1. Ia ʼaho nei, kotea ia te finegalo ʼo Sehova?

 IA ʼAHO nei, ko te finegalo ʼo Sehova ʼe ko te fakamafola ʼo te logo lelei ʼo te Puleʼaga ʼi te kele katoa. (Mko. 13:10; 1 Tim. 2:3, 4) ʼE maʼuhiga ʼaupito kia te ia ke fakahoko te gaue ʼaia neʼe ina foaki ki tona ʼAlo ʼofaina. ʼE tou tui papau ʼe hoko anai ia te finegalo ʼaia ʼo Sehova ʼi muʼa ʼo te hoko mai ʼo te fakaʼosi he ʼe takitaki tatou e Sesu.​—Mat. 24:14.

2. Kotea ka tou vakaʼi ʼi te alatike ʼaeni?

² ʼI te alatike ʼaeni, ʼe tou vakaʼi anai pe ʼe fakaʼaogaʼi feafeaʼi e Sesu tana “tagata faifekau agatonu mo poto” moʼo foaki te meʼa kai fakalaumalie ki ʼana tisipulo. Pea ʼe ina fakatuʼutuʼu feafeaʼi anai ia tanatou fakahoko ia te toe gaue maʼuhiga ko te faifakamafola. (Mat. 24:45) ʼE tou toe vakaʼi anai pe ʼe feafeaʼi hatatou lagolago fuli kia Sesu mo tana tagata faifekau.

3. Kotea ia te gaue ʼae neʼe tuku age kia Sesu?

³ ʼE takitaki e Sesu te gaue faifakamafola. He koʼe ʼe tou tui ki te faʼahi ʼaia? ʼI muʼa ʼo te hake ʼa Sesu ki selo, neʼe fakatahi mo ʼihi ʼo ʼana tisipulo ʼi he moʼuga ʼo Kalilea. Neʼe ina ui fenei age: “Kua tuku mai kia te au te pule katoa ʼi te lagi pea mo te kele.” Kae neʼe ina toe hoko atu fenei: “Koia, kotou olo ʼo fai ni tisipulo ʼi te hahaʼi ʼo te ʼu fenua fuli pe.” (Mat. 28:18, 19) Koia, neʼe tonu ke takitaki e Sesu ia te gaue faifakamafola.

4. He koʼe ʼe tou tui papau ʼe takitaki tuʼumaʼu e Sesu ia te gaue faifakamafola?

⁴ Neʼe ui e Sesu ʼe fakahoko anai te gaue faifakamafola  mo faiakonaki ʼi “te ʼu fenua fuli pe.” Pea ʼe nofo anai mo ʼana tisipulo “ ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaeni.” (Mat. 28:20) ʼE ha mai ʼi te ʼu palalau ʼaia ʼe hoko atu pe anai te gaue faifakamafola ʼo kaku mai kia ʼaho nei, ʼaki te takitaki ʼa Sesu.

5. ʼE tou lagolago feafeaʼi ki te fakahoko ʼo te lea fakapolofeta ʼae ia Pesalemo 110:3?

⁵ Neʼe mole tuʼania ia Sesu pe ʼe kaugamalie anai te kau gaue ʼo te taʼukai ʼi te ʼu temi fakaʼosi ʼo te malama ʼaeni. Neʼe ina iloʼi ʼe hoko anai te lea fakapolofeta ʼae ia Pesalemo 110:3. ʼE ui fenei ai: “ ʼE lotolelei anai tau hahaʼi ke gaue maʼa koe, ʼi te ʼaho ʼae ʼe ke fakatahiʼi ai tau kautau.” Kapau ʼe ke fakamafola te logo lelei, ʼe ke lagolago kia Sesu mo te tagata faifekau agatonu. Pea ʼe ke kau ki te fakahoko ʼo te lea fakapolofeta ʼaia. Koia, ʼe lolotoga fakahoko ia te gaue ʼaia kae ʼe ʼi ai anai he ʼu fihifihia ʼe tonu ke tou tauʼi.

