1. Ko te faʼahiga ako fea ʼae neʼe fai e te tehina ko Russell mo ʼihi kau ako, pea he koʼe neʼe lelei ʼaupito?

KUA hili he ʼu taʼu ʼe teau tupu ki ai, neʼe kamata fakatahitahi tuʼumaʼu te tehina ko Charles Russell pea mo ʼihi kau ako ʼo te Tohi-Tapu. Neʼe natou fia mahino pe ʼe kotea ʼae ʼe akoʼi moʼoni mai ʼi te Tohi-Tapu ʼo ʼuhiga mo Sehova, mo Sesu Kilisito, feia ki te aluʼaga ʼo te kau mate pea mo te totogi. Neʼe faigafua tanatou faʼahiga ako. Neʼe lagaʼi e he tahi he fehuʼi, pea neʼe vakavakaʼi e te kutuga ʼaia te ʼu vaega Tohi-Tapu fuli ʼo ʼuhiga mo te fehuʼi ʼaia. Pea ʼi te fakaʼosi, neʼe natou tohi te ʼu manatu fuli ʼae neʼe natou maʼu ʼi ʼanatou fekumi. ʼAki pe te tapuakina ʼa Sehova, neʼe mahino leva te ʼu Kilisitiano fakamalotoloto ʼaia ki te ʼu moʼoni Fakatohi-tapu maʼuhiga, ʼae ʼe kei ʼaoga ʼaupito kia tatou ʼi totatou temi.

2. He koʼe ʼe feala ke hala tatatou mahino moka tou vakavakaʼi he lea fakapolofeta?

² Kae neʼe mahino leva te kau ako ʼaia ʼo te Tohi-Tapu ʼe faigataʼa age te mahino ki he lea fakapolofeta ʼi he akonaki Fakatohi-tapu. Kotea tona tupuʼaga? ʼUluaki pe, he ʼe ʼi te agamahani ʼe hoki mahino lelei he lea fakapolofeta moka ʼe lolotoga fakahoko peʼe kua ʼosi fakahoko. Kae ʼe ʼi ai te tahi tupuʼaga. Ke tou mahino lelei ki he lea fakapolofeta, ʼe tonu ke tou vakavakaʼi lelei te ʼu vaega ʼae ʼi muʼa atu pea mo ʼae ʼe hoa mai ki ai. Kapau ʼe tou fakakaukauʼi pe he koga ʼo te lea fakapolofeta kae mole tou tokagaʼi katoa, pea ʼe feala ke hala tatatou mahino. Neʼe hoko te faʼahi ʼaia ki te lea fakapolofeta ʼo te tohi ʼo Soele. Tou toe vakaʼi te lea fakapolofeta ʼaia, pe ʼe koe ʼe ʼaoga ke fetogi tona fakamahino.

3-4. ʼO kaku mai ki te temi nei, neʼe tou mahino feafeaʼi ki te lea fakapolofeta ʼo Soele 2:7-9?

³ Lau ia Soele 2:7-9. Neʼe fakakikite e Soele ʼe ʼohofi anai e te ʼu heʼe pea mo maumauʼi te fenua ʼo Iselaele. ʼE hage ʼonatou nifo  mo ʼonatou kaugao ko ʼae ʼo he ʼu laione, pea ʼe natou kai anai te vao ʼakau fuli ʼi Iselaele. (Soele 1:4, 6) Talu mai fualoa, neʼe tou ui ʼe fakata e te lea fakapolofeta ʼaia te hoko atu ʼa te gaue faifakamafola ʼa te ʼu kaugana ʼa Sehova, ohage ko he faga heʼe pea ʼe mole he meʼa ʼe feala ke ina taʼofi natou. Neʼe tou fakamahino ko te gaue ʼaia ʼe ina maumauʼi te “fenua,” ʼae ʼe fakaʼuhiga ki te hahaʼi ʼae ʼe puleʼi e te kau takitaki lotu. *

⁴ ʼE feala ke totonu te fakamahino ʼaia mo kapau ʼe tou fakatokagaʼi pe ia Soele 2:7-9. Kae kapau ʼe tou vakaʼi te ʼu vaega ʼae ʼi muʼa atu pea mo ʼae ʼe hoa mai ki ai, pea ʼe tou tokagaʼi ai ʼe tonu ke toe fakamahino. Tou vakaʼi tupuʼaga ʼe fa.

