1. Kotea te tahi kalitate fakalotofimalie ʼo te agaaga ʼo Sesu? Fakamahino.

KO TE tahi kalitate fakalotofimalie ʼo te agaaga ʼo Sesu ko tana lotomahino ʼae moka tou tau mo he ʼu fihifihia ʼuhi ko totatou ʼuhiga agahala. ʼI te temi ʼae neʼe nofo ai ʼi te kele, neʼe feala kia Sesu ke “fakafiafia mo natou ʼae ʼe fakafiafia” pea mo “fetagihi mo natou ʼae ʼe fetagihi.” (Loma 12:15) Ohage la, neʼe liliu fiafia mai te toko 70 tisipulo ʼi tanatou faifakamafola ʼae neʼe fua lelei ʼaupito, pea neʼe ‘fiafia lahi ai ia Sesu ʼo fonu ʼi te laumalie maʼoniʼoni.ʼ (Luka 10:17-21) Kae ʼi te mate ʼo Lasalo, neʼe lotomamahi te hahaʼi. Pea ʼi te sio ʼa Sesu ki te faʼahi ʼaia, “neʼe lotomamahi ʼaupito mo lotohoha.”—Soa. 11:33.

2. Kotea ʼae neʼe tokoni kia Sesu ke ina fakaha tana lotomanavaʼofa ki te hahaʼi?

² Logo la ko Sesu neʼe ko he tagata haohaoa, kae neʼe lotomanavaʼofa ki te hahaʼi agahala. Kotea ʼae neʼe tokoni ki ai? Neʼe ko te ʼofa ʼo Sesu ki te hahaʼi. Ohage pe ko tatatou vakaʼi ʼi te alatike ʼae kua hili, neʼe ina maʼu tona “fiafiaaga i te lotolotoga o te u foha o te tagata.” (Taag. 8:31) ʼAki te ʼofa ʼae neʼe ina maʼu ki te hahaʼi, neʼe fakafealagia ai ke ina iloʼi lelei te faʼahiga manatu ʼa te hahaʼi. ʼE fakamahino fenei e te apositolo ko Soane: “Neʼe ina iloʼi te loto ʼo te tagata.” (Soa. 2:25) Neʼe ʼofa mamahi ia Sesu ki te hahaʼi. Pea neʼe natou logoʼi tona ʼofa ʼo natou tali leleiʼi te logo ʼo te Puleʼaga. ʼE toe feia pe mo tatou, kapau ʼe tou lotomahino ki te hahaʼi, ʼe fua lelei anai ki tatatou gaue faifakamafola.—2 Tim. 4:5.

3-4. (1) Kotea ʼae ʼe tou logoʼi moka tou gaue faifakamafola? (2) Kotea ʼae ka tou vakaʼi anai ʼi te alatike ʼaeni?

³ Neʼe iloʼi e te apositolo ko Paulo ʼe ko tona maʼua ke faifakamafola, pea ʼe toe feia pe mo tatou. (1 Ko. 9:16) Koia, ka tou kaugā mamahi mo te hahaʼi pea ʼe tokoni mai anai ke tou faifakamafola,  mole ʼuhi ko totatou maʼua pe kae ʼuhi he ʼe tou ʼoʼofa mo fia tokoni ki te hahaʼi. Pea ʼe tou mahino ai, “ ʼe lahi age te fiafia moka kita foaki, ʼi takita tali.” (Gaue 20:35) Moka ʼe tou faifakamafola ki te hahaʼi ʼe tou fakaha ai ʼe tou ʼoʼofa ia natou pea ʼe tou fiafia anai moka tou gaue malohi ʼi te faifakamafola.

