ʼE ke tui la ʼe lava fakatokatoka anai e te tagata te ʼu faigataʼaʼia fuli ʼae ʼe tupu ai tatatou maʼuli tuʼania ʼi te temi nei mo te temi ka haʼu? ʼE tonu muʼa ke tou iloʼi te tupuʼaga moʼoni ʼo ʼotatou fihifihia, pea hoki feala leva ke tou maʼu he puleʼaki.

Tou toʼo te faʼifaʼitaki ʼaeni ʼo Tom. Neʼe kamata mahamahaki pea ki muli age neʼe mate leva. ʼO tupu kotea? Neʼe ui fenei e te toketa ʼae neʼe gaue ʼi te lopitali ʼae neʼe tuku ai ia Tom: “ ʼI te kamata ʼo tona mahaki, neʼe mole ʼi ai he tahi neʼe ina kumi te tupuʼaga moʼoni ʼo tona mahaki.” Neʼe foaki age pe e te ʼu toketa he ʼu foʼi ʼakau ke logo fimalie ai.

ʼE toe feia pe koa anai te faʼahiga faitoʼo e te tagata te ʼu faigataʼaʼia ʼo te malama ʼaeni? Ohage la moka ʼe faiga ke tuku te ʼu faifakapo. ʼE fai e te ʼu puleʼaga ni lao, mo fakatuʼu he ʼu kamela pea mo fakamalohiʼi age te hahaʼi ʼo te kau polisi. Logo la ʼe ko he ʼu fakatuʼutuʼu ʼe lelei, kae ʼe mole fakatokatoka ai te tupuʼaga moʼoni ʼo te ʼu faigataʼaʼia. Kapau ʼe feia te aga ʼa te hahaʼi, he ʼe kovi ʼanatou manatu mo ʼonatou holi.

ʼE ui fenei e Daniel, ʼe maʼuli ʼi Amelika Saute ʼi he fenua ʼe masiva: “ ʼI muʼa atu neʼe hage pe tomatou maʼuli ko te hahaʼi fuli. Neʼe mole matou tuʼania he ʼu hahaʼi kaihaʼa ʼe toʼo fana. Kae kua puli leva te tokalelei ʼuhi ko te mole kei laka ki muʼa ʼo te maʼuli fakaekonomika. ʼE kua iloga lelei ai te ʼuhiga moʼoni ʼo te tokolahi. ʼE natou manumanū pea ʼe mole kei natou fakaʼapaʼapa ki te maʼuli ʼo te hahaʼi mo ʼonatou koloa.”

Neʼe hola ia Elias a mai te ʼu fenua Alape ʼuhi ko te tau pea ki muli age neʼe ina ako te Tohi-Tapu. ʼE ina ui fenei: “ ʼI toku kolo, neʼe ʼekenaki e ʼihi famili mo te kau takitaki lotu pea mo te kau faipolitike ia te kau tupulaga ke natou olo ki te tau he ʼe natou logologona ai anai. Neʼe toe fakalotoʼi e ʼonatou fili te ʼu tamaliki tagata ke natou fai feia. Neʼe hoki au mahino ai leva ʼe mole feala ke tou falala ki te ʼu pule fakatagata.”

ʼE ui fenei ʼi te Tohi-Tapu:

• “E kovi te u manatu o te loto o te tagata mai tona kei veliveli.”—Senesi 8:21.

• “E pikopiko te loto o fakalaka i te u mea fuli, pea e agakovi ia ia: ko ai e feala ke ina iloi ia ia?”—Selemia 17:9.

• “ ʼE haʼu mai te loto te ʼu fakakaukau kovi, mo te ʼu fakapo, . . . mo te ʼu felaveʼi fakasino heʼe ʼaoga, mo te ʼu kaihaʼa, mo te ʼu fakamoʼoni loi.”—Mateo 15:19.

ʼE mole heʼeki ʼi ai he puleʼaki ki te ʼu manatu kovi ʼae ʼi te loto ʼo te tagata. Kae ʼe ʼaʼasili kovi age, ohage pe ko tatatou vakaʼi ʼi te alatike kua ʼosi. (2 Timoteo 3:1-5) Ia ʼaho nei, kua loloto age te poto ʼo te tagata pea kua ina maʼu te ʼu faʼahiga felogoi foʼou. Kae he koʼe koa ʼe mole ina lava fakatuʼu te tokalelei ʼi te malama ʼaeni? ʼE ko he fealagia koa ʼe ina maʼu? Peʼe ʼe mole pe ina lavaʼi ia?

