Neʼe au tupu ʼi te taʼu 1954, ʼi te kolo ko Saint Paul, ʼi Minnesota, ʼi Amelika, ʼi he famili Katolika. Ko ʼaku matuʼā neʼe mole koloaʼia pea neʼe mole masisiva. Neʼe au tuʼulaga lua ʼi te toko nima fanau. ʼI taku kei veliveli, neʼe au ako ʼi te fale ako Katolika, pea neʼe au tauhi misa. Kae neʼe mole lahi te ʼu meʼa ʼae neʼe au iloʼi ʼo ʼuhiga mo te Tohi-Tapu. Neʼe au tui pe neʼe ʼi ai he ʼAtua neʼe ina fakatupu ia meʼa fuli, kae neʼe au manatu neʼe mole feala ki te lotu Katolika ke tokoni mai ke au tauhi ki te ʼAtua ʼaia.

ʼI toku ʼuluaki taʼu ʼi te Fale Ako ko William Mitchell, ʼae ʼe ako ai te lao, neʼe ʼomai te taumatuʼa ko te ʼu Fakamoʼoni ʼa Sehova kio ʼoku. Neʼe au lolotoga fai taku fo, koia neʼe nā ui mai ʼe nā toe liliu mai anai. ʼI tanā toe liliu mai ʼaia, neʼe kua au teuteuʼi ʼaku fehuʼi ʼe lua: “He koʼe ko te hahaʼi agakovi ʼe lelei age tonatou maʼuli ʼi te hahaʼi agalelei?” pea “Kotea ʼae ʼe tonu ke fai e te hahaʼi ke natou fiafia ai?” Neʼe au tali te tohi La vérité qui conduit à la vie éternelle pea mo te Tohi-Tapu. Fakaliliu ʼo Te Malama Foʼou ʼae neʼe fuluʼi hega tona takafi. Pea neʼe au lotolelei ke fai haku ako Tohi-Tapu. Ko te ako ʼaia neʼe tokoni mai ke au mahino ki he ʼu manatu foʼou. Neʼe au fiafia ʼaupito ʼi taku iloʼi ʼae ʼe ko te Puleʼaga  ʼo Te ʼAtua ʼae ka ina puleʼi anai te kele. Neʼe au mahino ai neʼe mole he fua lelei ʼo te pule ʼa te tagata pea neʼe kua mafola ʼi te malamanei te mamahi pea mo te heʼe faitotonu.

ʼI te kamata ʼo te taʼu 1982, neʼe au foaki toku maʼuli kia Sehova, pea ki muli age ʼi te taʼu pe ʼaia, neʼe au papitema ʼi te Fakatahi Lahi ʼae neʼe ko tona kupu tafito “La vérité du Royaume” pea neʼe fai ʼi te foʼi fale lahi ʼo te kolo ko Saint Paul. ʼI te vahaʼa ʼae neʼe hoa mai ki ai, neʼe au toe liliu ki te foʼi fale ʼaia ke au fai taku sivi ʼi te ako ke feala haku liliu ko he avoka, ʼi Minnesota. ʼI te kamata ʼo te mahina ʼo Oketopeli, neʼe fakaha mai kua au maʼu toku pepa pea neʼe kua feala leva ke au gaue ko he avoka.

ʼI te Fakatahi Lahi ʼaia, neʼe au felaveʼi mo te tehina ko Mike Richardson neʼe gaue ʼi te Petele ʼo Brooklyn. Neʼe ina fakaha mai neʼe fakatuʼu ʼi te Petele he selevisi ʼe tokaga ki te haofaki ʼo te kau Fakamoʼoni ʼa Sehova ʼaki te ʼu lao fakatagata. Neʼe au manatuʼi ai te ʼu palalau ʼa te enuke Etiopea ʼae ʼe tuʼu ia Gaue 8:36, pea neʼe au fai ai te fehuʼi ʼaeni kia au totonu: “Kotea ʼae ʼe ina taʼofi ai au ke au tokoni ki te selevisi ʼaia?” Neʼe au tohi ai taku pepa ke au gaue ʼi te Petele.

