1. Ohage ko tona ui ia Mateo 24:9, he koʼe ʼe mole tou punamaʼuli moka fehiʼaʼinaʼi tatou e te hahaʼi ʼo te malama?

NEʼE fakatupu tatou e Sehova ke tou ʼoʼofa pea ke ʼofainaʼi tatou. Koia, ka fehiʼa he tahi kia tatou, pea ʼe tou mamahi ai, pea ʼe feala ke tou matataku ai. Ohage la ko te tuagaʼane ʼaeni ko Georgina, * ʼae ʼe maʼuli ʼi Eulopa. ʼE ina fakamatala fenei: “ ʼI toku taʼu 14, neʼe fehiʼa taku faʼe kia au he neʼe au fia tauhi kia Sehova. Neʼe au lotomamahi ʼaupito pea mo au manatu neʼe lagi ko au ʼae ʼe kovi.” Pea neʼe tohi fenei e te tehina ko Danylo: “Neʼe ʼomai he kau solia ʼo ta au, mo laukoviʼi au, pea mo fakamatakuʼi au, ʼuhi ʼae he ʼe ko au ko he Fakamoʼoni ʼa Sehova. Neʼe au mataku ʼosi pea mo au lainoa.” Ka fehiʼaʼinaʼi tatou, ʼe tou mamahi ai. Kae ʼe mole tou punamaʼuli, he neʼe fakakikite e Sesu totatou fehiʼaʼinaʼi ʼaia e te hahaʼi.—Lau ia Mateo 24:9.

2-3. He koʼe ʼe fehiʼa te malama ki te ʼu tisipulo ʼa Sesu?

² He koʼe ʼe fehihiʼa te hahaʼi kia tatou? Ko tona tupuʼaga ʼae, he ʼe mole tou “kau ki te malama ʼaeni,” ohage pe ko Sesu. (Soa. 15:17-19) Koia la ʼae, logo la ʼe tou fakaʼapaʼapa ki te ʼu puleʼaga fakatagata, kae ʼe mole tou faipolitike. ʼE mole tou tauhi ki te fuka pea mo hiva te hiva fakapuleʼaga. ʼE ko Sehova tokotahi pe ʼae ʼe tou tauhi ki ai pea ʼe tou lagolago ki tona pule. ʼE mole tou hage ko Satana pea mo tana hahaʼi, ʼae ʼe natou fakatutuʼu ki te ʼAtua. (Sen. 3:1-5, 15) ʼE tou toe tala foki ko te puleʼaki pe ʼe tahi ki te ʼu fihifihia ʼo te tagata ʼe ko te Puleʼaga ʼo te ʼAtua pea ʼe kua ina vave pulihi anai ia natou fuli ʼae  ʼe fakafeagai ki ai. (Tan. 2:44; Fkha. 19:19-21) ʼE ko he logo lelei ʼaia ki te kau agavaivai, kae ʼe mole fia logo ia ki ai te kau agakovi.—Pes. 37:10, 11.

³ ʼE toe fehiʼa te hahaʼi kia tatou, he ʼe alu tahi tatatou aga mo te manatu ʼa te ʼAtua ʼae ʼe tuʼu ʼi te Tohi-Tapu kae mole ko ʼae ʼa te malama. Ohage la, kua tali pe e te hahaʼi te ʼu aga fakalialia mo heʼe ʼaoga. Kae neʼe ko te taʼi aga ʼaia neʼe fai e te hahaʼi ʼo Sotoma mo Komola, ʼo tupu ai tonatou tauteaʼi e te ʼAtua. (Suta 7) Koia ʼae ʼe vaʼi ai tatou e te hahaʼi, pea mo natou ui ʼe tou aga fefeka.—1 Pet. 4:3, 4.

