1-2. Kapau heʼeki ke tokalelei ki te papitema, he koʼe ʼe mole tonu ke ke lotovaivai? (Vakaʼi te pāki ʼo te takafi.)

 KA KUA ke fia papitema ʼe ko hau fakatuʼutuʼu lelei ʼaia. ʼI te temi nei kua ke tokalelei koa ke ke fakahoko tau fakatuʼutuʼu ʼaia? Kapau ʼe ke ʼio ki ai feia mo te ʼu tagata ʼafea, pea ʼi te fakatahi ka hoko mai ʼe feala leva ke ke papitema. ʼE ke maʼu anai he maʼuli fiafia ʼi tau tauhi kia Sehova.

² Kae neʼe ui atu koa e he tahi ke ke toe hikihiki ʼau faiga ke feala ai hau papitema? Pe neʼe ke tokagaʼi pe koe te fahaʼi ʼaia? Kapau koia ʼaia, ʼaua naʼa ke lotovaivai. ʼE feala hau tuputupu ke ke fakahoko te fakatuʼutuʼu maʼuhiga ʼaia maʼia pe ʼe kei ke tupulaga peʼe kua ke fotufotuʼa.

3. Kotea ʼae neʼe ui e te tagata Etiopea kia Filipo, pea kotea te fehuʼi ʼe feala ke tou fai? (Gaue 8:36, 38)

³ Lau ia Gaue 8:36, 38. Neʼe ui age e te tagata maʼu tuʼulaga Etiopea kia Filipo, te tagata faifakamafola: “Kotea ʼae ʼe ina taʼofi toku papitemaʼi?” Neʼe kua fia papitema te tagata Etiopea. Kae neʼe kua tokalelei moʼoni koa ke papitema?

4. Neʼe fakaha feafeaʼi e te tagata Etiopea tana loto ʼae ke hoko atu tana ako?

⁴ Ko te tagata Etiopea “neʼe alu ʼo tauhi ʼi Selusalemi.” (Gaue 8:27) Neʼe mole ko he tagata Sutea kae neʼe liliu ʼo tauhi ki te lotu Fakasutea. ʼE mahino ia neʼe ina ako ke ina iloʼi ia Sehova ʼi te ʼu Tohi Taputapu Fakahepeleo. Pea neʼe lahi te ʼu fahaʼi neʼe fia mahino ki ai. ʼI te felaveʼi ʼa Filipo mo te tagata maʼu tuʼulaga ʼaia ʼi te ala, kotea ʼae neʼe lolotoga fai e te tagata ʼaia? Neʼe ina lau te takaiga tohi ʼo te tohi ʼo te  polofeta ko Isaia. (Gaue 8:28) Neʼe ko he akonaki Fakatohi-Tapu maʼuhiga ʼaupito. Ko te tagata maʼu tuʼulaga ʼo te fale hau neʼe mole ina fia ako pe he ʼu manatu tafito, kae neʼe loto ia ke hoko atu tana ako.

5. Neʼe faiga feafeaʼi te Etiopea ke mulimuli ki te meʼa ʼae neʼe ina ako?

⁵ Neʼe ko te tagata maʼu tuʼulaga ʼaia ʼa “te fineʼaliki ʼo te kau Etiopea ko Kanetase pea neʼe tokaga ki ʼona koloa fuli.” (Gaue 8:27) ʼE mahino ia neʼe lahi ʼosi te maʼumaʼua ʼo te tagata ʼaia. Kae neʼe ina toʼo hona temi ke tauhi ai kia Sehova. Neʼe mole ina fia ako pe te moʼoni kae neʼe faiga ke mulimuli ki te meʼa ʼae neʼe ina ako. Koia neʼe alu loaloaga mai Etiopea ki Selusalemi ʼo tauhi kia Sehova ʼi te fale lotu. Neʼe lagi ʼaoga he temi loaloaga mo he foʼi falā ki tana faifolau ʼaia, kae neʼe lotolelei pe ke ina fai ia meʼa fuli ke alu ʼo tauhi kia Sehova.