5-6. Ko te fehuʼi fea ʼae ʼe feala ke tou fai moka tou lau ia (1) Soele 2:20? (2) Soele 2:25?

⁵ ʼUluaki, ʼe fakapapauʼi fenei mai e Sehova ia Soele 2:20, MN: “ ʼE au fakamamaʼo anai mai ia koutou ia ia ʼae ʼo te potu noleto,” ʼae ko te ʼu heʼe. Kapau neʼe fakata e te ʼu heʼe ia te kau Fakamoʼoni ʼa Sehova ʼi tonatou ʼuhiga hahaʼi faifakamafola, he koʼe leva ʼe fakapapauʼi e Sehova ke ina kapu natou? (Esk. 33:7-9; Mat. 28:19, 20) ʼE mahino ia, ʼe mole kapu e Sehova ʼana kaugana agatonu ʼae ʼe fakalogo ki te fakatotonu ʼa Sesu ke faifakamafola pea mo fai ni tisipulo. Kae ʼe ina kapu he meʼa peʼe ko he tahi ʼe ina fia fai he meʼa ʼe kovi ki tana hahaʼi.

⁶ Lua, ʼe ui fenei e Sehova ia Soele 2:25, MN: “ ʼE au totogi atu anai te ʼu meʼa fuli ʼae neʼe kai lolotoga ni taʼu e te ʼu heʼe, mo te ʼu heʼe ʼae kei mui, mo te ʼu heʼe ʼae ʼe maumau, pea mo te ʼu heʼe ʼae ʼe natou kai te ʼu meʼa fuli, ʼei, te foʼi kautau lahi ʼae neʼe au fekauʼi atu kia koutou.” ʼE ke tokagaʼi ʼe fakapapauʼi e Sehova ʼe ina “totogi” anai ki te hahaʼi ʼo te fenua te ʼu maumau ʼae neʼe fakahoko e te ʼu heʼe. Kapau neʼe fakata e te ʼu heʼe te kau faifakamafola ʼo te Puleʼaga, ko tona fakaʼuhiga ko te logo ʼae ʼe natou tala ʼe fakahoko ai he ʼu maumau. Kae ʼe mole ko ia ʼaia. ʼE haofaki e te logo ʼaia te hahaʼi he ʼe ina taki te kau agakovi ki te fakahemala. (Esk. 33:8, 19) Ko he tapuakina lahi ia kia natou!

7. Ia Soele 2:28, 29, ʼe tou mahino feafeaʼi ki te kupusiga palalau ʼae: “I te osi o te mea aia”?

⁷ Lau ia Soele 2:28, 29. Ko te tolu tupuʼaga ʼe pipiki ki te fakaalualu ʼo te ʼu meʼa ʼae ʼe tuʼu ʼi te lea fakapolofeta ʼaia. ʼE ke fakatokagaʼi ʼe ui fenei e Sehova: “I te osi o te mea aia, * e au liligi anai toku Laumalie,” ko tona fakaʼuhiga ʼi te ʼosi fakahoko e te ʼu heʼe tanatou gaue. Kapau neʼe fakata e te ʼu heʼe te kau faifakamafola ʼo te Puleʼaga, he koʼe ʼe foaki anai e Sehova tona laumalie kia natou ʼi te ʼosi ʼo tanatou faifakamafola? ʼI tona fakahagatonu, kapau neʼe mole tokoni te laumalie maʼoniʼoni ʼae ʼe mafimafi ʼo te ʼAtua kia natou, pea neʼe mole feala ke natou faifakamafola lolotoga ni taʼu pea mo katakiʼi te ʼu fakafeagai, ʼo feia ki te tapuʼi ʼo ʼanatou gaue.

