1-2. He koʼe ʼe feala ke tou ui ʼe fakaʼuhiga ki te gaue faifakamafola te ʼu palalau ʼae ʼe maʼu ia Ekelesiasi 11:6?

ʼI ʼIHI fenua, ʼe fia logo te hahaʼi ki te logo lelei he neʼe ko te faʼahi ʼaia neʼe natou kumi. Kae ʼi te tahi age ʼu fenua, tokolahi te hahaʼi ʼe mole natou tui ki te ʼAtua, pea ʼe natou fakafisi ki te logo ʼae ʼe fakaha ʼi te Tohi-Tapu. ʼE feafeaʼi ki te hahaʼi ʼo tou fenua? Tatau aipe pe ʼe kotea te faʼahiga tali ʼa te hahaʼi, kae ʼe kole mai e Sehova ke hoko atu pe tatatou faifakamafola, ʼo kaku ki te temi ʼae ka ina fakagata ai.

² ʼE fakagata anai e Sehova te faifakamafola ʼi te temi ʼae kua fakatuʼutuʼu ki ai, pea ʼe “hoki hoko mai anai ia te fakaʼosi.” (Mat. 24:14, 36) Ia muʼa ʼo te hoko mai ʼo te faʼahi ʼaia, kotea ʼae ʼe tonu ke tou fai ke “aua naa tuku ke malolo [totatou] nima”? *—Lau ia Ekelesiasi 11:6.

3. Kotea ʼae ka tou vakaʼi anai ʼi te alatike ʼaeni?

³ ʼI te alatike ʼaeni kua ʼosi atu, neʼe tou talanoa kia kalitate ʼe fa ʼe tonu ke tou maʼu ke tou liliu ai ko he ʼu “tautai tagata” faiva. (Mat. 4:19) ʼI te alatike ʼaeni, ʼe tou vakaʼi anai he ʼu faʼahi ʼe tolu ke fakamalohiʼi ai totatou loto moʼoni ʼae ke tou faifakamafola, logo pe la te ʼu fihifihia ʼae ʼe tou tau mo ia. ʼE tou vakaʼi anai pe ʼe koʼe ʼe maʼuhiga (1) ke tou fakamuʼamuʼa te faifakamafola, (2) ke tou kataki fualoa, pea (3) ke malohi tatatou tui.

4. He koʼe ʼe tonu ke tou fakamuʼamuʼa te gaue ʼae neʼe foaki mai e Sehova?

⁴ Neʼe fakakikite e Sesu te ʼu aluʼaga fakamalamanei ʼae ka hoko anai ʼi te ʼu ʼaho fakamuli. Neʼe ina iloʼi neʼe feala ke mole  toe tokakaga ʼana tisipulo ki tanatou faifakamafola, ʼuhi ko te ʼu aluʼaga faigataʼa ʼaia. Koia, neʼe ina fakalotomalohiʼi natou ke natou “nonofo ʼalaʼala.” (Mat. 24:42) ʼI te temi ʼo te Tulivio, neʼe mole tokagaʼi e te hahaʼi te ʼu fakatokaga ʼa Noe, he neʼe natou maʼumaʼua ʼi tanatou ʼu gaue. ʼE toe feia mo tatou, ʼe feala ke mole tou toe tokakaga ki tatatou faifakamafola ʼuhi pe ko tatatou ʼu gaue. (Mat. 24:37-39; 2 Pet. 2:5) Koia, ʼe tou fia fakamuʼamuʼa ai te gaue ʼae neʼe foaki mai e Sehova.

5. ʼE kaku anai kifea te gaue faifakamafola, ʼo mulimuli kia Gaue 1:6-8?

