Ko tou ʼuhiga moʼoni ʼe mole gata ʼaki pe tou higoa pea mo tou agaaga tuʼa. ʼE kau ki ai mo te faʼahiga maʼuli ʼae ke loto ki ai, te ʼu meʼa ʼae ʼe ke tui ki ai pea mo tou uluagaʼaga. Ko “koe” totonu ʼi loto pea mo tuʼa.

Ka ke fakaha tou ʼuhiga totonu, ʼe ke lagolago ki te ʼu meʼa ʼae ʼe ke tui ki ai kae ʼe mole ke tuku ke puleʼi koe e ʼou kaumeʼa.

ʼE ui fenei ai e Adrian ʼe tau 18: “Ko te tokolahi ʼe natou hage ko te ʼu tagata peʼe fafine kausu ʼae ʼe fakatuʼu ʼi te ʼu koloa. ʼE mole feala ke natou filifili te ʼu mutuʼi meʼa ʼae ʼe fakatui kia natou. Kae ko ʼihi hahaʼi ʼae ʼe natou filifili maʼa natou.”

ʼE ui fenei e Courtney: “Neʼe au ako pe ʼe feafeaʼi te lagolago ki te meʼa ʼae ʼe lelei, tatau aipe pe ʼe faigataʼa. Kua au iloʼi pe ko ai ʼoku kaumeʼa moʼoni he ka matou fakatahi, ʼe au faʼifaʼitaliha mo natou. Koteʼuhi ʼe natou fakaʼapaʼapa mai ki taku lotu.”

PELESEPETO FAKATOHI-TAPU: “Tuku takotou faʼifaʼitakiʼi ia te ʼu aga ʼo te tuʼu ʼo te ʼu faʼahiga meʼa ʼaeni, kaʼe ke kotou fetogi tokotou ʼulugaaga.”—Loma 12:2.

Fakakaukauʼi tou ʼuhiga moʼoni ʼi te temi nei pe ʼe ke fia liliu ko he faʼahiga tagata peʼe fafine feafeaʼi, ʼaki tau sivisivi ʼou fealagia, ʼou vaivaiʼaga pea mo meʼa ʼe ke tui pau ki ai. Ke ke iloʼi hona tali, fai te ʼu fehuʼi ʼaeni:

ʼOu fealagia: ʼE ʼi ai koa hoku faiva? Ko te ʼu kalitate fea ʼae ʼe au malohi ai? (Ohage la: ʼE au haʼu tautonu tuʼumaʼu koa? ʼE au lotololomi koa? ʼE au faʼa gaue koa? ʼE au lotofoaki koa? Ko te ʼu meʼa lelei fea ʼae ʼe au fai?

TOKONI: ʼE faigataʼa koa kia koe hau maʼu, he ʼu meʼa lelei neʼe ke fai peʼe neʼe ke palalau ki ai? Kole age ki he tahi ʼo tou famili peʼe ko hou kaumeʼa lelei ke ina ui atu pe ko te ʼu kalitate fea la ʼae ʼe ina tokagaʼi ia koe pea kotea tona tupuʼaga.

PELESEPETO FAKATOHI-TAPU: “Ke tahi vakavakaʼi e te tagata ʼana gaue ʼa ia totonu, pea ʼe ina maʼu ai anai he tupuʼaga ke fiafia ʼo ʼuhiga mo ia totonu pe. ʼE mole tonu ke ina fakatatau ʼana gaue mo te ʼu gaue ʼa he tahi age.”—Kalate 6:4.

ʼOu vaivaiʼaga: Ko te ʼu faʼahi fea ʼo toku uluagaaga ʼae ʼe tonu ke au gaueʼi ke lahi age? Ko te temi fea ʼae ʼe faigafua ai toku fakahalaʼi? Ko te ʼu aluʼaga fea ʼae ʼe ʼaoga lahi ai ke au maʼu te lotololomi?

PELESEPETO FAKATOHI-TAPU: “Kapau ʼe tou ui fenei: “ ʼE mole ʼi ai hatatou agahala,” ʼe tou kakaʼi pe ia tatou totonu.”—1 Soane 1:8.

Te ʼu meʼa ʼae ʼe ke tui pau ki ai: Ko te faʼahiga maʼuli feafeaʼi ʼae ʼe au muliʼi, pea kotea tona tupuʼaga? ʼE au tui pau koa ʼe maʼuli moʼoni te ʼAtua? Kotea te ʼu fakamoʼoni ʼo taku tui ki te ʼAtua? Ko te ʼu aluʼaga fea ʼae ʼe au manatu ʼe mole faitotonu, pea kotea tonu tupuʼaga? Ko te ʼu meʼa ʼae ʼe au tui ki ai ʼe hoko moʼoni anai koa ʼi te ka haʼu?

PELESEPETO FAKATOHI-TAPU: “Ko te fealagia ʼo te fakakaukau ʼe ina leʼoleʼo anai koe, ko te fakasiosio tonu ʼe ina taupau anai koe.”—Taaga Lea 2:11, MN.