1. Kotea ʼae neʼe fakaha e Sehova ʼo ʼuhiga mo ia kia Moisese? He koʼe ʼe maʼuhiga te faʼahi ʼaia?

ʼI TE tahi ʼaho, neʼe fakaha e te ʼAtua pe ko ai ia ia kia Moisese ʼaki tana tala age ia tona huafa pea mo ʼihi ʼo ʼona kalitate. Neʼe feala pe ke fakamaʼuhigaʼi e Sehova ia tona malohi peʼe ko tona poto, kaʼe neʼe ʼuluaki talanoa ia ki tona manavaʼofa pea mo tana agaʼofa. (Lau ia Ekesote 34:5-7.) Neʼe ʼaoga ke iloʼi e Moisese pe ʼe lagolago anai ia Sehova kia ia. Koia, neʼe fakamaʼuhigaʼi ai e Sehova ʼona kalitate ʼae ʼe ha ai ia tana fia tokoni moʼoni ki ʼana kaugana. (Ekesote 33:13) Kotea ʼe ke logoʼi ʼi tou loto, ʼi tau iloʼi ʼae ʼe tokaga moʼoni ia Sehova kia tatou? ʼE talanoa tafito anai ia te alatike ʼaeni ki te agaʼofa, ko tona fakaʼuhiga, ko tatatou lotomahino ki te ʼu mamahi ʼo niʼihi pea mo tatatou holi ʼae ke tou tokoni kia natou.

2, 3. (1) He koʼe ʼe mole tonu ke tou punamaʼuli ki te agaʼofa ʼa te hahaʼi? (2) He koʼe ʼe tonu ke tou vakaʼi pe kotea ʼae ʼe ui ʼi te Tohi-Tapu ʼo ʼuhiga mo te agaʼofa?

² Ko Sehova ʼe agaʼofa pea neʼe ina fakatupu te tagata ʼo mulimuli ki tona pāki. Koia ʼae ʼe mole tou punamaʼuli ai ki te tokaga ʼa te  hahaʼi ki ʼihi. Pea maʼia pe la mo natou ʼae ʼe mole natou iloʼi ia Sehova, ʼe natou maʼu ia te agaʼofa. (Senesi 1:27) ʼE tou maʼu ʼi te Tohi-Tapu, ia he ʼu fakamatala ʼo he hahaʼi neʼe natou fakaha ia te agaʼofa. Tou vakaʼi he faʼifaʼitaki. ʼI te fia iloʼi e te Hau ko Salomone pe ko ai te faʼe ʼa te kiʼi tamasiʼi ʼi te ʼu fafine ʼe toko lua, neʼe ina fakatotonu ai ke tuʼusi lua te tamasiʼi. Neʼe kole mamahi ai e te faʼe ki te hau ke tuku age te kiʼi tamasiʼi ki te fafine ʼae, ʼuhi ko te lahi ʼo tona ʼofa ki tana kiʼi toe. (1 Hau 3:23-27) Tou vakaʼi te tahi faʼifaʼitaki ʼo te agaʼofa, ia te ʼofafine ʼo Falaone. ʼI te temi ʼae neʼe ina maʼu ai ia Moisese ʼi tana kei meamea, neʼe ina iloʼi ko te kiʼi toe Hepeleo pea neʼe tonu ia ke matehi. Kaʼe neʼe “ofa leva . . . ki te kii fanau” pea neʼe ina fakatotonu ai ke ina taupau ohage pe ko hana kiʼi tama.—Ekesote 2:5, 6.

³ He koʼe ʼe tonu ke lahi age te ʼu faʼahi ʼae ʼe tou ako ʼo ʼuhiga mo te agaʼofa? Koteʼuhi ʼe loto e Sehova ke tou faʼifaʼitakiʼi ia ia. (Efeso 5:1) Logo la, neʼe ina fakatupu tatou ʼaki te fealagia ʼae ke tou fakaha ia te agaʼofa, kaʼe ʼuhi ko totatou ʼuhiga agahala, ʼi ʼihi temi ʼe tou manatu pe kia tatou totonu. ʼE lagi faigataʼa ʼi ʼihi temi, hatatou filifili pe ʼe tou tokoni ki ʼihi peʼe tou tokakaga pe kia tatou. Kotea ʼae ka tokoni mai anai ke tou tokakaga ki ʼihi? ʼUluaki, tou vakaʼi pe neʼe fakaha feafeaʼi e Sehova pea mo ʼihi ia te agaʼofa. Lua, tou vakaʼi pe ʼe feafeaʼi hatatou faʼifaʼitakiʼi ia te agaʼofa ʼo te ʼAtua pea he koʼe ʼe lelei ke tou fai te faʼahi ʼaia.