⁴ ʼI te alatike ʼaeni, ʼe tou ako anai pe ʼe feafeaʼi hatatou lotomahino ʼi tatatou gaue faifakamafola. ʼUluaki, ʼe tou vakaʼi anai pe ʼe kotea te ako ʼe tou maʼu mai ia Sesu ʼi te ʼu meʼa ʼae neʼe ina logoʼi ʼo ʼuhiga mo te hahaʼi. Pea ʼe tou toe ako anai te ʼu aluʼaga ʼe fa ke tou faʼifaʼitakiʼi ai ia Sesu.—1 Pet. 2:21.

5-6. (1) Neʼe lotomahino koa ia Sesu kia ai? (2)  He koʼe neʼe ʼofa mamahi ia Sesu ki te hahaʼi ʼae neʼe faifakamafola ki ai, ohage ko tona fakakikite ia Esaia 61:1, 2?

⁵ ʼE tou vakaʼi anai he faʼifaʼitaki neʼe iloga ai te lotomahino ʼa Sesu. ʼI te tahi ʼaho, ko Sesu mo ʼana tisipulo neʼe natou gaʼegagaʼe koteʼuhi neʼe natou faifakamafola hoholo, kae neʼe mole maʼu honatou temi malolo. Neʼe mole natou maʼu pe la “he temi ke natou kakai ai.” Koia, neʼe ʼave e Sesu ʼana tisipulo “ki he koga meʼa lavaki ke natou ʼateaina ai” pea ke natou “malolo ai.” Pea neʼe ʼi ai te tokolahi neʼe feleleʼi age kia Sesu mo ʼana tisipulo ʼi muʼa ʼo tanatou kaku ki te koga meʼa ʼae neʼe tonu ke natou olo ki ai. ʼI te tau atu ʼa Sesu pea sio ki te hahaʼi, kotea ʼae neʼe ina logoʼi? Neʼe “ ʼofa mamahi * kia natou, koteʼuhi neʼe natou hage ko he ʼu ovi ʼe mole honatou tauhi ovi. Pea neʼe lahi te ʼu meʼa neʼe ina kamata akoʼi age kia natou.”—Mko. 6:30-34.

⁶ Kotou fakatokagaʼi pe koʼe neʼe ʼofa mamahi ia Sesu ki te hahaʼi. Neʼe ina tokagaʼi ko te hahaʼi “neʼe natou hage ko he ʼu ovi ʼe mole honatou tauhi ovi.” Neʼe lagi sio ia Sesu ko ʼihi ia natou neʼe masisiva pea mo gaue kinakina moʼo taupau ʼonatou famili. Pea lagi ko ʼihi neʼe kua mate he tahi neʼe natou ʼoʼofa mamahi ai.  Koia, neʼe lagi feala ke lotomahino ia Sesu ki ʼonatou aluʼaga. Ohage pe ko tatatou vakaʼi ʼi te alatike ʼae kua hili, neʼe lagi tau ia Sesu mo te ʼu fihifihia ʼaia. Neʼe lotomahino ia Sesu ki te hahaʼi, koia neʼe ina fia foaki ai he logo ʼe fakalotofimalieʼi ai natou.—Lau ia Esaia 61:1, 2.

7. ʼE tou muliʼi feafeaʼi te faʼifaʼitaki ʼo Sesu?

⁷ Kotea ʼae ʼe tou ako mai te faʼifaʼitaki ʼa Sesu? Ohage ko Sesu, ʼe tou sisio ki te hahaʼi ʼe natou hage “ko he ʼu ovi ʼe mole honatou tauhi ovi.” ʼE lahi ʼonatou fihifihia ʼae ʼe tonu ke fakatokatoka. ʼE tou maʼu ia te meʼa ʼae ʼe ʼaoga kia natou, ʼe ko te logo ʼo te Puleʼaga. (Fkha. 14:6) Koia, ʼo mulimuli ki te faʼifaʼitaki ʼo totatou Pule, ʼe tou fakamafola te logo lelei koteʼuhi ʼe tou ʼoʼofa ki “ ʼae ʼe veliveli pea mo ʼae ʼe masiva.” (Pes. 72:13, MN) ʼE tou ʼoʼofa mamahi ki te hahaʼi, pea ʼe tou fia fai ia meʼa fuli ke tou tokoni ai kia natou.