Neʼe mole fiafia ʼaku matuʼā ʼi taku liliu ko he Fakamoʼoni ʼa Sehova. Neʼe fia iloʼi e taku tamai pe ʼe ko taku gaue ʼaia ʼi te Petele ʼe fua lelei anai ki taku gaue ʼae ko he avoka. Neʼe au fakamahino age ʼe mole totogi anai au, kae ʼe foaki mai pe anai he kiʼi tokoni ʼi te mahina fuli ohage pe ko te kau Petelite fuli ʼae.

Neʼe kua au kamata gaue ʼi he telepinale, koia neʼe mole feala ai ke au ulu atu aipe ki te Petele. Kae neʼe kamata leva taku gaue ʼi te Petele ʼo Brooklyn ʼi te taʼu 1984. Neʼe au gaue ʼi te selevisi ʼe tokaga ki te haofaki ʼo te kau Fakamoʼoni ʼa Sehova ʼaki te ʼu lao fakatagata. Ko te poto ʼae neʼe au maʼu ʼi taku gaue ʼi te telepinale neʼe ʼaoga mai leva ki taku gaue foʼou ʼaia.

ʼI Novepeli 1983, neʼe totogi e te kau Fakamoʼoni ʼa Sehova te fale ʼae ko te Stanley, ʼi te kolo ʼo Jersey City, ʼi New Jersey. Neʼe loto e te ʼu tehina ke toe faʼu te hila mo te ʼu tuio ʼo te fale ʼaia. Koia neʼe natou kole ai te fakagafua ke natou fai te ʼu gaue ʼaia. ʼI tanatou felogoi mo te ʼu pule ʼo te kolo, neʼe fakaha age e te ʼu tehina tanatou loto ʼae ke fakaʼaogaʼi te fale ʼaia moʼo fai ai ʼanatou fakatahi lalahi. Kae ʼo mulimuli ki te ʼu lao ʼo te kolo, neʼe feala pe ke fakaʼaogaʼi he ʼu fale ki te tauhi moka neʼe tuʼu ʼi he koga meʼa ʼe nonofo ai te hahaʼi. Kae ko te fale ʼae ko te Stanley neʼe tuʼu ia ʼi te loto kolo, pea neʼe lahi ai te ʼu fale koloa. Koia, neʼe mole tali ai e te ʼu pule ʼo te kolo ke fai e te ʼu tehina te ʼu gaue. Neʼe toe fai e  te ʼu tehina tanatou kole ki te ʼu pule lalahi ʼo te kolo, kae neʼe natou fakafisi.

ʼI toku ʼuluaki vahaʼa ʼi te Petele, neʼe fai he tagi ʼa te kautahi ki te telepinale ʼuhi ko te mole fakagafua age ke fai te ʼu gaue. Neʼe hoki ʼosi age pe taku gaue ia taʼu ʼe lua ʼi te telepinale ʼi Saint Paul, ʼi Minnesota, koia neʼe au mahani ʼi te vakaʼi ʼo he ʼu faʼahiga fihifihia feia. Neʼe fakamahino e he tahi ʼi ʼatatou avoka, neʼe kua fakaʼaogaʼi te fale ʼae ko te Stanley ki he ʼu fakatahi lalahi kehekehe, ohage la ko te fakaha ʼo he ʼu ʼata peʼe ko te ʼu faimaholo. Pea he koʼe leva ʼe tapuʼi e te lao ke fai ai he ʼu fakatahi fakalotu? Neʼe vakaʼi e te telepinale te faʼahi ʼaia, pea neʼe ina fai te tonu ʼae ko te ʼu pule ʼo te kolo ko Jersey City neʼe mole natou fakaʼapaʼapa ki te ʼateaina ʼae ʼe matou maʼu ke fai tamatou tauhi. Neʼe fakatotonu ai e te telepinale ki te ʼu pule ʼo te kolo ke natou foaki te ʼu pepa ʼae ʼe fakagafua ai te gaue. Neʼe au kamata sio ai ki te tapuakinaʼi e Sehova te ʼu faiga ʼo tana kautahi ke hoko atu ʼana gaue ʼaki tana fakaʼaogaʼi te ʼu lao fakatagata. Neʼe au fiafia ʼaupito ʼi taku kau ki te malo ʼaia!

