Neʼe kotou lau fakalelei koa te ʼu Tule Leʼo ʼo te taʼu ʼaeni? Kapau ko ia, kotou ʼahiʼahiʼi tali ki te ʼu fehuʼi ʼaeni:

ʼE tonu ke feafeaʼi tatatou aga ki te kau Kilisitiano fakanofo?

ʼE maʼuhiga kia tatou tanatou tui, kae ʼe mole lelei hatatou fakamaʼuhigaʼi fau ia natou. ʼE mole tou “vikiʼi ia natou ʼae ʼe iloa.” (Suta 16, nota) ʼE mole tou faifehuʼi anai kia natou ʼo ʼuhiga mo tanatou ʼamanaki.—w20.01, p. 29.

He koʼe ʼe feala hau tui papau ʼe tokagaʼi koe e Sehova?

ʼE fakaha ʼi te Tohi-Tapu neʼe ina tokagaʼi koe ʼi muʼa ʼo tau tupu. ʼE fakalogo ki ʼau faikole. ʼE ina iloʼi ʼau manatu pea mo te ʼu meʼa ʼae ʼe ke logoʼi, pea ʼe fakafiafiaʼi e ʼau gaue lelei ia te ia. (1 Klk. 28:9; Taag. 27:11) Neʼe ina taki mai koe kia te ia.—w20.02, p. 12.

Ko te temi fea ʼae ʼe tonu ai ke tou palalau pea mo ʼae ʼe tonu ai ke tou fakalogologo?

ʼE tou fiafia ʼi te palalau ʼo ʼuhiga mo Sehova. ʼE tou palalau ki he tahi moka tou sio ka ina ʼamanaki fai he meʼa ʼe kovi. ʼE palalau age te kau tagata ʼafea ki te ʼu tehina mo tuagaʼane ʼae ʼe ʼaoga kia natou he ʼu tokoni. Pea ʼe tou nonofo fakalogologo anai ʼo mole tou kumi ke tou fia iloʼi peʼe ke tou fakaha te aluʼaga ʼo totatou gaue ʼi te ʼu fenua ʼae ʼe tapuʼi ai. ʼE mole tou fakamatala anai he ʼu faʼahi ʼe mole tonu ke palalauʼi.—w20.03, p. 20-21.

Kotea ʼae ʼe kehekehe ai te faga heʼe ia Soele kapite 2 mo te faga heʼe ia Fakaha kapite 9?

Ia Soele 2:20-29, ʼe kapu e te ʼAtua te ʼu heʼe pea ʼe ina fakapapau ʼe ina totogi anai te ʼu maumau ʼae neʼe natou fai. Pea hili ʼaia, ʼe ina folahi tona laumalie. Ko te ʼu faʼahi ʼaia neʼe hoko ʼi te temi ʼae neʼe ʼohofi ai e te kau Papiloni ia Iselaele pea ki muli age. ʼE talanoa ia Fakaha 9:1-11 ki te kau fakanofo, ʼae ʼe natou hage ko he faga heʼe, ʼi totatou temi pea ʼe natou tala te ʼu fakamau ʼa te ʼAtua ki te malama agakovi ʼaeni, ʼo iita ai natou ʼae ʼe kau ki te malama ʼaia.—w20.04, p. 3-6.

Ko ai te hau ʼo te noleto ia ʼaho nei?

ʼE ko Lusia mo te ʼu fenua ʼae ʼe kau mo ia. Neʼe natou gaohi koviʼi te hahaʼi ʼa te ʼAtua, ʼo natou tapuʼi te faifakamafola pea mo fehihiʼa ʼi te kau Fakamoʼoni. Pea ʼe haga fetauʼaki pe ia te hau ʼo te noleto mo te hau ʼo te saute.—w20.05, p. 13.

Ko te ʼu kalitate ʼe hiva ʼae ʼe tuʼu ia Kalate 5:22, 23, ʼe ko te ʼu kalitate pe koa ʼaia ʼae ʼe kau ki “te fua ʼo te laumalie”?

Kailoa ia. ʼE feala ke tokoni mai te laumalie maʼoniʼoni ke tou toe maʼu he tahi atu ʼu kalitate, ohage la ko te faitotonu. (Efe. 5:8, 9)—w20.06, p. 17.

He koʼe ʼe feala ke fua kovi kia koe tau ʼai ki te Neti he ʼu logo ʼo ʼuhiga mo koe totonu?

Ko ʼou pāki, mo ʼau tala manatu, pea mo ʼau ʼata ʼae ʼe ke ʼai ki te Neti, ʼe feala ai ke manatu e ʼihi ʼe ke fia vikiʼi pe ia koe, pea ʼe mole ke agavaivai.—w20.07, p. 6-7.

Kotea te ʼu ako ʼe feala ke taʼofi e te kau Kilisitiano mai te kau tagata tautai faiva?

ʼE natou gaue ʼi te temi pea ʼi te ʼu koga meʼa ʼae ʼe maʼu ai te ʼu ika. ʼE natou maʼu he ʼu meʼa gaue ʼe lelei pea mo iloʼi tona fakaʼaogaʼi. ʼE natou lototoʼa ʼi he ʼu aluʼaga faigataʼa. ʼE feala hatatou faʼifaʼitakiʼi ia natou moka tou faifakamafola.—w20.09, p. 5.

ʼE feafeaʼi hatatou tokoni ki te kau ako ke natou fakamalohiʼi tonatou ʼofa kia Sehova?

ʼE feala ke tou fakalotomalohiʼi ia natou ke natou lau te Tohi-Tapu ʼi te ʼaho fuli pea mo metitasio ki te meʼa ʼae ʼe natou lau. Pea tou akoʼi age kia natou pe ʼe feafeaʼi hanatou faikole.—w20.11, p. 4.

Ko ai “te hahaʼi fuli” ʼae “ ʼe toe maʼuʼuli ake anai . . . ʼaki ia Kilisito”?—1 Ko. 15:22.

Neʼe mole ui e te apositolo ko Paulo ʼe fakatuʼuake fuli anai te hahaʼi ki te maʼuli ʼi selo. Kae neʼe palalau ia ki te kau Kilisitiano fakanofo ʼae ‘neʼe fakamaʼoniʼoniʼi natou ʼi tanatou fakatahi mo Kilisito Sesu.’ (1 Ko. 1:2; 15:18)—w20.12, p. 5-6.

Kotea ʼae ka fai anai e te kau fakanofo hili tanatou fetogi “ ʼi hona aluʼaga fakafokifa, lolotoga te pupuhi ʼo te fakatagi pupuhi fakamuli”?—1 Ko. 15:51-53.

ʼE natou pule anai mo Sesu ki te hahaʼi ʼaki he toko ukamea. (Fkha. 2:26, 27)—w20.12, p. 12-13.