafiafia natou moka natou ʼomai ki te ʼu fono. (Loma 15:7) Kae kapau ʼe ke fia kaumeʼa lelei mo natou, faiga ke ke faipalalau mo natou. Ohage la, faiga ke ke iloʼi te ʼu fihifihia ʼae ʼe tau mo ia, kae ke ke tokaga pe naʼa ke fia iloʼi meʼa fuli. ʼAua naʼa ke fakakinauʼi ʼihi ke natou palalau atu, moka ʼe ke tokagaʼi ʼe faigataʼa hanatou fakaha atu te ʼu meʼa ʼae ʼe natou logoʼi. Ke ke fakaʼapaʼapa kia natou moka ke fai he ʼu fehuʼi. Pea ke ke fakalogo lelei moka natou palalau atu. Ohage la, ʼe feala ke ke fehuʼi age pe neʼe feafeaʼi tanatou maʼu ia te moʼoni.

15. ʼE lava tokoni feafeaʼi ki te kokelekasio ia natou ʼae ʼe malohi tanatou tui?

¹⁵ ʼE feala ke tuputupu ʼi te faʼahi fakalaumalie te ʼu tehina mo tuagaʼane ʼo te kokelekasio,  tafito mo kapau ʼe tokakaga kia natou te kau tagata ʼafeā, pea mo natou ʼae ʼe malohi tanatou tui. Ko te tuagaʼane ko Melissa ʼae neʼe pusiaki e tana faʼe ʼi te moʼoni, ʼe ina ui fenei: “ ʼE au fakamalo lahi ki te ʼu tuagaʼane ʼae neʼe natou hage ko haku ʼu tamai. Neʼe natou faipalalau mo au, mo tokakaga kia au. Pea ʼe au iloʼi ka au fia palalau mo he tahi, pea ʼe natou fagono mai anai.” ʼE ui fenei e te tehina tupulaga ko Mauricio, ʼae neʼe hage kia ia neʼe liʼakina ʼi te mavae ʼo tana tagata faiako ʼi te moʼoni: “Neʼe tokakaga lelei te kau tagata ʼafeā kia au, mo tokoni lahi mai. Neʼe matou faipalalau mo faifakamafola, pea neʼe natou vaevae mo au he ʼu manatu Fakatohi-tapu maʼuhiga neʼe natou maʼu ʼi tanatou ako takitokotahi. Pea neʼe natou faigaoʼi mo au.” ʼI te temi nei, ko Melissa mo Mauricio kua nā kau ʼi te selevisi temi katoa.

16-17. Kotea ʼae ʼe feala ke ke fai moʼo tokoni ki ʼou tehina mo tuagaʼane?

¹⁶ Fai he meʼa moʼo tokoni ki ʼou tehina mo tuagaʼane. (Kal. 6:10) ʼE ui fenei e te tehina ko Leo, ʼae ʼe misionea pea neʼe mavae mai tona famili: “ ʼI ʼihi temi ko te meʼa pe ʼe ʼaoga kia matou ke agalelei mai he tahi ʼi tona temi totonu. ʼI te tahi ʼaho neʼe au fakaʼi mo taku motoka. Pea ʼi taku toe liliu leva ʼae ki toku ʼapi, neʼe au lotohoha ʼaupito. Kae neʼe fakaafe au e he taumatuʼa kio naua, ke matou kakai. Ko te meʼa ʼae ʼe kei au manatuʼi lelei, ʼe mole ko te meʼa kai kae ko tanā agalelei, pea mo fakalogo mai ʼi taku palalau age. Hili ʼaia, neʼe au logo fimalie.”