6. Kotea te fihifihia ʼe tou tau mo ia?

⁶ Ko te fihifihia ʼae ʼe feala ke tou tau mo ia ʼe ko te fakafeagai mai ʼo ʼotatou fili. ʼE fakamafola e te kau aposita, mo te kau takitaki lotu pea mo te kau taki politike he ʼu loi ʼo ʼuhiga mo tatou. ʼE tui ʼihi ʼo totatou famili, mo ʼotatou feilo peʼe ko ʼotatou kauga gaue ki te ʼu loi ʼaia. Koia ʼe natou fakaneke ai tatou ke tou tuku tatatou tauhi ʼae kia Sehova pea mo faifakamafola. ʼI ʼihi fenua, ʼe gaohi koviʼi peʼe fakamatakuʼi ʼotatou tehina mo tuagaʼane e ʼotatou fili peʼe puke mo pilisoniʼi natou. Kae ʼe mole tou punamaʼuli ki te ʼu aluʼaga ʼaia. Neʼe kua fakakikite fenei pe e Sesu: “ ʼE fehiʼaʼinaʼi anai koutou e te ʼu puleʼaga fuli ʼuhi ko toku huafa.” (Mat. 24:9) Kapau ʼe fehiʼaʼinaʼi tatou e te hahaʼi, ʼe ko he fakamoʼoni ʼaia ʼe tou nofo ʼi te lotu moʼoni. (Mat. 5:11, 12) Ko Satana ʼae ʼe ina fakatupu ia te fakafeagai ʼaia. Kae ʼe malohi age pe Sesu ia ia. ʼE tokoni mai ia Sesu kia tatou koia ʼe fakamafola anai te logo lelei ki te hahaʼi ʼi te ʼu fenua fuli pe.

7. He koʼe ʼe ke tui papau ʼe hoko moʼoni te ʼu palalau ʼae ia Apokalipesi 14:6, 7?

⁷ Tou talanoa ki he tahi fihifihia ʼe tou tau mo ia ʼe ko tatatou mole palalau ki he lea ʼe tahi. ʼI te meʼa ʼae neʼe ha ki te apositolo ko Soane, neʼe fakaha age ai e Sesu ʼe lava tauʼi anai e te kau faifakamafola ʼo te logo lelei ia te fihifihia ʼaia. (Lau ia Apokalipesi 14:6, 7.) ʼO feafeaʼi? ʼAki hatatou fakamafola ki te tokolahi ke natou iloʼi te logo ʼaia ʼo te Puleʼaga. Ia ʼaho nei, kua lahi te ʼu faʼahi ʼe feala ke ako e te hahaʼi ʼo ʼuhiga mo te Tohi-Tapu ʼi tanatou olo ki tatatou tuʼasila ʼi te neti jw.org. ʼE maʼu ai he ʼu tohi neʼe fakaliliu ia lea ʼe 1 000 tupu. Pea tahi, neʼe fakatuʼutuʼu ke fakaliliu te tohi ʼaeni Ke Ke Fiafia ʼo Heʼe Gata ia lea ʼe 700 tupu. Neʼe ta te tohi ʼaia moʼo fai ʼaki he ʼu ako Tohi-Tapu pea mo fai ni tisipulo. Pea kua toe maʼu te meʼa kai fakalaumalie ʼi he ʼu ʼata viteo maʼa te kau tuli pea mo he ʼu tohi ki te kau kivi. ʼE mahino ia, ʼe hoko moʼoni ia te ʼu lea fakapolofeta ʼo te Tohi-Tapu. ʼE ako e te hahaʼi ʼo te ʼu lea fuli ke natou palalau ʼi te lea maʼa, ʼae ko te ʼu moʼoni Fakatohi-tapu. (Sakl. 8:23; Sofo. 3:9) Kapau ʼe feala te faʼahi ʼaia he ʼe tou gaue fakatahi mo Sesu.