8. Ko ai ʼae ʼe fakata e te ʼu heʼe ʼae ʼe tuʼu ia Fakaha 9:1-11? (Vakaʼi te pāki ʼo te takafi.)

⁸ Lau ia Fakaha 9:1-11. Tou vakaʼi ʼi te temi nei te fa tupuʼaga. ʼI muʼa atu, neʼe tou ui neʼe fakata e te ʼohofi ʼa te ʼu heʼe ʼae ʼe tuʼu ia Soele tatatou gaue faifakamafola, koteʼuhi ʼe tatau mo te lea fakapolofeta ʼae ʼe tou maʼu ʼi te tohi ʼo Fakaha. ʼE palalau te lea fakapolofeta ʼaia ki he faga heʼe ʼe hage ʼonatou fofoga ko te fofoga ʼo he tagata, pea ʼe ʼi ai ʼi ʼonatou ʼulu “te ʼu meʼa neʼe hage ko he ʼu kolona aulo.” (Fkha. 9:7) Neʼe fakagafua age ke natou fakamamahiʼi ‘te hahaʼi ʼae neʼe mole natou maʼu ʼi ʼonatou laʼe te fakailoga ʼo te ʼAtua,’ ko tona fakaʼuhiga ko te ʼu fili ʼo te ʼAtua. Pea ʼe natou fakamamahiʼi te hahaʼi ʼaia ia mahina ʼe nima, ʼae ko te loaloaga ʼaia ʼo te  maʼuli ʼo te heʼe. (Fkha. 9:4, 5) ʼE fakata lelei e te faʼahi ʼaia te ʼu kaugana fakanofo ʼa Sehova. ʼE natou fakamafola ʼaki he lototoʼa te ʼu fakamau ʼa te ʼAtua ʼo ʼuhiga mo te malama agakovi ʼaeni, ʼo iita ai ia natou fuli ʼae ʼe kau ki te malama ʼaia.

9. Kotea te ʼu faʼahi maʼuhiga ʼe kehekehe ai te ʼu heʼe ʼae neʼe sio ki ai Soele pea mo ʼae neʼe palalau ki ai Soane?

⁹ ʼE moʼoni, ʼe ʼi ai te ʼu manatu ʼe tatau ʼi te lea fakapolofeta ʼo Fakaha pea mo Soele. Kae ʼe toe ʼi ai te ʼu faʼahi maʼuhiga ʼe nā kehekehe ai. Ohage la, ʼi te lea fakapolofeta ʼo Soele, ʼe maumauʼi e te ʼu heʼe te vao ʼakau fuli. (Soe. 1:4, 6, 7) Kae ʼi te meʼa ʼae neʼe ha kia Soane, ʼe ui ki te ʼu heʼe “ke ʼaua naʼa natou fai he meʼa ʼe kovi” ki te vao ʼakau ʼo te kele. (Fkha. 9:4) ʼE ʼomai te ʼu heʼe ʼae neʼe sio ki ai ia Soele mai te potu noleto. (Soe. 2:20) Kae neʼe sio ia Soane ki te ʼu heʼe ʼe hahake ake mai te vanu. (Fkha. 9:2, 3) Ko te ʼu heʼe ʼae neʼe palalau ki ai ia Soele, neʼe kapu natou. Kae ko te ʼu heʼe ʼae ʼe palalau ki ai te tohi ʼo Fakaha, ʼe fakagafua age ke fakaʼosi tanatou gaue. ʼE mole he tahi vaega ʼi te Tohi-Tapu ʼe fakaha ai ʼe mole fiafia Sehova kia natou ʼaia.—Vakaʼi te fakamatala ʼae ʼe ʼa takai “ Ko He ʼu Lea Fakapolofeta ʼe Lua ʼe Tatau, Kae Ko He Faga Heʼe Kehekehe ʼe Lua.”

