1. ʼE fakaʼuhiga feafeaʼi ʼi te Tohi-Tapu te kupu akonakiʼi?

KOTEA ʼe ke manatu ki ai moka ke logo ki te kupusiga palalau “akonakiʼi”? ʼE manatu te tokolahi ki te fakatuʼā, kae ʼe mole gata ai. ʼE ui mai ʼi te Tohi-Tapu ʼe lelei kia tatou moka akonakiʼi tatou, pea ʼi ʼihi temi ʼe pipiki fakatahi ki ai te ʼatamai malama, te poto, te ʼofa mo te maʼuli. (Taaga Lea 1:2-7; 4:11-13) He ʼe ha ʼi totatou akonakiʼi e te ʼAtua, ʼe ʼofa ia tatou pea ʼe ina loto ke tou maʼuli ʼo heʼe gata. (Hepeleo 12:6) ʼE moʼoni, ʼi ʼihi temi ʼe fakatuʼā tatou moka akonakiʼi tatou e te ʼAtua, kae ʼe mole he temi ʼe agakovi ai peʼe ina fia fakamamahiʼi tatou. Ko te fakaʼuhiga tafito ʼo te kupu “akonakiʼi,” ko te akoʼi ʼo he tahi ohage pe ko he tamai ʼe ina akoʼi tana tamasiʼi he ʼe ʼofa ai.

2, 3. He koʼe ʼe pipiki totatou akoʼi mo te fakatuʼā ki totatou akonakiʼi? (Vakaʼi te ʼuluaki pāki.)

² Tou fakakaukau ki te faʼifaʼitaki ʼaeni. Ko te kiʼi fanau ʼe higoa ko Johnny neʼe ina li tana foʼi fiti ki te loto fale. Neʼe ui fenei age e tana faʼe: “Johnny ʼe ke iloʼi lelei pe ʼe mole tonu ke ke gaoʼi mo tau foʼi fiti ʼi te loto fale. He ʼe feala ke ke maumauʼi ai he meʼa.” Neʼe hoko atu pe tana gaoʼi mo tana foʼi fiti, kae mole  tokaga ia ki tana faʼe. Pea neʼe foa leva te foʼi ipu fisiʼi teu. Neʼe akonakiʼi feafeaʼi ia Johnny e tana faʼe? Neʼe ina fakamahino age ki ai ko te meʼa ʼae neʼe ina fai ʼe kovi. Neʼe loto e tana faʼe ke mahino ʼe lelei ke fakalogo ki ʼana matuʼā pea ko ʼanā lekula ʼe ʼaoga mo fakapotopoto. Ke tokoni kia Johnny te ako ʼaia, neʼe ina fakatuʼutuʼu ke ina fakatuʼā ia Johnny ʼo ina toʼo tana foʼi fiti ʼi he kiʼi lakaga. Neʼe mole leleiʼia e Johnny te faʼahi ʼaia, kae neʼe tokoni ki ai ke ina iloʼi ka mole fakalogo ki ʼana matuʼā ʼe ʼi ai anai ʼona nunuʼa.

³ Ko tatou ko te kau Kilisitiano, pea ʼe tou kau ki te loto fale ʼo te ʼAtua. (1 Timoteo 3:15) ʼE tuha mo Sehova tatatou Tamai, ke ina fakatuʼu ni lekula ʼo ʼuhiga mo te meʼa ʼae ʼe lelei mo ʼae ʼe kovi. ʼO toe feia ke ina akonakiʼi tatou moka ʼe mole tou fakalogo kia te ia. Pea tahi, moka tou mamahi ʼuhi ko ʼatatou aga, ʼe feala ke tokoni mai totatou akonakiʼi e Sehova ʼaki te ʼofa ke tou manatuʼi te maʼuhiga ʼae ke tou fakalogo kia te ia. (Kalate 6:7) ʼE ʼofa mamahi te ʼAtua ia tatou pea ʼe mole ina loto ke tou mamahi.—1 Petelo 5:6, 7.

4. (1) ʼE loto e Sehova ke tou akoʼi feafeaʼi ʼihi? (2) Kotea ʼae ka tou vakaʼi ʼi te alatike ʼaeni?

