Kapau ʼe tou lau fakavilivili ia te fakamatala ʼaia, ʼe feala ke mole tou mahino lelei ki te aluʼaga ʼaia. ʼE talanoa ʼi te fakamatala ʼaeni, kia tagata ʼe toko lua ʼe nā higoa ko Mefiposete. Kae ʼe tou vakaʼi muʼa pe kotea te aluʼaga ʼae neʼe hoko pea kotea te ako ʼe feala ke tou maʼu mai ai.

Neʼe maʼu e Saulo ia te Hau ʼo Iselaele ni foha ʼe toko fitu pea ni ʼofafine ʼe toko lua. Ko tona ʼuluaki foha neʼe higoa ko Sonatane. Pea ki muli age, neʼe ina maʼu tona tahi foha pea mo Lisepa ʼe higoa ko Mefiposete. Kae neʼe maʼu e Sonatane ia tona foha neʼe higoa mo ia ko Mefiposete. Koia neʼe maʼu ai e te Hau ko Saulo ia tona foha pea mo tona mokopuna ʼe nā higoa toko lua ko Mefiposete.

ʼI te tahi ʼaho, neʼe ita ia te Hau ko Saulo ki te kau Kapaone ʼae neʼe maʼuʼuli fakatahi pea mo te kau Iselaele. Pea neʼe faiga ia ke ina matematehi ia natou. Pea neʼe ʼi ai ʼihi ia natou neʼe mamate. Kae neʼe mole tonu ke ina fai ia te faʼahi ʼaia. He kotea tona tupuʼaga? He ʼi te temi ʼo Sosue, neʼe fai e te kau matuʼa ʼo Iselaele ia he fuakava pea mo te kau Kapaone ki te tokalelei.​—Sos. 9:3-27.

Neʼe kei fakaʼapaʼapa ia te kau Iselaele ki te fuakava ʼaia ʼi te temi ʼo te Hau ko Saulo. Kae neʼe mole fakaʼapaʼapa ia Saulo ki te fuakava ʼaia. Pea neʼe faiga ia ke ina pulihi ia te kau Kapaone. Neʼe ko he ‘fakapo ʼaia ʼa Saulo pea mo tona famili.’ (2 Sam. 21:1) Ki muli age, neʼe ʼafio leva ia Tavite ʼo fetogi ia Saulo. ʼI te tahi ʼaho, ko te kau Kapaone ʼae neʼe hao mai te matea ʼaia, neʼe natou fakamatala kia Tavite ia te aluʼaga ʼae neʼe hoko. Pea neʼe fakalavelave age e Tavite kia natou pe kotea ʼae ʼe feala ke ina fai moʼo fakatokatoka ia te aluʼaga heʼe faitotonu ʼae neʼe fai e Saulo pea ke toe tapuakiʼi e Sehova ia te fenua. Neʼe mole kole age e te kau Kapaone ke ʼavage he foʼi falā kae neʼe natou kole age ke tuku age ia te ʼu foha ʼe toko fitu ʼo te tagata ʼae ‘neʼe ina fia pulihi ia natou’ pea ke natou matehi ia natou. (Num. 35:30, 31) Pea neʼe tali e Tavite ia tanatou kole.​—2 Sam. 21:2-6.

ʼI te temi ʼaia neʼe kua mate ia Saulo pea mo Sonatane. Neʼe nā mamate ʼi te tau kua hili ki ai ni taʼu. Kae neʼe kei maʼuli ia Mefiposete te foha ʼo Sonatane. Neʼe maʼimoa talu tana kei veliveli. Koia neʼe mole feala ke kau ʼi te tau ʼae neʼe fakatotonu e Saulo ke fai ki te kau Kapaone mai tona aluʼaga ʼae neʼe kei veliveli. Pea tahi, neʼe fai e Tavite ia he fuakava pea mo tona kaumeʼa ko Sonatane, ʼe ina puipui anai ia te hologa ʼo Sonatane. Koia neʼe maʼua kia Tavite ke ina puipui ia Mefiposete. (1 Sam. 18:1; 20:42) ʼE ui fenei ʼi te Tohi-Tapu: “Neʼe manavaʼofa ia te hau [ko Tavite] kia Mefiposete, te foha ʼo Sonatane, te foha ʼo Saulo, ʼuhi ko te fakapapau ʼae neʼe fai e Tavite mo Sonatane, te foha ʼo Saulo ia muʼa ʼo Sehova.”​—2 Sam. 21:7.

Neʼe tali e Tavite ia te kole ʼae neʼe fai e te kau Kapaone. Neʼe ina tuku age kia natou ia te ʼu foha ʼe toko lua ʼo Saulo pea neʼe higoa te tahi ko Mefiposete pea mo toe tuku age ia tona ʼu mokopuna ʼe toko nima. (2 Sam. 21:8, 9) Pea neʼe ina fakagata ai ia te malaʼia ʼae neʼe to ki te fenua.

ʼE maʼuhiga ia te fakamatala ʼaeni. Neʼe ui ʼi te Lao ʼa Sehova: “ ʼE mole tonu anai ke matehi ia te ʼu fanau ʼuhi ko te meʼa ʼae ʼe fai e ʼanatou tamai.” (Tet. 24:16) Neʼe mole tuku anai e Sehova ke matematehi ia te ʼu foha ʼe toko lua ʼa Saulo pea mo tona ʼu mokopuna mo kapau neʼe mole natou fai he meʼa ʼe kovi. Koia ʼe toe ui fenei ʼi te lao: “ ʼE matehi pe anai he tahi ʼuhi ko tana agahala.” Koia neʼe matehi ai ia te ʼu fanau mo te ʼu mokopuna ʼe toko fitu ʼo Saulo he neʼe natou lagolago ki te fakatuʼutuʼu ʼae ke pulihi ia te kau Kapaone. Koia neʼe mamate ai ia te ʼu tagata ʼaia ʼe toko fitu ʼuhi ko ʼanatou agahala.

Ko te tahi ako ʼe tou maʼu mai te fakamatala ʼaeni, ʼe mole feala ke tou fai he aga ʼe kovi pea mo tou ui neʼe tou fakalogo pe tatou ki te fakatotonu ʼae neʼe fai mai. ʼE ui fenei ia te taʼaga lea: “Fakatokalelei te ala ʼae ʼe ke haʼele ai, pea ʼe lelei anai ʼou ala fuli.”​—Taag. 4:24-27; Efe. 5:15.