4. (1) He koʼe neʼe fekauʼi ifo e Sehova ʼana ʼaselo ki Sotoma? (2) Kotea te ako ʼe feala ke tou taʼofi mai te aluʼaga ʼae neʼe hoko ki te famili ʼo Lote?

⁴ ʼI te Tohi-Tapu, ʼe lahi te ʼu aluʼaga ʼe ha ai ia te agaʼofa ʼa Sehova. Tou fakakaukauʼi age muʼa pe kotea ʼae neʼe ina fai maʼa Lote. Neʼe ko te tagata faitotonu, kaʼe neʼe “lotomamahi ʼaupito” ʼuhi ko te aga heʼe ʼaoga ʼa te hahaʼi ʼo te ʼu kolo ko Sotoma pea mo Komola. Kia mata ʼo Sehova, neʼe tuha mo te hahaʼi ʼaia ke pulihi he neʼe mole natou fakaʼapaʼapa kia te ia. (2 Petelo 2:7, 8) Koia neʼe fekauʼi ifo e Sehova ʼana ʼaselo ke olo ʼo tala kia Lote ʼe pulihi anai ia Sotoma mo Komola pea ʼe tonu ke hola. ʼE ui fenei ʼi te Tohi-Tapu: “Kae nee fakatuatuai aipe ia Lote, koia nee too ai leva e te u aselo tona nima, o . . . Lote, mo tona ohoana, pea mo ona ofafine e toko lua, koteuhi nee loto [ia Sehova] ke fakamauli ia ia. Nee na ave leva ia ia o tuku ki te tua kolo.” (Senesi 19:16) Neʼe mahino ia Sehova ki te aluʼaga ʼae neʼe tau mo Lote. Koia ʼae ʼe tou tui papau ai, ʼe mahino ia ki te ʼu faigataʼaʼia fuli ʼae ʼe tou felaveʼi mo ia.—Esaia 63:7-9; Sakopo 5:11; 2 Petelo 2:9.

5. ʼE akoʼi feafeaʼi tatou e te Folafola ʼa te ʼAtua ke tou maʼu ia te agaʼofa?

⁵ Neʼe toe akoʼi e Sehova ki tana hahaʼi ke natou fakaha ia te manavaʼofa. Tou fakakaukauʼi age muʼa te lao ʼaeni neʼe ina foaki ki te kau Iselaele. Kapau neʼe foaki falā he tagata ki he tahi, neʼe feala ke ina toʼo te kofu ʼo ia ʼae neʼe kole falā. Neʼe ko he fakamoʼoni ʼaia, ʼe toe liufaki age anai ia tana foʼi falā. (Lau ia Ekesote 22:26, 27.) Kaʼe neʼe tonu ki te tagata foaki falā ke ina liufaki te kofu ʼo ia ʼae neʼe kole falā, ʼi muʼa ʼo te to ʼo te laʼa ke mole mokosia ʼi te poʼuli. Kapau ʼe mole agaʼofa ia te tagata  foaki falā, neʼe feala pe ke mole ina fia liufaki ia te kofu. Kaʼe neʼe akoʼi e Sehova ia tana hahaʼi ke natou manavaʼofa. Kotea ia te pelesepeto ʼae ʼe tou ako mai te lao ʼaia? Ke tou tokakaga tuʼumaʼu ki te ʼu meʼa ʼae ʼe ʼaoga ki ʼotatou tehina mo tuagaʼane. Kapau ʼe feala ke tou tokoni ki hotatou tehina peʼe ko hotatou tuagaʼane ʼe tau mo he ʼu mamahi, ʼe tou tokoni anai ki ai.—Kolose 3:12; Sakopo 2:15, 16; lau ia 1 Soane 3:17.