⁴ Moka tou akonakiʼi ʼo fakatafito ki te Tohi-tapu, ʼe feala ke tou tokoni ai ki he fanau peʼe ko he tahi ʼe ina ako te Tohi-Tapu ke liliu ko he tisipulo ʼa Kilisito. ʼE tou fakaʼaogaʼi te Tohi-Tapu moʼo akoʼi ki ʼatatou kau ako pe ʼe kotea te meʼa ʼae ʼe lelei pea mo tou tokoni ke natou mahino mo ‘mulimuli ki te ʼu meʼa fuli ʼae neʼe fakatotonu’ mai e Sesu. (Mateo 28:19, 20; 2 Timoteo 3:16) ʼE loto e Sehova ke tou akoʼi feiaʼi natou ke feala hanatou toe tokoni ki ʼihi ke mulimuli kia Kilisito. (Lau ia Tito 2:11-14.) Tou vakaʼi te ʼu fehuʼi maʼuhiga ʼaeni ʼe tolu: (1) ʼE ha feafeaʼi te ʼofa ʼo te ʼAtua ʼi tana akonakiʼi tatou? (2) Kotea te ako ʼe tou taʼofi mai ia natou ʼae neʼe akonakiʼi e te ʼAtua? (3) ʼE feala ke tou faʼifaʼitakiʼi feafeaʼi te faʼahiga akonakiʼi ʼo he tahi e Sehova mo tona ʼAlo?

5. ʼE ha feafeaʼi te ʼofa ʼo Sehova kia tatou moka ʼe ina akonakiʼi tatou?

⁵ ʼE fakatonutonuʼi mo akoʼi tatou e Sehova koteʼuhi ʼe ʼofa ia tatou. ʼE ina loto ke tou fakaovi kia te ia pea ke tou maʼuli ai ʼo heʼe gata. (1 Soane 4:16) ʼE mole ina lau koviʼi tatou peʼe ina fakalainoaʼi tatou ʼi he temi. (Taaga Lea 12:18) Kae ʼe tokagaʼi tafito e Sehova ʼotatou kalitate pea neʼe ina fakafealagia mai mo te loto faʼitaliha. ʼE feala koa ke ke sio ki te ʼofa ʼo Sehova ʼi tana akonakiʼi tatou ʼaki te Tohi-Tapu, ʼatatou tohi, ʼatatou matuʼā, mo te kau tagata ʼafeā? ʼI tona fakahagatonu, moka fakatonutonuʼi tatou e te kau tagata ʼafeā ʼaki te ʼofa mo te agamalū, kae heʼeki tou iloʼi ʼe tou lolotoga fai he aga  ʼe kovi, ʼe natou faʼifaʼitakiʼi moʼoni te ʼofa ʼo Sehova kia tatou.—Kalate 6:1.

6. Tatau aipe pe ʼe toʼo te ʼu pilivilesio ʼo he tahi moka akonakiʼi e te ʼAtua, kae ʼe ha feafeaʼi te ʼofa ʼo te ʼAtua?

⁶ ʼI ʼihi temi moka akonakiʼi he tahi, ʼe mole gata pe ke tokoniʼi ia ia. Moka fai he agahala mamafa e he tahi, ʼe toʼo anai ʼona pilivilesio ʼae ʼi te kokelekasio. Tatau aipe pe ʼe hoko te faʼahi ʼaia, kae ʼe ha te ʼofa ʼo te ʼAtua ʼi tona akonakiʼi. Ohage la, ʼe tokoni anai ki ai tona akonakiʼi ke ina iloʼi te maʼuhiga ʼae ke ina ako fakamalotoloto te Tohi-Tapu, ke metitasio ki ai pea mo faikole. ʼI tana fai te ʼu faʼahi ʼaia, ʼe feala ke malohi ai ʼana felogoi mo Sehova. (Pesalemo 19:8) Pea ʼaki te temi, ʼe feala pe ke ina toe maʼu ʼona pilivilesio. Maʼia moka fakamavae he tahi ʼi te kokelekasio ʼe toe ha ai te ʼofa ʼo Sehova ʼi tana fia puipui te kokelekasio mai te ʼu fakaneke kovi. (1 Kolonito 5:6, 7, 11) Pea ʼuhi ʼae ʼe faitotonu tuʼumaʼu moka akonakiʼi he tahi e te ʼAtua, ʼe tokoni anai kia ia ʼae neʼe fakamavae ke ina iloʼi te mamafa ʼo tana agahala. Pea ʼe uga ai anai ia ia ke fakahemala.—Gaue 3:19.