10. Tuku mai he faʼifaʼitaki ʼi te Tohi-Tapu ʼe ha ai ʼe feala ke kehekehe te fakaʼuhiga ʼo he fakata.

¹⁰ Ko te ʼu faʼahi kehekehe ʼaia ʼe tokoni mai ke tou mahino ʼe mole he pikipikiga ʼi te ʼu lea fakapolofeta ʼaia ʼe lua. Ko tona fakaʼuhiga koa ko te ʼu heʼe ʼae ʼe tuʼu ia Soele ʼe mole tatau mo ʼae  ʼe tuʼu ʼi te tohi ʼo Fakaha? ʼEi. ʼI te Tohi-Tapu, ʼe feala pe ke kehekehe te fakaʼuhiga ʼo he fakata, ʼo mulimuli ki tona faʼahiga fakaʼaogaʼi. Ohage la, ia Fakaha 5:5 ʼe higoaʼi ia Sesu ko “te Laione ʼo te telepi ʼo Suta” pea ʼe ui ia 1 Petelo 5:8 ʼe hage te Tevolo ko “he laione ʼe gugulu.” ʼUhi ko tupuʼaga ʼe fa ʼae neʼe tou vakaʼi, ʼe tou fai ai te fehuʼi ʼaeni: Kotea te fakaʼuhiga ʼo te lea fakapolofeta ʼo Soele?

11. ʼE tokoni feafeaʼi mai te ʼu manatu ʼae ʼe tuʼu ia Soele 1:6 pea mo te kapite 2:1, 8, 11 ke tou mahino ai pe ʼe ko ai ʼae ʼe fakatata e te ʼu heʼe?

¹¹ Ka tou vakavakaʼi fakalelei te tahi ʼu vaega ʼo te lea fakapolofeta ʼo Soele, ʼe tou mahino ai neʼe fakakikite e te polofeta he ʼohofi ʼa he kau solia. (Soe. 1:6; 2:1, 8, 11) Neʼe fakaha fakatomuʼa e Sehova ʼe ina fakaʼaogaʼi anai tana “foʼi kautau lahi” (te kau solia ʼo Papiloni) moʼo tauteaʼi te kau Iselaele talagataʼa. (Soe. 2:25, MN) Neʼe fakahigoaʼi te foʼi kautau ʼaia, ko “ia ʼae ʼo te potu noleto” koteʼuhi neʼe ʼomai te kau solia Papiloni mai te potu noleto moʼo tauʼi ia Iselaele. (Soe. 2:20, MN) Ko te foʼi kautau ʼaia ʼe fakatata ki he faga heʼe ʼe fakatuʼutuʼu lelei. ʼE ui fenei e Soele ʼo ʼuhiga mo natou: “E . . . tahi haele [te tagata solia] i tona atu; . . . E natou mavetevete i te kolo, felelei i oluga o te u kaupa, kake i oluga o te u fale, ulu i te u matapa fakamalama o hage he tagata kaihaa.” (Soe. 2:8, 9) Fakakaukauʼi age muʼa te meʼa ʼae ʼe hoko: ʼE mavetevete te kau solia ʼi te fenua katoa. ʼE mole feala he fenonoʼi. Pea ʼe mole feala ke hao he tahi mai te heleta ʼa te kau Papiloni!

12. Neʼe hoko feafeaʼi te lea fakapolofeta ʼo Soele ʼo ʼuhiga mo te ʼu heʼe?

¹² Ohage ko te ʼu heʼe, neʼe mavetevete te kau Papiloni (peʼe ko te kau Kaletea) ʼi te kolo ko Selusalemi, ʼi te taʼu 607 I.M.T.S. * ʼE ui fenei ʼi te Tohi-Tapu: “[Ko] te hau o te kau Kaletea . . . nee ina tamatei leva aki te heleta anatou kau tupulaga . . . nee mole pe ina fakahao he tama pee ko he taahine, he fotufotua tagata pee ko he matua hina; nee ina [te ʼAtua] tuku leva te u mea fuli ki ona nima. Nee natou tutu leva te fale o te Atua, nee natou maumaui leva te u kaupa o Selusalemi, nee natou tuku leva ki te afi te u mea fuli o ana fale hau mo maumaui te u mea mauhiga fuli.” (2 Klk. 36:17, 19) Hili te ʼohofi ʼaia ʼa te kau Papiloni, neʼe liliu leva te fenua ʼo Iselaele “ko he toafa ia ia, hala tagata pea hala manu, pea kua tuku ia ia kia nima o te kau Kaletea.”—Sel. 32:43.

