KO HE MAHAKI KOVI PEʼE KO HE MAʼIMOA ʼE MALAVE MALOHI KI TE MAʼULI ʼO HE TAHI. Ki muʼa atu ko André * neʼe ko te tagata malohi mo malolo lelei ʼi te faʼahi fakasino. Pea ʼi te temi ʼae neʼe palalisia ai, neʼe ina ui fenei: “Neʼe au lotomamahi ʼaupito. Neʼe mole kei hoku malohi pea neʼe mole kei au faʼa kataki. Neʼe kua au noa noa lelei ʼosi.”

Ko te aluʼaga ʼae neʼe tau mo André, ʼe tou fakatokagaʼi ai, ʼe mole feala ke tou puleʼi katoa totatou malolo fakasino. Kae ʼe feala pe ke tou fai ni fakatuʼutuʼu ke mole tou mahahaki ai. ʼE feafeaʼi anai mo kapau la ʼe fakaalualu pe ʼo kovi age totatou malolo fakasino? ʼE fakaʼuhiga koa ʼe tou maʼuli mamahi tuʼumaʼu anai? Kailoa ia. ʼE hoki tou palalau anai ki ai ki muli age. ʼUluaki, tou vakaʼi muʼa he ʼu pelesepeto ki te malolo lelei fakasino.

KE KE MAʼU TE ‘LOTOLOLOMI ʼI TE ʼU ALUʼAGA FULI ʼO TOU MAʼULI.’ (1 Timoteo 3:2, 11) Ko te kai lahi mo te inu fakavale ʼe kovi ki te malolo fakasino pea ʼe fakatupu puli falā. ʼE ui fenei ia Taaga Lea 23:20, 21: “Ke aua naa ke kau i te kau inu vino, ia natou ae e kai fakavale ki te u inasi: Koteuhi ko te tagata inu kava mo ae e kai fakavale e liliu o masiva.”

TUKU TAU ʼULIHI TOU SINO. ʼE ui fenei ia 2 Kolonito 7:1: “Tou fakamaʼa ia tatou mai te ʼu ʼuli fuli ʼo te sino pea mo te ʼatamai.” ʼE ʼulihi e te hahaʼi tonatou sino ʼaki te kai ʼo te pata mo te suluka peʼe ko te inu fakavale ʼo te kava peʼe ko te fakaʼaogaʼi ʼo te toloke. Ohage la, ʼe ui fenei te U.S. Centers for Disease Control and Prevention ʼo ʼuhiga mo te suluka “ ʼe fakatupu mahaki mo fakatupu kovi ki te ʼu teitei koga fuli ʼo te sino.”

KO TOU SINO MO TOU MAʼULI ʼE KO HE ʼU MEʼA ʼOFA MAʼUHIGA ʼAUPITO. ʼE ui fenei ʼi te Tohi-Tapu: “Koteʼuhi ʼaki ia te [ʼAtua], ʼe tou maʼuʼuli, mo gaūgaūe pea mo tou ʼi heni.” (Gaue 17:28) Ka tou metitasioʼi te manatu ʼaeni, ʼe uga ai tatou ke tou tekeʼi te ʼu aluʼaga ʼae ʼe fakatupu tuʼutamaki, ʼe feala ke hoko peʼe ʼi te fale gaue, peʼe ʼi te ʼuli motoka peʼe ʼi te filifili ʼo he fakafiafia. ʼE ke lagi logoʼi ai he toe fiafia lahi fakatemi. Kae ʼe feafeaʼi anai mo kapau ʼe ke tuʼutamaki ai pea ke maʼimoa ʼo talu ai.

LOLOMI TE ʼU MANATU ʼAE ʼE MOLE LELEI. Ko te ʼatamai mo te sino ʼe nā pipiki fakatahi. Koia, faigaʼi ke ke lolomi te hoha fau, te hoko ita, te maheka pea mo ʼihi  atu manatu ʼe mole lelei. ʼE ui fenei ia Pesalemo 37:8: “Ke ke tuku te ita, ke ke siaki te itaita kovi.” Pea ʼe toe ui ia Mateo 6:34: “ ʼAua naʼa kotou tuʼania ki te apogipogi, koteʼuhi ʼe toe ʼi ai anai mo ʼona tuʼania.”

