1-2. Kotea te ʼu meʼa maʼuhiga ʼae neʼe foaki age kia Timoteo ʼo mulimuli kia 1 Timoteo 6:20?

ʼI TE agamahani, ʼe tou tuku ʼatatou koloa ki he tahi ke tokaga ki ai. Ohage la, neʼe tou tuku tatatou foʼi falā ki he fale paʼaga. Kapau ko ia, ʼe tou fakaʼamu ke tokaga lelei ki ai, pea ke mole puli peʼe kaihaʼa. Koia, ʼe tou mahino ai ki te fakaʼuhiga ʼo te foaki ʼo he meʼa maʼuhiga ki he tahi.

² Lau ia 1 Timoteo 6:20. Neʼe fakamanatuʼi age e te apositolo ko Paulo kia Timoteo neʼe foaki age kia ia, he meʼa maʼuhiga ia te ʼatamai malama totonu ʼo ʼuhiga mo te fakatuʼutuʼu ʼa te ʼAtua ki te tagata. Neʼe toe foaki kia Timoteo te tahi meʼa maʼuhiga, ʼae ko te pilivilesio ke ina “fai te gaue ʼa he tagata faifakamafola ʼo te logo lelei.” (2 Tim. 4:2, 5) Neʼe fakalotomalohiʼi ia ia e Paulo ke ina taupau maʼu te meʼa ʼae neʼe foaki age. Neʼe toe foaki mai foki e Sehova kia tatou he ʼu meʼa maʼuhiga. Kotea te ʼu meʼa maʼuhiga ʼaia? Pea he koʼe ʼe tonu ke tou taupau maʼu?

3-4. He koʼe ʼe maʼuhiga te ʼu moʼoni ʼae ʼe tuʼu ʼi te Tohi-Tapu?

³ ʼI tana ʼofa kia tatou, neʼe foaki mai e Sehova te ʼatamai malama totonu ʼo ʼuhiga mo te ʼu moʼoni ʼae ʼe tuʼu ʼi tana Folafola, te Tohi-Tapu. ʼE maʼuhiga te ʼu moʼoni ʼaia, he ʼe tokoni mai ke tou iloʼi pe ʼe feafeaʼi hatatou kaumeʼa mo Sehova, pea mo maʼuli fiafia. Ka tou tui ki te ʼu moʼoni ʼaia pea mo maʼuliʼi, ʼe tou ʼateaina ai mai te popula ki te ʼu akonaki hala, pea mo te ʼu aga heʼe ʼaoga.—1 Ko. 6:9-11.

⁴ Koʼeni te tahi tupuʼaga ʼo te maʼuhiga ʼo te ʼu moʼoni ʼae ʼe tuʼu ʼi te Tohi-Tapu. ʼE fakaha pe e Sehova te ʼu moʼoni ʼaia kia natou ʼae ʼe “lelei ʼonatou loto.” (Gaue 13:48) ʼE mahino te hahaʼi agavaivai  ʼaia, ʼe fakaʼaogaʼi e Sehova te tagata faifekau agatonu mo poto moʼo akoʼi mai te ʼu moʼoni ʼaia. (Mat. 11:25; 24:45) ʼE maʼuhiga ʼaupito ke tou mahino ki te ʼu moʼoni ʼaia. Kae, ʼe ʼaoga ke tokoni mai he tahi ke tou mahino ki te ʼu moʼoni ʼaia.—Taag. 3:13, 15.

5. Kotea te tahi meʼa maʼuhiga neʼe foaki mai e Sehova kia tatou?

⁵ Neʼe toe foaki mai e Sehova te pilivilesio ʼae ke tou akoʼi ki te hahaʼi te moʼoni ʼo ʼuhiga mo ia, pea mo tana ʼu fakatuʼutuʼu. (Mat. 24:14) Ko te logo ʼae ʼe tou fakamafola ʼe maʼuhiga ʼaupito. Kotea tona tupuʼaga? Koteʼuhi kapau ʼe tali e te hahaʼi te logo ʼaia, ʼe feala anai ke natou kau ki te famili ʼa Sehova, pea mo maʼu te maʼuli heʼe gata. (1 Tim. 4:16) Peʼe lahi peʼe veliveli tatatou kau ki te minisitelio, kae ʼe tou lagolago ki te gaue ʼae ʼe maʼuhiga ʼaupito ʼi totatou temi. (1 Tim. 2:3, 4) ʼI toe pilivilesio leva tatatou kauga gaue mo te ʼAtua!—1 Ko. 3:9.