6. Kotea ʼae ʼe feala ke tou ako mai te ʼofa mamahi ʼa Sehova ki te kau Iselaele ʼae neʼe agahala?

⁶ Neʼe manavaʼofa ia Sehova ki te kau Iselaele, maʼia pe la ʼi te temi ʼae neʼe natou agahala ai kia te ia. He ʼe tou lau fenei: “Ko Sehova te ʼAtua ʼo ʼanatou kui neʼe ina tuku kia natou te ʼu fakatokaga, ʼaki ʼana ʼave logo, ʼo ina fekauʼi liuliuga, koteʼuhi neʼe manavaʼofa ki tana hahaʼi pea mo tona nofoʼaga.” (2 Koloniko 36:15, MN) ʼO toe feia pe, ʼe tonu ke tou manavaʼofa kia natou ʼae ʼe heʼeki natou iloʼi ia Sehova. He ʼe kei feala pe tanatou fakahemala pea mo natou liliu ko he ʼu kaumeʼa ʼo te ʼAtua. Pea tahi, ʼe mole loto e Sehova ke fakaʼauha he tahi ʼi tona ʼaho fakamau. (2 Petelo 3:9) Koia, ʼi muʼa ʼo te hoko mai ʼo te ʼaho ʼaia, ʼe tou fia tala ʼana fakatokaga ki te hahaʼi fuli. Pea ʼe tou tokoni anai kia natou ke natou maʼu te manavaʼofa ʼo te ʼAtua.

7, 8. He koʼe neʼe tui papau ia te kiʼi famili neʼe manavaʼofa ia Sehova kia natou?

⁷ Ia ʼaho nei, tokolahi te ʼu kaugana ʼa Sehova neʼe natou sisio ʼi tonatou maʼuli ki te manavaʼofa ʼo te ʼAtua. Ohage la, lolotoga te ʼu taʼu 1990 ʼi Bosnie, neʼe fetauʼaki te ʼu lanu kehekehe pea mo natou fematematehiʼaki. Neʼe ʼi ai te kiʼi tama ʼe taʼu 12 ʼe tou fakahigoaʼi anai ko Milan neʼe maʼuli ʼi ai mo tona kiʼi tehina pea mo ʼana matuʼā. Neʼe natou faifagona ʼi te papika mai Bosnie ki Serbie pea mo ʼihi kau Fakamoʼoni. Neʼe natou fakatuʼutuʼu ke natou olo ki te fakatahi lahi, ʼae ʼe tonu ke papitema ai te ʼu matuʼā ʼa Milan. ʼI tanatou kaku atu ki te gataʼaga ʼo Bosnie, neʼe fakatokagaʼi e ʼihi solia, neʼe mole lanu tahi te kiʼi famili ʼo Milan mo natou ʼae ʼi te papika. Koia ʼae neʼe natou fakahifo ai te kiʼi famili, kaʼe natou tuku ke hoko atu te faifagona ʼa te papika mo te ʼu tehina. Neʼe nonofo ai te kiʼi famili lolotoga ʼaho ʼe lua mo te kau solia. Pea neʼe telefoni leva te ofisie ki tona pule he neʼe ina fia iloʼi pe kotea ʼae ka natou fai ʼo ʼuhiga mo te kiʼi famili. Kaʼe neʼe haga mai pe te kiʼi famili kia ia pea neʼe natou logo fuli ki te tali fenei mai ʼa te pule: “ ʼAve natou ki tuʼa pea matematehi natou.”

⁸ Lolotoga te faipalalau ʼa te ofisie mo ʼana tagata solia, neʼe fakaovi mai te ʼu tagata ʼe toko lua ki te kiʼi famili. Kaʼe neʼe mole natou feiloʼiʼaki. Neʼe nā fanafana age ko naua ko te ʼu Fakamoʼoni pea neʼe ko te ʼu tehina ʼi te papika ʼae neʼe natou fakamatala age te meʼa ʼae neʼe hoko. Neʼe nā ui kia Milan mo tona kiʼi tehina ke nā heheka ki tanā motoka he ʼe mole vakaʼi e te ʼu solia ia te ʼu pepa ʼo te tamaliki ʼi tanatou fakalaka ʼi te ʼu tuʼakoi. Pea neʼe ui leva e te ʼu tehina ki te ʼu matuʼā ke nā olo age ʼi te tuʼa fale pea ke natou felaveʼi ʼi tuʼa atu ʼo te ʼu tuʼakoi. ʼI te lahi ʼo te mataku ʼo Milan, neʼe mole kei ina iloʼi pe ʼe tonu ke tagi peʼe kata. Pea neʼe fehuʼi leva e te ʼu matuʼā ki te ʼu Fakamoʼoni, “ ʼIo, ʼi takolua manatu la ʼe natou tuku anai ke ma olo feia pe?” Kaʼe ʼi tanā lolotoga haʼele, neʼe mole sisio pe la te kau solia kia naua. Neʼe felaveʼi ai te kiʼi famili katoa pea natou olo ai ki te fakatahi lahi. Neʼe natou tui papau neʼe tali ia Sehova ki ʼanatou faikole. ʼAki te Tohi-Tapu, ʼe tou iloʼi ko Sehova ʼe mole ina puipui tuʼumaʼu feia pe ʼana  kaugana. (Gaue 7:58-60) Kaʼe ʼo ʼuhiga mo te aluʼaga ʼaia, neʼe ui fenei e Milan: “Kia au neʼe hage pe ia, neʼe fakakiviʼi e te ʼu ʼaselo ia te kau solia pea neʼe haofaki matou e Sehova.”—Pesalemo 97:10.