FAIGAʼI KE KE MAʼU HE ʼU MANATU ʼE LELEI. ʼE ui fenei ia Taaga Lea 14:30: “Ko he loto lelei ko te mauli ki te sino.” Pea ʼe toe ui fenei ʼi te Tohi-Tapu: “Ko te loto ae e fiafia ko he faitoo lelei.” (Taaga Lea 17:22) Neʼe fakamoʼoni ki ai te kau poto. Neʼe ui fenei e te toketa ʼi Écosse: “Kapau ʼe ke fiafia, ʼe mole ke mahamahaki anai ohage ko natou ʼae ʼe mole fiafia.”

KE KE MAʼU TE FAʼA KATAKI. Ohage ko André ʼae neʼe tou talanoa ki ai ʼi te kamata, ka tou tau mo he mamahi ʼe loaloaga, ʼe mole ʼe ʼi ai he tahi age puleʼaki, ʼe tonu pe ke tou katakiʼi. Kae ʼe ʼi ai ʼihi faʼahiga fai ʼe feala ke tou katakiʼi ai te ʼu faigataʼaʼia. Pea ko ʼihi ʼi te lahi fau ʼo tonatou lotovaivai, ʼe ʼasili veliveli ai tanatou faʼa kataki. ʼE ui fenei ia Taaga Lea 24:10: “Kapau e ke vaivai i te aho o te mamahi, ko tou malohi e veliveli pe.”

Pea ko ʼihi, ʼi te kamata neʼe natou lotomamahi, kae neʼe natou faigaʼi ke natou lotomalohi. ʼE natou tali te mamahi mo kumi he ʼu puleʼaki moʼo tauʼi te aluʼaga ʼaia. Pea neʼe ko te meʼa ʼaia ʼae neʼe fai e André. ʼI tana faikole tuʼumaʼu pea mo metitasio ki te logo lelei fakalotomalohi ʼo te Tohi-Tapu, neʼe “sio ai ki te ʼu faigamalie ʼae ke ina katakiʼi te ʼu fihifihia, kae ke mole ina tokagaʼi te ʼu aluʼaga fakatupu lotovaivai.” Pea tahi, ohage ko te tokolahi neʼe felaveʼi mo ni malaʼia, neʼe ina taʼofi ai he ʼu ako maʼuhiga mai te loto manavaʼofa pea mo te lotomahino. Koia neʼe lotomalohi ai ke ina vaevae mo ʼihi te logo fakalotofimalie ʼo te Tohi-Tapu.

Ko Steve ʼe ko he tahi tagata neʼe tau mo ia he aluʼaga kovi. ʼI tona taʼu 15 neʼe hoko ki ai he tuʼutamaki ʼo palalisia katoa ai. Kae ʼi tona taʼu 18, neʼe kua feala tana toe fakaʼaogaʼi ʼona nima. ʼI tana ako ʼi te univelesite, neʼe kamata ai tana toloke, tana inu kava pea mo tana fai te ʼu aga heʼe maʼa. Neʼe mole hona ʼamanaki ki te ka haʼu ʼo kaku ki te temi ʼae neʼe ina ako ai te Tohi-Tapu. Pea neʼe hoki ina maʼu ai he ʼuhiga ki tona maʼuli ʼo ina liʼaki ai ʼana agamahani ʼae ʼe kovi. Neʼe ui fenei e Steve: “Lolotoga ni taʼu, neʼe mole au logoʼi pe la hoku ʼuhiga, kae ʼi te temi nei kua fonu toku maʼuli ʼi te tokalelei, te fiafia pea mo te maʼuli fakafeʼauga.”

ʼE fakamanatuʼi mai ʼi te ʼu palalau ʼa Steve mo André te manatu ʼo te Pesalemo 19:7, 8, MN: “Ko te lao ʼa Sehova ʼe haohaoa ʼo ina toe fakalotomalohiʼi. . . . Ko te ʼu fakatotonu ʼa Sehova ʼe totonu, ʼo natou fakafiafia te loto; ko te fakatotonu ʼa Sehova ʼe maʼa, pea ʼe ina fakagigila te ʼu mata.”