1. Ko te temi fea ka tanaki ai te kau fakanofo fuli ki selo?

 KUA hili ki ai ni taʼu, neʼe feʼekeʼaki e te hahaʼi ʼa Sehova: ‘Ko te temi fea ʼae ka hake fuli ai te kau fakanofo ʼae kei ʼi te kele ki selo?’ ʼI muʼa atu neʼe tou manatu, hili te tau ʼo Alamaketone, ko ʼihi ia natou ʼe nonofo muʼa ʼi he kiʼi temi ʼi te kele, ʼi te malama foʼou. Kae ʼi Te Tule Leʼo ʼo te ʼaho 15 ʼo Sulio 2013, neʼe ui ai ko te kau fakanofo fuli ʼae kei nonofo ʼi te kele ʼe tanaki anai natou ki selo ʼi muʼa ʼo te hoko ʼo Alamaketone.​—Mat. 24:31.

2. Kotea te fehuʼi ʼe feala ke tou fai? Pea kotea ka tou vakaʼi ʼi te alatike ʼaeni?

² Kae ʼe feala ke tou fai te fehuʼi ʼaeni: Kotea ka hoko anai ki “ ʼihi atu ovi” ʼa Kilisito ʼae ʼe tauhi agatonu kia Sehova ʼi te kele lolotoga te “mamahi lahi”? (Soa. 10:16; Mat. 24:21) Ia ʼaho nei, ko ʼihi ʼe matataku naʼa liakī anai natou moka hake fuli te ʼu tehina mo tuagaʼane fakanofo ki selo. Tou vakaʼi te ʼu fakamatala ʼe lua ʼi te Tohi-Tapu ʼae lagi tupu ai tanatou manatu feia. Pea ʼe tou vakaʼi anai ni tupuʼaga ke ʼaua naʼa tou tuʼania ki te faʼahi ʼaia.

TE ʼU MEʼA ʼAE ʼE MOLE HOKO ANAI

3-4. Kotea ʼae ʼe feala ke ui e ʼihi? He koʼe ʼe natou manatu feia?

³ Ko ʼihi ʼe feala ke natou ui ka hake anai ki selo te ʼu tehina fakanofo ʼo te Kolesi Pule, ko ʼihi ovi ʼe lagi mole kei natou tauhi anai kia Sehova. ʼE lagi natou manatu feia ʼuhi ko he ʼu fakamatala ʼi te Tohi-Tapu. Koia, tou vakaʼi faʼifaʼitaki ʼe lua. Koʼeni te ʼuluaki ko ʼae ʼo te Pelepitelo Lahi ko Seosata ʼae neʼe agatonu ki te ʼAtua. Ko ia mo tona ʼohoana ko Sokapeta neʼe nā puipui te kiʼi tamasiʼi tagata ko Seoasi, pea neʼe nā tokoni ki ai ke liliu ko he hau lelei mo agatonu. Neʼe haga fai pe e Seoasi te meʼa ʼae ʼe lelei, ʼi te temi ʼae neʼe kei maʼuli ai te pelepitelo ko  Seosata. Kae ʼi te mate leva ʼo Seosata, neʼe ina fai leva te ʼu aga ʼae ʼe kovi. Neʼe fakalogo leva ki te kau ʼAliki agakovi ʼo ina liakī ai ia Sehova.​—2 Klk. 24:2, 15-19.

⁴ Ko te lua faʼifaʼitaki ʼe fakaʼuhiga ki te kau Kilisitiano ʼae neʼe maʼuʼuli hili te mate ʼa te kau apositolo. Ko te apositolo ʼae neʼe mate fakamuli ko Soane. ʼI te temi ʼae neʼe kei maʼuli ai, neʼe tokoni lahi ki te kau Kilisitiano ke natou nonofo agatonu. (3 Soa. 4) Ohage ko te kau apositolo agatonu ʼa Kilisito, neʼe tauʼi malohi e Soane te apositasia ʼae neʼe kamata fakamafola. (1 Soa. 2:18; 2 Tes. 2:7) Hili te mate ʼo Soane, tokolahi ʼi te ʼu kokelekasio neʼe liliu ko ni aposita. Pea ʼi te ʼu tau ʼae neʼe hoa mai ki ai, ko te kau aposita ʼaia neʼe natou fakamafola ni akonaki loi pea mo tali te ʼu aga heʼe maʼa ʼi te ʼu kokelekasio fuli.