7. Neʼe ko ai ia Sepena, pea kotea ʼae neʼe tuputupu ʼi tona loto?

⁷ ʼE tou palalau anai ki he ʼu tagata neʼe akonakiʼi e Sehova, ke tou mahino lelei ki te maʼuhiga ʼae ʼo te akonakiʼi ʼo he tahi. ʼUluaki ko Sepena, ko te tagata Iselaele neʼe maʼuli ʼi te temi Hau ʼo Esekiasi. Lua ko Graham, ko he tehina ʼo totatou temi. Ko Sepena peʼe ko Sepa, neʼe ko te “kovana o te fale hau,” ʼo Esekiasi, pea neʼe lahi te ʼu meʼa neʼe pule ki ai. (Esaia 22:15) Ki muli age, neʼe fiameʼalahi ia Sepena pea neʼe ina loto ke fakamaʼuhigaʼi ia ia e ʼihi. Neʼe ina faʼu ai tona foʼi fale maka fakaʼaliki pea neʼe fealuʼaki ʼi te ʼu “saliote matalelei.”—Esaia 22:16-18.

8. Neʼe akonakiʼi feafeaʼi e Sehova ia Sepena, pea neʼe kotea ʼona fua?

⁸ ʼUhi ʼae neʼe fia fakakololiaʼi e Sepena ia ia totonu, koia ʼae neʼe toʼo ai ʼona pilivilesio e te ʼAtua ʼo foaki ki te tagata ʼe higoa ko Eliakimi. (Esaia 22:19-21) Neʼe hoko te faʼahi ʼaia, ʼi te temi ʼae neʼe fakatotonu ai e te  Hau ʼo Asilia ko Sanekelipe ke ina ʼohofi ia Selusalemi. Ki muli age, neʼe fekauʼi e Sanekelipe ʼana tagata takitaki mo tana foʼi tau ke olo ʼo fakamatakuʼi te kau Sutea pea mo fakaneke te Hau ko Esekiasi ke fakalogo ki te Hau ko Sanekelipe. (2 Hau 18:17-25) Neʼe fekauʼi ai e Esekiasi ia Eliakimi mo tagata ʼe tokolua ke olo ʼo fakafelaveʼi ki te ʼu tagata takitaki. Neʼe kau ia Sepena kʼi te ʼu tagata ʼaia ʼe toko tolu, kae kua sikalaipe pe leva ia. ʼE mahino ia neʼe ako e Sepena te agavaivai pea ʼe ha mai ai neʼe mole meo ia peʼe mamahi kia ia totonu. Neʼe ina tali leleiʼi he gaue ʼe mole faʼa maʼuhiga. ʼE tou maʼu ʼi heni te ʼu ako ʼe tolu ʼo ʼuhiga mo te ʼu aluʼaga neʼe hoko kia Sepena.

9-11. (1) Kotea te ʼu ako maʼuhiga ʼe tou maʼu ʼo ʼuhiga mo Sepena? (2) Kotea tau manatu ʼo ʼuhiga mo te aga ʼae neʼe fakaha e Sehova kia Sepena?

⁹ ʼUluaki, ʼi te toʼo ʼo te tuʼulaga ʼo Sepena ʼe fakamanatuʼi mai kia tatou “ko te fiameʼalahi ʼe muʼa mai ia ʼi te fakaʼauha.” (Taaga Lea 16:18, MN) ʼE lagi tou maʼu he ʼu pilivilesio ʼi te kokelekasio, pea ʼe lagi fakamaʼuhigaʼi tatou e ʼihi. Kapau ko ia, ʼe tou agavaivai anai koa? ʼE tou manatuʼi anai koa ko te ʼu fealagia fuli ʼae ʼe tou maʼu mo te ʼu gaue lelei fuli ʼae neʼe tou fai neʼe feala pe ʼuhi ko Sehova? (1 Kolonito 4:7) Neʼe fakatokaga fenei mai e te apositolo ko Paulo: “ʼE au ui kia koutou fuli ke ʼaua naʼa kotou manatu ʼe kotou maʼuhiga, kaʼe ke kotou maʼu he manatu ʼe fakapotopoto ʼo ʼuhiga mo koutou totonu.”—Loma 12:3.