⁵ ʼE tonu ke maʼuhiga kia tatou te fakamafola ʼo te Puleʼaga. Neʼe fakaha e Sesu ʼe fualoa age anai te faifakamafola ʼo ʼana tisipulo ʼi te hili ʼo tana mate. Pea ʼe lahi age anai tanatou faifakamafola ia ia. (Soa. 14:12) ʼI te ʼosi mate ʼa Sesu, neʼe toe liliu ʼihi ʼo ʼana tisipulo ki tanatou gelu. ʼI tona ʼosi fakatuʼuake, neʼe ina fai ai he milakulo, ʼo feala ai ke natou puke he ʼu tuʼuga ika. Neʼe ina fakamanatuʼi age kia natou ʼe maʼuhiga age tanatou gaue tautai tagata ʼi te ʼu gaue fuli ʼae. (Soa. 21:15-17) ʼI muʼa ʼo tana hake ki selo, neʼe ina fakaha ki ʼana tisipulo ʼe mole gata pe anai te gaue ʼi te fenua ʼo Iselaele. (Lau ia Gaue 1:6-8.) Hili ki ai ni taʼu, neʼe ina fakaha ki te apositolo ko Soane te meʼa ʼae ka hoko anai lolotoga “te ʼaho ʼo te ʼAliki.” * Neʼe sio ia Soane ki he aluʼaga fakaofoofo. ʼAki te takitaki ʼa te kau ʼaselo, neʼe tala “he logo lelei ʼe heʼe gata . . . ki te ʼu puleʼaga fuli, mo te ʼu telepi fuli, mo te ʼu lea fuli, pea mo te hahaʼi fuli.” (Fkha. 1:10; 14:6) ʼE mahino ia, ʼe loto e Sehova ke tou kau ki te faifakamafola ʼaia ʼe hoko ʼi te malamanei, ʼo kaku ki te temi ʼae ka ina fakagata ai.

6. Kotea ʼae ʼe ina uga tatou ke tou fakamuʼamuʼa te faifakamafola?

⁶ ʼE tou fakamuʼamuʼa anai te faifakamafola mo kapau ʼe tou fakakaukauʼi ia meʼa fuli ʼe fai e  Sehova maʼa tatou. Ohage la, ʼe lahi te meʼa kai fakalaumalie ʼe ina foaki mai, ʼaki he ʼu tohi neʼe ta peʼe ʼi te Neti, he ʼu fakamatala neʼe puke peʼe ko he ʼu ʼata viteo, pea mo te Televisio JW ʼi te mahina fuli. Fakakaukauʼi age muʼa, ʼe maʼu ʼi totatou tuʼasila ʼi te Neti he ʼu tohi kua fakaliliu ia lea ʼe 1 000 tupu! (Mat. 24:45-47) Ko te hahaʼi ʼi te malamanei ʼe mole natou logo tahi, he ʼe natou lagolago ki he ʼu faʼahi fakapolitike kehekehe, mo kau ki he ʼu lotu kehekehe, pea ʼe maʼu koloa ʼihi kae masisiva ʼihi. Kae ko te toko valu miliona tupu ʼu kaugana ʼa te ʼAtua ʼe natou faʼufaʼu he foʼi famili ʼe logo tahi ʼi te malama katoa. Ke ke manatuʼi, ʼi te Feliaono ʼaho 19 ʼo Apelili 2019, neʼe tatau te koga tohi ʼo te ʼaho ʼae neʼe vakaʼi e te kau Fakamoʼoni ʼa Sehova ʼi te malamanei katoa. Pea ʼi te afiafi ʼaia, ko te toko 20 919 041 hahaʼi neʼe natou fakatahitahi ke natou fakamanatu te mate ʼo Sesu. Ka tou fakakaukauʼi te pilivilesio ʼae ke tou sisio ki te milakulo ʼaia ia ʼaho nei pea mo kau ki ai, ʼe mole uga koa la tatou e te faʼahi ʼaia ke tou fakamuʼamuʼa te faifakamafola?