8. ʼE feafeaʼi hatatou fakaha ʼe tou lotomahino ʼi te faifakamafola? Tuku mai he faʼifaʼitaki.

⁸ Kotea ʼae ʼe feala ke tokoni mai ke tou fakaha ʼe tou lotomahino ai kia natou ʼae ʼe tou faifakamafola ki ai? ʼE tou fia hage pe ko natou ʼae ʼe tou faifakamafola ki ai, koia tou fai ki te hahaʼi ia meʼa fuli ʼe tou leleiʼia ke fai mai kia tatou. * (Mat. 7:12) Tou vakaʼi aluʼaga ʼe fa, ʼe tonu ke tou fai. ʼUluaki, tou tokagaʼi te ʼu meʼa ʼae ʼe ʼaoga ki te takitokotahi. Ko te fakamafola ʼo te logo lelei ʼe tatau mo te gaue ʼa he toketa. Ko he toketa lelei ʼe ina tokagaʼi te ʼu meʼa ʼae ʼe ʼaoga ki te mahaki takitokotahi. ʼE ina fai te ʼu fehuʼi pea fakalogo lelei ki te ʼu fakamahino ʼae ʼe tala age e te mahaki ʼo ʼuhiga mo ia. ʼE mole ina tohi anai te ʼu faitoʼo ʼae ʼe manatu ki ai, kae ʼe ina tuku anai he temi ke ina sivisivi ai te ʼu fakailoga ʼo te mahaki pea hoki ina foaki leva te ʼu faitoʼo ʼae ʼe tau mo ia. ʼE toe feia pe mo tatou, ʼe mole tou fakaʼaogaʼi anai he faʼahiga gaue pe ʼe tahi kia natou ʼae ʼe tou faifakamafola ki ai. Kae ʼe tou tokagaʼi anai te ʼu aluʼaga pea mo te ʼu faʼahiga manatu ʼa te takitokotahi.

9. Kotea ʼae ʼe mole tonu ke tou fai? Fakamahino.

⁹ Ka kotou felaveʼi mo he tahi ʼi te faifakamafola, ʼaua naʼa kotou ui leva kua kotou iloʼi ia ia pea mo ʼana faʼahiga manatu peʼe ko te ʼu meʼa ʼae ʼe tui ki ai pea kotea te tupuʼaga ʼo tana tui ki ai. (Taag. 18:13) Kae, ke kotou fai he ʼu fehuʼi ʼaki he aga fakaʼeteʼete. (Taag. 20:5) Kapau ʼe mahino lelei ki takotou agaʼi fenua, kotou fai he ʼu fehuʼi ʼo ʼuhiga mo tana gaue, tona famili, te ʼu aluʼaga ʼo tona maʼuli pea mo ʼana faʼahiga manatu. Ka tou fai he ʼu fehuʼi, ʼe tou fakafealagia kia natou ke natou fakaha mai pe koʼe ʼe ʼaoga kia natou te logo lelei. ʼI tatatou kua mahino ki te faʼahi ʼaia, kua feala leva ke tou fakaha kia natou te ʼu meʼa ʼae ʼe natou logoʼi pea mo foaki age te ʼu meʼa ʼae ʼe  ʼaoga kia natou ohage pe ko tona fai e Sesu.—Vakaʼi ia 1 Kolonito 9:19-23.

10-11. Ka tou lau ia 2 Kolonito 4:7, 8, kotea te lua aluʼaga ʼae ʼe tou fakaha ai ʼe tou lotomahino ki te hahaʼi? Tuku mai he faʼifaʼitaki.

