Ka akoʼi he tahi ʼaki te Tohi-Tapu, ʼe feala ke fetogi katoa ai tona maʼuli. Tou vakaʼi te ʼu faʼifaʼitaki ʼaeni ʼe lua ʼo Ricardo mo Andres.

RICARDO: Neʼe au kau ki te kutuga agamalohi kae neʼe kei au taʼu 15 pe. Neʼe au kamata faʼifaʼitakiʼi ai te ʼu mamio kovi ʼo ʼoku kaumeʼa foʼou. Pea ko taku fakatuʼutuʼu ke au pilisoni ʼi ni taʼu ʼe 10. Neʼe ko he fakakaukau vale foki ʼaia. Kae neʼe ʼi ai ʼihi ʼi toku kolo neʼe laupisiʼi mo fakaʼapaʼapaʼi he neʼe kua natou pilisoni. Pea neʼe au loto la ke au hage ko natou.

Neʼe au muliʼi pe te faʼahiga maʼuli ʼo taku kutuga, ohage ko te agamalohi mo te toloke pea mo te ʼu felaveʼi fakasino. ʼI te tahi po, neʼe au kau ʼi te faifana neʼe fai. ʼI taku manatu ʼe au mate ai kae neʼe au hao pe. Hili ʼaia, neʼe au kamata fakakaukauʼi lelei leva toku maʼuli mo ʼaku fakatuʼutuʼu. Neʼe au fakatotonu ai ke au fetogi toku maʼuli. Kae ʼo feafeaʼi foki? Kofea ʼae ʼe feala ke au maʼu ai he tokoni?

Neʼe hahaʼi ʼoku famili neʼe mole fiafia he neʼe lahi ʼonatou fihifihia. Kae neʼe mole feia te famili ʼo taku faʼe tagata. Neʼe au iloʼi ʼe natou agalelei pea ʼe natou maʼuliʼi te ʼu pelesepeto ʼo te Tohi-Tapu. Neʼe hoki au iloʼi mai ia natou, ko te huafa ʼo te ʼAtua ko Sehova. Koia, neʼe heʼeki faʼa fualoa atu ki te faifana ʼae neʼe hoko, neʼe au faikole kia Sehova, ʼo au fakaʼaogaʼi tona huafa mo kole age tana tokoni. ʼI te uhu ake pe, neʼe au punamaʼuli he neʼe tukituki e te Fakamoʼoni ʼa Sehova toku matapa. Neʼe liliu leva ko toku tagata faiako.

Kae ki muli age, neʼe ʼi ai pe te ʼu faigataʼaʼia. Neʼe tau telefoni mai ʼoku kaumeʼa ke matou tataka fakatahi. Neʼe au lava fakafisi pe logo la neʼe faigataʼa kia au. Neʼe au loto ke hoko atu taku ako te Tohi-Tapu. Pea neʼe ko he tonu ia ʼe lelei he ʼe kua lelei age toku maʼuli pea kua au maʼu te fiafia moʼoni.

ʼE au manatuʼi ʼi te tahi ʼaho neʼe au faikole kia Sehova. Neʼe au ui age neʼe ko taku fakaʼamu ʼi te temi muʼa ke pilisoniʼi au ʼi ni taʼu ʼe hogofulu ke tupu ai hoku fakaʼapaʼapaʼi. Kae ʼi te temi leva ʼaeni, ʼe au kole age ke ina fakafealagia mai ke au pionie temi katoa ʼi ni taʼu ʼe hogofulu. Koteʼuhi ʼe au fia tokoni ki ʼihi ohage pe ko te tokoni mai ʼa ʼihi kia au. Neʼe tali e te ʼAtua taku kole he ʼe kua taʼu 17 nei taku pionie. Pea ʼi meʼa lelei foki, neʼe mole kakusia ia taku fakatuʼutuʼu ʼae ke au pilisoni.