8. Kotea te ʼu fua lelei ʼe tou maʼu ʼi tatatou gaue faifakamafola ʼo kaku mai ki te temi nei?

⁸ ʼE lau ko te toko 8 000 000 tupu hahaʼi ʼa Sehova ʼe maʼuʼuli ia fenua mo telituale ʼe 240. Pea ʼi te taʼu fuli, ko te toko lauʼi hogofulu afe ʼe papitema. Ko te faʼahi ʼae ʼe maʼuhiga ʼe mole ko tonatou kaugamalie kae ʼe ko tanatou maʼu he ʼu kalitate, ʼae ʼe  ui ʼi te Tohi-Tapu ko “te ʼulugaaga foʼou.” (Kol. 3:8-10) Tokolahi neʼe natou liʼaki te ʼu aga heʼe ʼaoga, mo te agamalohi peʼe ko te fehiʼa ki te ʼu lanu mo te fakamaʼuhigaʼi ʼo tonatou fenua. Pea ʼe toe hoko ai foki ia te lea fakapolofeta ʼaeni ia Esaia 2:4: ‘ ʼE mole toe ako anai e te ʼu kaugana ʼa Sehova te tau.’ Ka tou faiga ke tou kofuʼi ia te ʼuluagaaga foʼou, ʼe tou tokoni ai ki te hahaʼi ke natou ʼomai ki te kautahi ʼa Sehova. ʼE mahino ia, ʼe natou tokagaʼi ʼe tou fakalogo kia Kilisito. (Soa. 13:35; 1 Pet. 2:12) Koia, ʼe tou maʼu te ʼu fua lelei ʼaia ʼaki te tokoni ʼa Sesu.

9. Ka tou lau ia Mateo 24:45-47, kotea neʼe fai e Sesu ʼi te ʼu temi fakaʼosi?

⁹ Lau ia Mateo 24:45-47. Neʼe fakakikite e Sesu ʼe ina fakanofo anai he “tagata faifekau agatonu mo poto” ʼi te ʼu temi fakaʼosi. Pea ʼe tokaga anai ki te foaki ʼo te meʼa kai fakalaumalie ki ʼana tisipulo. ʼE mahino ia, ʼe lahi anai te ʼu gaue ka fakahoko e te tagata faifekau ʼaia ia ʼaho nei. ʼE fakaʼaogaʼi e Sesu he kiʼi kutuga ko he ʼu tagata neʼe fakanofo ʼaki te laumalie. Pea ʼe natou foaki anai te “meʼa kai ʼi tona temi totonu” ki te hahaʼi ʼa Sehova mo natou ʼae ʼe natou tali te moʼoni. ʼE mole puleʼi e te tagata ʼaia ia te tui ʼa ʼihi. (2 Ko. 1:24) ʼE natou iloʼi ko Sesu ʼe ko te “takitaki” pea mo te “kamutoa” ʼo ʼana tisipulo.​—Esa. 55:4.

10. Ko te tohi fea ʼae neʼe tokoni atu ke ke kamata tauhi kia Sehova?

¹⁰ Talu mai te 1919, neʼe lahi te ʼu tohi neʼe ta e te tagata faifekau. Pea neʼe feala ai kia natou ʼae ʼe natou tali te moʼoni ke natou leleiʼia te meʼa kai fakalaumalie. ʼI te 1921, neʼe ta te tohi La Harpe de Dieu moʼo tokoni kia natou ke natou mahino ki te ʼu moʼoni tafito ʼo te Tohi-Tapu. ʼAki te temi, neʼe toe ta ʼihi tohi. Neʼe ko te tohi fea ʼae  neʼe tupu ai tau fia iloʼi mo ʼofa ki tatatou Tamai ʼe ʼi selo? Neʼe ko te tohi koa “ Que Dieu soit reconnu pour vrai ! ” peʼe La vérité qui conduit à la vie éternelle, peʼe E Feala Keke Mauli o Heegata Ite Palatiso Ite Kele, peʼe Te ʼAtamai Mālama ʼAē ʼe Ina Taki Ki Te Maʼuli Heʼegata, peʼe Koteā ʼAē ʼe Akoʼi Moʼoni Mai ʼi Te Tohi-Tapu?, peʼe Kotea ʼAe ʼe Akoʼi Mai ʼi Te Tohi-Tapu? peʼe ko te tohi foʼou ʼaeni Ke Ke Fiafia ʼo Heʼe Gata? Neʼe ta te ʼu tohi ʼaia moʼo tokoni mai ke tou fai ni tisipulo. Pea neʼe ʼaoga moʼoni mai ʼi te temi ʼaia neʼe ta ai.