4. Ko te ʼu kalitate fea ka tokoni mai ke tou ʼutakiʼi totatou fehiʼaʼinaʼi?

⁴ Kotea ʼae ka tokoni mai ke tou kataki moka fehihiʼa mo laukoviʼi tatou e te hahaʼi? ʼE tonu ke tou tui ʼe tokoni mai anai ia Sehova, he ʼe ko te tui ʼe hage ko he meʼa tali tau, ʼe ina “tamateʼi te ʼu kauʼi nahau ulo fuli ʼa te Agakovi.” (Efe. 6:16) Pea ʼe tonu foki ke tou ʼoʼofa, he ʼe ko te ʼofa ʼe ina katakiʼi ia te ʼu faigataʼaʼia fuli. (1 Ko. 13:4-7, 13) Tou vakaʼi pe ʼe tokoni feafeaʼi mai totatou ʼofa kia Sehova, mo ʼotatou tehina mo tuagaʼane, ʼo toe feia mo ʼotatou fili, ke tou ʼutakiʼi totatou fehiʼaʼinaʼi e te malamanei.

5. Kotea ʼae neʼe lava fai e Sesu ʼuhi ko tona ʼofa ki tana Tamai?

⁵ ʼI te po fakaʼosi ʼo Sesu mo ʼana tisipulo, neʼe ina ui fenei kia natou: “ ʼE au ʼofa ʼi te Tamai, [koia] ʼe au fai pe ia te meʼa ʼae neʼe fakatotonu mai e te Tamai.” (Soa. 14:31) Ko te ʼofa ʼo Sesu kia Sehova ʼae neʼe ina foaki kia ia te malohi ke ina tauʼi te ʼu ʼahiʼahi ʼae neʼe ʼamanaki hoko kia ia. Pea ʼe toe feia pe anai mo tatou moka ʼe tou ʼoʼofa kia Sehova.

6. ʼO mulimuli kia Loma 5:3-5, kotea ʼae ʼe logoʼi e te ʼu kaugana ʼa Sehova moka fehiʼaʼinaʼi natou?

⁶ Ko te ʼofa ʼo te ʼu kaugana ʼa Sehova ki tanatou Tamai ʼae ʼi selo, neʼe ina foaki ai kia natou te malohi ʼi tonatou fakatagaʼi. Ohage la, neʼe ʼave te kau apositolo kia muʼa ʼo te fakamauʼaga Sutea ʼuhi ko tanatou faifakamafola. Pea ko tanatou ʼoʼofa kia Sehova ʼae neʼe ʼekenaki ai natou ke natou ui ʼe natou fakalogo ki te ʼAtua kae mole ki te tagata. (Gaue 5:29; 1 Soa. 5:3) ʼO toe feia pe ʼi te temi nei, ko te ʼofa ʼo ʼotatou tehina mo tuagaʼane kia Sehova, ʼae ʼe natou maʼu ai te malohi moka fakatagaʼi natou e te ʼu puleʼaga fakatagata agakovi. ʼE mole natou lotovaivai moka fehiʼaʼinaʼi natou, kae ʼe natou fiafia.—Gaue 5:41; lau ia Loma 5:3-5.

7. ʼE feafeaʼi anai tatatou aga moka fakafeagai mai ʼotatou famili?

⁷ Kae ʼe feala ke faigataʼa age moka fakafeagai mai ʼotatou famili kia tatou. ʼI tatatou kamata iloʼi ia te moʼoni, neʼe lagi ui e ʼihi neʼe kakaʼi tatou peʼe kua tou vavale. (Vakaʼi ia Mko. 3:21.) Pea neʼe feala pe ke natou ta tatou. ʼE mole tou punamaʼuli ki te faʼahi ʼaia, he neʼe ui fenei e Sesu: “Ko te ʼu fili ʼo te tagata ʼe ko natou totonu anai ʼo tona loto fale.” (Mat. 10:36) Logo la tanatou gaohi koviʼi tatou, kae ʼe tou ʼoʼofa pe kia natou, ʼuhi ʼae he ʼe tou ʼoʼofa ia Sehova. (Mat. 22:37-39) Kae ʼe maʼuhiga age kia tatou hatatou fakalogo ki te ʼu lao pea mo te ʼu fakatotonu ʼa te ʼAtua, ʼi hatatou fakalogo ki ʼotatou famili.

