Ko Gail ʼae neʼe tou talanoa ki ai ʼi te kamata, neʼe manatu ʼe mole ina lava katakiʼi anai te mate ʼo tona ʼohoana, ko Rob. Kaʼe, ʼe fakatalitali ʼaki he fakaʼamu lahi ke toe felaveʼi mo ia ʼi te malama foʼou ʼae ʼe fakapapauʼi mai e te ʼAtua. ʼE ina ui fenei: “Ko te vaega tafitō ʼae ʼe au leleiʼia, ʼe ko Apokalipisi 21:3, 4.” ʼE ui fenei ai: “E nofo anai te Atua totonu mo natou. E ina holoholoi anai te u loimata fuli mai onatou mata, pea e mole toe mau anai te mate: e mole toe mau anai he tagi, mo he lauga, mo he mamahi, koteuhi kua puli leva te u uluaki mea.”

ʼE ui fenei e Gail: “Ko te fakapapau ʼaia, ʼe ko he fakapapau taulekaleka pea mo fakalotofimalie. Kaʼe, ʼe au ʼofa mamahi ia natou ʼae kua mate he tahi neʼe natou ʼoʼofa mamahi ai kaʼe ʼe mole natou iloʼi ʼe feala ke natou toe sisio ki ai ʼi he ʼaho.” ʼE maʼuliʼi e Gail te ʼu akonaki ʼae ʼe tui ki ai ʼaki tana toʼo te selevisi temi katoa. ʼE alu ʼo fakaha te fakapapau ʼa te ʼAtua ki te ka haʼu, te temi ʼae “e mole toe mau anai te mate.”

ʼE lagi ke ui anai ‘ ʼE mole feala ia.’ Kaʼe, manatuʼi te faʼifaʼitaki ʼo Sopo. Neʼe kovi tona mahaki ʼo ina loto ai ke mate. (Sopo 2:7) Logo la neʼe loto e Sopo ke mate, kaʼe neʼe tui ʼe fakatuʼuake anai ia ia e te ʼAtua ke maʼuli ʼi te kele. Neʼe ina ui fenei ʼaki he lotofalala: “Oi, ka na ke loto pe ke fufu au i te nofoaga o te kau mate, . . . I te aho aia e ke paui mai anai kia au, pea e au tali anai kia koe, e ke fia sio anai ki te gaueaga o ou nima.” (Sopo 14:13, 15) Neʼe tui papau ia Sopo ʼe mole galoʼi anai ia ia e te ʼAtua pea ʼe ina fakatuʼuake anai.

Kua vave fakatuʼuake pe e te ʼAtua ia Sopo pea mo ʼihi atu hahaʼi ʼi te kele ʼae ka liliu anai ko he palatiso. (Luka 23:42, 43) ʼE fakamoʼoni fenei ia Gaue 24:15: “E i ai anai he toe tuuake.” Pea ʼe fakapapau fenei mai e Sesu: “Aua naa kotou punamauli ki te mea aena; koteuhi e hau te hola ae e logo ai anai natou fuli e nonofo i te u tanuma ki tona leo, pea e natou feulufi anai ki tua.” (Soane 5:28, 29) ʼE sio anai ia Sopo ki te fakahoko ʼo te fakapapau ʼaia. ʼE ina toe maʼu anai “tona malohi fakatupulaga” pea ʼe liliu anai tona kakano ʼo “foʼou ake ʼi tona kei tupulaga.” (Sopo 33:24, 25, MN) ʼE hoko anai te aluʼaga ʼaia kia natou fuli ʼae ʼe natou tali mo he lotofakafetaʼi lahi, ia te fakatuʼutuʼu fonu ʼo te ʼofa ʼa te ʼAtua ʼo ʼuhiga mo te fakatuʼuake ʼae ʼi te kele.

Kapau neʼe mate he tahi neʼe ke ʼofa mamahi ai, ʼe lagi mole puli fakafokifa anai tou lotomamahi ʼuhi ko te ’u faʼahi ʼae neʼe kua tou palalau ki ai. Kaʼe, ʼe feala ke ke maʼu he ʼamanaki moʼoni pea mo he lotomalohi, ʼaki tau metitasio ki te ʼu fakapapau ʼa te ʼAtua ʼae ʼe tou maʼu ʼi te Tohi-Tapu.—1 Tesalonika 4:13.

ʼE ke loto koa ke lahi age tau ako ʼo ʼuhiga mo te faʼahiga katakiʼi ʼo tou lotomamahi? Peʼe ʼi ai he tahi ʼu fehuʼi neʼe ke fai, ohage la “He koʼe koa ʼe fakagafua e te ʼAtua ia te agakovi pea mo te mamahi?” ʼE feala ke ke alu ki tamatou tuʼasila ʼi te Neti jw.org, ke ke maʼu ai he ʼu tali fakalotofimalie ʼi te Tohi-Tapu.