5. Kotea te ʼu ako ʼe tou taʼofi mai te ʼu faʼifaʼitaki ʼe lua ʼaeni?

⁵ ʼI te ʼu faʼifaʼitaki ʼaeni ʼe lua ʼae neʼe tou vakaʼi, ʼe fakaʼuhiga koa ʼe toe hoko feia pe te aluʼaga ʼaia ki te tahi ʼu ovi ʼa Kilisito, moka hake fuli anai te kau fakanofo ki selo? ʼE galoʼi anai koa e te kau Kilisitiano agatonu te ʼu meʼa fuli ʼae neʼe natou ako ohage ko Seoasi? peʼe natou liliu koa ko ni aposita ohage ko te kau Kilisitiano ʼae neʼe maʼuʼuli hili te mate ʼa te kau apositolo? Kailoa ia. ʼE tou tui papau, ka hake anai ki selo te kau fakanofo, ʼe hoko atu pe te tauhi agatonu ʼa te tahi ʼu ovi ʼa Kilisito ʼi te kele, pea ʼe tokaga mo puipui aipe e Sehova ia natou ʼi te faʼahi fakalaumalie. He koʼe ʼe tou tui papau ki ai?

KO TE TAUHI MAʼA ʼE TUʼU ʼO TALU AI

6. Kotea te ʼu temi ʼe tolu ka tou vakaʼi?

⁶ He koʼe ʼe tou tui papau ʼe hoko atu pe te tauhi agatonu ʼa te hahaʼi ʼa Sehova lolotoga te ʼu temi faigataʼa ʼae ka hoko mai? Koteʼuhi neʼe tou ako ʼi te Tohi-Tapu ʼo ʼuhiga mo te temi ʼae ʼe tou maʼuʼuli ai nei. Pea ko te temi ʼaeni, ʼe kehe ia ʼi te temi ʼo te Iselaele ʼafea pea mo ʼae hili te mamate ʼa te kau apositolo. Koia, tou vakaʼi te ʼu temi ʼaia ʼe tolu: (1) Te temi ʼo te Iselaele ʼafea, (2) te temi hili te mamate ʼa te kau apositolo, pea (3) “te temi ʼae ka toe fakatuʼu ai ia meʼa fuli.”​—Gaue 3:21.

7. He koʼe neʼe lotofalala pe ia te kau Iselaele agatonu, logo la neʼe fai e te ʼu hau pea mo te puleʼaga ʼo Iselaele he ʼu aga ʼe kovi?

⁷ Te temi ʼo te Iselaele ʼafea. Mole faʼa fualoa ʼi muʼa ʼo tona mate, neʼe ui fenei e Moisese ki te kau Iselaele: “ ʼE au iloʼi lelei, ʼe kotou fai moʼoni anai he ʼu aga ʼe kovi hili toku mate, pea ʼe kotou maliu kehe anai mai te ala ʼae neʼe au fakatotonu atu ke kotou muliʼi.” (Tet. 31:29) Pea neʼe kua fakatokaga e Moisese ki te kau Iselaele, kapau ʼe mole natou fakalogo ʼe ʼave popula anai natou ki he tahi puleʼaga. (Tet. 28:35, 36) Neʼe hoko moʼoni koa te ʼu palalau ʼaia? ʼEi. Lolotoga ni sekulo, tokolahi te ʼu hau neʼe natou fai he ʼu aga ʼe kovi kia mata ʼo Sehova ʼo tupu ai te to ʼa te hahaʼi ʼa te ʼAtua ki te tauhi hala. Koia, neʼe liakī ai e Sehova te hahaʼi heʼe agatonu ʼo Iselaele, pea neʼe ina fakagata ai ʼo talu ai te hologa hau ʼae neʼe ina fakafofoga ia ia ʼi te kele. (Esk. 21:25-27) Kae ʼi te sio ʼa te kau Iselaele agatonu ki te hoko moʼoni ʼo te Folafola ʼa te ʼAtua, neʼe natou lototoʼa ai mo lotofalala.​—Esa. 55:10, 11.

8. ʼE tonu koa ke tou punamaʼuli ki te liliu ʼo te kokelekasio Fakakilisitiano ʼo te lua sekulo ko he aposita? Fakamahino.