8-9. Kotea ʼae neʼe tokoni ki he tuagaʼane ke nofo agatonu logo la tona fakatagaʼi?

⁸ Ko Georgina, ʼae neʼe kua tou ʼosi palalau ki ai, neʼe ina lava katakiʼi tona fakatagaʼi e tana faʼe. Neʼe ina ui, ʼi te kamata, neʼe nā ako tau faʼe ia te Tohi-Tapu. Kae hili ki ai mahina ʼe ono, ʼi tana fia kau leva ʼae ki te ʼu fono, neʼe kamata fakatagaʼi ia ia e tana faʼe. Neʼe feia tana faʼe he neʼe felogoi ia mo te  kau aposita. ʼE hoko atu fenei e Georgina: “Neʼe laukoviʼi au e taku faʼe, mo ina fusi toku lauʼulu, mo tege au pea mo laku ʼaku tohi. Kae neʼe au papitema ʼi toku taʼu 15. Pea ke tuku taku tauhi ʼae kia Sehova, neʼe ʼave au e taku faʼe ki he fale neʼe nonofo ai ni taʼahine ʼe toloke pea mo agakovi. Neʼe au mamahi ʼosi he neʼe ko taku faʼe totonu ʼae neʼe ina gaohi koviʼi au, kae neʼe tonu ia ke ʼofa mo tokaga kia au.”

⁹ Kotea ʼae neʼe tokoni kia Georgina ke nofo agatonu? ʼE ina ui fenei: “ ʼI te kamata gaohi koviʼi au e taku faʼe, neʼe kua ʼosi katoa te Tohi-Tapu ʼi taku lau. Neʼe au tui ai kua au maʼu te moʼoni, pea neʼe kua au felogoi lelei ai mo Sehova. Neʼe au faikole tuʼumaʼu kia te ia pea neʼe fagono mai. ʼI taku nofo ʼi te fale ʼae neʼe nonofo ai te ʼu taʼahine agakovi, neʼe fakaafe au e he tuagaʼane ke ma olo ki tona ʼapi ʼo ma ako ai te Tohi-Tapu. Neʼe toe fakalotomalohi au e te ʼu tehina mo tuagaʼane ʼo te kokelekasio, pea neʼe natou gaohi au ohage pe ko he tahi ʼo tonatou famili. Neʼe au mahino ai, ʼe malohi age ia Sehova ʼi ʼotatou fili fuli.

10. Kotea ʼae ʼe feala ke tou tui papau ki ai?

¹⁰ Neʼe tohi e te apositolo ko Paulo ʼe mole he meʼa ʼe ina “fakamavae [anai] tatou mai te ʼofa ʼo te ʼAtua [ia tatou], ʼae ia Kilisito Sesu totatou ʼAliki.” (Loma 8:38, 39) ʼE feala ke tou tui papau ai, ʼe nofo tuʼumaʼu pe ia Sehova ʼi ʼotatou tafa, ʼo fakapelepeleʼi pea mo fakalotomalohiʼi tatou. Pea ohage ko tona fakaha mai e Georgina, ʼe toe tokoni mai ia Sehova kia tatou ʼaki totatou famili fakalaumalie.

