“Nee i ai he hekaaga fakahau i selo, pea nee heka he tahi i te hekaaga fakahau aena. Ko ae nee heka i ai, nee ina mau te agaaga o he u maka mauhiga ko te sasepe mo te saletuane; pea nee takatakai te hekaaga fakahau e he nuanua nee tatau mo te emelote.”—Apokalipisi 4:2, 3.

“Ko he malama gigila ae nee ina takatakai ia ia. Nee tatau te malama gigila aia nee ina takatakai ia ia mo te malama o te nuanua i he aho ua. Ko he paaki aia o te kololia o [Sehova].”—Esekiele 1:27, 28.

ʼI te ʼu meʼa ʼaia neʼe ha ki te apositolo ko Soane pea mo te polofeta ko Esekiele, neʼe fakaha ai te taulekaleka ʼo te ʼAtua Maʼoluga, ia Sehova. Neʼe talanoa ʼo ʼuhiga mo ni meʼa ʼe feala ke tou fakakaukauʼi, ohage la ko he maka maʼuhiga, mo he nuanua pea mo he hekaʼaga fakahau taulekaleka. ʼE nā toe fakaha foki ko te ʼafioʼaga ʼo Sehova ʼe fakaofoofo tona matalelei, mo fakafimalie pea mo tokalelei.

Ko te ʼu fakamatala ʼaia ʼo ʼuhiga mo te ʼAtua ʼe alu tahi mo te ʼu palalau ʼa te tagata faipesalemo, ʼae neʼe ina tohi fenei: “E lahi [ia Sehova] pea e gali osi ia ia mo te fakavikiviki, e fakamatakutaku ia ia i oluga o te u atua fuli. Koteuhi ko te u atua fuli o te atu puleaga ko ni taulaatua, kae nee fai e [Sehova] te atu lagi. E tuu i ona mua te fakaapaapa mo te mafimafi, e nofo te kololia mo te mamalu i tona sagatualio.”—Pesalemo 96:4-6.

Logo la te Maʼoluga ʼo Sehova, kaʼe ʼe ina fakaafe tatou ke tou fakaovi kia te ia ʼi te faikole. Pea ʼe ina fakaha mai ʼe fagono ki ʼatatou faikole. (Pesalemo 65:3) ʼE ʼofa mamahi te ʼAtua ia tatou pea ʼe tokaga mai. Koia ʼae neʼe ui fenei ai e te apositolo ko Soane: “E ofa te Atua.”—1 Soane 4:8.

“Nee fonu leva [ia te tisipulo Kilisitiano ko] Setefano i te Laumalie Maonioni, nee tagaki ake tona fofoga ki te lagi, pea nee sio leva ia ki te kololia o te Atua, pea mo Sesu nee tuu i te faahi matau o te Atua. Pea nee ina ui leva: Koeni, e au sio ki te lagi kua ava pea mo te foha o te tagata e tuu i te faahi matau o te Atua.”—Gaue 7:55, 56.

Neʼe fakamatala e Setefano te ʼu faʼahi ʼaia ki te kau takitaki lotu Sutea, ia natou pe ʼae neʼe natou matehi ia Sesu. Neʼe fakamoʼoni ʼi te meʼa ʼae neʼe ha, ʼe maʼuli moʼoni ia Sesu pea neʼe fakatuʼuake mo maʼu tona  tuʼulaga. Neʼe tohi fenei e te apositolo ko Paulo ʼo ʼuhiga mo te faʼahi ʼaia: “I [te] fakatuuake [e Sehova] ia [Sesu] Kilisito mai te kau mate, o fakanofo ia i tona nima matau i te u potu fakalagi, o maoluga age i te u pule fuli, mo te u malohi fuli, mo te u mafimafi fuli, mo te u mamalu fuli, pea mo te u higoa fuli e feala ke lau, o mole gata pe i te sekulo aeni, kae i te sekulo foki ka hau.”—Efeso 1:20, 21.

Neʼe mole talanoa pe ʼi te Tohi-Tapu ki te tuʼulaga maʼoluga ʼo Sesu kaʼe ʼe toe fakaha ai tana tokaga moʼoni ki te tagata, ohage pe ko Sehova. ʼI tana faifakamafola ʼi te kele, neʼe fakamalolo e Sesu te kau mahaki, mo te kau maʼimoa pea neʼe ina fakatuʼuake te kau mate. Pea neʼe ina fakaha tona ʼofa moʼoni ʼi te ʼAtua mo te tagata ʼaki tana foaki tona maʼuli ko he sakilifisio. (Efeso 2:4, 5) ʼI tana kua heka ʼi te toʼomataʼu ʼo te ʼAtua, ʼe kua vave fakaha e Sesu tana pule pea mo foaki ni tapuakina lahi ki te hahaʼi fakalogo ʼi te kele katoa.

“Nee au [te polofeta ko Taniela] sio leva, pea koeni, nee fakatuu ni hekaaga fakahau. Pea nee hekaheka leva te Matua o te u aho [ia Sehova]. . . . Nee laui afe mo afe natou ae nee tauhi kia ia, pea mo miliona mo miliona natou ae nee tutuu i ona mua.”—Taniela 7:9, 10.

ʼI te meʼa ʼae neʼe ha kia Taniela, neʼe mole sio pe ia ki he ʼaselo ʼe tahi kaʼe neʼe natou kaugā malie. ʼE lagi neʼe ko he aluʼaga fakaofoofo. Ko te kau ʼaselo ʼe ko te ʼu laumalie, ʼe natou popoto pea mo malolohi. Pea ʼi te ʼu ʼaselo ʼaia, ʼe ʼi ai ʼonatou tuʼulaga, ohage la ko te ʼu selafimi pea mo te ʼu selupino. ʼI te Tohi-Tapu, ʼe talanoa tuʼa 250 tupu ki te kau ʼaselo.

