ʼE TOU loto fuli ke ui e te hahaʼi ʼe tou agalelei. Kae ʼe mole faigafua te fakaha ʼo te agalelei ʼi te malama ʼaeni. Tokolahi te hahaʼi ʼe natou “fehihiʼa ki te lelei.” (2 Tim. 3:3) ʼE natou liʼaki te ʼu lekula ʼa te ʼAtua. Koia ʼe “natou fakahigoa te kovi ko te lelei, pea mo te lelei ko te kovi.” (Esa. 5:20) Pea tahi, ʼe faigataʼa te fai ʼo te lelei ʼuhi ko tatatou faʼahiga maʼuli ʼafeā pea mo totatou ʼuhiga tagata agahala. ʼE feala pe ke tou manatu ohage ko Ana. * Logo la kua fualoa tana tauhi kia Sehova, kae ʼe ina ui fenei: “ ʼE hage kia au, ʼe mole ko au ko he tahi ʼe agalelei.”

Kae meʼa lelei, he ʼe feala kia tatou fuli ke tou liliu ko he tahi ʼe agalelei age. Ko te agalelei ʼe ko he kalitate ʼe maʼu mai te laumalie maʼoniʼoni ʼo te ʼAtua. Pea ʼe malohi ʼaupito tona laumalie, koia ʼe mole feala ki he tahi ke ina taʼofi te gaue ʼa te laumalie maʼoniʼoni ʼae kia tatou. Tou vakaʼi pe ʼe kotea te agalelei, pea mo vakaʼi pe ʼe tou lava liliu feafeaʼi ko he tahi ʼe agalelei age.

Ko he tahi ʼe agalelei ʼe ko he tahi ʼe ina fai he ʼu gaue ʼe lelei. ʼE ko he tahi ʼe lelei tona maʼuli pea mo tana aga, pea ʼe mole ko he tahi ʼe agakovi peʼe agakaka. ʼE fiafia te hahaʼi moka natou tokagaʼi ʼe tou agalelei kia natou. Ko he tahi ʼe agalelei ʼe ina fai he ʼu gaue ʼe ʼaoga.

Neʼe lagi kotou sisio ki ni hahaʼi ʼe natou fai ni ʼu gaue ʼe lelei ki ʼonatou famili pea mo ʼonatou kaumeʼa, kae ʼe mole fakaʼuhiga leva ʼe natou agalelei. ʼE mahino ia ʼe mole feala ke tou agalelei ʼi te temi fuli pe, he ʼe ui ʼi te Tohi-Tapu “e mole mau i te kele he tagata agatonu e tahi ae e ina fai te lelei pea e mole agahala i he aho.” (Ekl. 7:20) Neʼe ui fakahagatonu fenei e te apositolo ko Paulo: “ ʼE au iloʼi ʼe mole he meʼa ʼe lelei ʼe nofo ia au, ʼi toku kakano, he ʼe au fia fai te meʼa ʼae ʼe lelei kae ʼe mole feala ke au fai te faʼahi ʼaia.” (Loma 7:18) Koia kapau ʼe tou fia liliu ko he tahi ʼe agalelei age, ʼe tonu ke tou haga kia Sehova, ia te Matapuna ʼo te agalelei.

Ko Sehova ʼAtua ʼae ʼe ina fakaha mai pe ʼe kotea te lelei. ʼE ui fenei ʼi te Tohi-Tapu ʼo ʼuhiga mo Sehova: “E ke agalelei pea e ke fai te u mea lelei; ako mai kia au au fakatuutuu!” (Pes. 119:68) Tou fakamahino muʼa te agalelei ʼa Sehova ʼae ʼe palalau ki ai te vaega ʼaeni.