11. Neʼe tokoni feafeaʼi te ʼofa ʼae neʼe palalau ki ai ia Sesu ia Soane 15:12, 13 ki ʼana tisipulo?

¹¹ ʼI te po ʼi muʼa ʼo tana mate, neʼe toe fakamanatuʼi age e Sesu ki ʼana tisipulo te maʼua ʼae ke natou feʼofaʼaki. (Lau ia Soane 15:12, 13.) Neʼe ina iloʼi, ʼe natou logo tahi anai pea mo natou lava ʼutakiʼi tonatou fakatagaʼi, moka ʼe natou faʼifaʼitaki ia tona ʼofa. Ohage la ko te kokelekasio ʼo te temi muʼa ʼo Tesalonika. ʼI tona kamata fakatuʼu, neʼe fakatagaʼi ai natou. Kae logo la te faʼahi ʼaia, neʼe natou faʼa kataki pea mo feʼofaʼaki. (1 Tes. 1:3, 6, 7) Pea neʼe fakalotomalohi natou e Paulo ke toe laka age tonatou feʼofaʼaki. (1 Tes. 4:9, 10) ʼE uga anai e tonatou ʼofa ke natou tokoni kia natou ʼae neʼe lotomamahi pea mo vaivai ʼi te faʼahi fakalaumalie.  (1 Tes. 5:14) Neʼe mulimuli te kau Tesalonika ki te tokoni ʼa Paulo. Koia neʼe ui fenei leva e Paulo: “Kua tuputupu tokotou feʼofaniʼaki ia koutou.” (2 Tes. 1:3-5) Ko tonatou feʼofaʼaki ʼaia neʼe tokoni ai ke natou tauʼi ʼonatou fihifihia pea mo ʼutakiʼi tonatou fakatagaʼi.

12. Neʼe feʼofaʼaki feafeaʼi te ʼu tehina mo tuagaʼane lolotoga te temi tau?

¹² Tou vakaʼi leva te faʼifaʼitaki ʼa Danylo, ʼae neʼe kua tou ʼosi palalau ki ai, pea mo tona ʼohoana. Logo la te tau ʼae neʼe hoko ʼi tonā kolo, neʼe nā haga kau aipe ki te ʼu fono, mo faifakamafola, pea mo vaevae tanā meʼa kai mo te ʼu tehina mo tuagaʼane. ʼI te tahi ʼaho leva, neʼe ʼomai te kau tagata solia kio naua. ʼE fakamatala fenei e Danylo: “Neʼe natou fakatotonu mai ke au fakafisi ki taku tui. Neʼe mole au loto ki ai. Koia neʼe natou ta au, mo ui mai e natou matehi anai au, pea neʼe natou fakapa te fana ʼi toku fuga ʼulu, moʼoku fakamatakuʼi. ʼI tanatou mavae, neʼe natou ui mai ʼe natou toe liliu mai anai ʼo fakaʼalikiʼi toku ʼohoana. Neʼe fakahola vave ai maua ki he tahi kolo e te ʼu tehina mo tuagaʼane. ʼE mole galo anai kia au tonatou ʼofa. Pea ʼi te kolo ʼae neʼe ma tau ki ai, neʼe foaki mai e te tahi ʼu tehina mo tuagaʼane hamā meʼa kai. Neʼe natou toe tokoni mai ke au maʼu haku gaue pea mo homa ʼapi. Ki muli age, neʼe feala ke ma fakaʼapi he ʼu tehina mo tuagaʼane neʼe feholaki mai te tau.” ʼE ha mai ʼi te fakamatala ʼaia, ʼe maʼuhiga te ʼofa moʼo ʼutakiʼi totatou fehiʼaʼinaʼi.

13. ʼE tokoni feafeaʼi mai ia te laumalie maʼoniʼoni ʼo te ʼAtua ke hoko atu tatatou tauhi logo la totatou fehiʼaʼinaʼi?

¹³ Neʼe ui e Sesu ki ʼana tisipulo ke natou ʼoʼofa ki ʼonatou fili. (Mat. 5:44, 45) ʼE mole faigafua, kae ʼe feala pe ʼaki te tokoni ʼa te laumalie maʼoniʼoni ʼo te ʼAtua. ʼE feala ʼaki te laumalie maʼoniʼoni ʼaia ke tou ʼoʼofa, mo kataki fualoa, mo agaʼofa, mo agamalū, pea mo lotololomi. (Kal. 5:22, 23) ʼE tokoni mai te ʼu kalitate ʼaia ke tou ʼutakiʼi moka fehiʼaʼinaʼi tatou. Tokolahi neʼe natou fai ni fetogi ʼuhi ʼae neʼe fakaha te ʼu kalitate ʼaia e ʼonatou ʼohoana, peʼe ko ʼonatou fanau, peʼe ko ʼonatou vahaʼa fale. Pea neʼe liliu pe la ʼihi ko ni tehina mo tuagaʼane. Kapau ʼe faigataʼa kia koe hou ʼofa kia natou ʼae ʼe fehihiʼa kia koe ʼuhi ko tau tauhi kia Sehova, kole ia tona laumalie. (Luka 11:13)  Pea ke ke falala ʼe fua lelei tuʼumaʼu pe kia koe moka ke fakalogo ki te ʼAtua.—Taag. 3:5-7.

