KO YOMARA mo ʼona kiʼi tuagaʼane, ko Marcelo mo Hiver, ʼe natou maʼuʼuli ʼi he kiʼi kolo ʼo Guatemala. Neʼe kamata ako e Yomara te Tohi-Tapu mo te kau Fakamoʼoni ʼa Sehova, pea ki muli age, neʼe toe ako e ʼona kiʼi tuagaʼane te Tohi-Tapu. Kae neʼe ʼi ai te fihifihia. Ko Yomara mo ʼona kiʼi tuagaʼane ʼe lua ʼe natou kivi. Pea neʼe mole natou popoto ʼi te lau ʼo te ʼu mataʼi tohi maʼa te kau kivi. Koia, neʼe maʼua ai ki te tehina ʼae neʼe ina fai tanatou ako, ke ina lau age te ʼu palakalafe mo te ʼu vaega Tohi-Tapu.

Neʼe toe faigataʼa kia natou tanatou kau ki te ʼu fono. ʼUhi he neʼe natou kivi, neʼe mole feala ke natou olo ia minuta ʼe 40 ki te Fale Fono. Kae neʼe fakatuʼutuʼu e te ʼu tehina ʼo te kokelekasio ke natou ʼave natou ki te ʼu fono fuli. ʼI te temi ʼae neʼe foaki age he ʼu kiʼi faipalalau kia Yomara mo ʼona kiʼi tuagaʼane ʼi te fono ʼo te vahaʼa, neʼe tokoni age te ʼu tehina ke natou maʼu loto.

ʼI Maio 2019, neʼe fai leva te ʼu fono ʼi tonatou kiʼi kolo. Pea ʼi te temi ʼaia, neʼe olo te taumatuʼa pionie katoa ʼo nonofo ʼi te kiʼi kolo ʼaia. Logo la neʼe heʼeki nā iloʼi te lau mo te tohi ʼo te ʼu mataʼi tohi maʼa te kau kivi, kae neʼe nā loto ke nā akoʼi age kia Yomara mo ʼona kiʼi tuagaʼane te faʼahi ʼaia. Koia, neʼe olo te taumatuʼa ki te fale tohi, ʼo toʼo ai ni tohi ʼo ʼuhiga mo tohi ʼo te ʼu mataʼi tohi maʼa te kau kivi pea ke nā iloʼi pe ʼe feafeaʼi tona akoʼi ki ʼihi.

Hili ki ai ni kiʼi mahina, neʼe kua popoto leva ia Yomara mo ʼona kiʼi tuagaʼane ʼi te lau ʼo te ʼu mataʼi tohi maʼa te kau kivi, ʼo hoko atu ai tonatou tuputupu ʼi te faʼahi fakalaumalie. ʼI te temi nei, ko Yomara, mo Marcelo pea mo Hiver kua natou pionie katoa. Ko Marcelo kua faifekau fakaminisitelio. ʼE natou maʼumaʼua ʼi tanatou tauhi kia Sehova lolotoga te vahaʼa. Pea ʼe uga ai te ʼu tehina mo tuagaʼane ke natou faʼafai mo natou.

ʼE lotofakafetaʼi ia Yomara mo ʼona kiʼi tuagaʼane ki te tokoni ʼofa ʼa te kokelekasio. ʼE ui e Yomara: “ ʼI tamatou ʼuluaki felaveʼi pe mo te kau Fakamoʼoni ʼa Sehova neʼe natou fakaha mai te ʼofa moʼoni Fakakilisitiano.” ʼE toe ui fenei e Marcelo: “Kua matou maʼu he ʼu kaumeʼa lelei ʼi te kokelekasio, pea ʼe matou kau ki he foʼi famili fakamalamanei ʼe logo tahi ʼi te ʼofa.” Kua fakaʼamu la ia Yomara mo ʼona kiʼi tuagaʼane ke natou sisio ki te temi ʼae ka fakaliliu ai te kele ko he palatiso.—Pes. 37:10, 11; Esa. 35:5.