13. Kotea te fakaʼuhiga ʼo te ʼu palalau ia Selemia 16:16, 18?

¹³ Hili teitei taʼu ʼe 200 ʼi te fai e Soele tana lea fakapolofeta, neʼe fakaʼaogaʼi e Sehova ia Selemia moʼo fakakikite te tahi aluʼaga ʼo ʼuhiga pe mo te ʼohofi ʼaia. Neʼe ina fakaha ʼe kumikumi lelei anai e te kau solia Papiloni te kau Iselaele ʼae neʼe natou fai te ʼu meʼa ʼe kovi, ʼo natou puke natou. “E ui e [Sehova]: Koeni, e au fekaui anai ni kau faigelu kaugamalie, pea e natou [“puke,” MN] anai natou; pea ka osi te mea aia, e au fekaui anai ni kau kapu manu kaugamalie, pea e natou [“tuli,” MN] anai natou mai te u mouga fuli, mo te u mouga liliki fuli, pea mo te u ana o te u utu. E au uluaki foaki anai kia natou te totogi o tanatou agakovi mo tanatou agahala.” Neʼe mole he koga meʼa ʼi te moana peʼe ko te ʼu vao matuʼa neʼe feala ke fenonoʼi ai te kau Iselaele ʼae neʼe mole fakahemala, ke natou hao mai te kau solia Papiloni.—Sel. 16:16, 18.

14. Ko te temi fea ʼae neʼe hoko ai ia Soele 2:28, 29?

¹⁴ ʼE toe maʼu ʼi te lea fakapolofeta ʼo Soele he ʼu logo lelei. ʼEi, ʼe toe lahi anai te taʼukai ʼi te fenua. (Soe. 2:23-26) Pea ʼi te ka haʼu, ʼe mahu anai te meʼa kai fakalaumalie ʼae ka tufa. Neʼe fakapapau fenei e Sehova: “E au liligi anai toku Laumalie ki te u kakano fuli; e kikite anai okotou foha mo akotou ofafine . . . Pea e tatau foki ki te u tagata faifekau mo te u fafine faifekau, i te u aho aia, e au liligi anai toku Laumalie.” (Soe. 2:28, 29) Neʼe mole hoko te aluʼaga ʼaia ʼi te toe liliu ʼa te kau Iselaele mai tonatou ʼaunofo ʼi Papiloni. Kae neʼe hoko hili ki ai ni sekulo, ʼi te Penikosite ʼo te taʼu 33 H.T.S. * ʼE tou iloʼi feafeaʼi te faʼahi ʼaia?

15. Ka tou lau ia Gaue 2:16, 17, kotea te fetogi ʼae neʼe fai e Petelo ʼo ʼuhiga mo Soele 2:28?

¹⁵ ʼAki te takitaki ʼa te ʼAtua, neʼe fakaʼaogaʼi e te apositolo ko Petelo ia Soele 2:28, 29 moʼo talanoa ki he aluʼaga fakaofoofo neʼe hoko ʼi te ʼaho ʼo te Penikosite. ʼI te vaʼevaʼe hola hiva uhu, neʼe foaki e te ʼAtua tona laumalie maʼoniʼoni ki he kiʼi kutuga ko te ʼu tisipulo ʼa Kilisito, pea neʼe natou kamata palalau ai ki “te ʼu gaue taulekaleka ʼa te ʼAtua.” (Gaue 2:11) Pea ʼaki pe te takitaki ʼa te ʼAtua, neʼe fakaʼaogaʼi e Petelo he ʼu palalau ʼe mole faʼa kehekehe fau mo te ʼu palalau ʼi te lea fakapolofeta ʼo Soele. Neʼe ke tokagaʼi koa te kiʼi kehekehe ʼaia? (Lau ia Gaue 2:16, 17.) Neʼe ina fetogi te kupusiga palalau ʼaeni ʼo te lea fakapolofeta “I te osi o te mea aia” ʼaki te kupusiga palalau “Pea ʼi te ʼu ʼaho fakamuli.” Neʼe palalau ki te ʼu ʼaho fakamuli ʼo te tuʼu fakasutea pea neʼe ina fakamahino ai ʼe foaki anai e te ʼAtua tona laumalie “ki te kakano fuape” ʼo te temi ʼaia. ʼE fakaha ai, neʼe tonu ke fakalaka he temi loaloaga ʼi muʼa ʼo te hoko ʼo te lea fakapolofeta ʼo Soele.