¹⁰ Lua, fakakaukauʼi age muʼa pe ʼe feafeaʼi tonatou maʼuli. ʼE feala pe ke tou mahino ki tonatou aluʼaga. Tafito la, ʼe tou agahala fuli, pea ʼe tou tau fuli mo te ʼu fihifihia. (1 Ko. 10:13) ʼE tou iloʼi ko te maʼuli ʼi te malama ʼaeni ʼe feala ke faigataʼa ʼaupito. ʼE tou katakiʼi ʼaki pe te tokoni ʼa Sehova. (Lau ia 2 Kolonito 4:7, 8.) Tou manatuʼi ia natou ʼae ʼe maʼuli mamahi ʼi te malama ʼaeni, he ʼe mole natou iloʼi ia Sehova. Ohage pe ko Sesu, ʼe tou ʼoʼofa mamahi kia natou pea ʼe tou fia foaki kia natou “te ʼu logo lelei ʼo he meʼa ʼe lelei age.”—Esa. 52:7.

¹¹ Tou vakaʼi te faʼifaʼitaki ʼo te tehina ko Sergey. Ia muʼa ʼo tana ako te moʼoni, neʼe umiuminoa ia Sergey. Neʼe faigataʼa tana faipalalau ki te hahaʼi. ʼAki te temi, neʼe ina tali leva ke fai hana ako Tohi-Tapu. Neʼe ui fenei e Sergey: “ ʼI taku ako te Tohi-Tapu, neʼe au iloʼi ai ko te kau Kilisitiano ʼe maʼua ke natou vaevae tanatou tui mo te hahaʼi. Neʼe au tui papau, ʼe mole feala anai haku fai te faʼahi ʼaia.” Kae, neʼe ina manatuʼi ia natou ʼae neʼe heʼeki logo ki te moʼoni pea neʼe ina logoʼi te maʼuli fakaʼofaʼofa ʼo te hahaʼi ʼae ʼe mole heʼeki natou iloʼi ia Sehova. Pea neʼe toe ui e Sergey: “ ʼAki te ʼu lelei ʼae neʼe au ako, neʼe au maʼu ai he toe fiafia lahi mo he loto ʼe tokalelei. Pea neʼe au iloʼi ʼe tonu ke ako e te hahaʼi te ʼu moʼoni ʼaia.” Koia, neʼe ʼekenaki ai ia ia ke lototoʼa ke alu ʼo faifakamafola. Neʼe toe ui fenei e Sergey: “Neʼe au fiafia lahi, koteʼuhi kua au lotomalohi ʼi te faipalalau ki te hahaʼi ʼo ʼuhiga mo te Tohi-tapu. Pea neʼe au toe lotomalohi ʼuhi ko te ʼu moʼoni foʼou ʼae neʼe au ako ʼi te Tohi-tapu.” *

12-13. He koʼe ʼe tonu ke tou faʼa kataki mo natou ʼae ʼe ako mo tatou? Tuku mai he faʼifaʼitaki.

¹² Tolu, kotou faʼa kataki mo natou ʼae ʼe  kotou ako. Kotou manatuʼi, neʼe mole heʼeki natou mahino ki te ʼu moʼoni Fakatohi-tapu ʼae kua kotou iloʼi lelei. Tokolahi ia natou ʼe natou pipiki malohi ki te ʼu meʼa ʼae ʼe natou lolotoga tui ki ai. Kia natou, ko te lotu ʼe pipiki tahi mo te ʼu famili pea mo ʼanatou agaʼi fenua. ʼE feafeaʼi hatatou tokoni kia natou?