7. He koʼe ʼe tokoni mai te faʼifaʼitaki ʼa Sesu ke tou fakamuʼamuʼa te faifakamafola?

⁷ ʼE tou toe fakamuʼamuʼa anai te faifakamafola mo kapau ʼe tou fakakaukauʼi te faʼifaʼitaki ʼa Sesu. Neʼe mole ina tuku he meʼa ke ina fakaleluʼi ia ia mai tana gaue, ʼae ko te fakamoʼoni ʼo ʼuhiga mo te moʼoni. (Soa. 18:37) Neʼe mole ina tuku ke fakahalaʼi ia ia e Satana ʼi tana fakaha age “te ʼu puleʼaga fuli ʼo te malamanei mo ʼonatou kololia,” pea mo tona fia fakanofo hau e te hahaʼi. (Mat. 4:8, 9; Soa. 6:15) Neʼe mole fia maʼu koloa pea neʼe mole mataku ʼi te ʼu fakafeagai ʼae neʼe hoko kia ia. (Luka 9:58; Soa. 8:59) Kae kia tatou, ʼe feafeaʼi hatatou fakamuʼamuʼa ia te Puleʼaga moka ʼahiʼahiʼi tatatou tui? ʼE fakalotomalohiʼi tatou e Paulo ke tou tokagaʼi lelei te faʼifaʼitaki ʼa Sesu ke mole tou “gaʼegaʼe pea mo lotovaivai” ai.—Hep. 12:3.

8. He koʼe ʼe maʼuhiga te kataki fualoa?

⁸ ʼE ʼaoga te kataki fualoa mo kapau ʼe tou loto ke gata he aluʼaga faigataʼa, peʼe kapau kua fualoa tatatou atalitali ke hoko he meʼa ʼe tou fakaʼamu ki ai. Neʼe loto e te polofeta ko Hapakuke ke fakagata la te agamalohi ʼae neʼe hoko ʼi Suta. (Hap. 1:2) Neʼe ʼamanaki e te ʼu tisipulo ʼa Sesu ke “ha fakafokifa” te Puleʼaga ʼo te ʼAtua, pea ke ina pulihi te puleʼaga ʼo Loma. (Luka 19:11) ʼE tou fakaʼamu mo tatou ke pulihi e te Puleʼaga ʼo te ʼAtua te agakovi, pea mo fakatuʼu he malama foʼou ʼe maʼu ai te faitotonu. (2 Pet. 3:13) Kae ʼe tonu ke tou kataki fualoa pea mo atalitali ki te temi ʼae kua fakatuʼutuʼu e Sehova ki ai. Koia tou vakaʼi pe ʼe akoʼi feafeaʼi mai e Sehova te kataki fualoa.

9. Kotea ʼae ʼe ha ai ʼe kataki fualoa ia Sehova?

⁹ ʼE tuku mai e Sehova he faʼifaʼitaki ʼe lelei tukupau ʼo ʼuhiga mo te kataki fualoa. Neʼe ina tuku he temi feʼauga kia Noe ke ina faʼu te aleka, pea ke ina fakatokagaʼi te hahaʼi ʼo ʼuhiga mo te hoko mai ʼo te Tulivio. (2 Pet. 2:5; 1 Pet. 3:20) Neʼe toe kataki fualoa ia Sehova ʼo fakalogo kia Apalahamo, ʼae neʼe tuʼania ki tana tonu ʼae ke ina maumauʼi te ʼu kolo ʼae ko Sotoma mo Komola. (Sen. 18:20-33) Lolotoga ni lauʼi taʼu, neʼe kataki fualoa ia Sehova ki te Puleʼaga ʼo Iselaele ʼae neʼe mole nofo agatonu kia te ia. (Nee. 9:30, 31) Pea ia ʼaho nei, ʼe ina tuku he temi ki te hahaʼi ʼae ʼe ina taki mai ke natou “kaku . . . ki te fakahemala.” (2 Pet. 3:9; Soa. 6:44; 1 Tim. 2:3, 4) ʼE uga tatou e tana faʼifaʼitaki, ke tou toe kataki fualoa mo tatou, ʼo hoko atu tatatou faifakamafola pea mo fai he ʼu tisipulo. Kae ʼe toe akoʼi mai e Sehova te kataki fualoa ʼaki te lea fakatata ʼe tou maʼu ʼi tana Folafola.