⁸ Te temi hili te mamate ʼa te kau apositolo. ʼE tonu koa ke tou punamaʼuli ki te liliu ʼo te kokelekasio Fakakilisitiano ʼo te lua sekulo ko he aposita? Kailoa. Neʼe kua ʼosi fakakikite e Sesu ʼe hoko anai te toe apositasia lahi. (Mat. 7:21-23; 13:24-30, 36-43) Neʼe kua fakaha e te ʼu apositolo ko Paulo, mo Petelo pea mo Soane, ko te lea fakapolofeta ʼa Sesu neʼe kua kamata  hoko ʼi te ʼuluaki sekulo. (2 Tes. 2:3, 7; 2 Pet. 2:1; 1 Soa. 2:18) Pea ʼi te lua sekulo, ʼi te kua ʼosi mate ʼa te apositolo fakamuli, neʼe liliu ia te kokelekasio Fakakilisitiano ko he aposita, ʼo kau leva ki te Papiloni Lahi, te kautahi fakamalamanei ʼo te lotu hala. Neʼe ha ai ko te ʼu meʼa ʼae neʼe fakakikite e Sesu neʼe hoko moʼoni.

9. Kotea ʼae ʼe kehekehe ai totatou temi mo ʼae ʼo te Iselaele ʼafea pea mo te temi ʼae neʼe mafola ai te apositasia lahi?

⁹ “Te temi ʼae ka toe fakatuʼu ai ia meʼa fuli.” ʼE kehekehe totatou temi mo ʼae ʼo te Iselaele ʼafea pea mo te temi ʼae neʼe mafola ai te apositasia lahi, hili te mamate ʼo te kau apositolo. Kae ʼe fakahigoaʼi feafeaʼi te temi ʼae ʼe tou maʼuʼuli ai nei? ʼE tou mahani ʼi te ui ʼe tou maʼuʼuli ʼi “te ʼu ʼaho fakamuli” ʼo te tuʼu agakovi ʼaeni. (2 Tim. 3:1) Kae ʼe toe fakaha ʼi te Tohi-Tapu, ʼe tou toe maʼuʼuli ʼi te tahi temi ʼe loaloaga age ia pea mo fakafiafia, neʼe kamata fakatahi mo te ʼu ʼaho fakamuli. Pea ʼe hoko atu pe anai ʼo kaku ki te temi ʼae ka toe fakatuʼu ai e te Puleʼaga Fakamesia te maʼuli haohaoa ʼi te malamanei katoa pea mo fakaliliu ai te kele ko he palatiso. ʼE fakahigoaʼi te temi ʼaia ko “te temi ʼae ka toe fakatuʼu ai ia meʼa fuli.” (Gaue 3:21) Neʼe kamata te temi ʼaia ʼi te taʼu 1914. Kotea ʼae neʼe toe fakatuʼu? Neʼe fakanofo hau leva ia Sesu ʼi selo. Koia, neʼe toe maʼu ai e Sehova he pule foʼou mai te hologa ʼo te Hau ko Tavite moʼona fakafofoga. Kae, neʼe mole ko te puleʼaga pe ʼaia ʼae neʼe toe fakatuʼu. Neʼe mole faʼa fualoa ki ai, neʼe toe fakatuʼu leva mo te tauhi maʼa. (Esa. 2:2-4; Esk. 11:17-20) ʼE feala koa ke toe to te tauhi maʼa ki te apositasia?

10. (1) Kotea ʼae ʼe fakakikite ʼi te Tohi-tapu ʼo ʼuhiga mo te tauhi maʼa ʼae ʼi totatou temi? (Esaia 54:17) (2) Pea he koʼe ʼe fakalotofimalie te ʼu lea fakapolofeta ʼaia?