6-7. Neʼe haga tuputupu feafeaʼi te ʼofa ʼo te tagata Etiopea kia Sehova?

⁶ Neʼe ako e te Etiopea mai ia Filipo te ʼu moʼoni foʼou maʼuhiga, ohage la neʼe ko Sesu te Mesia. (Gaue 8:34, 35) ʼE mahino ia neʼe malave ki te loto ʼo te tagata maʼu tuʼulaga ʼo te fale hau ia tana iloʼi te meʼa ʼae neʼe fai e Sesu maʼa ia. Kotea ʼae neʼe fai e te tagata ʼaia? Neʼe feala pe ke hoko atu tana nofo ʼi te lotu Fakasutea. Kae neʼe mole ko te meʼa ʼaia neʼe ina fai. Neʼe kua tuputupu tona ʼofa kia Sehova mo tona ʼAlo. Pea neʼe uga ai ia ia ke ina toʼo te tonu ʼae ke papitema ke liliu ai ko he tisipulo ʼa Sesu Kilisito. Pea neʼe fetogi ai tona maʼuli. Neʼe sio ia Filipo kua feala te papitema ʼo te tagata ʼaia pea neʼe ina papitemaʼi leva.

⁷ Kapau ʼe ke mulimuli ki te faʼifaʼitaki ʼa te tagata Etiopea ʼaia, ʼe feala ai ke ke teuteu ki te papitema. ʼAki he tui malohi ʼe feala anai mo koe ke ke ui “Kotea ʼae ʼe ina taʼofi toku papitemaʼi?” Ko te tagata Etiopea ʼaia neʼe loto ke hoko atu tana ako, neʼe ina maʼuliʼi te ʼu meʼa ʼae neʼe ina ako, pea neʼe haga tuputupu ia tona ʼofa ʼae ki te ʼAtua. Tou vakaʼi pe ʼe feafeaʼi hau faʼifaʼitakiʼi te tagata ʼaia.

8. ʼO mulimuli kia Soane 17:3, kotea ʼae ʼe tonu ke ke fai?

⁸ Lau ia Soane 17:3. Neʼe tokoni atu koa te ʼu palalau ʼaia ʼa Sesu ke ke fakaui hau ako Tohi-Tapu? Ko te meʼa ʼaia neʼe hoko ki te tokolahi ia tatou. Kae ʼe ha koa, ʼi te ʼu palalau ʼaia ʼa Sesu, ʼe tonu ke hoko atu tatatou ako? ʼEi. ʼE mole gata anai tatatou ako ke tou iloʼi “te ʼAtua moʼoni pe ʼe tahi.” (Ekl. 3:11) ʼE tou fai anai te fahaʼi ʼaia ʼo talu ai. ʼI te lahi ʼo tatatou ako te ʼu meʼa ʼo ʼuhiga mo Sehova ʼe toe lahi anai tatatou fakaovi kia te ia.—Pes. 73:28.

9. Kotea ʼae ʼe tonu ke tou fai moka kua tou mahino ki te ʼu akonaki tafito ʼo te Tohi-Tapu?

 ⁹ ʼE mahino ia ko te ako ʼae ke iloʼi ia Sehova ʼe kamata ʼaki te ʼu akonaki tafito ʼo te Tohi-Tapu. ʼI tana tohi ki te kau Hepeleo, neʼe ui e te apositolo ko Paulo ko te ʼu akonaki tafito ʼaia ʼe ko “te ʼu ʼuluaki akonaki.” Neʼe mole ina fia ui ko “te ʼu ʼuluaki akonaki” ʼaia neʼe mole maʼuhiga, kae neʼe ina ui ʼe natou hage ko te huʼa pipi ʼae ʼe fafaga ʼaki he toe meamea. (Hep. 5:12; 6:1) Kae neʼe toe fakalotomalohiʼi e Paulo te kau Kilisitiano fuli ke mole gata ʼaki pe tanatou ako te ʼu akonaki tafito kae ke natou toe ako te ʼu moʼoni ʼae ʼe loloto age ʼo te Folafola ʼa te ʼAtua. Kua ke fia ako koa te ʼu moʼoni loloto ʼaia ʼo te Tohi-Tapu? Pea ʼe ke loto koa ke ke haga tuputupu ʼo haga ako ʼo ʼuhiga mo Sehova pea mo ʼana fakatuʼutuʼu?

