• “Neʼe hage kia au neʼe tono tuʼa lahi toku ʼohoana.”

• “Neʼe hage neʼe ina meʼa noaʼi au, neʼe mole kei au matalelei, pea mole kei ʼi ai hoku ʼuhiga.”

• “Neʼe mole feala ke au palalau mo he tahi huʼu mo te faʼahi ʼaia. Neʼe au ʼutakiʼi tokotahi pe.”

• “Neʼe hage kia au ʼe mole tokaga mai ia Sehova.”

Ko te ʼu tala manatu ʼaia ʼe ha ai te mamahi ʼe tali e te fafine moka sioʼi e tona ʼohoana he ʼu ʼata ʼe kovi. Pea ka kua lauʼi mahina peʼe lauʼi taʼu te fai fakafufu e tona ʼohoana te faʼahi ʼaia, ʼe lagi faigataʼa hana toe falala ki ai. Neʼe ui fenei e he fafine: “Neʼe hage ia neʼe mole au iloʼi te tagata ʼae neʼe ʼau ʼohoanaʼi. ʼE ʼi ai koa he tahi age ʼu meʼa ʼe ina fufu mai?”

Neʼe teuteuʼi te alatike ʼaeni maʼa te ʼu fafine ʼohoana ʼae ʼe sioʼi e ʼonatou ʼohoana te ʼu ʼata ʼae ʼe kovi. a ʼE vakaʼi ai ni pelesepeto ʼi te Tohi-Tapu ʼe fakalotofimalieʼi ai natou, ke natou tui papau ʼe tokoni Sehova kia natou. ʼE natou toe maʼu anai mai te ʼu pelesepeto ʼaia te tokalelei pea ʼe tokoni anai kia natou ke natou nonofo ovi kia Sehova. b

ʼE mole feala ke ke iloʼi te ʼu meʼa fuli ʼae ʼe fai e tou ʼohoana, kae ʼe feala pe tau kumi ni puleʼaki ke fakasiʼisiʼi ai tou lotohoha. Tokagaʼi te ʼu tokoni ʼaeni:

ʼAua naʼa ke ui ko tau hala. ʼE feala ke manatu te fafine neʼe ina fai he aga ʼe kovi, ʼae ʼe tupu ai te sioʼi e tona ʼohoana te ʼu ʼata ʼae ʼe kovi. Neʼe manatu Alice c ʼe mole kei matalelei kia mata ʼo tona ʼohoana. Neʼe ina feʼekeʼaki: “He koʼe ʼe fia sioʼi e toku ʼohoana he tahi ʼu fafine kehe age?” ʼE tukugakoviʼi ʼihi fafine ia natou totonu, ʼo natou manatu ʼe ʼasili kovi te aluʼaga ʼuhi ko tanatou aga. ʼE ui e Danielle: “Neʼe au ui neʼe au maumauʼi toma maʼuli fakataumatuʼa ʼuhi ko toku lotomamahi mo toku itaita.”

Kapau ʼe ke toe manatu feia mo koe, ke ke iloʼi ʼe mole tukugakoviʼi koe e Sehova ʼuhi ko te aga ʼo tou ʼohoana. ʼE ui ia Sakopo 1:14: “ ʼE ʼahiʼahiʼi te tagata takitokotahi moka ina tuku tona holi totonu  ke ina taki pea mo fakahalaʼi ia ia.” (Loma 14:12; Flp. 2:12) ʼE mole ui e Sehova ʼe ko tau hala, kae ʼe maʼuhiga kia ia tau nofo agatonu.—2 Klk. 16:9.

Tou toe manatuʼi foki, kapau ʼe sioʼi e he tagata ʼohoana te ʼu ʼata ʼae ʼe kovi, ʼe mole ʼuhi he mole kei matalelei tona ʼohoana. ʼE fakamahino e te hahaʼi ʼae ʼe natou sivi te aga ʼaia, ka sioʼi e he tagata he ʼu ʼata ʼe kovi, ʼe tupu ia ia he ʼu holi heʼe ʼaoga, ʼe mole feala ke fakafimalieʼi e tona ʼohoana.

ʼAua naʼa ke hoha fau. ʼE ui e Catherine, neʼe manatu tuʼumaʼu pe ia ki te sioʼi e tona ʼohoana te ʼu ʼata ʼae ʼe kovi pea neʼe fua kovi ʼosi kia ia. Feia mo France, ʼe ina ui fenei: “ ʼE au hoha moka ʼe mole au iloʼi pe ʼe ʼifea toku ʼohoana. Pea ʼe lahi ai taku hoha ʼi te ʼaho katoa.” ʼE ui e ʼihi fafine ʼohoana ʼe natou ufiufi moka natou fakatahi mo te ʼu tehina mo tuagaʼane ʼae ʼe lagi natou iloʼi te aga ʼo tonatou ʼohoana. Pea ʼe ui e ʼihi fafine ʼe natou logoʼi tanatou nofo tokotahi he ʼe mole he tahi ʼe mahino ki tonatou aluʼaga.