6. Kotea ʼae neʼe hoko ki ʼihi tagata ʼae neʼe mole natou leleiʼia te pilivilesio ʼae ke kauga gaue mo te ʼAtua?

⁶ Neʼe mole hage ʼihi Kilisitiano ko Timoteo. He neʼe mole natou leleiʼia te pilivilesio ʼae ke natou kauga gaue mo te ʼAtua. Ko Temasi neʼe manako ia ki te malama, pea neʼe ina liʼaki tana pilivilesio ʼae ke tauhi ki te ʼAtua fakatahi mo Paulo. (2 Tim. 4:10) Ko Fiselo mo Elemosene neʼe nā liʼaki tanā minisitelio, he neʼe lagi nā matataku naʼa fakatagaʼi naua ohage ko Paulo. (2 Tim. 1:15) Ko Imeneo, mo Alesatelo pea mo Fileto neʼe natou liliu ko he kau aposita pea neʼe natou mavae ʼi te moʼoni. (1 Tim. 1:19, 20; 2 Tim. 2:16-18) ʼI te kamata, neʼe lagi felogoi lelei te ʼu tagata fuli ʼaia mo Sehova. Kae neʼe mole kei maʼuhiga leva kia natou te ʼu meʼa ʼae neʼe ina foaki age.

7. Kotea te ʼu faʼahiga meʼa fakakaka ʼae ʼe fakaʼaogaʼi e Satana ke tou liʼaki te ʼu koloa ʼae neʼe foaki mai e Sehova?

⁷ Kotea ʼae ʼe fai e Satana ke tou liʼaki ai te ʼu koloa ʼae neʼe foaki mai e Sehova? Tou vakaʼi ʼihi faʼahiga meʼa fakakaka ʼe fakaʼaogaʼi e Satana. ʼE ina fakaʼaogaʼi te ʼu fakafiafia, mo te televisio, mo te ʼu ʼata, mo te Neti, mo te ʼu nusipepa, pea mo te ʼu tohi moʼo uga tatou ke tou maʼu he faʼahiga manatu, pea mo he aga ka fakamamaʼo mamalie ai tatou mai te moʼoni. Pea ʼe faiga Satana ke tou matataku ki te tagata peʼe ko te fakataga, ke tou tuku ai te faifakamafola. Pea ʼe ina toe uga tatou ke tou fakalogo ki “te ʼatamai malama hala” ʼa te kau aposita ke puli ai tatatou tui.—1 Tim. 6:20, 21.

8. Kotea te ako ʼe ke taʼofi mai te meʼa ʼae neʼe hoko kia Daniel?

⁸ Kapau ʼe mole tou tokakaga ʼe feala anai ʼaki te temi ke tou fakamamaʼo mai te moʼoni. Tou vakaʼi te meʼa neʼe hoko ki te tehina ko Daniel, * ʼae neʼe ina leleiʼia te ʼu gaoʼi viteo. ʼE ina ui fenei:  “Neʼe au kamata gaoʼi ʼi toku taʼu hogofulu. ʼI te kamata neʼe lelei pe te ʼu meʼa gaoʼi viteo, kae faifai pea neʼe au filifili leva ia he ʼu meʼa gaoʼi viteo ʼe maʼu ai te agamalohi mo te faifakalauʼakau.” Ki muli age, neʼe gaoʼi ia Daniel hola ʼe hogofulu ma nima ʼi te ʼaho fuli. ʼE ina toe ui fenei: “Neʼe au iloʼi lelei pe ʼe au fakamamaʼo mai ia Sehova ʼi taku gaoʼi ʼaia, pea mo te lahi ʼo te temi ʼae neʼe au fakaʼaogaʼi ki ai. Kae neʼe au ui pe au ʼe mole fakaʼuhiga kia au te ʼu pelesepeto ʼo te Tohi-Tapu.” Koia, kapau ʼe mole tou tokakaga ʼe feala ʼaki te ʼu fakafiafia kovi ke tou liʼaki ai te moʼoni. Kapau ʼe hoko te faʼahi ʼaia kia tatou, pea ʼe mole kei tou taupau anai te ʼu meʼa maʼuhiga ʼae neʼe foaki mai e Sehova.