10. He koʼe ʼe ui e ʼihi ʼe faigataʼa te ako?

¹⁰ Kae tokolahi ia tatou ʼe natou ui ʼe faigataʼa te ako. Kotea tau manatu huʼu mo te ako? Neʼe ke ako koa ʼi te fale ako ke ke lautohi lelei pea mo poto ʼi te ako? Neʼe ke leleiʼia koa tau ako he ʼu tuʼuga meʼa? Peʼe ke ui koe ʼe mole ke maʼu he poto feʼauga ke ke ako ai he ʼu tohi? Kapau koia ʼaia ʼe mole ko koe tokotahi pe. Kae ʼe feala ke tokoni atu ia Sehova. ʼE haohaoa pea ko te Faiako lelei tokotahi pe ʼaia.

11. ʼE fakaha feafeaʼi e Sehova ʼe ko ia te “Faiako Lahi”?

¹¹ ʼE ui e Sehova ʼo ʼuhiga mo ia totonu ko “tou Faiako Lahi.” (Esa. 30:20, 21) ʼE ko he faiako ʼe kataki fualoa, agalelei pea mo lotomahino. ʼE ina kumi te meʼa ʼae ʼe lelei ʼi ʼana kau ako. (Pes. 130:3) ʼE mole ina kole mai ke tou fai he meʼa ʼe mole tou lavaʼi. Manatuʼi ko ia ʼae neʼe ina faʼu tou ʼuto. Ko te meʼa ʼofa taulekaleka ʼaia. (Pes. 139:14) ʼE tou maʼu te holi ʼae ke tou fia ako. ʼE loto e totatou Tupuʼaga ke hoko atu tatatou ako ʼo talu ai pea ke tou leleiʼia. ʼE ko he meʼa lelei moka ʼe tou “holi” ke tou ako te ʼu moʼoni Fakatohi-Tapu ʼi te temi nei. (1 Pet. 2:2) Fai hau fakatuʼutuʼu ʼe feala hau fakahoko, pea fai hau polokalama ke ke lau mo ako te Tohi-Tapu, pea ke mulimuli lelei ki ai. (Sos. 1:8) ʼAki te tokoni ʼa Sehova ʼe ke leleiʼia anai tau lautohi pea ʼe lahi age anai tau manatuʼi ia ia.

12. He koʼe ʼe maʼuhiga ke tou ako te maʼuli mo te minisitelio ʼa Sesu?

¹² Toʼo tuʼumaʼu hou temi ke ke fakakaukauʼi ai te maʼuli mo te minisitelio ʼa Sesu. ʼE maʼuhiga ke ke faʼifaʼitakiʼi ia Sesu mo kapau ʼe ke fia tauhi kia Sehova tafito ʼi te ʼu temi faigataʼa ʼaeni. (1 Pet. 2:21) Neʼe ui e Sesu ʼe tau anai ʼana tisipulo mo he ʼu faigataʼaʼia. (Luka 14:27, 28) Kae neʼe falala ia Sesu ʼe nonofo agatonu anai ʼana tisipulo moʼoni kia Sehova ohage ko ia. (Soa. 16:33) Ako fakalelei te maʼuli ʼa Sesu ʼi te kele pea mo ke fakatuʼutuʼu ke ke mulimuli ki tana faʼifaʼitaki ʼi tou maʼuli.