ʼE logoʼi e te tagata fuli te ʼu faʼahi ʼaia. Kae kapau ʼe ke haga manatuʼi tuʼumaʼu pe, pea ʼe toe ʼasili ai tau lotohoha. Faiga ke ke tokagaʼi tafito ʼau felogoi mo Sehova. ʼE ke maʼu ai anai te malohi ke ke faʼa kataki.—Pes. 62:2; Efe. 6:10.

ʼE ke tokagaʼi anai te fua lelei kia koe moka ke lau mo metitasioʼi he ʼu fakamatala ʼi te Tohi-Tapu ʼo he ʼu fafine neʼe lotohoha. Kae neʼe natou maʼu he fakalotofimalie ʼi tanatou fakaha ʼi te faikole te ʼu meʼa ʼi tonatou loto kia Sehova. Neʼe mole ina pulihi ʼonatou faigataʼaʼia, kae neʼe ina foaki age tana tokalelei. Ohage la ko Ana, “neʼe lotomamahi ʼaupito” ʼuhi ko te aluʼaga ʼae neʼe tau mo ia. Kae ʼi ‘tana ʼosi faikole loaloaga ia muʼa ʼo Sehova’ neʼe ina logoʼi te tokalelei logo la neʼe mole ina iloʼi pe kotea ka hoko ki muli age.—1 Sam. 1:10, 12, 18; 2 Ko. 1:3, 4.

Kole tokoni ki te ʼu tagata ʼafea ʼo te kokelekasio. ʼE feala ke natou liliu “ko he nonoʼaga ʼi te matagi, ko he holaʼaga ʼi te afā.” (Esa. 32:2) ʼE toe feala pe anai ke natou filifili he tuagaʼane ʼe feala ke ke palalau ki ai pea ʼe feala hana fakalotofimalieʼi koe.—Taag. 17:17.

ʼE feala koa ke ke tokoni ki tou ʼohoana ke ina fakagata tana sioʼi te ʼu ʼata ʼae ʼe kovi? Lagi ʼe feala pe. ʼE ui ʼi te Tohi-Tapu “ ʼe lelei age he toko lua ʼi he tokotahi” moʼo fakatokatoka he fihifihia peʼe moʼo tauʼi he fili. (Ekl. 4:9-12) ʼE fakaha ʼi he ʼu sivi neʼe fai, ʼi te agamahani ʼe maʼu ni fua lelei moka  gaue fakatahi he taumatuʼa ke lava tauʼi e te tagata tana sioʼi te ʼu ʼata ʼae ʼe kovi pea ke feala hanā toe fefalalaʼaki.

ʼE moʼoni, ʼe fakalogo pe anai ki te loto moʼoni ʼo tou ʼohoana mo tana fakamalotoloto ke ina tuku tana sioʼi te ʼu ʼata ʼae ʼe kovi. Neʼe kole mamahi koa kia Sehova ke ina foaki age te malohi pea mo kole te tokoni ʼa te ʼu tagata ʼafea? (2 Ko. 4:7; Sakp. 5:14, 15) Kua ina fai koa ni puleʼaki ke mole to ki te fakahala? Ohage la, kua ina fakasiʼisiʼi koa tana fakaʼaogaʼi te ʼu kiʼi masini toʼotoʼo pea mo ina tekeʼi te ʼu aluʼaga ʼe feala ke fakahalaʼi ai? (Taag. 27:12) ʼE loto moʼoni koa ke ke tokoni age pea ʼe mole kei ina fufu atu koa he meʼa? Kapau koia, ʼe lagi feala anai hau tokoni ki ai.

ʼO feafeaʼi? Tou vakaʼi pe kotea ʼae neʼe fai e te taumatuʼa ko Felicia mo Ethan. Neʼe sioʼi e Ethan te ʼu ʼata ʼae ʼe kovi talu mai tana kei tupulaga. Neʼe faiga ia Felicia ke felogoi tuʼumaʼu mo tona ʼohoana ke feala ai hana palalau faʼifaʼitaliha age ʼo ʼuhiga mo tana holi ʼae ke ina sioʼi te ʼu ʼata ʼae ʼe kovi. ʼE ui fenei e Ethan: “Ka au palalau age ki toku ʼohoana, ʼe mole au fufu age he meʼa. ʼE tokoni mai mo he loto ʼofa ke au fai ni tuʼakoi pea mo ina tau fehuʼi mai pe kei au mulimuli pe ki ai. ʼE toe tokoni mai ke au fakatuʼakoi te sioʼi ʼo te Neti.” ʼE moʼoni ʼe lotomamahi ia Felicia ʼi te fia sioʼi e Ethan te ʼu ʼata ʼae ʼe kovi. Kae ʼe ina ui fenei: “Kapau ʼe au ita peʼe au lotomamahi, ʼe mole tokoni anai ki toku ʼohoana ke ina tuku tana agamahani ʼaia ʼe kovi. Hili tamā faipalalau ki tona fihifihia, kua feala hana tokoni mai ke mole kei au lotomamahi.”