11. He koʼe ʼe ʼaoga kia tatou fuli ia te meʼa kai fakalaumalie?

¹¹ ʼE mole gata pe kia natou ʼae neʼe hoki natou tali age te moʼoni ʼe ʼaoga kia natou te meʼa kai fefeka. Kae ʼe ʼaoga kia tatou fuli te meʼa kai ʼaia. Neʼe tohi fenei e te apositolo ko Paulo: “Ko te meʼa kai fefeka ʼe ʼa te hahaʼi ʼae kua fotufotuʼa.” Neʼe ina toe ui ka tou maʼuliʼi te ʼu meʼa ʼae ʼe tou ako, pea ʼe tokoni mai anai ke tou “fakakehekeheʼi te meʼa ʼae ʼe lelei mo te meʼa ʼae ʼe kovi.” (Hep. 5:14) ʼE lagi feala ke faigataʼa hatatou fakalogo ki te ʼu lao ʼa Sehova ia ʼaho nei koteʼuhi tokolahi ʼe mole kei natou aga fakaʼapaʼapa. Kae ʼe tokaga pe ia Sesu ke tou maʼu he meʼa kai fakalaumalie ke malohi tuʼumaʼu tatatou tui. ʼE fakatafito te meʼa kai ʼaia ki te Folafola ʼa te ʼAtua, ia te Tohi-Tapu. ʼE takitaki e Sesu ia te teuteuʼi mo te tufa ʼo te meʼa kai ʼaia e te tagata faifekau.

12. ʼE tou fakamaʼuhigaʼi feafeaʼi te huafa ʼo te ʼAtua ohage ko Sesu?

¹² ʼE tou fia faʼifaʼitakiʼi ia Sesu ʼo tou fakamaʼuhigaʼi ia te huafa ʼo te ʼAtua. (Soa. 17:6, 26) Ohage la, ʼi te 1931 neʼe fakahigoaʼi ai leva tatou ko te ʼu Fakamoʼoni ʼa Sehova, ko he higoa neʼe toʼo mai ʼi te Tohi-Tapu. Neʼe tou fakaha ai ʼe maʼuhiga kia tatou ia te huafa ʼo tatatou Tamai ʼe ʼi selo. (Esa. 41:10-12) Pea talu mai te  mahina ʼo Oketopeli ʼo te taʼu ʼaia, neʼe tuʼu leva te huafa ʼo te ʼAtua ʼi te takafi ʼo te ʼu Tule Leʼo fuli. Pea tahi, ʼi te Tohi-Tapu Traduction du monde nouveau (Fakafalani) (Fakaliliu ʼo Te Malama Foʼou) neʼe toe fakatuʼu ai te huafa ʼaia ʼi te ʼu faʼahi ʼae neʼe tonu ke tuʼu ai. ʼE mole hage ia ko te ʼu lotu ʼae ʼe natou ui ʼe natou muliʼi ia Kilisito he neʼe natou pulihi te huafa ʼo te ʼAtua ko Sehova ʼi ʼanatou Tohi-Tapu.

13. He koʼe ʼe ke tui ʼe fakaʼaogaʼi e Sesu ia te “tagata faifekau agatonu mo poto” ia ʼaho nei? (Soane 6:68)

¹³ ʼAki te “tagata faifekau agatonu mo poto,” neʼe fakatuʼu e Sesu he kautahi ʼi te kele ke lagolago ki te tauhi maʼa. Kotea tau manatu ʼo ʼuhiga mo te kautahi ʼaia? ʼE lagi ke toe maʼu pe anai te manatu ʼa te apositolo ko Petelo, ʼae neʼe ina ui fenei kia Sesu: “ ʼAliki, ke matou olo la kia ai? ʼE ke maʼu te ʼu folafola ʼo te maʼuli heʼe gata.” (Soa. 6:68) Kapau la neʼe mole tou iloʼi te kautahi ʼa Sehova, ʼe tou ʼifea nei? ʼE tokaga ia Sesu ke fafaga lelei tatou ʼi te faʼahi fakalaumalie ʼaki te kautahi ʼaia. ʼE ina akoako tatou ke tou faiva ʼi te faifakamafola. Pea ʼe tokoni mai ke tou kofuʼi “ia te ʼulugaaga foʼou” ke tou fakafiafiaʼi ai te loto ʼo Sehova.​—Efe. 4:24.