Neʼe toe faʼu katoa e te ʼu tehina te fale. Pea ʼi te ʼaho 8 ʼo Sepetepeli 1985, neʼe fai ai leva te fono ʼae neʼe foaki ai te ʼu pepa ʼo te kau ako ʼo te kalasi 79 ʼo Kalaate. Neʼe liliu te fale ʼaia ko te Fale Fakatahi ʼo te kolo ko New Jersey City, kae neʼe heʼeki ʼosi he taʼu katoa ki tona toe faʼu. Neʼe ko he pilivilesio kia au haku gaue fakatahi mo te selevisi ʼae ʼe tokaga ki te haofaki ʼo te kau Fakamoʼoni ʼa Sehova ʼaki te ʼu lao fakatagata pea mo lagolago ki te Puleʼaga ʼo Te ʼAtua. Neʼe lahi age taku fiafia ʼi taku gaue ʼi te Petele ʼi taku gaue ʼi te malama. Kae neʼe heʼeki au iloʼi ʼe fakaʼaogaʼi anai au e Sehova ki he tahi ʼu faifakamau.

ʼI te ʼu taʼu 1980, ko te ʼu lopitali mo te ʼu toketa neʼe mole natou fakaʼapaʼapa ki te fakafisi ʼa te kau Fakamoʼoni ʼa Sehova ia te toto. Neʼe faigataʼa tafito ki te ʼu fafine faitama he neʼe manatu te kau tuʼi fakamau ʼe mole fakagafua e te lao ke fakafisi te ʼu fafine faitama ki te toto. Neʼe natou ui ʼe mate anai te faʼe mo kapau ʼe mole ʼai ki ai te toto pea ʼe hala mo faʼe anai te kiʼi tamasiʼi.

ʼI te ʼaho 29 ʼo Tesepeli 1988, ʼi tana ʼosi fanauʼi tana kiʼi tamasiʼi, ko te tuagaʼane ko Denise Nicoleau neʼe lahi te toto ʼae neʼe alu ia ia. ʼI te kua hifo ʼo tona toto, neʼe kole age e te toketa ke ʼai kia ia hona foʼi huki toto. Neʼe fakafisi ia te tuagaʼane ko Nicoleau. ʼI te ʼaho ake, ko te lopitali neʼe ina kole ki te telepinale ke fakagafua age ke natou ʼai fakakinau te toto kia ia. Ko te tuʼi fakamau neʼe mole ina kumi te manatu ʼa te tuagaʼane ko Nicoleau peʼe ko tona ʼohoana, pea neʼe mole ina fakaha age pe la kia naua tana fakagafua ʼae ki te lopitali ke natou ʼai te toto ki te tuagaʼane.

ʼI te Feliaono, ʼaho 30 ʼo Tesepeli, logo la te fakafeagai ʼo tona ʼohoana pea mo tona famili, kae neʼe ʼai pe e te lopitali te toto ki te tuagaʼane ko  Nicoleau. I te afiafi ko ʼihi kaiga ʼo te tuagaʼane pea mo ʼihi kau tagata ʼafeā neʼe puke natou. Neʼe tukugakoviʼi natou, takua neʼe natou ʼa takai te palepale ʼa te tuagaʼane ke mole ʼai kia ia he foʼi huki toto e te kau gaue ʼo te lopitali. ʼI te Moeaki uhu, ʼaho 31 ʼo Tesepeli, ko te ʼu sulunale, mo te televisio pea mo te ʼu latio ʼo New York City neʼe natou fakamatala tanatou puke ʼaia.

ʼI te Monite uhu, neʼe au palalau mo te tuʼi fakamau ʼo te telepinale lahi, ko Milton Mollen. Neʼe au fakamatala age te ʼu meʼa ʼae neʼe hoko, kae tafito te fakatotonu ʼa te tahi tuʼi fakamau ke ʼai he foʼi huki toto kae neʼe heʼeki felogoi mo te taumatuʼa. Ko te tuʼi fakamau ko Mollen neʼe ina kole mai ke au toe liliu age ʼi te hili hoʼata ke ma palalau ki te ʼu aluʼaga ʼae neʼe hoko pea mo vakaʼi te ʼu lao ʼae ʼe pipiki ki ai. Pea ko te tehina ko Philip Brumley, ʼae neʼe takitaki kia au, neʼe ma kaugā olo. Ko te tuʼi fakamau ko Mollen neʼe ina toe fakaafe te avoka ʼo te lopitali ke kau ki tamatou felogoi ʼaia. Neʼe fakaalu ʼo kovi tamatou felogoi ʼaia. Ko te tehina ko Brumley neʼe ina tohi mai ʼi he moʼi pepa ke au palalau mamalie. Neʼe au fakakaukauʼi neʼe ko he tokoni lelei ʼaia kia au, he neʼe au ʼasili ita ʼi taku faiga ʼae ke au fakamoʼoni neʼe faihala te avoka ʼo te lopitali.