¹⁰ Lua, neʼe fakatonutonuʼi e Sehova ia Sepena he neʼe ina iloʼi ʼe feala pe ke fetogi ia Sepena. (Taaga Lea 3:11, 12) Ko he ako ia kia natou ʼae neʼe toʼo ʼonatou pilivilesio. ʼE feala pe ke natou foaki ʼonatou fealagia fuli kia Sehova ʼi hanatou nonofo ʼo meo pea mo mamahi. ʼE feala pe ke natou sisio ʼi tonatou akonakiʼi ki te ʼofa ʼo Sehova kia natou. Tou manatuʼi ʼe fakapale anai e tatatou Tamai ia natou fuli ʼae ʼe agavaivai. (Lau ia 1 Petelo 5:6, 7.) ʼI te akonakiʼi ʼo tatou e Sehova ʼaki te ʼofa, ʼe feala ai ke ina faʼufaʼu tatou mo kapau ʼe tou agavaivai pea moka tou hage ko he kele malū.

¹¹ Tolu, ʼe tou maʼu he ako maʼuhiga ʼi te aga ʼae neʼe fakaha e Sehova kia Sepena. Logo la ʼe ha ʼi te faʼahiga akonakiʼi ʼo he tahi e Sehova ʼe fehiʼa ki te agahala, kae ʼe toe ha ai ʼe ʼofa ki te tagata ʼae neʼe agahala. ʼE kumi pe e Sehova te meʼa ʼae ʼe lelei ʼi he tahi. Kapau ko koe ko he tamai, peʼe ko he faʼe, peʼe ko he tagata ʼafeā, ʼe ke faʼifaʼitakiʼi anai koa te faʼahiga akonakiʼi ʼo he tahi e Sehova?—Suta 22, 23.

12-14. (1) ʼE tali feafeaʼi e ʼihi moka akonakiʼi natou e Sehova? (2) Neʼe tokoni feafeaʼi te Folafola ʼa te ʼAtua ki he tehina ke ina fetogi tana manatu, pea neʼe kotea ʼona fua?

¹² Meʼa fakaʼofaʼofa, ko ʼihi ʼe natou loto mamahi ʼaupito moka akonakiʼi natou pea ʼe natou fakamamaʼo ai mai te ʼAtua pea mo te kokelekasio. (Hepeleo 3:12, 13) Ko tona fakaʼuhiga koa ʼe mole feala ke tokoni age he tahi? Kailoa. Tou vakaʼi te faʼifaʼitaki ʼo Graham, ʼae neʼe fakamavae pea ki muli age neʼe toe liliu mai ki te moʼoni. Kae ʼi te hoko atu ʼi tana liliu mai ʼaia, neʼe mole kei alu ʼo faifakamafola pea kua to fono. Pea neʼe ʼi ai te tagata ʼafeā neʼe faiga ke fakakaumeʼa kia Graham, pea neʼe toe fia fai ai he ako Fakatohi-tapu ʼa Graham mo te tagata ʼafeā ʼaia.

¹³ Neʼe manatuʼi fenei e te tagata ʼafeā: “Neʼe ko te fihifihia ʼo Graham ko te fiameʼalahi. Neʼe ina fatufatuʼi te kau tagata ʼafeā ʼae neʼe kau ki tona fakamavae. Hili ki ai he ʼu kiʼi faiʼaga ʼo tama ako, neʼe ma faipalalau ai ʼo ʼuhiga mo he ʼu vaega ʼe talanoa ki te fiameʼalahi pea mo ʼona nunuʼa. Neʼe kamata sio ai ia  Graham ʼi te sioʼata ʼae ʼo te Folafola ʼa te ʼAtua kia ia totonu, pea neʼe mole ina leleiʼia te meʼa ʼae neʼe sio ki ai. Neʼe ʼi ai ʼona fua kia ia pea neʼe fakapunamaʼuli ʼaupito. ʼI tana ʼosi iloʼi ʼae neʼe fakakiviʼi ʼaki te foʼi ‘lalago’ ʼo te fiameʼalahi pea mo tona fihifihia ʼae ko te faifatufatu, neʼe kamata fetogi atu aipe. Neʼe kamata kau tuʼumaʼu ai ki te ʼu fono, neʼe ina ako fakamalotoloto ai te Folafola ʼa te ʼAtua, pea neʼe liliu ai ko hana agamahani ko te faikole ʼi te ʼaho fuli. Neʼe ina toe toʼo ai ʼona maʼua fakafamili ʼi te faʼahi fakalaumalie, pea neʼe fiafia ai tona ʼohoana mo tana fanau.”—Luka 6:41, 42; Sakopo 1:23-25.