9. Kotea neʼe logoʼi e Sesu ʼo ʼuhiga mo te hahaʼi ʼae neʼe mulimuli ia te ia? (Vakaʼi te ʼuluaki pāki.)

⁹ Ko Sesu neʼe ko he tahi faʼifaʼitaki lelei ʼo te agaʼofa. Neʼe ʼofa mamahi ki te hahaʼi koteʼuhi “neʼe natou ogosia pea mo mavetevete ohage ko he ʼu ovi ʼe mole honatou tauhi ovi.” Kotea ʼae neʼe ina fai? “Neʼe lahi te ʼu meʼa neʼe ina kamata akoʼi age kia natou.” (Mateo 9:36; lau ia Maleko 6:34.) Kaʼe, ko te kau Faliseo neʼe mole natou agaʼofa pea neʼe mole natou fia tokoni ki te hahaʼi. (Mateo 12:9-14; 23:4; Soane 7:49) ʼE ke fia tokoni moʼoni koa ki te hahaʼi ohage ko Sesu, pea mo akoʼi kia natou pe ko ai ia Sehova?

10, 11. ʼE tonu koa ke tou manavaʼofa tuʼumaʼu? Fakamahino.

¹⁰ Kaʼe ʼe mole fakaʼuhiga leva ʼe tonu ke tou manavaʼofa tuʼumaʼu. Tou vakaʼi te faʼifaʼitaki ʼo te Hau ko Saulo. Neʼe fakatotonu e Sehova kia Saulo ke ina matehi fuli te kau Amaleke pea mo ʼanatou faga manu. Kaʼe neʼe mole matehi e Saulo ia te hau ko Akake ʼo Amaleke, te fili ʼo te hahaʼi ʼa te ʼAtua pea mo ʼihi manu. He neʼe lagi manavaʼofa ia kia natou. Kaʼe ʼuhi ko tana talagataʼa ʼaia, neʼe mole kei loto ai e Sehova ke hau ia Saulo. (1 Samuele 15:3, 9, 15) Ko Sehova ʼe ko te Tuʼi Fakamau faitotonu. ʼE sio ki te ʼu loto ʼo te hahaʼi. Pea ʼe ina iloʼi pe ko te temi fea ʼae ʼe tonu ai ke ina fakaha tona manavaʼofa. (Tagilaulau 2:17; Esekiele 5:11) Kua ovi mai pe te ʼaho ʼae ka ina fakamauʼi ai te hahaʼi ʼae ʼe mole fia fakalogo kia te ia. (2 Tesalonika 1:6-10) Pea ʼi te temi ʼaia, ʼe mole toe fakaha anai e Sehova ia tona manavaʼofa ki te hahaʼi agakovi. Kaʼe, ʼi tana pulihi ia natou ʼaia, ʼe ina fakaha ai ia tana agaʼofa ki te kau faitotonu ʼaki tana haofaki ia natou.

¹¹ ʼE ha lelei mai, ʼe mole ʼa tatou ia te fakamauʼi ʼo te hahaʼi pe ʼe tonu ke maʼuʼuli peʼe kailoa. Kaʼe ʼe tonu ke tou fai ia meʼa fuli ʼe tou lavaʼi ʼi te temi nei moʼo tokoni kia natou. ʼE feafeaʼi anai hatatou agaʼofa ki ʼotatou tatau? Tou vakaʼi he ʼu tokoni ʼe ʼaoga.