Hili ki ai he hola katoa, ko te Tuʼi Fakamau ko Mollen neʼe ina ui ko te aluʼaga ʼaia ka ʼuluaki vakaʼi anai ʼi te telepinale, ʼi te ʼaho ake. ʼI tama mavae ʼi tona pilo, neʼe ina ui mai “ ʼe faigataʼa anai te ʼaho ʼaia ki te avoka ʼo te lopitali.” Ko tona fakaʼuhiga, ʼe faigataʼa anai ki te avoka ʼo te lopitali ke ina fakalakatonuʼi te tonu ʼae ke ʼai te toto ki te tuagaʼane ko Nicoleau. Neʼe au manatu ai, neʼe fakafimalieʼi au e Sehova, ʼi tana fakaha mai ʼe matou malo anai. Neʼe malave ʼaupito ki toku loto tana fakaʼaogaʼi matou moʼo fakahoko tona finegalo.

Neʼe matou gaue kinakina ʼi te po ʼaia moʼo teuteuʼi tamatou palalau ʼi te telepinale. ʼE mole vaha mamaʼo te telepinale mo te Petele ʼo Brooklyn. Koia ko ʼihi ʼae ʼe gaue ʼi te selevisi ʼae ʼe tokaga ki te haofaki ʼo te kau Fakamoʼoni ʼa Sehova ʼaki te ʼu lao fakatagata neʼe natou olo lalo ki ai. ʼI tamatou ʼosi palalau, neʼe ui ai e te ʼu tuʼi fakamau ʼe toko fa neʼe mole tonu ke fai te fakatotonu ʼae ke ʼai he foʼi huki toto. Neʼe fakaha e te telepinale lahi neʼe moʼoni te tuagaʼane ko Nicoleau. Pea neʼe ina toe ui ko te fakagafua ke fai he meʼa ki he tahi ʼe mahaki kae neʼe heʼeki felogoi mo ia, ʼe ko te maumauʼi ʼaia ʼo te lao.

Mole faʼa fualoa ki ai, neʼe fakamoʼoni e te telepinale maʼoluga ʼo New York ko te tuagaʼane ko  Nicoleau neʼe feala ke ina filifili ke mole ʼai ki ai te toto. Neʼe au maʼu te pilivilesio lahi ke au liliu ko te avoka ʼa te kau Fakamoʼoni ʼa Sehova ʼo ʼuhiga mo te fakafisi ki te toto, ʼi te ʼu faifakamau ʼe fa neʼe hoko ʼi te ʼu telepinale lalahi kehekehe ʼo Amelika pea neʼe tou malo ai. Ko te aluʼaga ʼae neʼe hoko ki te tuagaʼane ko Nicoleau neʼe ko te ʼuluaki faifakamau ʼaia. (Vakaʼi te fakamatala ʼae ʼi te ʼa takai “ Te ʼu Malo ʼi Te ʼu Telepinale Lahi.”) ʼI te Petele, neʼe au gaue fakatahi mo te tahi ʼu avoka ʼo ʼuhiga mo te taupau ʼo te fanau, mo te ʼu mavete ʼohoana, pea mo te fakaʼaogaʼi ʼo te ʼu kele mo te ʼu fale.