9. Neʼe fakatatau e Paulo ia Timoteo kitea, ʼo mulimuli kia 1 Timoteo 1:18, 19?

⁹ Lau ia 1 Timoteo 1:18, 19. Neʼe fakatatau e Paulo ia Timoteo ki he tagata solia. Pea neʼe ina fakalotomalohiʼi ia ia ke ina “hoko atu te tau ʼae ʼe lelei.” Neʼe mole ko he tau moʼoni ia, kae neʼe ko he tau fakalaumalie. Kotea la he ʼu fahaʼi ʼe tatau ai ia te kau Kilisitiano mo he ʼu tagata solia ʼe kau ki te tau? Kotea te ʼu kalitate ʼae ʼe tonu ke maʼu e te kau solia ʼa Kilisito? Tou toʼo he ʼu ako ʼe nima mai te fakatata ʼae neʼe fai e Paulo. ʼE tokoni mai anai te ʼu ako ʼaia ke tou taupau maʼu te moʼoni.

10. He koʼe ʼe tonu ke tou faiga ke malohi tatatou pipiki ʼae ki te ʼAtua?

¹⁰ Tou pipiki malohi ki te ʼAtua. Ko he tagata solia lelei ʼe agatonu. ʼE tau mo tona malohi katoa moʼo puipui he tahi peʼe ko he meʼa ʼe maʼuhiga. Neʼe fakalotomalohiʼi e Paulo ia Timoteo ke faiga ke malohi tana pipiki ʼae ki te ʼAtua. (1 Tim. 4:7) Kapau ʼe malohi tatatou ʼofa ki te ʼAtua pea mo tatatou pipiki kia te ia, pea ʼe tou faiga malohi anai ke tou taupau maʼu te moʼoni.—1 Tim. 4:8-10; 6:6.

11. He koʼe ʼe tonu ke tou faiga malohi ke tou fai te meʼa ʼae ʼe lelei?

¹¹ Tou faiga malohi ke tou fai te meʼa ʼae ʼe lelei. ʼE tonu ki he tagata solia ke akoako malohi ke feala hana nofo teuteu ki te tau. Neʼe malohi ia Timoteo ʼi te faʼahi fakalaumalie, he neʼe mulimuli ki te tokoni ʼa Paulo ke hola mai te ʼu holi ʼae ʼe kovi, ke ina fakaha te ʼu kalitate Fakakilisitiano, pea ke fakatahi mo te ʼu tehina mo tuagaʼane. (2 Tim. 2:22) Neʼe tonu ai ke faiga malohi. ʼO toe feia mo tatou, ʼe tonu ke tou faiga ʼo fai te meʼa ʼae ʼe lelei, ke tou lava tauʼi ʼotatou ʼu holi ʼae ʼe kovi. (Loma 7:21-25) ʼE toe maʼua foki ke tou faiga malohi ʼo liʼaki totatou ʼuluagaaga ʼafea, kae tou kofuʼi te ʼuluagaaga foʼou. (Efe. 4:22, 24) Pea ka ʼe tou gaʼegaʼe ʼi te ʼosi ʼo tatatou gaue, ʼe lagi tonu anai ke tou faiga malohi ke tou olo ʼo fono.—Hep. 10:24, 25.

12. ʼE feafeaʼi hatatou akoako ke tou fakaʼaogaʼi lelei te Folafola ʼa te ʼAtua?

¹² ʼE tonu ki he tagata solia ke ina akoako te fakaʼaogaʼi ʼo tana ʼu mahafu. Pea ʼe tonu ke ina fai tuʼumaʼu ke liliu ai ʼo faiva. ʼO toe feia, ʼe tonu ke tou akoako ke tou fakaʼaogaʼi lelei te Tohi-Tapu. (2 Tim. 2:15) ʼE akoako lelei tatou ʼi ʼatatou ʼu fono. Kae kapau ʼe tou loto ke tui te hahaʼi ʼe maʼuhiga ia te ʼu moʼoni ʼae ʼe tuʼu ʼi te Tohi-Tapu, ʼe tonu mo tatou ke tou tahi ako tuʼumaʼu te Tohi-Tapu. ʼE tonu ke tou fakaʼaogaʼi ia te Tohi-Tapu moʼo fakamalohiʼi tatatou tui. Kae ʼe mole gata pe mo tatatou lau ia te Tohi-Tapu. Ke tou mahino ki te fakaʼuhiga ʼo he vaega pea mo tona maʼuliʼi, ʼe tonu ke tou metitasio ki ai pea mo fai he ʼu fekumi ʼi ʼatatou tohi. (1 Tim. 4:13-15) Pea ʼe feala anai hatatou fakaʼaogaʼi te Tohi-Tapu moʼo akoʼi te hahaʼi. ʼI te aluʼaga ʼaia, ʼe mole gata pe ki tatatou lau age he vaega Tohi-Tapu. Ka tou lau he vaega Tohi-Tapu ki he tahi, ʼe tou tokoni anai ke mahino ki ai pea ke ina iloʼi ai tona maʼuliʼi. Koia, ka tou tahi ako tuʼumaʼu te Tohi-Tapu, ʼe tou popoto ai  ʼi tona fakaʼaogaʼi moʼo akoʼi te hahaʼi.—2 Tim. 3:16, 17.