¹⁴ Neʼe toe ui fenei e te tagata ʼafeā: “Neʼe ʼi ai te tahi ʼaho, neʼe malave kia au te ʼu palalau ʼa Graham. Neʼe ina ui mai, ‘ʼe au iloʼi te moʼoni talu mai fualoa, pea neʼe kua au pionie katoa pe foki la. Kae ko taku hoki logoʼi ifo ʼae ia toku ʼofa ʼae kia Sehova.’” Mole fualoa kia ai, neʼe hinoʼi ai ia Graham ki te gaue fai mikolo ʼi te ʼu fono, pea neʼe fiafia ai ʼi tona fakaʼaogaʼi. Neʼe ui fenei e te tagata ʼafeā: “Neʼe akoʼi mai au ʼi te faʼifaʼitaki ʼaia, moka agavaivai he tahi ʼo ina tali tona akonakiʼi e te ʼAtua, pea ʼe maʼu tapuakina ai.”

15. Kotea ʼe tonu ke tou fai ke fua lelei ai tatatou akonakiʼi he tahi?

¹⁵ Kapau ʼe tou fia liliu ko he ʼu faiako lelei, ʼe tonu muʼa ke lelei tatatou ako. (1 Timoteo 4:15, 16) ʼO toe feia aipe, moka fakaʼaogaʼi koe e Sehova ke ke akonakiʼi he tahi, ʼe tonu ke ke agavaivai ʼo tuku ke taki tou maʼuli e Sehova. ʼE fakaʼapaʼapa anai ʼihi kia koe moka natou sisio ʼe ke agavaivai, pea ʼe natou tali gafua anai ʼau faitokoni. ʼE feala ke tou ako mai te faʼifaʼitaki ʼo Sesu.

16. Kotea ʼe feala ke tou ako ʼo ʼuhiga mo te faʼahiga faiako pea mo te faʼahiga akonakiʼi ʼo ʼihi e Sesu?

¹⁶ Neʼe fakalogo tuʼumaʼu ia Sesu ki tana Tamai, logo ai pe la pe neʼe faigataʼa. (Mateo 26:39) Neʼe ina fakamanatuʼi age kia natou ʼae ʼe natou fakalogo, ko ʼana akonaki mo te poto ʼae ʼe ina maʼu ʼe haʼu mai tana Tamai. (Soane 5:19, 30) Neʼe agavaivai ia Sesu pea mo fakalogo, pea neʼe tokoni ki ai ke liliu ko he faiako manavaʼofa. Ko te hahaʼi ʼae ʼe natou fakalogo fakamalotoloto, neʼe natou fia fakatahi tuʼumaʼu mo Sesu. (Lau ia Luka 4:22.) ʼAki ʼana palalau agalelei, neʼe fakalotomalohiʼi e Sesu ia natou ʼae kua lotovaivai pea mo mafasia. (Mateo 12:20) Logo la neʼe feala ke ita ʼi te fihi tuʼumaʼu ʼo ʼana apositolo pe ʼe ko ai ʼae ʼe lahi ia natou, kae neʼe fakatonutonuʼi pe natou e Sesu ʼaki te ʼofa mo te agaʼofa.—Maleko 9:33-37; Luka 22: 24-27.

17. Kotea te ʼu kalitate ʼe ʼaoga ki te kau tagata ʼafeā ke natou tokakaga ki te kokelekasio?

¹⁷ ʼI te temi fuli pe, moka fakatonutonuʼi e te kau tagata ʼafeā he tahi ʼaki te ʼu pelesepeto Fakatohi-tapu, ʼe tonu ke natou faʼifaʼitakiʼi ia Kilisito. ʼE natou fakaha ai tanatou loto ʼae ke takitaki natou e te ʼAtua pea mo tona ʼAlo. Neʼe tohi fenei e te apositolo ko Petelo: “Kotou tauhi te faga ovi ʼa te ʼAtua ʼae neʼe tuku atu kia koutou, ʼo kotou gaue ohage ko he ʼu  tagata taupau, ʼo mole kotou fai ʼaki he fakakinau kaʼe ʼaki he lotolelei ia muʼa ʼo te ʼAtua, ʼo mole ʼaki he lotomanumanū ki te paʼaga kaʼe ʼaki he faʼafai, ʼo mole kotou puleʼi ia natou ʼae ʼe ko te tofiʼa ʼo te ʼAtua, kaʼe ke kotou liliu ko he ʼu faʼifaʼitakiʼaga maʼa te faga ovi.” (1 Petelo 5:2-4) Ko te kau tagata ʼafeā ʼae ʼe natou fakalogo ʼi te fiafia ki te ʼAtua mo Kilisito, ʼe fua lelei anai kia natou pea mo natou ʼae ʼe natou tokakaga ki ai.—Esaia 32:1, 2, 17, 18.