14-15. Neʼe tokoni feafeaʼi ia te koga tohi ʼo Loma 12:17-21 kia Yasmeen ke ina katakiʼi tona gaohi koviʼi e tona ʼohoana?

¹⁴ Tou vakaʼi te meʼa ʼae neʼe hoko kia Yasmeen, ʼae ʼe nofo ʼi he fenua Alape. ʼI tana liliu ko he Fakamoʼoni ʼa Sehova, neʼe manatu tona ʼohoana kua natou kakaʼi ia ia. Neʼe ina faigaʼi ai ke ina taʼofi tana tauhi ʼae ki te ʼAtua. Neʼe ina laukoviʼi ia ia. Neʼe ina toe kole foki ki tona famili, mo he takitaki lotu pea mo he tagata gaohi meʼa fakatemonio ke natou fakatutukiʼi ia ia pea mo ui age ʼe mavete anai tona famili ʼuhi ko ia. ʼI te tahi ʼaho, ʼae neʼe fai ai te fono ʼo te kokelekasio, neʼe haʼu ʼo laukoviʼi ia te ʼu tehina mo tuagaʼane. Neʼe tagi tuʼumaʼu pe ia Yasmeen ʼi tona gaohi koviʼi ʼaia.

¹⁵ Neʼe fakapelepeleʼi mo fakalotofimalie ia Yasmeen e tona famili fakalaumalie ʼi te ʼu fono. Neʼe fakalotomalohiʼi ia ia e te ʼu tagata ʼafea ke ina maʼuliʼi te tokoni ʼae ia Loma 12:17-21. (Lau.) ʼE ui fenei e Yasmeen: “Neʼe mole faigafua, kae neʼe au kole kia Sehova ke tokoni mai. Pea neʼe au toe faiga foki ke au fakalogo ki te meʼa ʼae ʼe ui mai ʼi te Tohi-Tapu. Ka laku e toku ʼohoana te ʼu ʼotaʼota ʼi fale kuka, neʼe au tae. Ka ina leakoviʼi au, neʼe au tali lelei age pe. Pea moka mahaki, ʼe au tokaga lelei pe ki ai.”

16-17. Kotea ʼae ʼe tou ako mai te faʼifaʼitaki ʼa Yasmeen?

¹⁶ Neʼe fua lelei kia Yasmeen tana haga ʼofa pe ʼae ki tona ʼohoana. ʼE ina ui fenei: “Neʼe falala leva toku ʼohoana kia au, he neʼe au fakaha tuʼumaʼu pe ia te moʼoni. Neʼe fakalogo mai pea mo fakaʼapaʼapa mai moka neʼe ma palalau ki te lotu. Pea neʼe ina tali ke ma felogoi ʼi te tokalelei. ʼI te temi nei, ʼe ina fakalotomalohiʼi au ke au alu ki te ʼu fono. Kua lelei age ʼama felogoi pea kua ma maʼuʼuli ʼi te tokalelei. ʼE au fakaʼamu ke tali anai e toku ʼohoana ia te moʼoni pea ke ma tauhi fakatahi kia Sehova.”