13. He koʼe ʼe tonu ke tou fakasiosio poto ʼo mulimuli kia Hepeleo 5:14?

¹³ Tou fakasiosio poto. E tonu ke iloʼi fakatomuʼa e he tagata solia he tuʼutamaki ka hoko ke feala hana tekeʼi. ʼO toe feia mo tatou, ʼe tonu ke tou iloʼi fakatomuʼa te ʼu aluʼaga ʼae ʼe fakatupu tuʼutamaki ʼi te faʼahi fakalaumalie, pea ke tou tekeʼi. (Taag. 22:3; lau ia Hepeleo 5:14.) Ohage la, ʼe tonu ke tou fakasiosio poto moka tou filifili tatatou ʼu fakafiafia. ʼI te agamahani, ʼe ha ʼi te u fakafiafia ʼi te televisio pea mo te ʼu ʼata he ʼu aga heʼe ʼaoga. Kae, ʼe fehiʼa te ʼAtua ki te aga ʼaia pea ʼe fua kovi kia tatou pea mo ʼihi. Koia, ʼe tou tekeʼi te ʼu fakafiafia ʼae ʼe natou pulihi mamalie ai totatou ʼofa ki te ʼAtua.—Efe. 5:5, 6.

14. Neʼe maʼu feafeaʼi e Daniel te fakasiosio poto?

¹⁴ Ko Taniela ʼae neʼe kua tou ʼosi palalau ki ai, neʼe mahino leva kia ia te tuʼutamaki ʼo te ʼu meʼa gaoʼi viteo ʼae ʼe maʼu ai te agamalohi mo te faifakalauʼakau. Neʼe ina fai he ʼu fekumi ʼi te Tanakiʼaga Tohi ʼi Te Neti ʼo ʼuhiga mo te faʼahi ʼaia. Neʼe kotea tona fua? Neʼe ina fakagata tana gaoʼi mo te ʼu faʼahiga meʼa gaoʼi viteo ʼaia ʼe mole lelei ki he kau Kilisitiano. Pea neʼe ina toe tuku tana gaoʼi moʼo ʼihi ʼi te Neti. ʼE ui fenei e Daniel: “ ʼI te temi nei, ʼe au alu ʼo gaohi meʼa ʼi tuʼa. Pea ʼe au fakatahi mo ʼoku tehina mo tuagaʼane. Kae, ʼe mole kei au gaoʼi mo te ʼu meʼa gaoʼi viteo.” ʼI te temi nei kua pionie mo tagata ʼafea ia Daniel.

15. He koʼe ʼe fakatupu tuʼutamaki te ʼu fakamatala loi ʼa te kau aposita?

¹⁵ Ohage ko Timoteo, ʼe tonu ke tou ako ke tou iloʼi fakatomuʼa te tahi tuʼutamaki ʼaeni: te ʼu fakamatala loi ʼae ʼe fakamafola e te kau aposita. (1 Tim. 4:1, 7; 2 Tim. 2:16) Ohage la, ʼe faiga anai te kau aposita ke natou fakamafola ni loi ʼo ʼuhiga mo ʼotatou tehina, peʼe ke mole kei tou falala ki te kautahi ʼa Sehova. ʼE feala ʼaki te ʼu fakamatala loi ʼaia, ke vaivai ai tatatou tui. ʼE mole tonu ke tou tui ki te ʼu fakamatala loi ʼaia. Kotea tona tupuʼaga? Koteʼuhi ko te ʼu tagata ʼaia “kua ʼulihi ʼonatou ʼatamai, pea ʼe mole kei natou mahino ki te moʼoni.” ʼE natou fakatupu he ʼu “fihi ʼo ʼuhiga mo he ʼu kupu.” (1 Tim. 6:4, 5) ʼE natou loto ke tou tui ki ʼanatou fasituʼu, pea ke mole kei tou falala ki ʼotatou tehina.