¹⁰ Lau ia Esaia 54:17. Tou fakakaukauʼi age muʼa te lea fakapolofeta ʼaeni: “ ʼE to noa anai ia mahafu fuli ʼae ʼe fai moʼo tauʼi ʼo koe.” ʼE hoko moʼoni te ʼu palalau ʼaia ʼi totatou temi, ʼo toe feia pe mo te lea fakapolofeta fakalotofimalie ʼaeni: “Pea ʼe akoʼi anai ʼau tama fuli e Sehova, pea ʼe mahu anai te tokalelei ʼo ʼau tama. ʼAki te faitotonu ʼe ke tuʼu malohi anai. . . . ʼE mole ke toe tuʼania anai mo mataku ki he meʼa, he ʼe mole toe fakaovi atu anai kia koe he meʼa fakamataku.” (Esa. 54:13, 14) Maʼia mo Satana, “te ʼatua ʼo te tuʼu ʼo te ʼu faʼahiga meʼa ʼaeni,” ʼe to noa fuli anai ʼana faiga ʼae ke ina taʼofi te gaue ʼae ʼe fai e te hahaʼi ʼa Sehova ke natou akoʼi te hahaʼi ʼo ʼuhiga mo te ʼAtua. (2 Ko. 4:4) Neʼe toe fakatuʼu te tauhi maʼa ʼo talu ai. Koia, ʼe mole feala anai ʼi he temi ki te hahaʼi ʼa  te ʼAtua ke natou toe to ki te tauhi hala. ʼE to noa anai ia mahafu fuli ʼae ʼe fai moʼo tauʼi ʼo tatou!

TE ʼU MEʼA ʼAE KA HOKO ANAI

11. He koʼe ʼe tou tui papau ʼe mole liakī anai te tahi ʼu ovi moka kua hake fuli ia te kau fakanofo ki selo?

¹¹ Kotea ka hoko anai moka kua hake fuli te kau fakanofo ki selo? ʼAua naʼa galo kia koe ko Sesu totatou Tauhi Ovi. Ko ia te pule ʼo te kokelekasio Fakakilisitiano. Neʼe ui fakahagatonu mai e Sesu: “Ko tokotou Takitaki pe ʼe tahi ko Kilisito.” (Mat. 23:10) Logo la ʼe Hau ia Sesu ʼi selo, kae ʼe tou tui papau ʼe tokaga tuʼumaʼu mai pe anai ki ʼana kaugana agatonu ʼi te kele. Koia ʼe mole natou matataku anai. ʼE mole tou iloʼi lelei pe ʼe feafeaʼi anai te takitaki e Kilisito tana hahaʼi ʼi te moʼi temi ʼaia. Koia, tou vakaʼi he ʼu faʼifaʼitaki Fakatohi-tapu moʼo fakalotofimalieʼi ai ʼo tatou.

12. Neʼe tokaga feafeaʼi ia Sehova ki tana hahaʼi (1) ʼi te ʼosi mate ʼa Moisese? (2) ʼi tana fekauʼi leva ia Elia ke alu ki Suta? (Vakaʼi mo te pāki.)

¹² Neʼe mate ia Moisese ʼi muʼa ʼo te hu ʼa te kau Iselaele ki te Kele ʼo te Fakapapau. Kotea ʼae neʼe hoko ki te hahaʼi ʼa te ʼAtua? Neʼe mole kei ʼi ai koa honatou takitaki? Kailoa. Neʼe foaki tuʼumaʼu pe e Sehova te ʼu meʼa ʼae neʼe ʼaoga ki tana hahaʼi mo kapau neʼe natou nonofo agatonu kia te ia. ʼI muʼa ʼo te mate ʼa Moisese, neʼe ui e Sehova kia ia ke ina fakanofo ia Sosue ke ina takitaki tana hahaʼi. Neʼe akoako e Moisese ia Sosue lolotoga ni taʼu. (Eke. 33:11; Tet. 34:9) Pea tahi, neʼe toe fakanofo te ʼu tagata faiva ke pule kia natou. Neʼe ko he ʼu pule ki te toko afe, ki te toko teau, ki te toko nimagofulu pea mo he ʼu pule ki te toko hogofulu. (Tet. 1:15) Neʼe ha ai neʼe puipui lelei te hahaʼi ʼa te ʼAtua. Tou vakaʼi leva te faʼifaʼitaki ʼo Elia. Lolotoga ni taʼu, neʼe lagolago mo faʼafai ia Elia ki te tauhi maʼa ʼi Iselaele. Kae ki muli age, neʼe fekauʼi leva ia ia e Sehova ke alu ki te puleʼaga o te saute ʼi Suta. (2 Hau 2:1; 2 Klk. 21:12) Neʼe liakī koa te kau Iselaele agatonu ʼo te puleʼaga ʼo te ʼu telepi ʼe hogofulu? Kailoa ia. Lolotoga ni taʼu neʼe akoako e Elia ia Eliseo. Pea tahi, neʼe toe ʼi ai “te ʼu foha ʼo te kau polofeta” neʼe akoakoʼi ia natou ʼi he ʼu fale ako. (2 Hau 2:7) Koia, neʼe maʼu ai e Sehova ni tagata agatonu moʼo takitaki tana hahaʼi. Neʼe feala ai ke hoko atu e Sehova tana fakatuʼutuʼu pea mo tokaga lelei ki tana hahaʼi agatonu.

