Te Famili Mo Te ʼu Fakakaumeʼa
ʼE faigataʼa ki te tokolahi ia tanatou felogoi lelei mo tonatou ʼu famili mo ʼonatou kaumeʼa. Tou vakaʼi pe ʼe tokoni feafeaʼi atu te ʼu pelesepeto Fakatohi-tapu ke ke fakamalohiʼi ai ʼau felogoi mo ʼihi.
ʼAUA NAʼA KE MANATU KIA KOE TOTONU
PELESEPETO FAKATOHI-TAPU: “ ʼAua naʼa kotou kumi pe te ʼu meʼa ʼae ʼe lelei kia koutou totonu, kaʼe ke kotou toe kumi foki mo te ʼu meʼa ʼae ʼe lelei ki ʼihi.”—Filipe 2:4.
TONA FAKAʼUHIGA: Ka kita foaki he meʼa ki ʼihi, ʼe malohi anai ʼatatou felogoi ʼi takita tali he meʼa mai ia natou. Kapau ʼe ke manatu pe kia koe totonu, ʼe feala ke puli ai ʼau felogoi lelei mo ʼihi. Ohage la, kapau kua ke ʼohoana pea ʼe ke manatu pe ki ʼou holi, ʼaki te temi ʼe feala ke ke tono. Tahi ʼae meʼa, ʼe mole tou fia kaumeʼa mo he tahi ʼe ina fakahaha ʼona koloa peʼe fia poto. Koia, ʼe ui ʼi te tohi (The Road to Character), “ko te hahaʼi ʼae ʼe natou tokakaga pe kia natou totonu kae mole ki ʼihi, ʼe natou fihifihia anai.”
TE ʼU TOKONI:
-
Tokoni ki ʼihi: Ko he ʼu kaumeʼa lelei ʼe natou fefalalaʼaki mo fetokoniʼaki tuʼumaʼu. ʼE fakaha ʼi te ʼu sivi, ko te ʼu hahaʼi ʼaia ʼe mole natou lotomamahi lahi anai pea ʼe natou lotomalohi mo fiafia.
-
Ke ke lotomahino. Ko he tahi ʼe lotomahino ʼe kaugā mamahi mo ia ʼae ʼe mamahi. ʼE mole kiasi anai mo fai ni fakahuahua ke lavea ai tona loto.
Ko ia ʼae ʼe lotomahino, ʼe fakakaumeʼa mo ʼihi atu lanu pea ʼe mole fakapalatahi.
-
Ke ke fakatahi tuʼumaʼu mo te hahaʼi. Kapau ʼe ke fakakaumeʼa tuʼumaʼu mo he tahi, ʼe kolua feiloʼileleiʼaki anai. Pea ʼe tologa anai ʼakolua felogoi mo kapau ʼe kolua faipalalau ki ʼona tuʼania mo te ʼu meʼa ʼae ʼe maʼuhiga tafito ki ai. Neʼe mole faʼa fualoa ki ai neʼe fai te sivi, ʼe ui ai “ ʼe fiafia te hahaʼi ki te ʼu faipalalau ʼae ʼe maʼuhiga kae mole ki ʼae ʼe laulaunoa.”
FILIFILI LELEI ʼOU KAUMEʼA
PELESEPETO FAKATOHI-TAPU: “Ko te ʼu fakakaugā kovi ʼe fakatupu kovi ki te ʼu faʼahiga aga ʼae ʼe lelei.”—1 Kolonito 15:33, nota.
TONA FAKAʼUHIGA: Ko te hahaʼi ʼae ʼe ke fakatahi tuʼumaʼu mo ia ʼe feala hanatou fakaneke koe ke ke fai te meʼa ʼae ʼe lelei mo ʼae ʼe kovi. ʼE ui e te kau sivi ʼo te agaaga ʼo te tagata, ko ʼou kaumeʼa ʼe feala ke natou fulihi tou maʼuli. Ohage la, ʼe feala ke ke kamata suluka peʼe ke fia mavete mo tou ʼohoana ʼuhi ʼae ko ʼou kaumeʼa ʼe natou fai te ʼu aga ʼaia.
TE ʼU TOKONI: Ke ke faʼifaʼitakiʼi mo ke fakakaumeʼa mo he ʼu hahaʼi ʼe ʼi ai honatou ʼu kalitate, ohage la ko te aga fakaʼapaʼapa, te lotofoaki mo te tali kaiga.
TAHI ʼU PELESEPETO FAKATOHI-TAPU
Vakaʼi te ʼu ʼata viteo Fakatohi-Tapu ʼe tokoni ai ki te ʼu taumatuʼa mo te ʼu fanau ke fua lelei tonatou maʼuli fakafamili
ʼAUA NAʼA KE FAI NI PALALAU ʼE MALAVE KOVI.
“Ko he tahi, ae e palalau fakafuanoa, e ina fakalaveai te loto o hage ko he heleta.”—TAAGA LEA 12:18.
KE KE LOTOFOAKI.
“Ko te laumalie ae e manavaofa e makona anai.”—TAAGA LEA 11:25.
FAI TE MEʼA ʼAE ʼE KE LOTO KE FAI ATU.
“Ko meʼa fuli ʼe kotou loto ke fai atu e te hahaʼi, kotou toe fai feia mo koutou kia natou.”—MATEO 7:12.