Ko Sehova ʼe agalelei. ʼE mole feala ʼi he temi ke agakovi ia Sehova. Kotou tokagaʼi pe ʼe kotea ʼae neʼe hoko ʼi te temi ʼae neʼe palalau ai ia Sehova kia Moisese ʼo ina ui fenei: “E au haele anai i ou mua.” ʼI te temi ʼae neʼe fakaha ai e Sehova tona kololia kia Moisese, neʼe logo ia Moisese ki he leʼo ʼe ui fenei ʼo ʼuhiga mo Sehova: “Sehova, Sehova, Atua manavaofa mo lotoofa, mo kataki fualoa, mo mau koloa i te agalelei mo te agatonu, ae e ina taupau tona ofa o kaku ki te u taitupu e afe, ae e ina fakamolemole te agakovi, mo te logogataa, pea mo te agahala, kae e mole ina tukunoa ae e agahala.” (Eke. 33:19; 34:6, 7) ʼE tou mahino ai, ko meʼa fuli ʼe fai e Sehova, ʼe ha ai tana agalelei. ʼI te ʼu tagata fuli, neʼe ko Sesu tokotahi pe ʼae neʼe agalelei ʼaupito. Kae logo la te faʼahi ʼaia neʼe ina ui fenei: “Ko te tokotahi pe ʼe agalelei, ʼe ko te ʼAtua.”—Luka 18:19.

Ko te ʼu gaue ʼa Sehova ʼe lelei. ʼE ha lelei te agalelei ʼa te ʼAtua ʼi te ʼu gaue fuli ʼae ʼe ina fai. “E agalelei ia Sehova ki te u tagata fuli, pea e mafola tona  manavaofa ki ana gaueaga fuli.” (Pes. 145:9) Ko Sehova ʼe agalelei, pea ʼe mole feala ia ke fakapalatahi, koia ʼe ina foaki ai ki te hahaʼi fuli ia te ʼu meʼa ʼae ʼe ʼaoga ki ʼonatou maʼuli. (Gaue 14:17) ʼE ina toe fakaha tana agalelei ʼi tana fakamolemole ʼatatou agahala. Neʼe tohi fenei e te tagata faipesalemo: “Aliki, koteuhi e ke agalelei, e ke fakamolemole.” (Pes. 86:5) Koia ʼe tou tui papau ai ko Sehova “e mole ina fakafisi he mea lelei kia natou ae e haele i te mooni.”—Pes. 84:12.

Neʼe fakatupu tatou ki te pāki ʼo te ʼAtua, koia ʼe feala ai ke tou liliu ʼo agalelei pea mo fai te meʼa ʼae ʼe lelei. (Sen. 1:27) Kae ʼe toe ui ʼi te Tohi-Tapu, ʼe tonu ki te ʼu kaugana ʼa te ʼAtua ke natou “ako ki te fai o te mea ae e lelei.” (Esa. 1:17) Kae ʼe feafeaʼi hatatou ako ke tou fai ia te meʼa ʼae ʼe lelei? Tou vakaʼi he ʼu faʼahiga fai ʼe tolu.

ʼUluaki, ʼe tonu ke tou kole ki te ʼAtua tona laumalie maʼoniʼoni, ʼae ʼe feala ke tokoni ki te kau Kilisitiano takitokotahi, ke ina maʼu ia te agalelei moʼoni. (Kal. 5:22) ʼEi, ʼaki te laumalie ʼo te ʼAtua ʼe feala ai ke tou ʼoʼofa ki te meʼa ʼae ʼe lelei kae ke tou liʼaki te ʼu meʼa ʼae ʼe kovi. (Loma 12:9) ʼE ui ʼi te Tohi-Tapu, ko Sehova ʼae ʼe ina fakafealagia ke tou “fai tuʼumaʼu te ʼu gaue pea mo te ʼu palalau ʼae ʼe lelei.”—2 Tes. 2:16, 17.

Lua, ʼe tonu ke tou lau ia te Folafola ʼa te ʼAtua. Ka tou fai te faʼahi ʼaia, ʼe akoʼi ai tatou e Sehova ʼi “te u ala fuli ae e ina taki ki te lelei,” pea mo ina teuteuʼi tatou ke tou “fai te ʼu gaue lelei fuli.” (Taag. 2:9; 2 Tim. 3:17) ʼE feala ke tou fakatatau totatou loto ki he puha ʼe tanaki ai te ʼu koloa maʼuhiga. Ka tou lau ia te Tohi-Tapu pea mo metitasio ki ai, ʼe hage pe ʼe tou tanaki he ʼu koloa maʼuhiga ʼi totatou loto, pea ʼe toe ʼaoga anai kia tatou ki ʼamuli.—Luka 6:45; Efe. 5:9.

