ʼE mole ko te fakaʼuhiga ʼaia ʼo te vaega. Kae ko ia ʼae ʼe toka, ko tona fakaʼuhiga ʼe lahi te ʼu faigataʼaʼia ʼe tau mo ia. Pea ʼe toe tuʼuake, ko tona fakaʼuhiga ʼe ina lava ʼutakiʼi te ʼu faigataʼaʼia ʼaia.

Tou vakaʼi te vaega ʼi muʼa atu pea mo ʼae ʼe hoa mai ki ai. ʼE ui fenei: “Aua naa ke fakatuu ni puleaki kaka, o hage ko he tagata agakovi, ia mua o te fale o te tagata agatonu, pea aua naa ke maumaui te kogamea ae e malolo ai ia ia. Koteuhi e higa [peʼe “toka,” NWT] tua fitu te tagata agatonu, pea e toe tuu ake ia ki oluga, kae e laku te kau agakovi ki te malaia. * Aua naa ke fakafiafia moka to tou fili, pea aua naa nekenekea tou loto moka heke ia ia.”—Taag. 24:15-17.

ʼE manatu e ʼihi ʼe fakaʼuhiga te vaega 16 ki he tahi ʼe agahala, kae ʼe fakahemala, pea ʼe toe felogoi lelei mo te ʼAtua. Neʼe tohi e te ʼu tagata takitaki lotu ʼe lua mai Pilitania, neʼe fena tona fakamahino e te ʼu tagata lotu ʼo te temi muʼa pea mo te temi nei ia te vaega ʼaia. Neʼe nā ui ko tona fakaʼuhiga ʼae neʼe feala pe ke agahala mamafa he tahi ʼe agalelei, kae ʼe ʼofa pe ia ki te ʼAtua he ʼe fakahemala, pea ʼe toe ʼofa pe te ʼAtua ia ia he neʼe fakahemala. ʼE lagi leleiʼia te manatu ʼaia e he tahi ʼe mole ina fia tekeʼi te agahala. ʼE lagi manatu ʼe feala ke agahala tuʼa lahi, kae ʼe fakamolemole tuʼumaʼu pe te ʼAtua ki ai.

Kae ʼe mole ko te fakaʼuhiga ʼaia ʼo te vaega 16.

Ko te kupu Fakahepeleo ʼae neʼe fakaliliu ʼaki te ʼu kupu “toka” pea mo “to” ʼi te ʼu vaega 16 mo 17, ʼe feala ke ʼi ai hona ʼu fakaʼuhiga kehekehe. Ohage la, ʼe feala ke fakaʼuhiga ki he manu ʼe toka ʼi te ala, peʼe ko he tahi ʼe to ifo mai te ʼato, peʼe ko he fisiʼi ʼone ʼe to ki te kele. (Tet. 22:4, 8; Amo. 9:9) Pea ʼe toe ʼi ai foki he fakaʼuhiga fakata ʼo te kupu Fakahepeleo ʼaia. Ohage la, ʼe ui fenei ia Pesalemo 37:23, 24: “E fakamalohii e te Eteleno te u lakaaga o te tagata lelei, pea e fiafia ia ia i tona ala; ka higa [peʼe “toka,” NWT] ia ia, e mole nofo ia ia i te kele, koteuhi e puke e te Eteleno tona nima.”—Taag. 11:5; 17:20.

Kae neʼe ui fenei e te Polofesea ʼo te teolosia ko Edward Plumptre: “Ko te kupu Fakahepeleo ʼae neʼe fakaliliu ʼaki te kupu ‘to’ neʼe mole fakaʼuhiga ʼi he temi ki te to ʼa he tahi ki te agahala.” Koia, ʼe toe fakamahino fenei e he tahi tagata sivi Tohi-Tapu te vaega 16: “ ʼE mole he ʼuhiga ʼo te gaohi koviʼi ʼo te hahaʼi ʼa te ʼAtua, koteʼuhi ʼe natou malo tuʼumaʼu pe. Kae ʼe mole malo ia te kau agakovi.”

ʼEi, ʼe mole palalau ia Taaga Lea 24:16 ki he tahi ʼe to ki te agahala peʼe ina fai he aga heʼe ʼaoga. Kae ʼe palalau ia ki he tahi ʼe felaveʼi mo he ʼu faigataʼaʼia ʼi te malama ʼaeni, pea ʼe lagi hoko liuliuga. Ohage la, ʼe feala pe ki he tahi ʼe faitotonu ke mahamahaki. ʼE toe feala pe foki ke fakatagaʼi ia ia e te puleʼaga. Kae ʼe ui ʼi te vaega ʼe tokoni anai ia Sehova kia ia ke ina ʼutakiʼi tana faigataʼaʼia ʼaia. Neʼe kua ke tokagaʼi la ʼe to lelei tuʼumaʼu pe te aluʼaga ʼo te ʼu kaugana ʼa te ʼAtua? Kotea tona tupuʼaga? Koteʼuhi ko Sehova “e tokoni . . . kia natou fuli ae e higa [peʼe “fetokaʼi,” NWT], pea e ina toe lagai natou fuli ae e mapelu ki lalo.”—Pes. 41:2-4; 145:14-19.

Ohage ko tona ui ʼi te vaega 17, ʼe mole fiafia “te tagata agatonu” moka ʼe tau ʼihi mo ni faigataʼaʼia. Kae ʼe fiafia ia he ʼe ina iloʼi “ ʼe fua lelei anai kia natou ʼae ʼe manavasiʼi ki te ʼAtua moʼoni, koteʼuhi neʼe natou manavasiʼi kia te ia.” —Ekl. 8:11-13; Sopo 31:3-6; Pes. 27:5, 6.