13. Kotea ʼae ʼe tonu ke ke haga kole kia Sehova, pea kotea tona tupuʼaga?

¹³ ʼE mole feʼauga pe tatatou maʼu ia te ʼatamai malama. ʼE tokoni atu te ʼatamai malama ke ke iloʼi lelei age ia Sehova pea mo ke maʼu he ʼu kalitate ohage la ko te ʼofa mo te tui kia te ia. (1 Ko. 8:1-3) ʼI tau hoko atu tau ako haga kole kia Sehova ke tokoni atu ke tuputupu tau tui. (Luka 17:5) Pea ʼe fia tali e Sehova te ʼu faʼahiga kole ʼaia. Ko he tui ʼe moʼoni pea mo fakatafito ki te ʼatamai malama totonu ʼo ʼuhiga mo totatou ʼAtua, ʼe tokoni atu anai ke ke tuputupu.—Sakp. 2:26.

14. Neʼe fakaha feafeaʼi e te apositolo ko Petelo te maʼuhiga ʼae ke tou maʼuliʼi te ʼu meʼa ʼae neʼe tou ako? (Vakaʼi mo te pāki.)

¹⁴ Neʼe fakaha e te apositolo ko Petelo te  maʼuhiga ʼae ke maʼuliʼi e te ʼu tisipulo ʼa Kilisito te ʼu meʼa ʼae ʼe natou ako. Neʼe palalau ʼo ʼuhiga mo te hisitolia ʼo Noe. Neʼe ui age e Sehova kia Noe ʼe ina maumauʼi anai te kau agakovi ʼo te temi ʼaia ʼaki he tulivio. Neʼe mole feʼauga pe kia Noe mo tona famili tanatou iloʼi ʼae ʼe hoko mai he tulivio ke haofaki ai natou. Tokagaʼi neʼe palalau ia Petelo ki te temi ʼi muʼa ʼo te hoko ʼo te tulivio pea “ ʼi te lolotoga faʼu ʼo te aleka.” (1 Pet. 3:20) ʼE moʼoni neʼe maʼuliʼi e Noe mo tona famili te ʼu meʼa ʼae neʼe natou ako mai te ʼAtua, ʼonatou faʼu he aleka, te toe foʼi vaka. (Hep. 11:7) Pea neʼe fakatatau leva e Petelo te gaue ʼae neʼe fai e Noe ki te papitema ʼo ina tohi fenei: “Ko te faʼahi ʼaia ʼe ko he fakata ʼo te papitema, ʼae ʼe ina toe haofaki mo koutou ʼi te temi nei.” (1 Pet. 3:21) Koia, ʼe feala ke tou fakatatau te gaue ʼae ʼe ke fai ʼi te temi nei ke feala hau papitema mo te ʼu gaue ʼae neʼe fai e Noe mo tona famili lolotoga ni taʼu moʼo laga te aleka. Kotea te ʼu gaue ʼe tonu ke ke fai ke feala ai hau papitema?

15. Kotea te fakahemala moʼoni?

¹⁵ ʼI te ʼu ʼuluaki faʼahi ʼae ʼe tonu ke tou fai, ʼe kau ai tatatou fakahemala moʼoni. (Gaue 2:37, 38) Kapau ʼe tou fakahemala moʼoni ʼe tou fai anai he ʼu fetogi. Kua ke liʼaki koa te ʼu aga ʼae ʼe fehiʼa ki ai ia Sehova ohage la ko te ʼu felaveʼi fakasino heʼe ʼaoga, te suluka, te gutu tauvele, mo he ʼu palalau ʼe kovi? (1 Ko. 6:9, 10; 2 Ko. 7:1; Efe. 4:29) Kapau heʼeki ke tuku te ʼu aga ʼaia haga faiga ke ke fai he ʼu fetogi. Kumi tokoni kia ia ʼae ʼe ina fai tau ako peʼe ki te ʼu tagata ʼafea ʼo te kokelekasio. Kapau kei ke tupulaga mo ke nofo mo au matuʼā haga kole ke nā tokoni atu ke ke liʼaki te ʼu aga ʼae ʼe kovi heʼe taʼofi ai tau papitema.