13. Kotea te fakapapau fakalotofimalie ʼe tou maʼu ia Hepeleo 13:5, lua koga? (Vakaʼi mo te pāki.)

¹³ ʼAki te ʼu faʼifaʼitaki ʼae neʼe tou vakaʼi, kia koe la, kotea ka hoko anai moka hake fuli te kau fakanofo ki selo? ʼE mole he ʼuhiga ke tou  fai te fehuʼi ʼaia, he ʼe fakaha mai ʼi te Tohi-Tapu te manatu fakalotofimalie ʼaeni: ʼE mole liakī anai e Sehova tana hahaʼi ʼae ʼi te kele. (Lau ia Hepeleo 13:5, lua koga.) Ohage pe ko Moisese mo Elia, ko te kiʼi kutuga fakanofo ʼae ʼe natou takitaki tatou ʼi te temi nei, ʼe natou mahino ʼe maʼuhiga te akoako ʼo ʼihi. Kua hili ki ai ni taʼu, ko te ʼu tehina ʼo te Kolesi Pule ʼe natou akoako ni tehina ʼe kau ʼi te tahi ʼu ovi ke natou takitaki te gaue ʼa te ʼAtua. Ohage la, neʼe natou fakatuʼutuʼu te ʼu ako ki te kau tagata ʼafeā, mo te kau taupau siliko, mo te ʼu tehina ʼo te ʼu komite ʼo te filiale, mo te ʼu taupau gaue ʼi te ʼu Petele pea mo ʼihi atu gaue. Ko te Kolesi Pule ʼae ʼe natou akoako te ʼu tehina ʼae ʼe tokoni ki te ʼu komite ʼo te Kolesi Pule. Ko te ʼu tehina tokoni ʼaia kua natou maʼumaʼua ʼi te ʼu gaue ʼa te kautahi. Koia ʼe teuteuʼi ai natou ke natou hoko atu te gaue ʼae ke natou taupau te ʼu ovi ʼa Kilisito.

14. Kotea te manatu tafito ʼo te ako?

¹⁴ Koʼeni te manatu tafito ʼo te ako: ʼI muʼa ʼo te fakaʼosi ʼo te mamahi lahi, ʼi te kua hake fuli ʼa te kau fakanofo ki selo, ʼe hoko atu pe te tauhi maʼa ʼi te kele ʼuhi ko te takitaki ʼa Sesu Kilisito. ʼE tou iloʼi ʼi te temi ʼaia, ʼe ʼohofi anai tatou e Koke ʼo Makoke ʼae ʼe fakaʼuhiga ki he fakatahitahi ʼo he ʼu puleʼaga. (Esk. 38:18-20) Kae ko te ʼohofi nounou ʼaia ʼe to noa anai. ʼE mole feala anai ke ina taʼofi te tauhi ʼa te hahaʼi ʼa te ʼAtua kia Sehova. ʼEi, ʼe haofaki anai e Sehova tana hahaʼi. ʼI te meʼa ʼae neʼe ha kia Soane, neʼe sio ai te apositolo ki te “toe hahaʼi tokolahi” mai te tahi ʼu ovi ʼa Kilisito. Pea neʼe ui e Soane ko te “toe hahaʼi tokolahi” ʼaia ʼe ʼomai “mai te toe mamahi lahi.” (Fkha. 7:9, 14) Koia, ʼe tou tui papau ai ʼe haofaki anai natou e Sehova!

15-16. Ia Fakaha 17:14, kotea ka fai e te kau fakanofo mo Kilisito lolotoga te tau ko Alamaketone? Pea he koʼe ko he logo fakalotomalohi?