¹⁷ ʼE ha mai ʼi te faʼifaʼitaki ʼa Yasmeen, ko te ʼofa “ ʼe ina ʼutakiʼi ia meʼa fuli, . . . ʼe falala kia meʼa fuli pea ʼe ina katakiʼi ia meʼa fuli.” (1 Ko. 13:4, 7) ʼE kovi ʼosi ia te fehiʼa pea ʼe fakatupu mamahi. Kae ko te ʼofa ʼe ina lava tauʼi ia te fehiʼa. ʼE feala ki te ʼofa ke ina fetogi te loto ʼo te hahaʼi. Pea ka tou haga ʼoʼofa ki te hahaʼi, ʼe tou fakafiafiaʼi ai te loto ʼo Sehova. Kae ʼe feafeaʼi hatatou taupau totatou fiafia logo la totatou fehiʼaʼinaʼi?

18. He koʼe ʼe tou fiafia logo la totatou fehiʼaʼinaʼi?

¹⁸ Neʼe ui e Sesu ke tou fiafia moka fehihiʼa te hahaʼi kia tatou. (Luka 6:22) ʼE mole fakaʼuhiga leva ʼe tou leleiʼia moka fakatagaʼi tatou ʼuhi ko tatatou tui. Kae ʼe tou fiafia ʼuhi ko tupuʼaga ʼe tolu: ʼUluaki, ka tou ʼutakiʼi totatou fakatagaʼi, ʼe ʼofa ia Sehova ia tatou. (1 Pet. 4:13, 14) Lua, ʼe malohi age ai tatatou tui pea ʼe liliu ai ʼo maʼuhiga. (1 Pet. 1:7) Tolu, ʼe tou iloʼi ʼe tou maʼu anai ia te maʼuli heʼe gata.—Loma 2:6, 7.

19. He koʼe neʼe fiafia ia te kau apositolo ʼi tonatou huipiʼi?

¹⁹ Hili te fakatuʼuake ʼo Sesu, neʼe logoʼi e te kau apositolo te fiafia ʼae neʼe talanoa ki ai ia Sesu. Neʼe fakatotonu e te kau takitaki lotu ke huipiʼi natou pea ke natou fakagata tanatou faifakamafola. Kae neʼe fiafia pe te kau apositolo “he neʼe ko he pilivilesio kia natou tonatou fakalainoaʼi ʼuhi ko te huafa ʼo Sesu.” (Gaue 5:40-42) Neʼe lahi age tonatou ʼoʼofa ki tonatou Pule, ʼi tanatou matataku ʼae naʼa gaohi koviʼi natou e ʼonatou fili. Neʼe natou fakaha te ʼofa ʼaia, he neʼe mole natou tuku tanatou tala te logo lelei. ʼI te temi nei, ko te ʼu tehina mo tuagaʼane ʼe hoko atu pe tanatou tauhi ʼae kia Sehova logo la ʼonatou fihifihia. Pea ʼe natou iloʼi ʼe mole galoʼi anai e Sehova ʼanatou gaue pea mo tonatou ʼoʼofa ki tona huafa.—Hep. 6:10.

20. Kotea ʼae ka tou vakaʼi anai ʼi te alatike ka hoa mai?

²⁰ ʼE hoko atu pe anai te fehihiʼa ʼa te hahaʼi kia tatou, ʼo kaku ki te pulihi ʼo te malama ʼaeni. (Soa. 15:19) Kae ʼe mole tou matataku ai. ʼE tou vakaʼi anai ʼi te alatike ka hoa mai, ko Sehova ʼe ina fakamalohiʼi pea mo haofaki anai ʼana kaugana agatonu. (2 Tes. 3:3) Koia, tou haga ʼoʼofa kia Sehova, mo ʼotatou tehina mo tuagaʼane, ʼo feia aipe ki ʼotatou fili. Kapau ʼe tou fai te faʼahi ʼaia, ʼe tou logo tahi mo malolohi anai ʼi te faʼahi fakalaumalie. ʼE tou toe fakakololiaʼi foki mo Sehova, pea mo fakaha ai ko te ʼofa ʼe malohi age ʼi te fehiʼa.