16. Kotea ʼae ʼe kau ki te ʼu agamahani fakalaumalie ʼae ʼe lelei?

¹⁶ ʼE toe maʼuhiga ke ke maʼu he ʼu agamahani fakalaumalie ʼe lelei. ʼE kau ai te ʼu fono pea mo tau fai ni tali. (Hep. 10:24, 25) Pea ka fakagafua atu ke ke faifakamafola, faiga ke ke kau tuʼumaʼu ki ai. ʼE lahi anai tau leleiʼia te faifakamafola moka ʼe lahi tau kau ki ai. (2 Tim. 4:5) Kapau kei ke tupulaga mo maʼuli mo ʼau matuʼā fai te  ʼu fehuʼi ʼaeni: “ ʼE ko ʼaku matuʼā koa ʼae ʼe nā fakamanatuʼi mai te ʼu fono pea mo te faifakamafola? Peʼe kua au mahani pe au ʼi tona fai?” Ka ʼe ke fai ʼe koe totonu te ʼu faʼahi ʼaia ʼe ke fakaha ai tau tui, mo tou ʼofa, pea mo tou lotofakafetaʼi ki te ʼu meʼa ʼae ʼe foaki atu e Sehova ʼAtua. ʼI tau fai te ʼu gaue ʼaia “ ʼe ha ai [tau] pipiki ki te ʼAtua,” pea ʼe ko he ʼu meʼa ʼofa ʼe ke foaki kia Sehova. (2 Pet. 3:11; Hep. 13:15) Ko te ʼu meʼa ʼofa ʼae ʼe tou foaki kia Sehova mo he loto lelei ʼe ina tali leleiʼi. (Vakaʼi ia 2 Kolonito 9:7.) ʼE tou fai feia heʼe tou fiafia ʼi te foaki kia Sehova te ʼu meʼa ʼae ʼe lelei ʼaupito.

17-18. Kotea te kalitate maʼuhiga ʼe tonu ke ke maʼu ke ke kakusia te papitema, pea kotea tona tupuʼaga? (Taaga Lea 3:3-6)

¹⁷ ʼI tau tuputupu ki te papitema ʼe hoko anai he ʼu faigataʼaʼia. ʼE lagi vaʼi anai koe e ʼihi ʼuhi ko tau tui peʼe natou fakafeagai atu. (2 Tim. 3:12) ʼI tau faiga ʼae ke ke tauʼi he aga mahani ʼe mole lelei ʼe feala pe ke ke toe to ki ai. ʼE feala pe ke ke lotovaivai mo ita heʼe ki tau manatu ʼe mole heʼeki oviovi ke ke papitema. Kotea anai ka tokoni atu ke hoko atu ʼau faiga? Ko te kalitate maʼuhiga ʼaeni: ʼe ko tou ʼofa kia Sehova.

¹⁸ Ko tou ʼofa kia Sehova ko te kalitate lelei tukupau. (Lau ia Taaga Lea 3:3-6.) Ko tou ʼofa mamahi ki te ʼAtua ʼe tokoni atu ke ke lava tauʼi te ʼu faigataʼaʼia ʼo te maʼuli. ʼE fakaha ʼi te Tohi-Tapu te ʼofa agatonu ʼa Sehova ki ʼana kaugana. Ko tona fakaʼuhiga ʼe mole ina liʼakina anai ʼana kaugana pea ʼe ʼofa tuʼumaʼu kia natou. (Pes. 100:5) Neʼe fakatupu koe ki te pāki ʼo te ʼAtua. (Sen. 1:26) ʼE ke fakaha feafeaʼi te faʼahiga ʼofa ʼaia?