¹⁵ Kae ko ʼihi ʼe feala ke natou feʼekeʼaki fenei: ‘Kotea ka fai anai e te kau fakanofo ʼi tanatou kua hake fuli ki selo?’ ʼE tali fakahagatonu mai te Tohi-Tapu ki te fehuʼi ʼaia. ʼE ui ai ʼe ‘tauʼi anai’ e te ʼu puleʼaga fakatagata ia te Akeno, pea ʼe tou iloʼi pe, ʼe mole natou malo anai, koteʼuhi ʼe ui fenei: “ ʼE malo anai te Akeno ia natou.” Ko ai ka tokoni ki te Akeno? ʼI te hoko  atu pe ʼo te vaega ʼe ui, ʼe ko “natou ʼae neʼe pauʼi, mo filifili pea mo agatonu.” (Lau ia Fakaha 17:14.) Ko ai ia natou ʼaia? Ko te ʼu tehina mo tuagaʼane fakanofo ʼae kua fakatuʼuake! Koia, ʼi te kua ovi ki te fakaʼosi ʼo te mamahi lahi, ʼi te temi ʼae ka hake fuli ai te kau fakanofo ki selo, ko te ʼuluaki gaue ʼae ka natou fai, ko te tau. ʼE ko he toe gaue fakaofoofo! ʼI muʼa ʼo tanatou liliu ko he ʼu Fakamoʼoni ʼa Sehova, ko ʼihi ia natou neʼe ko he ʼu tagata fuhu, pea ko ʼihi neʼe ko he ʼu solia. Kae ʼi tanatou liliu leva ko he ʼu Kilisitiano moʼoni neʼe natou ako ai te tokalelei. (Kal. 5:22; 2 Tes. 3:16) Neʼe natou fakafisi ai ki te ʼu tau fuli. Kae, ʼi tonatou kua fakatuʼuake ki selo, ʼe natou kaugā gaue anai mo Kilisito pea mo te ʼu ʼaselo maʼoniʼoni ʼo tauʼi te ʼu fili ʼo te ʼAtua.

¹⁶ Fakakaukauʼi age muʼa: ʼI tanatou ʼi te kele, ko te kau fakanofo neʼe natou matutuʼa mo vaivavai. Kae ʼi tonatou kua fakatuʼuake ki selo, kua natou liliu leva ko ni laumalie malolohi mo tuputupua. Ko tanatou ʼuluaki gaue, ʼe natou tau fakatahi mo tonatou Hau ko Sesu Kilisito. Hili te tau ko Alamaketone, ʼe natou gaue tahi anai mo Sesu ʼo natou taki ai te malamanei katoa ki te maʼuli haohaoa. ʼE mahino ia, ʼi tanatou kua ʼi selo, kua natou lavaʼi leva hanatou tokoni ki ʼonatou tehina mo tuagaʼane ʼi te kele ʼo lahi age ia ʼi ʼae ʼi tanatou kei agahala!

17. ʼE tou iloʼi feafeaʼi ko te ʼu kaugana fuli ʼa te ʼAtua ʼe puipui anai natou lolotoga te tau ko Alamaketone?

¹⁷ ʼE ke kau koa ia natou ʼae ko te tahi ʼu ovi? Kapau ko ia, kotea ka ke fai moka hoko anai te tau ko Alamaketone? Koʼeni pe te meʼa ʼae ka ke fai: Ke ke falala kia Sehova pea mo mulimuli ki ʼana fakatotonu. Kotea tona fakaʼuhiga kia koe? ʼE ui fenei ʼi te Tohi-Tapu: “Ulu ki ʼou koga fale taupotu pea ke pupunu te ʼu matapa ʼi ʼou tuʼa. Ke ke nono ʼi he kiʼi temi, ʼo kaku ki te ʼosi ʼo toku hauhau.” (Esa. 26:20) Lolotoga te temi ʼaia, ko te ʼu kaugana agatonu fuli ʼa te ʼAtua ʼi te kele mo te lagi, ʼe puipui anai natou. Ohage ko tona ui e te apositolo ko Paulo, ʼe tou tui papau ʼe mole “ko te ʼu puleʼaga, peʼe ko te ʼu meʼa ʼo te temi ʼaeni, peʼe ko te ʼu meʼa ka hoko mai . . . ʼe feala anai ke ina fakamavae tatou mai te ʼofa ʼo te ʼAtua.” (Loma 8:38, 39) ʼAua naʼa galo kia koe, ʼe ʼofa ia Sehova ia koe pea ʼe mole feala ʼi he temi ke ina liakī koe!