Neʼe ke lau fakalelei koa te ʼu Tule Leʼo ʼo te taʼu ʼaeni? Kapau koia, ʼahiʼahi tali ki te ʼu fehuʼi ʼaeni:

Kotea te faʼifaʼitaki ʼe tuku mai e Sehova ʼo ʼuhiga mo te tokaga ʼae ki te hahaʼi fafine?

ʼE mole fakapalatahi te ʼAtua, kae ʼe fai fakatatau ki te hahaʼi tagata mo te hahaʼi fafine. ʼE fagono ki te hahaʼi fafine, ʼo ina tokagaʼi te ʼu meʼa ʼae ʼi ʼonatou loto mo ʼonatou tuʼania. Pea ʼe falala te ʼAtua ʼe fakahoko e te hahaʼi fafine te gaue ʼae ʼe ina foaki age.​—w24.01, p. 15-​16.

ʼE feafeaʼi hatatou mulimuli kia Efeso 5:​7, ʼae ʼe ui ai: “ ʼAua naʼa kotou fakatahi mo natou”?

ʼE fakatokaga mai ia te apositolo ko Paulo ke ʼaua naʼa tou fakatahi mo ni hahaʼi ʼe mole natou fakalotomalohiʼi tatou ke tou fakalogo ki te ʼu lao ʼa te ʼAtua. ʼE kau ki te ʼu hahaʼi ʼaia ʼe mole lelei, ia natou ʼae ʼe tou fakatahi moʼoni mo natou ʼo feia pe mo natou ʼae ʼi te ʼu fakatahiʼaga ʼo te neti.​—w24.03, p. 22-​23.

Kotea te ʼu fakamatala loi ʼae ʼe tonu ke tou tokakaga ki ai?

ʼE tonu ke tou tokakaga ki ni fakamatala ʼe momoli mai e hotatou ʼu kaumeʼa kae neʼe mole natou vakaʼi pe ʼe moʼoni, mo he tohi ʼi te neti neʼe momoli mai e he tahi ʼe mole tou iloʼi, pea mo te kau aposita, ʼae ʼe natou fai loi ʼe natou fia iloʼi te moʼoni.​—w24.04, p. 12.

Kotea ʼae ʼe tou iloʼi pea mo ʼae ʼe mole tou iloʼi ʼo ʼuhiga mo te fakamauʼi e Sehova ʼi te ka haʼu ia te Hau ko Salomone ʼo feia mo natou ʼae neʼe mamate ʼi te ʼu kolo ko Sotoma mo Komola pea ʼi te Tulivio?

ʼE mole tou iloʼi pe kua fakatuʼā natou e Sehova ki te tautea heʼe gata. Kae ʼe tou iloʼi ʼe iloʼi e Sehova ia meʼa fuli pe pea ʼe lahi tona manavaʼofa.​—w24.05, p. 3-4.

Ko te ʼAtua ʼe ko te “Maka Malohi” peʼe ko he Utu, koia kotea ʼae ʼe feala ke tou tui papau ki ai? (Tet. 32:4)

ʼE feala ke tou olo ʼo nono ia Sehova. ʼE tuha mo te falala, heʼe ina fakahoko tuʼumaʼu ʼana fakapapau. Pea ʼe mole fetogi, ʼei, ʼe mole fetogi tona ʼuluagaaga pea mo tana fakatuʼutuʼu.​—w24.06, p. 26-​28.

Kotea ka tokoni atu moka ke fetogi kokelekasio?

Falala kia Sehova, ʼae ka tokoni atu ohage pe ko tana tokoni ki ʼana kaugana ʼi te temi muʼa. ʼAua naʼa ke fakatatau mo tau kokelekasio ʼafeā. Kau lahi ki te ʼu gaue ʼo tau kokelekasio foʼou, pea faiga ke ke maʼu hou ʼu kaumeʼa foʼou.​—w24.07, p. 26-​28.

Kotea te ʼu ako ʼe tou maʼu mai te ʼu lea fakatata ʼe tolu ia Mateo kapite 25?

ʼE fakaha ʼi te lea fakatata ʼo te ʼu ovi mo te ʼu tao te maʼuhiga ʼae ke tou agatonu. ʼI te lea fakatata ʼo te ʼu taʼahine taupoʼou popoto mo ʼae ʼe vavale, ʼe fakaha lelei mai ke tou nofo teuteu pea mo tokaga. Pea ʼe fakamaʼuhigaʼi ʼi te lea fakatata ʼo te ʼu taleta ke tou faʼa gaue pea mo faʼafai.​—w24.09, p. 20-​24.

Neʼe meta fia te maʼoluga ʼo te fakamalumaluʼaga ʼo te fale lotu ʼo Salomone?

ʼI ʼihi tohi ʼafea, ʼe tuʼu ia 2 Koloniko 3:4 “fasiga nima ʼe 120” ʼo fakafuafua ai ko te fakamalumaluʼaga neʼe meta 53 tona maʼoluga. Kae ʼi te tahi ʼu tohi ʼe tuha mo te falala ʼe tuʼu ai “fasiga nima ʼe 20” ʼo fakafuafua neʼe meta hiva tona maʼoluga. Pea ʼe ko te maʼoluga ʼaia ʼae neʼe feala ke tali e te matolu ʼo te ʼu kaupa ʼo te fale lotu.​—w24.10, p. 31.

Kotea te fakaʼuhiga ki he tagata faifekau fakaminisitelio ‘ke ʼohoana mo he fafine ʼe tahi’? (1 Tim. 3:12)

Ko tona fakaʼuhiga ʼe ʼohoana mo he fafine pe ʼe tahi pea ʼe mole tonu ke ina fai ni felaveʼi fakasino heʼe ʼaoga. Tahi ʼae, ʼe mole tokaga ki he tahi ʼu fafine ʼaki ni holi ʼe kovi.​—w24.11, p. 19.

He koʼe ʼe feala ke tou ui ʼe mole he pikipikiga ʼo te ʼu palalau ʼae ia Soane 6:53 mo te Taumafa ʼa Te ʼAliki?

ʼE talanoa ia Soane 6:53 ki te maʼuhiga ʼae ʼo te kai ki te kakano ʼo Sesu pea mo inu tona taʼataʼa. Neʼe fai e Sesu te ʼu palalau ʼaia ʼi te taʼu 32 H.T.S. ʼi Kalilea, ki te kau Sutea neʼe tonu ke natou tui kia te ia. Kae neʼe fai te Taumafa ʼa Te ʼAliki hili ki ai te taʼu, ʼi Selusalemi. Neʼe palalau ai Sesu kia natou ʼae ka kauga hau mo ia ʼi selo.​—w24.12, p. 10-​11.