19. ʼE ke fakatuputupu feafeaʼi tou lotofakafetaʼi ʼi te ʼu meʼa fuli ʼae neʼe fai e Sehova maʼau? (Kalate 2:20)

¹⁹ Ke ke ʼuluaki fakaha te lotofakafetaʼi. (1 Tes. 5:18) ʼI te ʼaho fuli fai te fehuʼi ʼaeni: “Neʼe fakaha feafeaʼi e Sehova tona ʼofa kia au?” Hili ia, faikole kia Sehova ʼo fakamalo kia te ia ʼo ʼuhiga mo he aluʼaga neʼe ina fai maʼa koe. Pea ke ke mahino neʼe fai e Sehova he aluʼaga maʼa koe totonu, ohage pe ko te mahino ʼa Paulo. (Lau ia Kalate 2:20.) Pea ke fai te fehuʼi ʼaeni: “ ʼE au fakaha koa toku ʼofa kia te ia ʼi te ʼu faʼahi fuli ʼae neʼe ina fai maʼaku?” Ko tou ʼofa ʼaia kia Sehova ʼe tokoni atu ke ke lava tauʼi te  ʼu fakaneke ʼo toe feia pe mo te ʼu ʼahiʼahi. ʼE uga koe e te ʼofa ʼaia ke hoko atu ʼau agamahani lelei ʼi te faʼahi fakalaumalie. ʼE ke fakaha ai ʼi te ʼaho fuli tou ʼofa ʼae ki tau Tamai.

20. Kotea te faʼahi ʼe tonu ke ke fai ke ke momoli tou maʼuli kia Sehova, pea he koʼe ʼe ko he tonu maʼuhiga?

²⁰ ʼAki te temi ko tou ʼofa kia Sehova ʼe ina uga anai koe ke ke faikole kia te ia, ʼo ke momoli kia te ia tou maʼuli. Manatuʼi ko tau momoli tou maʼuli kia Sehova ʼe ke maʼu anai te fealagia taulekaleka ʼae ke ke tauhi kia te ia ʼo talu ai. Ka ke momoli tou maʼuli kia Sehova, ʼe ke fakapapau age ʼe ke tauhi anai kia te ia ʼi te ʼu temi lelei mo te ʼu temi faigataʼa. ʼE mole ʼaoga anai ke ke toe fai te fakapapau ʼaia. ʼE moʼoni ka tou momoli totatou maʼuli ʼe tou toʼo he tonu maʼuhiga. Fakakaukauʼi te faʼahi ʼaeni: ʼe ke toʼo anai ni tonu ʼi tou maʼuli, pea ko ʼihi tonu ʼe fua lelei anai. Kae ko te tonu ʼae ʼe lelei tokotahi age ʼe ko tau foaki tou maʼuli kia Sehova. (Pes. 50:14) ʼE faiga anai e Satana ke ina fakavaivaiʼi tou ʼofa ki tau Tamai, he ʼe loto ke ke situʼa ki tau agatonu. ʼAua naʼa ke tuku ke malo ia Satana. (Sopo 27:5) Ko tou ʼofa mamahi kia Sehova ʼe tokoni atu anai ke ke taupau tuʼumaʼu tau fakapapau pea mo ke haga fakaovi kia te ia.

21. He koʼe ko te papitema ʼe mole ko he fakaʼosiʼaga kae ʼe ko te kamataʼaga ʼo tatatou tauhi kia Sehova ʼo talu ai?

²¹ ʼI tau kua foaki tou maʼuli ʼi te faikole, fakaha ki te ʼu tagata ʼafea ʼo tau kokelekasio tau kua fia papitema. ʼAua naʼa galo kia koe ko te papitema ʼe mole ko he fakaʼosiʼaga kae ko te kamataʼaga ʼo tau tauhi kia Sehova ʼo talu ai. Koia fakamalohi ʼi te temi nei tou ʼofa ki tau Tamai. Fai hau ʼu fakatuʼutuʼu ke ke fakatuputupu ai tou ʼofa ʼae kia te ia. ʼI tau fai te ʼu faʼahi ʼaia ʼe feala anai ke ke papitema.ʼE ko he ʼaho fakafiafia ʼaupito anai. Kae ʼe ko te kamataʼaga pe ʼaia. ʼOfa pe ke haga tuputupu tou ʼofa kia Sehova pea mo tona ʼAlo ʼo heʼe gata.