Tolu, tou faiga fakamalotoloto ke tou “faʼifaʼitakiʼi te meʼa ʼae ʼe lelei.” (3 Soa. 11) ʼE lahi te ʼu faʼifaʼitakiʼaga lelei ʼe tou maʼu ʼi te Tohi-Tapu. Kae ko te ʼu faʼifaʼitakiʼaga ʼae ʼe lelei tukupau, ʼe ko Sehova pea mo Sesu. ʼE toe feala pe ke tou faʼifaʼitakiʼi ia natou ʼae ʼe tou iloʼi ʼe natou agalelei. Ohage la ko Tapita pea mo Palenapa. (Gaue 9:36; 11:22-24) ʼE feala ke tou maʼu he ʼu ako mai te ʼu fakamatala ʼaia pea mo tokagaʼi pe neʼe feafeaʼi tanā tokoni ki te hahaʼi. Tou fakakaukauʼi pe ʼe feafeaʼi hatatou tokoni ki totatou famili peʼe ko natou ʼo te kokelekasio. Pea mo tou tokagaʼi pe ʼe kotea te ʼu lelei neʼe nā maʼu ʼuhi ko tanā agalelei ki te hahaʼi. ʼE feala mo tatou ke tou maʼu he ʼu lelei.

ʼE toe feala pe ke tou fakakaukauʼi he ʼu faʼifaʼitakiʼaga lelei ʼo totatou temi. Ohage la, kotou tokagaʼi te kau tagata ʼafeā ʼo te kokelekasio ʼe natou gaue kinakina ʼuhi ko tanatou “ ʼofa ki te meʼa ʼae ʼe lelei.” Kotou tokagaʼi mo te ʼu tuagaʼane agatonu ʼae ʼe “natou  akoʼi te meʼa ʼae ʼe lelei” ʼaki ʼanatou palalau pea mo ʼanatou gaue. (Tito 1:8; 2:3) ʼE fakamatala fenei e te tuagaʼane ʼe higoa ko Roslyn: “Neʼe faiga e toku kaumeʼa ke tokoni pea mo fakalotomalohiʼi natou ʼo te kokelekasio. Neʼe ina fakakaukauʼi te aluʼaga ʼo ʼonatou maʼuli pea mo tokoni kia natou. Neʼe au tokagaʼi neʼe ko he tahi ʼe agalelei moʼoni.”

Neʼe fakalotomalohiʼi e Sehova tana hahaʼi ke natou “kumi te lelei.” (Amo. 5:14) ʼE mole tonu pe ke tou ʼoʼofa ki ʼana lao, kae ʼe tonu foki ke tou loto moʼoni ke tou fai ia te lelei.

ʼE mole tonu ke tou manatu, kapau ʼe tou fia fai ia te lelei ʼe tonu anai ke tou fai he ʼu tuʼuga sakilifisio. Tou toʼo he faʼifaʼitaki: Ka fia tui fakailoga e he tahi he pāki matalelei, ʼe mole ina fai anai ʼi he hola pe ʼe tahi, kae ʼe ʼaoga anai ki ai he ʼu faiga mo he temi loaloaga. Pea tahi, ʼe ina toe fakaʼaogaʼi mo he ʼu sua ʼe lanu kehekehe. ʼO toe feia pe, kapau ʼe tou fia fakaha ko tatou ko ni hahaʼi agalelei, ʼe mole maʼua leva ke tou fai he ʼu toe gaue ke feafeaʼi, kae ke tou fai pe ni ʼu kiʼi gaue lelei kehekehe.

ʼE uga tatou ʼi te Tohi-Tapu ke tou “tokalelei” pea mo “nofo teuteu” ke tou fai ni gaue lelei maʼa te hahaʼi. (2 Tim. 2:21; Tito 3:1) Kapau ʼe tou tokagaʼi he aluʼaga ʼe hoko ki he tahi pe ʼo te kokelekasio, ʼe feala anai ke tou mahino pea mo fai “te meʼa ʼae ʼe ina leleiʼia ke fua lelei kia ia.” (Loma 15:2) Ohage la ʼe feala ke tou foaki age ki ai he meʼa ʼofa. (Taag. 3:27) ʼE feala pe ke tou fakaafe ia ia ke tou kai meʼa kai fakatahi peʼe ke tou faipalalau mo ia mo fakalotomalohiʼi ia ia. Kapau ʼe tou logo ʼe ʼi ai he tehina peʼe ko he tuagaʼane ʼe mahaki, ʼe feala pe ke tou faitohi age ki ai, peʼe ke tou olo ʼo fakasiosio ia ia, peʼe ke tou telefoni ki ai. Tou toʼo ia te ʼu faigamalie fuli ke tou fai ai “he palalau pe ʼe ina fakalotomalohiʼi ʼihi moka ʼe ʼaoga, ke fua lelei ai kia natou ʼae ʼe logo.”—Efe. 4:29.