¹⁷ ʼE tou fiafia fuli ʼi te kau ki te ʼu fakatahi, koteʼuhi ʼe tou fakatahitahi ai mo ʼotatou tehina mo tuagaʼane. Pea ʼe tou vaevae ai he ʼu manatu neʼe tou leleiʼia ʼi te ʼu akonaki. Kae ʼe ui fenei e Carol, ʼae neʼe kua tou ʼosi palalau ki ai: “ ʼE lahi age taku logoʼi taku nofo tokotahi tafito la moka ʼe au kau ki te ʼu fakatahi.” He koʼe ʼe palalau feia ia Carol? ʼE ina hoko atu fenei: “ ʼE moʼoni ʼe au to ʼi te lotolotoiga ʼo he toko teau, peʼe ko he toko afe ʼu tehina mo tuagaʼane, kae ʼe natou heheka fakatahi mo tonatou famili. Pea ʼi taku sio ʼae ki te faʼahi ʼaia, ʼe toe ʼasili ai taku logoʼi ʼae ʼe au tokotahi.” ʼE toe faigataʼa kia natou ʼae neʼe hoki mate age pe tonatou hoa hanatou kau ki he fakatahi. ʼE ke iloʼi koa he tahi ʼe tau mo te aluʼaga ʼaia? ʼE feala  hau kole age pe ʼe fia kau anai mo koe mo tou famili ki te fakatahi ʼae ka hoko mai.

18. ʼE feafeaʼi hatatou maʼuliʼi te manatu ʼae ia 2 Kolonito 6:11-13 moka tou fakaafe he ʼu tehina mo tuagaʼane?

¹⁸ Ke ke vakaʼi he tahi age ʼu lakaga ke ke fakatahi ai mo ʼou tehina mo tuagaʼane. Ka ke fakatuʼutuʼu he ʼu kiʼi temi fakafiafia, ʼe feala ke ke fakaafe ʼihi ʼi tau kokelekasio, kae tafito la ia natou ʼae ʼe nonofo tokotahi. ʼE tou fia “ ʼoʼofa moʼoni” tafito kia natou ʼaia. (Lau ia 2 Kolonito 6:11-13.) ʼE ui fenei e Melissa ʼae neʼe kua tou ʼosi palalau ki ai: “Neʼe lahi ʼosi tamā fiafia, moka neʼe fakaafe maʼua e te ʼu tehina mo tuagaʼane kio natou, peʼe ke matou olo mo natou ʼo malolo.” ʼE ke iloʼi koa he tahi ʼi tau kokelekasio, ʼe feala ke ke fakaafe ki tou ʼapi?

19. Ko te ʼu ʼaho fea ʼe ʼaoga ai ke tou fakatahi mo ʼotatou tehina mo tuagaʼane?

¹⁹ ʼE ʼi ai he ʼu ʼaho ʼi te taʼu ʼe fiafia ai ʼotatou tehina mo tuagaʼane hanatou fakatahi mo tatou. Ohage la, ʼe feala ke faigataʼa ki ʼihi moka hoko mai te ʼu ʼaho lalahi, peʼe ko te ʼaho ʼae neʼe mate ai he tahi neʼe natou ʼoʼofa mamahi ai. Kapau ʼe tou fakatahi mo natou ʼi te ʼu ʼaho ʼaia, ʼe tou fakaha ai ʼe tou ‘tokakaga moʼoni’ kia natou.—Flp. 2:20.

20. Ka tou logoʼi tatatou nonofo tokotahi, ʼe fakalotomalohiʼi feafeaʼi tatou e te ʼu palalau ʼa Sesu ia Mateo 12:48-50?

²⁰ ʼE lahi te ʼu tupuʼaga ʼe feala ke tou logoʼi ai tatatou nonofo tokotahi. Kae ʼaua naʼa galo kia tatou ʼe mahino ia Sehova ki te ʼu meʼa ʼae ʼe tou logoʼi. ʼE feala ke ina fakaʼaogaʼi ʼotatou tehina mo tuagaʼane ke natou fakafimalieʼi ʼotatou loto. (Lau ia Mateo 12:48-50.) Pea ʼe tou fakaha anai tatatou lotofakafetaʼi kia Sehova ʼi tatatou kau ki he famili fakalaumalie, ʼo tou tokoni kia natou. Tatau aipe pe ʼe feafeaʼi totatou aluʼaga, kae ʼe mole tou tokotahi, he ʼe nofo tuʼumaʼu pe ia Sehova mo tatou.