10. Kotea te ako ʼe tou taʼofi mai te faʼifaʼitaki ʼa te tagata gaue kele, ʼo mulimuli kia Sakopo 5:7, 8?

¹⁰ Lau ia Sakopo 5:7, 8. ʼE fakamanatuʼi mai  e te faʼifaʼitaki ʼa te tagata gaue kele te maʼuhiga ʼae ke tou kataki fualoa. ʼE homo vave ake ʼihi fuʼu ʼakau. Kae ko ʼihi ʼe tuai, tafito la te ʼu fuʼu ʼakau ʼae ʼe fua. ʼI Iselaele, ko te temi ʼae neʼe tuputupu ai te ʼu fuʼu ʼakau neʼe teitei mahina ono. Neʼe nunusi e te tagata gaue kele tana pulapula ʼi te kamata ʼo te ʼu ʼuluaki ʼua, ʼi te vaelua ʼo Oketopeli. Pea neʼe ina utu ʼi te hili ʼo te ʼu ʼua fakaʼosi, ʼi te vaelua ʼo Apelili. (Mko. 4:28) ʼE tou aga poto anai mo kapau ʼe tou faʼifaʼitakiʼi te kataki fualoa ʼa te tagata gaue kele. Kae ʼe mole faigafua.

11. He koʼe ʼe tonu ke tou kataki fualoa ʼi tatatou minisitelio?

¹¹ ʼI te agamahani, ʼi tonatou ʼuhiga agahala, ʼe fia sisio fakavilivili te hahaʼi ki te ʼu fua ʼo tanatou ʼu gaue. Kae kapau ʼe tou fia utu he meʼa ʼi totatou gaueʼaga, ʼe tonu ke tou tokaga tuʼumaʼu ki ai. ʼE tonu ke tou fuli te kele, mo to te pulapula, mo huo pea mo fakavai. ʼO toe feia pe, ʼe tonu ke tou faiga tuʼumaʼu ʼi te gaue ʼae ko te fai ni tisipulo. ʼE ʼaoga he temi ke tou taʼaki mai te loto ʼo ʼatatou kau ako te fakapalatahi kae tou akoʼi age te ʼofa. Kapau ʼe tou kataki fualoa, ʼe mole tou lotovaivai anai moka mole fia logo mai te hahaʼi. Pea kapau ʼe fia logo he tahi ki te moʼoni, ʼe tonu ke tou toe kataki fualoa. ʼE mole feala ke tou fakakinauʼi he tahi ʼe ina ako te Tohi-Tapu ke ina maʼu he tui ʼe malohi. Neʼe toe feia pe la mo te ʼu tisipulo ʼa Sesu, neʼe ʼaoga he temi ke natou mahino ki ʼana akonaki. (Soa. 14:9) Ke ʼaua naʼa galo kia tatou, ʼe tou to pea mo fakavai, kae ʼe ko te ʼAtua ʼae ʼe ina haga fakatuputupu.—1 Ko. 3:6.

12. ʼE feafeaʼi hatatou kataki fualoa ki ʼotatou famili ʼae ʼe mole ko he kau Fakamoʼoni?

¹² ʼI ʼihi temi, ʼe mole tou kataki fualoa moka tou palalau ʼo ʼuhiga mo te moʼoni ki ʼotatou famili ʼae ʼe mole ko he kau Fakamoʼoni. Koia ʼe ʼaoga ai kia tatou te pelesepeto ʼae ia Ekelesiasi 3:1, 7. ʼE tou lau fenei ai: “E i ai he temi . . . ke fakalologo ai, pea mo he temi ke palalau ai.” Kapau ʼe lelei tatatou aga, ʼe feala ke tupu ai te fia logo ʼo totatou famili ki te moʼoni. Kae ʼe  tonu pe foki ke tou nofo teuteu tuʼumaʼu ke tou palalau ʼo ʼuhiga mo Sehova. (1 Pet. 3:1, 2) ʼE moʼoni, ʼe tou faʼafai ʼi te faifakamafola pea mo te akoʼi ʼo te hahaʼi. Kae ʼe tonu foki ke tou kataki fualoa ki te hahaʼi fuli, ʼo toe feia aipe ki totatou famili.

13-14. Tuku mai he faʼifaʼitaki ʼo he ʼu kaugana agatonu ʼa te ʼAtua ʼo te temi muʼa mo ʼae ʼo totatou temi neʼe natou kataki fualoa.