18. (1) Kotea ʼae neʼe fakamaʼua e Sehova ki te ʼu matuʼā? (2) ʼE tokoni feafeaʼi te ʼAtua ki te ʼu matuʼā?

¹⁸ Kae ʼe feafeaʼi ki he famili? ʼE ui fenei e Sehova ki te ʼu pule famili: “ʼAua naʼa kotou fakatupu ita ki ʼakotou fanau, kaʼe ke kotou haga taupau natou ʼo akonakiʼi pea mo akoʼi natou ʼo mulimuli ki te meʼa ʼae ʼe ui e Sehova.” (Efeso 6:4) Ko te akoako mo te akonakiʼi ʼo he fanau ʼe ʼaoga moʼoni koa? ʼE tou lau fenei ia Taaga Lea 19:18: “Tautea tou foha, koteuhi kei mau he amanaki lelei kia ia; kae aua naa ke holi ke fakamate ia ia.” ʼE foaki e Sehova ki te ʼu matuʼā te maʼua ʼae ke natou akonakiʼi ʼanatou fanau. ʼE natou tuʼu maʼua anai kia Sehova moka ʼe mole natou fai te faʼahi ʼaia. (1 Samuele 3:12-14) Kae ʼe foaki e Sehova ki te ʼu matuʼā te poto mo te malohi ʼae ʼe ʼaoga moka natou kole tokoni age pea moka natou falala ki tana Folafola pea mo tona laumalie maʼoniʼoni moʼo takitaki ʼo natou.—Lau ia Sakopo 1:5.

19, 20. (1) Kotea te ʼu tapuakina ʼe feala ke tou maʼu moka tou tali ke akonakiʼi tatou e te ʼAtua? (2) Kotea ʼae ka tou vakaʼi ʼi te alatike ʼae ka hoa mai?

¹⁹ Ka tou tali ke akonakiʼi tatou e te ʼAtua pea mo tou faʼifaʼitakiʼi te faʼahiga akonakiʼi ʼo he tahi e Sehova mo Sesu, pea ʼe tou maʼu anai ni toe tapuakina ʼe lahi. ʼE maʼuli anai ʼotatou famili mo te ʼu kokelekasio ʼi te tokalelei, pea ʼe natou logoʼi fuli anai tonatou ʼofainaʼi, mo tonatou maʼuhiga pea mo tonatou fimalie. Ko te tokalelei mo te fiafia ʼaia, ko tona kiʼi fakata veliveli mai ʼo ʼuhiga mo te ka haʼu. (Pesalemo 72:7) Moka akonakiʼi tatou e Sehova ʼe ina teuteuʼi tatou ke tou maʼuli fakatahi ʼi te tokalelei ohage ko he foʼi famili ʼe tahi ki te heʼe gata, mo tatatou Tamai ko Sehova. (Lau ia Esaia 11:9.) Moka tou manatuʼi te faʼahi ʼaia, ʼe tou mahino anai ki te fakaʼuhiga moʼoni ʼo te akonakiʼi ʼo he tahi: ko he faʼahiga fakaha mai ʼaia e te ʼAtua tona ʼofa ʼae kia tatou.

²⁰ ʼI te alatike ʼae ka hoa mai, ʼe lahi anai te ʼu faʼahi ʼe tou ako ʼo ʼuhiga mo te akonakiʼi ʼo he tahi ʼi te famili pea mo te kokelekasio. ʼE tou vakaʼi ai anai pe ʼe feala ke tou tahi akonakiʼi feafeaʼi ia tatou. Pea ʼe tou ako ai anai pe ʼe feala ke tou fakamamaʼo feafeaʼi mai he aluʼaga ʼe feala ke tou mamahi ai ʼo kovi age ʼi hotatou akonakiʼi.