ʼE tonu ke tou hage ko Sehova, ke tou agalelei ki te hahaʼi fuli. Koia ʼe mole tonu ai ke tou fakapalatahi, tafito la moka tou fakamafola ia te logo lelei ʼo te Puleʼaga. Neʼe fakatotonu mai e Sesu ke tou agalelei ki te hahaʼi fuli, maʼia mo natou ʼae ʼe natou fehihiʼa ia tatou. (Luka 6:27) ʼE tonu ke tou agalelei tuʼumaʼu ki te hahaʼi he ʼe “mole he lao ʼe fakafeagai ki te ʼu faʼahi ʼaia.” (Kal. 5:22, 23) Kapau ʼe tou agalelei, maʼia moka fakatagaʼi tatou peʼe tou tau mo ni mamahi, ʼe feala pe ke fakatupu ʼi he tahi age tana fia haʼu ki te moʼoni pea mo fakakololiaʼi ia te ʼAtua.—1 Pet. 3:16, 17.

“Ko te tagata ʼae ʼe agalelei ʼe fakapale anai ia ia ʼuhi ko tana aga.” (Taag. 14:14, MN) ʼE fakapale feafeaʼi anai ia ia? Ka tou agalelei ki te hahaʼi ʼe feala pe ke natou toe agalelei mai. (Taag. 14:22) Kae tatau aipe pe ʼe mole natou agalelei mai, kapau ʼe tou toe hoko atu pe tatatou agalelei kia natou, ʼe feala pe, ʼaki te alu ʼo te temi, ke malū ifo tonatou ita pea mo natou liliu ʼo agalelei.—Loma 12:20, nota.

Tokolahi te ʼu tehina mo tuagaʼane ʼe natou fakamoʼoni neʼe natou maʼu he ʼu fua lelei ʼuhi ko tanatou tuku te fai ʼo te ʼu aga ʼae ʼe kovi, kae natou fai ia te lelei. Kotou tokagaʼi te aluʼaga ʼae neʼe hoko kia Nancy. Neʼe ina ui fenei: “ ʼI taku lahilahi ake neʼe mole au aga fakapotopoto, pea neʼe mole au aga fakaʼapaʼapa, neʼe au fai he ʼu aga heʼe ʼaoga. Kae ʼi te temi leva ʼae neʼe au ako ai ia te Tohi-Tapu pea mo maʼuliʼi ʼana lao, neʼe au kamata logoʼi ai toku fiafia. ʼI te temi leva ʼaeni, kua au fiafia ʼo ʼuhiga mo au.”

ʼE tou fia agalelei ki te hahaʼi he ʼe tou iloʼi ʼe tou fakafiafiaʼi ai te loto ʼo Sehova. Tatau aipe pe ʼe mole kaugā malie ia natou ʼae ʼe natou sisio ki te ʼu gaue lelei ʼae ʼe tou fai, kae ʼe iloʼi e Sehova. ʼE ina tokagaʼi ia te ʼu gaue lelei fuli ʼae ʼe tou fai pea mo ʼatatou manatu lelei. (Efe. 6:7, 8) Pea ʼe ina fakapale feafeaʼi ia tatou? “ ʼE leleiʼia e Sehova ia te tagata ʼae ʼe agalelei.” (Taag. 12:2, MN) Koia tou faiga ke tou agalelei tuʼumaʼu. Neʼe fakapapau e Sehova “ko natou fuli ʼae ʼe natou fai te ʼu gaue ʼae ʼe lelei, ʼe natou maʼu anai te kololia mo te fakaʼapaʼapa pea mo te tokalelei.”—Loma 2:10.