16. Kotea ʼae ʼe feala ke fakaleluʼi ai tatou mai te ʼu meʼa ʼae ʼe maʼuhiga?

¹⁶ ʼAua naʼa fakaleluʼi tatou. Ohage ko “he  tagata solia lelei ʼa Kilisito Sesu,” neʼe tonu ke faiga malohi ia Timoteo moʼo fakahoko tana minisitelio. Neʼe mole tonu ke fakaleluʼi ia ia, ʼo ina kumi ke ina fakahoko he tahi age fakatuʼutuʼu ʼi tona maʼuli, peʼe ke maʼu koloa. (2 Tim. 2:3, 4) ʼO toe feia mo tatou, ʼe mole tou fakamuʼamuʼa anai te fia maʼu koloa, naʼa mole kei tou tokakaga ai ki te ʼu meʼa ʼae ʼe maʼuhiga. Ko “te malohi fakahala ʼo te ʼu koloa,” ʼe feala ke puli ai tatatou ʼofa kia Sehova, mo tatatou lotofakafetaʼi ki tana Folafola, pea mo tatatou fia vaevae ia te moʼoni ki ʼihi. (Mat. 13:22) ʼE tonu ke tou maʼuli fakafeʼauga, pea mo fakaʼaogaʼi totatou temi, mo totatou malohi katoa, ke tou ‘haga fakamuʼamuʼa ai ia te Puleʼaga.’—Mat. 6:22-25, 33.

17-18. Kotea ʼe feala ke tou fai ke tou puipui ai tatou ʼi te faʼahi fakalaumalie?

¹⁷ Tou fakakaukauʼi fakatomuʼa te meʼa ʼae ka tou fai. ʼE tonu ki he tagata solia ke ina fakakaukauʼi fakatomuʼa te meʼa ʼae ka ina fai moka hoko he tuʼutamaki. Kapau ʼe tou fia puipui te ʼu koloa ʼae neʼe foaki mai e Sehova, ʼe tonu mo tatou ke tou iloʼi te meʼa ʼae ka tou foimo fai anai moka hoko he tuʼutamaki. Kotea ʼae ka tokoni mai anai ke tou fai te faʼahi ʼaia? ʼE tonu ke tou fakakaukau fakatomuʼa ki ai.

¹⁸ Tou toʼo te faʼifaʼitaki ʼaeni: Ohage la, ʼi muʼa ʼo te malaga ʼo te vakalele, ʼe kole e te ʼu fafine ʼae ʼe gaue ʼi te vakalele ki te kau folau, ke natou iloʼi pe ʼe tuʼu ʼifea te ʼu matapa ʼae ʼe feala ke natou feholaki ai mo kapau ʼe hoko he tuʼutamaki. Kotea tona tupuʼaga? Ke feala hanatou feholaki fakavilivili. ʼO toe feia pe, ʼi muʼa ʼo hatatou olo ki te Neti, peʼe ko te sioʼi ʼo he ʼata peʼe ko he fakafiafia ʼi te televisio, ʼe tonu ke tou iloʼi fakatomuʼa te meʼa ʼae ka tou fai anai moka ha mai he ʼu felaveʼi fakasino heʼe ʼaoga, peʼe ko te agamalohi, peʼe tou logo ki he ʼu palalau ʼa he kau aposita. Kapau ʼe tou fakakaukauʼi fakatomuʼa te tuʼutamaki ʼe feala ke hoko, ʼe tou iloʼi anai te meʼa ʼae ʼe tonu ke tou foimo fai. ʼE tou puipui ai tatou ʼi te faʼahi fakalaumalie, pea mo tou maʼa kia mata ʼa Sehova.—Pes. 101:3; 1 Tim. 4:12.

19. Kapau ʼe tou puipui te ʼu koloa ʼae neʼe foaki mai e Sehova, ʼe fua lelei feafeaʼi anai kia tatou?

¹⁹ Neʼe foaki mai e Sehova te ʼu moʼoni ʼae ʼe tuʼu ʼi te Tohi-Tapu, pea mo te pilivilesio ʼae ke tou akoʼi te ʼu moʼoni ʼaia ki te hahaʼi. Kapau ʼe tou puipui te ʼu koloa ʼaia, ʼe fua lelei anai kia tatou. ʼE tou maʼu anai he leʼo ʼo loto ʼe lelei, mo he ʼuhiga ʼo totatou maʼuli, pea mo te fiafia ʼae ke tou tokoni ki te hahaʼi ke natou iloʼi ia Sehova. ʼAki te tokoni ʼa Sehova, ʼe feala anai ke tou taupau maʼu te ʼu meʼa ʼae neʼe ina foaki mai.—1 Tim. 6:12, 19.