12. ʼE feafeaʼi hatatou fakaha ia te agaʼofa ʼi ʼatatou felogoʼi mo ʼihi?

¹² Tou foaki he tokoni ʼi te ʼaho fuli. ʼE loto e Sehova ke agaʼofa ia te kau Kilisitiano ki ʼonatou tatau pea mo ʼonatou tehina mo tuagaʼane. (Soane 13:34, 35; 1 Petelo 3:8) ʼE feala ke fakaʼuhiga ia te agaʼofa ki te “kaugā mamahi fakatahi.” Ko he tahi ʼe agaʼofa, ʼe faiga ia ke tokoni kia natou ʼae ʼe tau mo he ʼu mamahi. Koia ʼae ʼe tonu ai ke tou kumi he ʼu faigamalie ke tou tokoni ai ki ʼihi. Ohage la, ʼe feala pe ke tou tokoni ki he tahi ʼo tou fakamaʼa tona ʼapi, peʼe ko te fai ʼo tana fakamolemole, peʼe ko ʼana fakatau.—Mateo 7:12.

13. Kotea ʼae ʼe fai e te hahaʼi ʼa te ʼAtua moka hoko he tuʼutamaki fakanatula?

¹³ Tou tokoni moka hoko he tuʼutamaki fakanatula. Ka tou sisio ki te lotomamahi ʼa te hahaʼi ʼuhi ko he tuʼutamaki fakanatula, ʼe  tou fia fakaha kia natou ia tatatou agaʼofa. Tokolahi ʼe natou iloʼi ko te hahaʼi ʼa Sehova ʼe natou lotolelei ke natou tokoni ki ʼonatou tatau. (1 Petelo 2:17) Tou vakaʼi te faʼifaʼitaki ʼo te tuagaʼane Saponia ʼe maʼuli ʼi te koga meʼa ʼae neʼe maumauʼi e te mafuike pea mo te hake ʼo te peau ʼi te taʼu 2011. Neʼe ina ui, neʼe ko “he fakalotomalohi mo he fakalotofimalie lahi” ia tana sio ki te ʼu tehina mo tuagaʼane mai te ʼu potu kehekehe ʼo Saponia pea mo ʼihi atu fenua, neʼe natou lotolelei ke ʼomai ʼo tokoni ki te toe laga ʼo te ʼu ʼapi pea mo te ʼu Fale Fono. Neʼe ina toe ui fenei: “Neʼe tokoni mai te aluʼaga ʼaia ke au mahino, ko Sehova ʼe tokaga kia matou. Pea ko te kau Fakamoʼoni ʼe natou fetokagaʼaki. Tokolahi te ʼu tehina mo tuagaʼane ʼi te malamanei katoa ʼe natou hufakiʼi matou.”

14. ʼE feafeaʼi hatatou tokoni kia natou ʼae ʼe mahahaki mo matutuʼa?

¹⁴ Tou tokoni ki te hahaʼi mahahaki mo matutuʼa. Ka tou sisio ki te lotomamahi ʼa te hahaʼi ʼuhi ko te mahaki pea mo te vaivai matuʼa, ʼe tou ʼoʼofa ia natou. Kua tou fakaʼamu la ke pulihi ia te ʼu fihifihia ʼaia, pea ʼe tou faikole ke hoko mai la ia te Puleʼaga ʼo te ʼAtua. Kaʼe ʼi tatatou atalitali ki te ʼaho ʼaia, ʼe tou faiga malohi ʼo tokoni kia natou ʼae ʼe mahahaki mo matutuʼa. Neʼe fakamatala e te tagata faitohi, ʼi te tahi ʼaho, ko tana faʼe kua finematuʼa pea mo lotogalogalo, neʼe ina ʼulihi ʼona kiʼi meʼa liliki. Lolotoga tana faigaʼi ʼae ke ina fakamaʼa ia ia, neʼe tutuʼu ʼi tona muʼa matapa ia te ʼu Fakamoʼoni. Neʼe ko te ʼu tuagaʼane ʼe toko lua ʼae ʼe nā tau ʼomai ʼo ʼaʼahi ia ia. Neʼe fehuʼi age e te ʼu tuagaʼane pe feala hanā tokoni kia ia. Neʼe  tali fenei age e te finematuʼa: “Ko he meʼa fakaufiufi kia au, kaʼe ʼe au lotolelei ki ai.” Pea neʼe tokoni ai leva te ʼu tuagaʼane kia ia. ʼOsi ʼaia, neʼe nā fai age tona ti pea mo natou faipalalau. Neʼe malave ʼaupito te aluʼaga ʼaia ki te tama ʼa te finematuʼa pea neʼe ina ui, ko te kau Fakamoʼoni “ ʼe natou maʼuliʼi te ʼu meʼa ʼae ʼe natou fakamafola.” Ko tau agaʼofa ʼae ki te hahaʼi mahahaki mo matutuʼa, ʼe ina uga koa koe ke ke faiga malohi ʼo tokoni kia natou?—Filipe 2:3, 4.

