Kua Ke Iloʼi Koa?
He koʼe neʼe kau ni tagata neʼe mole Iselaele ʼi te foʼi tau ʼa te Hau ko Tavite?
ʼI TE ʼu tagata neʼe mole Iselaele ʼae neʼe kau ʼi te foʼi tau ʼa Tavite, neʼe ʼi ai ia Teseleke, te tagata Amone, mo Elia te tagata Heti, pea mo Sitema te tagata Moape. a (1 Klk. 11:39, 41, 46) Neʼe toe kau ʼi te ʼu tagata solia ʼa Tavite “te kau Keleti, mo te kau Peletite pea mo te kau Kiete.” (2 Sam. 15:18) Ko te kau Keleti mo te kau Peletite neʼe lagi kaiga mo te kau Filisitini. (Esk. 25:16) Pea ko te kau Kiete neʼe ʼomai mai te kolo Filisitini ko Kiete.—Sos. 13:2, 3; 1 Sam. 6:17, 18.
He koʼe neʼe tali e Tavite ni tagata neʼe mole Iselaele ʼi tana kau solia? He neʼe falala ʼe natou nonofo agatonu kia ia, kae tafito kia Sehova. Ohage la, ʼe ui ʼi he tikisionalio Fakatohi-tapu ʼo ʼuhiga mo te kau Keleti pea mo te kau Peletite: “Neʼe natou nonofo agatonu kia Tavite ʼi te ʼu temi faigataʼa ʼo tana pule.” Neʼe natou fakaha feafeaʼi tanatou agatonu ʼaia? ʼI te liʼaki “e te ʼu tagata fuli ʼo Iselaele” ia te hau ko Tavite kae natou mulimuli ki te “tagata fakatupu maveuveu neʼe higoa ko Sepa,” ko te kau Keleti pea mo te kau Peletite neʼe natou nonofo agatonu kia Tavite pea neʼe natou tokoni kia ia ke fakagata te agatuʼu ʼa Sepa. (2 Sam. 20:1, 2, 7) Pea ki muli age, ʼi te faiga ʼa Atonisa te tahi foha ʼo Tavite ke ina faʼao te tuʼulaga hau, neʼe nonofo agatonu aipe te kau Keleti pea mo te kau Peletite kia Tavite. Neʼe natou tokoni kia Tavite ke fakanofo hau ia Salomone, ʼae neʼe filifili e Sehova ke ina fetogi ia Tavite.—1 Hau 1:24-27, 38, 39.
Ko te tahi tagata neʼe mole Iselaele neʼe nofo agatonu kia Tavite neʼe ko Itai, te tagata Kiete. Ko Itai mo ʼana tagata tau ʼe toko 600 neʼe natou lagolago kia Tavite ʼi te agatuʼu ʼo tona foha ko Apesalone, pea mo tana faiga ʼae ke ina fakamaliu te loto ʼo te hahaʼi ʼo Iselaele kia ia. Mai tona aluʼaga ʼae ko Itai neʼe ko he matapule, koia neʼe ui age e Tavite neʼe mole maʼua ia ke lagolago kia ia. Kae neʼe tali age e Itai: “Siʼoku ʼaliki te hau, ʼe au tala moʼoni atu kia koe pea ia muʼa ʼo Sehova: Ko he faʼahi pe ʼe ke nofo ai anai, pe ʼe ki te mate peʼe ki te maʼuli, ʼe au nofo ai anai!”—2 Sam. 15:6, 18-21.
Neʼe nofo agatonu ia Itai kia Tavite, te hau ʼae neʼe fakanofo e Sehova
Logo la ko te kau Keleti, mo te kau Peletite pea mo te kau Kiete neʼe mole ko ni Iselaele kae neʼe natou iloʼi ko Sehova ʼe ko te ʼAtua moʼoni pea ko Tavite ko te fakanofo ʼa Sehova. ʼE mahino ia, neʼe fiafia ia Tavite ʼi te nonofo agatonu ʼa te ʼu tagata ʼaia kia ia!
a ʼI te lao ʼa te ʼAtua ʼae ia Tetelonome 23:3-6 neʼe mole feala ke kau ia te kau Amone pea mo te kau Moape ʼi te kau Iselaele, ia te hahaʼi ʼa Sehova. Neʼe lagi fakaʼuhiga neʼe mole feala ke natou maʼu te ʼu fealagia ʼae neʼe maʼu e he tahi neʼe tupu ʼi te puleʼaga ʼo Iselaele. Kae neʼe feala pe ke natou fakatahi mo maʼuʼuli ʼi te lotolotoiga ʼo te kau Iselaele mo kapau ʼe natou tali te tauhi moʼoni. (Vakaʼi te tohi Fakafalani Études perspicace des Écritures, Tohi 1, p. 100.)