14. Kotea te ʼu fakatuʼutuʼu neʼe fai e te kautahi ʼa Sehova maʼa tatou lolotoga te taʼi mahaki COVID-19?

¹⁴ ʼE toe takitaki tatou e Sesu ʼi te ʼu temi faigataʼa. ʼE tou fakamoʼoni ki te faʼahi ʼaia ʼi te temi ʼae neʼe to ai te taʼi mahaki ʼaeni ko te COVID-19. Tokolahi ʼi te malamanei neʼe mole kei natou iloʼi pe kotea ʼe tonu ke natou fai. Kae neʼe tokaga pe ia Sesu ke tou maʼu he ʼu tokoni lelei moʼo puipui tatou. Neʼe kole mai ke tou ʼai he meʼa puipui  ʼo totatou ihu mo gutu ʼi te ʼu koga meʼa ʼae ʼe kaugamalie ai pea mo fakaʼapaʼapa ki te fevahaʼaki mo ʼihi. Neʼe toe fakamanatuʼi ki te kau tagata ʼafeā ia te maʼuhiga ʼae ke natou felogoi tuʼumaʼu mo te ʼu tehina mo tuagaʼane ʼo tanatou kokelekasio. Pea neʼe tonu ke natou toe tokaga ki te ʼu meʼa ʼae ʼe ʼaoga kia natou ʼi te faʼahi fakasino mo fakalaumalie. (Esa. 32:1, 2) Neʼe tou toe maʼu he ʼu fakatotonu pea mo he ʼu fakalotomalohi ʼi te ʼu talalogo ʼo te Kolesi Pule.

15. Kotea ia te ʼu fakatotonu ʼae neʼe tou maʼu lolotoga te taʼi mahaki? Pea kotea te ʼu fua lelei neʼe tou maʼu?

¹⁵ Neʼe tou toe maʼu he ʼu fakatotonu ʼo ʼuhiga mo te faʼahiga fai ʼo ʼatatou fono pea mo faifakamafola lolotoga te taʼi mahaki. Neʼe tou fai atu aipe ʼatatou fono mo ʼatatou fakatahi lahi ʼi te neti. Neʼe tou toe kamata faifakamafola ʼaki te faitohi mo te telefoni. Pea neʼe tapuakiʼi e Sehova ʼatatou faiga. Neʼe lahi te ʼu filiale neʼe natou fakaha ia te tuputupu ʼo te kaugamalie ʼo te kau faifakamafola. Pea tahi, neʼe ʼi ai te ʼu aluʼaga fakalotomalohi neʼe hoko kia tatou lolotoga te taʼi mahaki.—Vakaʼi te ʼa takai “  ʼE Tapuakiʼi e Sehova Tatatou Faifakamafola.”

16. Kotea ʼae ʼe tou tui papau ki ai?

¹⁶ Neʼe lagi manatu ʼihi neʼe fefeka fau ia te ʼu tuʼutuʼuni ʼae neʼe fai e te kautahi ʼa Sehova lolotoga te taʼi mahaki. Kae ki ʼamuli, neʼe tou mahino ai ko te ʼu fakatuʼutuʼu ʼaia neʼe fakapotopoto. (Mat. 11:19) Koia, ka tou fakakaukauʼi te faʼahiga takitaki e Sesu ʼana tisipulo, ʼe tou tui papau ʼe nofo tuʼumaʼu ia ia mo tana Tamai mo tatou, tatau aipe pe kotea te aluʼaga ka hoko.​—Lau ia Hepeleo 13:5, 6.

17. He koʼe ʼe tou fiafia ʼi te gaue fakatahi mo Sesu?

¹⁷ ʼE ko he toe pilivilesio ia tatatou gaue fakatahi mo Sesu. ʼE tou kau ki he kautahi ʼe logo tahi, logo la ʼe mole tatau ʼatatou agaʼi fenua, pea ʼe tou ʼomai mai ni fenua mo lea kehekehe. ʼE fafaga lelei tatou ʼi te faʼahi fakalaumalie pea ʼe tou maʼu ia meʼa gaue lelei fuli moʼo fakahoko te gaue faifakamafola. Pea ʼe tou tahi faiga ke tou kofuʼi ia te ʼuluagaaga foʼou pea mo feʼofaʼaki. Koia, ʼe tou fiafia ʼi te gaue fakatahi mo Sesu.