16. ʼAki te tokoni ʼo te laumalie maʼoniʼoni ʼo te ʼAtua, kotea te ʼu fua ʼo te faifakamafola ʼi te ʼuluaki sekulo, pea mo totatou temi?

¹⁶ Hili te foaki e te ʼAtua tona laumalie ki te  kau Kilisitiano ʼo te ʼuluaki sekulo, neʼe natou kamata ai leva te gaue faifakamafola ʼo kaku ki te ʼu potu taupotu ʼo te kele. ʼI te temi ʼae neʼe fai ai e te apositolo ko Paulo tana tohi ki te kau Kolose, ʼi te teitei taʼu 61 H.T.S., neʼe feala hana ui kua fakamafola te logo lelei “ki te hahaʼi fuli ʼae ʼi te lalo lagi.” (Kol. 1:23) ʼI tana tahi faʼahiga ui, neʼe fakamafola te logo lelei ʼi te ʼu potu fuli ʼo te malamanei ʼae neʼe feala ke olo ki ai te kau tisipulo. ʼAki te tokoni ʼo te laumalie maʼoniʼoni ʼo Sehova, kua toe lahi age te faifakamafola ia ʼaho nei, kua kaku ki “te ʼu potu taupotu ʼo te kele.”—Gaue 13:47; vakaʼi te fakamatala ʼae ʼe ʼa takai “  ʼE Au Foaki Anai Toku Laumalie.”

 17. Kotea ʼae neʼe fetogi ʼi te fakamahino ʼae ʼo te lea fakapolofeta ʼo Soele ʼo ʼuhiga mo te ʼu heʼe?

¹⁷ Kotea ʼae neʼe fetogi? Kua tou maʼu leva he fakamahino ʼe totonu age ʼo te lea fakapolofeta ʼo Soele 2:7-9. ʼI tona fakahagatonu, ʼe mole palalau te ʼu vaega ʼaia ki tatatou faʼafai ʼi te gaue faifakamafola, kae ki te ʼohofi ʼo Selusalemi e te kau solia Papiloni ʼi te taʼu 607 I.M.T.S.

18. Kotea ʼae heʼeki fetogi ʼo ʼuhiga mo te ʼu kaugana ʼa Sehova?

¹⁸ Kotea ʼae heʼeki fetogi? ʼE hoko atu pe e te ʼu kaugana ʼa Sehova tanatou tala te logo lelei ʼo te Puleʼaga ʼi te kele katoa, ʼo natou fakaʼaogaʼi te ʼu fealagia fuli. (Mat. 24:14) ʼE mole feala ki he puleʼaga ke ina taʼofi tatatou fakalogo ki te fakatotonu ʼae ke tou faifakamafola. Pea ʼaki pe te tapuakina ʼa Sehova, ʼe tou tala te logo lelei ʼaki te lototoʼa pea mo tou faʼafai tuʼumaʼu! ʼE tou kole tuʼumaʼu kia Sehova ʼaki te agavaivai ke ina takitaki tatou ke tou mahino ki te ʼu lea fakapolofeta ʼo te Tohi-Tapu. ʼE tou tui papau, ʼi tona temi totonu, ‘ ʼe ina taki anai tatou ke tou mahino katoa ki te moʼoni.’—Soa. 16:13.