¹³ Kotou manatuʼi te faʼifaʼitaki ʼaeni: Kotea ʼae ʼe feala ke hoko moka ʼe tonu ke fetogi he ʼaleso ʼafeā kua maumau? ʼI te agamahani ʼe faʼu te ʼaleso foʼou kae kei fakaʼaogaʼi pe te ʼaleso ʼafeā. ʼI te kua ʼosi ʼo te ʼaleso foʼou ʼaia, ʼe maumauʼi leva te ʼaleso ʼafeā. ʼE toe feia pe, ʼi muʼa ʼo te fetogi e te hahaʼi te ʼu akonaki ʼae neʼe natou tui ki ai mo pipiki ki ai, ʼe tonu ke tou tokoni muʼa kia natou ke natou ʼoʼofa ki te ʼu moʼoni “foʼou,” ko tona fakaʼuhiga ko te ʼu akonaki Fakatohi-tapu ʼae ʼe mole heʼeki natou mahani ki ai. Hili ia, pea hoki feala leva tanatou liʼaki te ʼu akonaki ʼafeā. ʼE feala pe ke fualoa tatatou tokoni ki te hahaʼi ke natou fai he ʼu fetogi.—Loma 12:2.

14-15. ʼE feafeaʼi hatatou tokoni kia natou ʼae ʼe mole natou iloʼi te ʼamanaki ki te maʼuli heʼe gata ʼi te palatiso fakakelekele? Tuku mai he faʼifaʼitaki.

¹⁴ Ka tou faʼa kataki ki te hahaʼi ʼi te faifakamafola, ʼe mole tou ʼamanaki anai ʼe natou tali atu aipe ia te ʼu moʼoni Fakatohi-tapu ʼi tanatou ʼuluaki fakalogo mai. Kapau ʼe tou lotomahino, ʼe tou fia toʼo anai he temi ke tou tokoni kia natou ke natou mahino ki te Tohi-Tapu. Ohage la, tou vakaʼi pe ʼe feafeaʼi hatatou fakamahino ki he tahi te ʼamanaki ʼae ki te maʼuli heʼe gata ʼi he palatiso fakakelekele. Tokolahi ʼe mole natou iloʼi te akonaki ʼaia. ʼE natou ui ko te mate ʼe ko te fakaʼosiʼaga pe ʼaia ʼo meʼa fuli. Pea ʼe natou manatu leva ko te hahaʼi agalelei ʼe olo ki te palatiso. ʼE feafeaʼi anai hatatou tokoni kia natou?

¹⁵ ʼE fakamatala e te tehina pe neʼe feafeaʼi tana kamata fai he faipalalau mo he tahi. ʼUluaki, neʼe ina lau ia Senesi 1:28. Hili ia pea neʼe ina fehuʼi ki te pule famili pe neʼe loto e te ʼAtua ke maʼuli ʼifea te tagata pea neʼe tonu ke feafeaʼi tona maʼuli. Tokolahi te hahaʼi ʼe natou tali fenei: “ ʼI te kele, ʼi he palatiso.” Pea neʼe lau leva e te tehina ia Esaia 55:11 pea neʼe ina fehuʼi age leva pe ʼe kua fetogi la te fakatuʼutuʼu ʼaia ʼa te ʼAtua. ʼI te agamahani ʼe tali fenei e te hahaʼi: “Kailoa.” Neʼe toe lau leva e te tehina ia Pesalemo 37:10, 11 pea neʼe ina fehuʼi pe kotea anai te ka haʼu ʼo te tagata. ʼI tana vakaʼi te ʼu vaega ʼaia, neʼe tokoni te tehina ki ʼihi ke natou mahino ʼe loto tuʼumaʼu e te ʼAtua ke maʼuli te hahaʼi agalelei ʼo heʼe gata ʼi te Palatiso ʼi te kele.

16-17. Ka tou manatuʼi ia Taaga Lea 3:27, ʼe feafeaʼi hatatou tokoni ki ʼihi? Tuku mai he ʼu faʼifaʼitaki.