15. ʼE tokoni feafeaʼi ia tatatou faifakamafola ki te hahaʼi?

¹⁵ Tou tokoni ki te hahaʼi ke natou iloʼi ia Sehova. Ko tatatou akoʼi te hahaʼi ʼo ʼuhiga mo te ʼAtua mo tona Puleʼaga, ʼe ko tatatou faʼahiga tokoni lelei tukupau ʼaia kia natou. ʼE toe feala foki ke tou fakamahino kia natou te ʼu fua lelei ʼo te fakalogo ki te ʼu lekula ʼa Sehova. (Esaia 48:17, 18) Koia, ʼaki tatatou faifakamafola, ʼe tou fakamaʼuhigaʼi ai ia Sehova pea ʼe tou fakaha ai te agaʼofa ki ʼotatou tatau. ʼE feala koa ke toe lahi age ia tau kau ki te faifakamafola?—1 Timoteo 2:3, 4.

16. Kotea te ʼu fua lelei ʼe tou maʼu moka ʼe tou agaʼofa?

¹⁶ ʼE ui e te ʼu toketa ʼo te mahaki ʼulu, ko he tahi ʼe agaʼofa, ʼe mole mahamahaki pea ʼe toe lelei age ʼana felogoʼi mo ʼihi. Ka ke tokoni ki he tahi ʼe tau mo he ʼu mamahi, ʼe toe lahi ai tou fiafia, mo ke maʼu he ʼu manatu lelei, ʼe mole ke logoʼi ai tau nofo tokotahi pea ʼe ke tekeʼi ai te ʼu manatu fakalotomamahi. Koia, ʼe lelei kia koe ia tau agaʼofa. (Efeso 4:31, 32) Ka uga tatou e te ʼofa ke tou tokoni ki ʼotatou tatau, ʼe tou maʼu ai ia he leʼo ʼo loto ʼe lelei, he ʼe tou iloʼi ʼe tou fai te finegalo ʼo Sehova. ʼE tokoni mai anai ia te agaʼofa ke lelei age totatou ʼuhiga tamai mo faʼe, totatou ʼuhiga tagata mo fafine ʼohoana pea mo totatou vahaʼa mo ʼotatou kaumeʼa. Pea ʼi te agamahani, moka tau ia ia ʼae ʼe agaʼofa mo he ʼu faigataʼaʼia, ʼe toe ʼomai pe anai ʼihi ʼo tokoni ki ai.—Lau ia Mateo 5:7; Luka 6:38.

17. He koʼe ʼe tou fia fakaha ia te agaʼofa?

¹⁷ ʼE moʼoni, ʼe fua lelei kia koe ia tau agaʼofa. Kaʼe ko te tupuʼaga tafito ʼo tau fakaha ia te agaʼofa, ko tau fia faʼifaʼitakiʼi mo fia fakakololiaʼi ia Sehova. Ko Sehova ʼe ko te Matapuna ʼo te ʼofa mo te agaʼofa. (Taaga Lea 14:31) ʼE ko te faʼifaʼitaki lelei tukupau ia kia tatou. Koia, tou fai ia meʼa fuli ʼe tou lavaʼi ke tou faʼifaʼitakiʼi ia te ʼAtua ʼaki tatatou fakaha ia te agaʼofa. He ʼe tou fakaovi ai anai ki ʼotatou tehina mo tuagaʼane pea mo tou felogoʼi lelei ai mo te hahaʼi.—Kalate 6:10; 1 Soane 4:16.