¹³ ʼE feala ke tou ako te kataki fualoa mai te faʼifaʼitaki ʼo te ʼu kaugana agatonu ʼa Sehova ʼo te temi muʼa mo ʼae ʼo totatou temi. Neʼe fakaʼamu e Hapakuke ke fakagata la te agakovi ʼi Suta. Kae neʼe ina ui fenei ʼaki he lotofalala: “ ʼI toku tule leʼo, ʼe au haga tuʼu ai anai.” (Hap. 2:1, NWT) Pea neʼe loto e Paulo ke ina “fakaʼosi” tana minisitelio, kae neʼe kataki fualoa ʼo haga “fakamoʼoni katoa ki te logo lelei.”—Gaue 20:24.

¹⁴ Tou toe vakaʼi mo te faʼifaʼitaki ʼa he taumatuʼa neʼe nā maʼu pepa ʼi te Ako ʼo Kalaate. Neʼe fekauʼi naua ki he fenua ʼe tokosiʼi ai te kau Fakamoʼoni, pea neʼe mole tui te hahaʼi kia Sesu. Neʼe mole faʼa hahaʼi ia natou ʼae neʼe fia ako te Tohi-Tapu. Ko ʼihi kau ako ʼo tanā kalasi, ʼae neʼe fekauʼi ki he tahi age ʼu fenua, neʼe natou fakamatala age te ʼu fua lelei ʼo tanatou gaue, pea mo te lahi ʼo te ʼu ako Tohi-Tapu ʼae neʼe natou fai. Tatau aipe pe neʼe mole lahi te hahaʼi ʼae neʼe fia logo, kae neʼe kataki fualoa pe te taumatuʼa ʼo hoko atu ʼanā faiga. Hili taʼu ʼe valu ʼi tanā faifakamafola ʼi tanā telituale, neʼe nā fiafia leva ʼi tanā sio ki te papitema ʼa he tahi neʼe ako mo naua. Kotea ʼae ʼe tatau ai te ʼu kaugana ʼa te ʼAtua ʼo te temi muʼa pea mo natou ʼo totatou temi? Neʼe hoko atu pe tanatou faʼafai. Neʼe mole natou tuku ke malolo tonatou nima. Pea neʼe tapuakina e Sehova tanatou kataki fualoa. Koia, tou “faʼifaʼitakiʼi ia natou ʼae ʼe natou maʼu te ʼu fakapapau, ʼuhi ko tanatou tui pea mo tanatou kataki fualoa.”—Hep. 6:10-12.

15. ʼE fakamalohiʼi feafeaʼi e tatatou tui tatatou loto moʼoni ʼae ke tou faifakamafola?

¹⁵ ʼE tou tui ki te logo ʼae ʼe tou tala, koia ʼe tou fia fakaha te logo ʼaia ki he tokolahi. ʼE tou falala ki te ʼu fakapapau ʼae ʼe maʼu ʼi te Folafola ʼa te ʼAtua. (Pes. 119:42; Esa. 40:8) ʼE tou sisio ki te hoko ʼo te ʼu lea fakapolofeta ʼi totatou temi, pea ʼe toe lelei mo te maʼuli ʼo te hahaʼi moka natou mulimuli ki te ʼu tokoni ʼa te Tohi-Tapu. Koia, ʼe malohi age ai tatatou tui ʼae ʼe ʼaoga ke logo te hahaʼi fuli ki te logo lelei ʼo te Puleʼaga.

16. ʼE tokoni feafeaʼi mai e tatatou tui kia Sehova pea mo Sesu ke fakamalohiʼi tatatou loto moʼoni ke tou faifakamafola, ʼo mulimuli kia Pesalemo 46:2-4?

¹⁶ ʼE tou toe tui foki kia Sehova, ia Ia ʼae neʼe ina fakaha mai te logo ʼae ʼe tou fakamafola. Pea ʼe tou toe tui kia Sesu, ʼae neʼe ina fakanofo ko te Hau ʼo te Puleʼaga. (Soa. 14:1) Logo la te ʼu fihifihia ʼae ʼe tou tau mo ia, kae ko Sehova ʼe ko totatou nonoʼaga mo totatou malohi ʼi te temi fuli. (Lau ia Pesalemo 46:2-4.) Pea ʼe tou tui papau ʼe takitaki e Sesu te gaue faifakamafola mai te lagi. ʼE ina fakaʼaogaʼi ki ai te malohi pea mo te pule ʼae neʼe foaki age e Sehova kia ia.—Mat. 28:18-20.