¹⁶ Fa, kotou fakakaukauʼi age muʼa pe ʼe feafeaʼi hakotou mahino ki te meʼa ʼae ʼe logoʼi e te hahaʼi ʼi ʼonatou loto. Ohage la, neʼe tou fakamafola koa ki he tahi neʼe maʼumaʼua?  Kapau ko ia ʼe feala pe hatatou fakalelei age mo fakalavelave age pe ʼe feala la ke tou toe liliu mai ʼi he tahi temi. Kapau neʼe tou maʼu he tahi ʼe lolotoga gaue ʼi tona ʼapi, ʼe ʼaoga koa ki ai he tokoni? Kapau neʼe kotou maʼu he tahi ʼi tona ʼapi ʼe mahaki peʼe kua vaivai matuʼa, ʼe ʼaoga koa ki ai ke fai hana ʼu fakatau peʼe ko he tahi age pe faʼahiga gaue? ʼI te ʼu aluʼaga ʼaia, ʼe lagi feala ai leva ke tou tokoni ki he tahi.—Lau ia Taaga Lea 3:27.

¹⁷ Neʼe maʼu e te kiʼi tuagaʼane te ʼu fua lelei hili tana fai he gaue ʼe lelei neʼe mole faʼa maʼuhiga. Neʼe ʼofa ki he famili neʼe mate tanatou kiʼi fanau pea neʼe faitohi kia natou. ʼI te tohi ʼaia, neʼe ina tohi ai te ʼu vaega Tohi-Tapu fakalotomalohi. Kotea ʼae neʼe logoʼi e te kiʼi famili ʼaia? Neʼe ui fenei e te faʼe: “Ko ʼanafi neʼe ko hoku ʼaho mamahi. Kae neʼe malave ʼaupito tau tohi kia matou. ʼE mole he kupu ʼe matou maʼu atu ke fai ʼaki he fakamalo ʼo ʼuhiga mo tau tohi fakalotomalohi. Neʼe au lau tuʼa 20 tau tohi ʼanafi. Neʼe mole au ʼamanaki ʼe ke agalelei feia anai pea mo tokagaʼi matou. Malo si’i ʼofa moʼoni.” ’E hoki feala ke tou ma’u he ’u fua lelei mo kapau ’e tou lotomahino kia natou ʼae ʼe mamahi pea mo tou tokoni kia natou.

18. Ka tou lau ia 1 Kolonito 3:6, 7, kotea ʼae ʼe mole tonu ke tou galoʼi?

¹⁸ ’E moʼoni ʼe tonu ke tou fakapotopoto ʼo ʼuhiga mo tatatou gaue faifakamafola. ʼE feala ke tou tokoni ki ʼihi ke natou iloʼi te ʼAtua, kae ʼe mole ko tatou ʼae ʼe tou fakahoko te gaue tafito. (Lau ia 1 Kolonito 3:6, 7.) Ko Sehova ʼae ʼe ina taki mai te hahaʼi. (Soa. 6:44) ʼE tali anai e te takitokotahi te logo lelei ʼo mulimuli pe ki tonatou loto. (Mat. 13:4-8) Kotou manatuʼi neʼe mole ko te hahaʼi fuli ʼae neʼe natou tali ia te logo ʼa Sesu, logo la ko ia te tagata Faiako lahi. ʼE mole tonu ke tou lotovaivai mo kapau ʼe mole tali e te tokolahi ia tatatou fia tokoni kia natou.

19. Kotea te ʼu lelei ʼe tou maʼu mo kapau ʼe tou lotomahino ʼi te faifakamafola?

¹⁹ ’E tou vaka’i anai he ’u fua lelei mo kapau ’e tou fakaha te lotomahino ’i te faifakamafola. ’E lahi anai tatatou lelei’ia te faifakamafola, koteʼuhi ʼe lahi anai te fiafia ʼae ʼe tou logoʼi ʼi tatatou foaki. Pea ʼe tou tokoni anai kia natou ʼae ʼe “lelei ʼonatou loto” ke natou tali leleiʼi te logo lelei. (Gaue 13:48) Koia “ ʼi te kei maʼu ʼo te temi faigamalie, tou fai te meʼa ʼae ʼe lelei ki te hahaʼi fuli.” (Kal. 6:10) ʼE tou fiafia anai ʼi tatatou fakakololiaʼi tatatou Tamai ʼae ʼe ʼi selo.—Mat. 5:16.