ʼI taku ʼuluaki felaveʼi mo Dawn, ʼae neʼe ma au ʼohoana ki muli age, neʼe kua mavete pea neʼe ina pusiaki tokotahi tana ʼu tamaliki ʼe toko tolu. Neʼe gaue moʼo taupau tona kiʼi famili pea neʼe toe pionie. Neʼe faigataʼa tona maʼuli, pea neʼe malave kia au tana fia tauhi fakamalotoloto kia Sehova. ʼI te taʼu 1992, neʼe kau ki te Fakatahi Lahi ʼi New York City, neʼe ko tona kupu tafito “Porteurs de lumière” pea neʼe au kole age ai ke ma fakatahi. Neʼe ma ʼohoana leva hili ki ai te taʼu katoa. Ko taku ʼohoana mo he fafine ʼe maʼuli fakalaumalie pea mo fiafia, neʼe ko he meʼa ʼofa ia mai ia Sehova. Ko Dawn neʼe ina fakafiafiaʼi au ʼi te ʼaho fuli ʼo toma maʼuli.—Taag. 31:12.

ʼI te temi ʼae neʼe ma ʼohoana ai, ko te kau toe neʼe natou taʼu 11, mo 13, pea mo 16. ʼI taku faiga ʼae ke au liliu ko he tamai agalelei kia natou, neʼe au fai ai he ʼu fekumi ʼi ʼatatou tohi ʼo ʼuhiga mo he ʼu tokoni ki te ʼu famili ʼae kua toe ʼohoana te ʼu matuʼā pea neʼe kua natou maʼu fanau. Neʼe au faiga malohi leva ke au maʼuliʼi. ʼAki te fakalaka ʼo te ʼu taʼu, neʼe matou tau ai mo he ʼu fihifihia kae neʼe au fiafia lahi leva, he neʼe tali leleiʼi e te ʼu fanau ke au liliu ko hanatou tamai ʼofa pea mo honatou kaumeʼa ʼe natou falala ki ai. Neʼe ma tali leleiʼi tuʼumaʼu pe ki fale te ʼu kaumeʼa ʼo ʼama tamaliki, pea neʼe ma leleiʼia te fakatahi mo he kau tupulaga kei malolohi.

ʼI te taʼu 2013, ko au mo Dawn neʼe ma hiki ki te Wisconsin ke ma taupau ʼama matuʼā ʼae neʼe kua vaivavai. Neʼe au punamaʼuli he neʼe mole fakagata ai taku gaue ʼi te Petele. Neʼe kole mai ke hoko atu pe taku tokoni ki te selevisi ʼaia ʼo te kautahi.

ʼI Sepetepeli 2018, neʼe au tokagaʼi neʼe au tale tuʼumaʼu. Neʼe vakaʼi au e tamā toketa, kae neʼe mole ina maʼu te tupuʼaga ʼo taku tale. Ki muli age, ʼi Sanualio 2019, neʼe ui mai e he tahi toketa ʼe au maʼu he mahaki kovi pea ʼe tahitahiga tona maʼu pea ʼaki te temi ʼe mafola anai ʼi toku sino katoa.

Hili ʼaho ʼe tolu, ʼi taku lolotoga faigaoʼi, neʼe au toka ʼo fasi ai toku ʼuluʼuluʼi nima mataʼu. Neʼe ko haku agamahani te faigaoʼi. Koia, neʼe au mahino ai ʼe fakahaʼuhaʼu anai ʼo faigataʼa taku gaugaue. Neʼe au punamaʼuli ki te vave ʼo te kovi ʼo te mahaki. Neʼe ʼasili faigataʼa ai taku palalau, mo taku haʼele pea mo taku folo he meʼa.

Neʼe au fiafia lahi ʼi taku lava tokoni ki te kautahi ʼa Sehova ʼi toku ʼuhiga avoka. Pea neʼe au toe fiafia he neʼe au tohi he ʼu alatike ʼi he ʼu nusipepa neʼe feala ke lau e te ʼu toketa, mo te ʼu avoka, pea mo te ʼu tuʼi fakamau. Pea neʼe au toe fai he ʼu akonaki ʼi te malamanei katoa moʼo fakaha te lava filifili e te kau Fakamoʼoni ʼa Sehova ke faitoʼo natou kae mole ʼai he toto. Kae ohage ko tona ui ia Luka 17:10, ‘ko au ko he kaugana heʼe ʼaoga. Neʼe au fai pe te meʼa ʼae neʼe tonu ke au fai.’