Tatau aipe pe ʼe ʼe maʼu anai e te tagata he puleʼaki ki ʼona manatu kovi, kae ʼe mole ina lava fakatuʼu anai ia te tokalelei ʼi te malama ʼaeni. Kotea tona tupuʼaga? ʼE ʼi ai ʼona tuʼakoi.

 ʼE ui fakahagatonu ia Selemia 10:23: “E mole ko te tagata ae e ina taki ona lakaaga.” ʼE hage pe ko te faʼifaʼitaki ʼaeni: neʼe mole fakatupu tatou ke tou maʼuʼuli ʼi te lalo tai. ʼE toe feia pe, neʼe mole fakatupu tatou ke tou puleʼi ni ʼihi.

Ohage la, ʼe leleiʼia koa e he tahi moka ʼe fakatotonu age te faʼahiga maʼuli ʼae ʼe tonu ke ina muliʼi? ʼE ina leleiʼia koa moka ʼe fakatotonu age te faʼahiga manatu ʼo ʼuhiga mo te fakato fatu mo te faʼahiga akoʼi ʼo ʼana tamaliki? Koʼena la ʼihi aluʼaga ʼe tokakovi ai te hahaʼi. Koia ʼe moʼoni pe te Tohi-Tapu, ʼe mole ʼa te tagata te fealagia taki ʼo te tagata. Kae kofea la ʼae ʼe tonu ke tou kumi ki ai he tokoni?

’E ko he aga fakapotopoto tatatou kumi tokoni ki te Tupuʼaga koteʼuhi ʼe ko ia tonu ʼae neʼe ina fakatupu tatou. ʼE mole ina galoʼi ia tatou ohage ko tona ui e ʼihi. Ka tou lau te Tohi-Tapu ʼe tou iloʼi ai ʼe tokaga ia kia tatou. Pea moka ʼe tou mahino ki te tohi makehe ʼaia, ʼe tou toe mahino lelei ai ki ʼotatou tuʼakoi mo te tupuʼaga ʼo te ʼu malaʼia talu mai te hisitolia ʼo te tagata. Koia ʼae neʼe tohi fenei ai e te tagata Siamani faifilosofia: “Neʼe mole taʼofi e te hahaʼi mo te ʼu pule’aga ni ako mai te hisitolia ke tupu ai hanatou fetogi ʼanatou aga.”

Neʼe ui fenei e Sesu: “ ʼE ha te poto ʼi ʼana fanau fuli” peʼe ʼi ʼona fua. (Luka 7:35) ʼE ʼi ai te manatu poto ia Esaia 2:22: “Koutou fakagata la te tuku o takotou falala ki te tagata.” Kapau ʼe tou mulimuli ki te tokoni ʼaeni pea ʼe mole tou fakaʼamu anai ki he meʼa ʼe mole anai hoko. ʼE maʼuli ia Kenneth ʼi Amelika Noleto, ʼi he kolo ʼe fonu ai te agamalohi. ʼE ina ui fenei: “ ʼE fai e te kau faipolitike he ʼu fakapapau kae mole natou fakahoko. Pea ʼe fakamoʼoni ai ʼe totonu pe te Tohi-Tapu.”

ʼE tohi fenei e Daniel ʼae neʼe kua tou palalau ki ai ʼi muʼa atu: “ ʼE fakalaka te temi kae ʼe ha aipe te mole lelei ʼo te pule fakatagata. . . . Tatau aipe pe ʼe lahi hau foʼi falā peʼe lelei tau letelete, kae ʼe mole fakaʼuhiga kua puipui ai tou ka haʼu. ʼE au iloʼi te ʼu hahaʼi neʼe natou hoha ʼaupito ʼuhi ko te ʼu meʼa fuli ʼaia.”

ʼE tokoni mai te Tohi-Tapu ke ʼaua naʼa tou fakaʼamu ki he meʼa ʼe mole hoko anai. ʼE tou vakaʼi anai ʼi te ʼu alatike ʼae ka hoa mai, te ʼamanaki ʼe toe tuʼu ʼi te Tohi-Tapu.