Ko te ʼu faipalalau ʼaia ʼe tokoni anai ki te tagata ʼohoana ke ina liʼaki tana sioʼi te ʼu ʼata ʼae ʼe kovi, pea ʼe toe tokoni foki ki tona ʼohoana ke toe falala ki ai. ʼE moʼoni, heʼe ka fakaha fakahagatonu e te tagata ʼona vaivaiʼaga, mo ina fakaha age te ʼu koga meʼa ʼe alu ki ai pea mo te meʼa ʼae ʼe ina fai, ʼe faigafua anai ki tona ʼohoana ke falala ki ai.

ʼE ke manatu koa ʼe feala hau tokoni feia ki tou ʼohoana? Kapau ko ia, he koʼe ʼe mole kolua lau fakatahi ia te alatike ʼaeni pea mo kolua faipalalau ki ai? ʼE tonu ke fakatuʼutuʼu e tou ʼohoana ke ina liʼaki te sioʼi ʼo te ʼu ʼata ʼae ʼe kovi pea ke ke sio kua feala hau toe falala ki ai. ʼE mole ita anai moka ke palalau age ki tau lotohoha, pea ʼe faiga anai ke mahino ki ai. ʼE ke fakatuʼutuʼu leva koe ke ke fakalotomalohiʼi ia ia pea mo ke tali ʼana faiga ʼae ke ke toe falala kia ia. ʼE ʼaoga anai ke kolua mahino tokolua ki te tupuʼaga ʼae ʼe uga ai he tahi ke ina sioʼi te ʼu ʼata ʼae ʼe kovi pea ʼe feafeaʼi te tauʼi ʼo te faigataʼaʼia ʼaia. d

 Kapau ʼe ke tuʼania naʼa kolua feitaitani ʼi takolua faipalalau, ʼe feala ke kolua kole ki he tagata ʼafea ʼe kolua feiloʼileleiʼaki mo ia ke nofo mo koulua moka kolua faipalalau. Ke mahino kia koe, tatau aipe pe kua lava liʼaki e tou ʼohoana tana sioʼi te ʼu ʼata ʼae ʼe kovi, kae ʼe lagi ʼaoga anai he temi loaloaga ke ke toe falala ki ai. ʼAua naʼa ke lotovaivai. Tokagaʼi te ʼu kiʼi faʼahi ʼae kua fetogi ʼi ʼakolua felogoi. Pea ke ke falala, ʼaki te temi pea mo tau faʼa kataki, ʼe toe malohi anai tokolua maʼuli fakataumatuʼa.—Ekl. 7:8; 1 Ko. 13:4.

Kapau ʼe hili ki ai he temi, ʼe toe sioʼi e tou ʼohoana te ʼu ʼata ʼae ʼe kovi, ko tona fakaʼuhiga koa ʼe mole fakahemala peʼe mole kei ʼi ai he puleʼaki ki ai? Kailoa. Kapau ko he aga kua fualoa tana fai, ʼe lagi tonu anai ke ina tauʼi te aga ʼaia ʼi tona maʼuli katoa. Tatau aipe pe kua lauʼi taʼu tana mole kei sioʼi te ʼu ʼata ʼae ʼe kovi, kae ʼe feala pe ke toe to ki ai. Ke mole hoko te aluʼaga ʼaia, ʼe tonu anai ke mulimuli lahi age ki te ʼu fakatuʼakoi ʼae kua ina fai, maʼia pe la moka ʼe manatu kua ina lava liʼaki tana aga ʼae ʼe kovi. (Taag. 28:14; Mat. 5:29; 1 Ko. 10:12) ʼE tonu anai ke ina maʼu he “faʼahiga manatu” foʼou pea ke ina ako ke ‘fehiʼa ki te meʼa ʼae ʼe kovi.’ ʼE kau ki ai te sioʼi ʼo te ʼu ʼata ʼae ʼe kovi pea mo te ʼu aga heʼe maʼa fuli, ohage ko te mulu. (Efe. 4:23; Pes. 97:10; Loma 12:9) ʼE loto moʼoni koa ke ina fai te ʼu faʼahi ʼaia? Kapau ʼe loto ki ai, pea ʼe feala anai hana fakagata. e

Kae ʼe feafeaʼi leva moka ʼe mole fia tuku e tou ʼohoana tana aga ʼaia ʼe kovi? ʼI ʼihi temi ʼe ke ita ai anai, mo lotomamahi pea mo hage kia koe neʼe kakaʼi koe. ʼE matou mahino ki ai. Kae tuku ʼau tuʼania fuli kia Sehova, ke ke maʼu ai he fimalie. (1 Pet. 5:7) Haga fakaovi kia Sehova ʼaki te faikole, pea mo ke lau mo metitasio ki tana Folafola. Pea ke ke tui papau ʼe fakaovi atu anai ia Sehova. Ohage ko tana ui ia Esaia 57:15, ʼe “nofo mo natou ʼae ʼe taʼomia mo agavaivai” pea ʼe ina “fakalotomalohiʼi te kau agavaivai.” Haga tauhi agatonu kia Sehova. Kumi te tokoni ʼa te ʼu tagata ʼafea. Pea ke falala, ʼe ʼi ai pe anai he ʼaho ʼe fetogi anai te manatu ʼo tou ʼohoana.—Loma 2:4; 2 Pet. 3:9.