17. Fakamatala mai he aluʼaga ʼe ha ai ʼe ʼaoga ke hoko atu tatatou faifakamafola.

¹⁷ Kapau ʼe tou tui, pea ʼe toe lahi age ai tatatou falala ʼae ʼe tapuakiʼi e Sehova ʼatatou faiga. Pea ʼi ʼihi temi, ʼe ina fai te faʼahi ʼaia ʼi hona aluʼaga neʼe mole tou ʼamanaki ki ai. (Ekl. 11:6) Ohage la, ʼi te ʼaho fuli, ʼe fakalaka te toko lauʼi afe hahaʼi ia muʼa ʼo tatatou ʼu laupapa. ʼE lelei koa te faʼahiga faifakamafola ʼaia? ʼEi. Neʼe fakamatala ʼi Te Minisitelio ʼo Te Puleʼaga ʼo te mahina ʼo Novepeli 2014, te meʼa neʼe hoko ki he finemui neʼe ako ʼi te univelesite. Neʼe ina fia fai he ʼu fekumi ʼo ʼuhiga mo te kau Fakamoʼoni ʼa Sehova. Neʼe mole maʼu e te finemui ʼaia hatatou Fale Fono, kae neʼe sio ki tatatou laupapa  ʼi te univelesite. Neʼe ina maʼu ai te ʼu tohi ʼae neʼe ʼaoga ki tana fekumi. Ki muli age, neʼe liliu leva ko hotatou tuagaʼane, pea kua pionie katoa ʼi te temi nei. Ko te fakamatala ʼaia pea mo ʼihi atu, ʼe fakalotomalohiʼi ai tatou ke hoko atu tatatou faifakamafola, he ʼe ha ai ʼe kei ʼi ai pe he hahaʼi ʼe ʼaoga ke natou logo ki te logo ʼo te Puleʼaga.

18. He koʼe ʼe tou tui papau ʼe fakagata anai tatatou faifakamafola ʼi te temi ʼae kua fakatuʼutuʼu ki ai ia Sehova?

¹⁸ Ke tou tui papau, ʼe fakagata anai tatatou faifakamafola ʼi tona temi totonu. ʼI te temi ʼo Noe, neʼe fakaha e Sehova ʼe pule ki te temi pea mo te ʼu aluʼaga ʼae ʼe hoko. Ia teitei taʼu ʼe 120 ia muʼa ʼo te hoko mai ʼo te Tulivio, neʼe kua fakatotonu e Sehova te temi ʼae ka kamata ai. Hili ki ai ni taʼu, neʼe ina kole kia Noe ke ina faʼu he aleka. Neʼe gaue kinakina ia Noe lolotoga ni taʼu ʼe 40 peʼe 50, ʼi muʼa ʼo te Tulivio. Pea neʼe hoko atu mo tana fakatokaga te hahaʼi. Kae neʼe mole natou fia logo ki ai, ʼo kaku pe ki te temi ʼae neʼe ui age e Sehova ke ina fakaulu te ʼu manu ki te aleka. ʼI tona temi totonu, “nee mapunui leva e [“Sehova,” NWT] te matapa.”—Sen. 6:3; 7:1, 2, 16.

19. Kotea te ʼu tapuakina ʼe tou maʼu anai mo kapau ʼe mole tou tuku ke malolo totatou nima?

¹⁹ Kua vave fakaha mai pe e Sehova kua ʼosi tatatou faifakamafola. Pea ʼe ina ‘mapunuʼi anai te matapa,’ ko tona fakaʼuhiga ʼe ina maumauʼi anai te malama ʼa Satana, kae ina fakatuʼu he malama foʼou ka maʼu ai te faitotonu. ʼI muʼa ʼo te hoko ʼo te faʼahi ʼaia, tou faʼifaʼitakiʼi ia Noe, mo Hapakuke, pea mo ʼihi atu kaugana ʼa te ʼAtua ʼae neʼe mole natou tuku ke malolo ʼonatou nima. ʼEi, tou fakamuʼamuʼa te faifakamafola, mo tou kataki fualoa, pea ke malohi tatatou tui kia Sehova pea mo ʼana fakapapau.