Tokolahi ʼo ʼoku kaumeʼa ʼafeā ʼe kei pilisoni pe nei lolotoga ni taʼu. Ko ʼihi kua mamate. Ka au toe manatuʼi toku maʼuli ʼafeā, ʼe au fakafetaʼi lahi ki ʼoku kaiga ʼae ʼe Fakamoʼoni kia Sehova. Neʼe natou makehe he neʼe natou muliʼi te Tohi-Tapu pea neʼe au fakaʼapaʼapa kia natou ʼo laka age ia natou ʼo te kutuga agamalohi. Kae ʼe au fakafetaʼi tafito ki te ʼAtua ʼi tana haga ʼo akoʼi mai te maʼuli ʼae lelei kehe age.

 ANDRES: Neʼe au tupu mo lahilahi ake ʼi he kolo masiva. Neʼe lahi ai te toloke, te agakaka, te faifakapo mo te aga fakapaomutu. Neʼe kovi te inu kava ʼo taku tamai mo tana toloke. Pea neʼe fuhu tuʼumaʼu pe mo taku faʼe mo nā fetauveleʼaki.

Neʼe au kamata inu kava mo toloke kae kei au veliveli. Neʼe au taka pe ʼi te ala ʼo kaihaʼa mo fakatau pe te ʼu meʼa ʼae neʼe au kaihaʼa. ʼI taku kua lahi, neʼe faiga taku tamai ke fakaovi mai kia au kae neʼe ʼi ai ʼona fua kovi. Neʼe ina akoʼi mai te fakatau ʼo te toloke mo ʼihi atu meʼa neʼe tapu ʼi te fenua. Neʼe vave pe te maʼu mo te lahi ʼo taku foʼi falā. Kae neʼe ʼomai leva te kau polisi ki toku ʼapi ʼo puke au. Neʼe au pilisoni ai ia taʼu ʼe nima he neʼe meihiʼi pe ke au matehi he tahi.

ʼI te tahi uhu, neʼe tala ifo ʼi te fakatagi ʼo te fale pilisoni ʼe ʼi ai te faipalalau Fakatohi-tapu ʼe fai anai mo te kau Fakamoʼoni ʼa Sehova. Pea neʼe fakaafe te kau pilisoni fuli ki ai. Neʼe au kau ai pea neʼe au leleiʼia te ʼu palalau ʼae neʼe au logo ki ai, ʼo kamata ai la taku ako te Tohi-Tapu mo te kau Fakamoʼoni ʼa Sehova. Neʼe mole natou fakamatala mai pe te ʼu meʼa ʼae ʼe au fia logo ki ai kae neʼe natou toe fakaha mai foki mo te ʼu lekula maʼoluga ʼa te ʼAtua ʼo ʼuhiga mo te ʼu aga ʼe lelei mo ʼae ʼe kovi.

Neʼe au iloʼi ʼe ʼaoga mai anai he tokoni ke au fetogi, tafito la ʼi te ʼu temi ʼae neʼe fakamatakuʼi au e ʼoku kaugā pilisoni ʼae neʼe mole natou leleiʼia taku ako. Neʼe au kole ai kia Sehova te malohi mo te poto pea neʼe ina fakahoko pe ʼaku kole. Neʼe au lava palalau ai ki te Tohi-Tapu ki ʼihi kau pilisoni.

Neʼe hoko leva toku temi mavae. Kae neʼe kua au mahani ʼi te fale pilisoni pea neʼe au loto pe ke au fuafualoa ai. ʼI te ʼaho leva ʼae neʼe au mavae ai, neʼe hahaʼi ia te kau pilisoni neʼe natou fai tauʼine mai pea neʼe ui mai e ʼihi: “Alu la koe patele.”

ʼE au tau fakakaukau pe kotea ʼae neʼe feala ke hoko kia au mo ka na pau la neʼe mole au tuku ke akoʼi au e te ʼAtua. Koia ʼae ʼe au fakafetaʼi ʼaupito ai ki tona manavaʼofa. Neʼe ina iloʼi neʼe feala pe ke au fetogi. a