Ko te kau ʼaselo ʼe mole ko he ʼu hahaʼi neʼe mamate ʼi te kele pea neʼe fakatuʼuake ʼo olo ʼo maʼuʼuli ʼi selo. Neʼe fualoa te fakatupu e Sehova te ʼu laumalie ʼaia ʼi muʼa atu ʼo te fakatupu ʼo te tagata. ʼI te lolotoga fakatupu ʼae o te kele, neʼe sisio ki ai te kau ʼaselo pea natou kalaga fakafiafia.—Sopo 38:4-7.

ʼE kau te kau ʼaselo agatonu ʼa te ʼAtua ki he gaue maʼuhiga ʼe lolotoga fakahoko nei ʼi te kele. Ko te gaue ʼaia ʼe ko te fakamafola ʼo te logo lelei ʼo te Puleʼaga ʼo te ʼAtua. ʼE ko hanatou tahi faʼahiga tauhi ʼaia ki te ʼAtua. (Mateo 24:14) Ko tanatou kau ki te gaue ʼaia, neʼe fakaha ʼi te meʼa neʼe ha ki te apositolo ko Soane, ʼae neʼe tohi fenei: “Nee au sio leva ki he tahi age aselo ae nee lele i lotomalie o te lagi; nee ina mau he  Evaselio eteleno, ke fakaha kia natou fuli ae nee nonofo i te kele, ki te u puleaga fuli, mo te u faahiga fuli, mo te u lea fuli, pea mo te u hahai fuli.” (Apokalipisi 14:6) Logo la ʼe mole palalau te kau ʼaselo ki te hahaʼi ia ʼaho nei ohage ko tanatou fai ʼi te temi muʼa, kaʼe ʼe natou tokoni kia natou ʼae ʼe natou fakamafola te logo lelei ki te hahaʼi ʼae ʼe fakamalotoloto.

“Nee i ai leva he tau lahi i te lagi. Nee tau leva ia Mikaele [Sesu Kilisito] mo ana kau aselo ki te gata. Pea nee tau leva kia natou te gata mo tana kau aselo. Kae nee mole malo leva te gata mo tana kau aselo, pea nee mole toe mau leva he nofoaga kia natou i te lagi. Pea nee li leva ki fafo te gata lahi, te gata afea, ae nee higoa ko te tiapolo mo Satana, ae nee ina kakaai te kele katoa, nee li leva ia ia ki te kele, pea nee li foki ana kau aselo mo ia ki te kele.”—Apokalipisi 12:7-9.

Neʼe mole maʼu tuʼumaʼu ʼi selo te tokalelei. ʼI te kamata ʼo te hisitolia ʼo te tagata, neʼe ʼi ai he ʼaselo neʼe ina loto ke fai age te tauhi kia ia ʼo tupu ai tana agatuʼu kia Sehova. Neʼe liliu ko Satana ko tona fakaʼuhiga, ko “He Tahi ʼe Fakafeagai.” Ki muli age, neʼe ʼi ai ʼihi ʼaselo neʼe natou muliʼi ia ia pea neʼe natou liliu ai ko ʼana temonio. ʼE natou fakafeagai malohi kia Sehova pea ʼe natou fakaheʼi te tokolahi ke natou fakafeagai ki te takitaki ʼofa ʼa Sehova.

ʼE agakovi ia Satana mo ʼana temonio. ʼE natou liliu ko te ʼu fili ʼo te tagata pea ʼe natou fakatupu te ʼu mamahi ʼae ʼe hoko ʼi te kele. Ohage la, neʼe matehi e Satana te faga manu pea mo te ʼu kaugana ʼa te tagata agatonu ko Sopo. Pea neʼe ina matehi te ʼu fanau e toko hogofulu ʼa Sopo ʼaki tana fakatupu ia he “tuani matagi” ʼo maumauʼi te ʼapi ʼae neʼe natou fakatahi ai. Hili ʼaia, neʼe fakatupu leva e Satana ia Sopo “te ’u polo fakamataku, mai tona ʼalofi vaʼe ʼo aʼu ki te tumutumu ʼo tona ʼulu.”—Sopo 1:7-19; 2:7, MN.

ʼE kua vave pulihi pe ia Satana. Talu pe tona li ifo ʼae ki te kele, ʼe ina iloʼi “kua nounou pe tona temi.” (Apokalipisi 12:12) ʼE ko he logo lelei tatatou iloʼi ʼae kua vave pulihi ia Satana.

“Neʼe ke [Sesu] totogi maʼa te ʼAtua ia te ’u hahaʼi mai te ’u telepi kehekehe, mo te ’u lea kehekehe, mo te ’u hahaʼi kehekehe pea mo te ’u puleʼaga kehekehe. Pea neʼe ke fakaliliu ia natou ko he puleʼaga pea mo he ’u pelepitelo maʼa totatou ʼAtua, pea ʼe natou pule fakahau anai ki te kele.”—Fakaha 5:9, 10, MN.

Ohage pe ko te fakatuʼuake ʼo Sesu ki te maʼuli ʼi selo, ʼe toe fai feia pe anai ki ʼihi. Neʼe ui fenei e Sesu ki ʼana apositolo agatonu: “E au alu o teuteui mai he nofoaga kia koutou. Pea, . . . e au toe hau anai, pea  e au too anai koutou mo au, o uhi ko te kogamea e au nofo ai e kotou nofo ai anai.”—Soane 14:2, 3.

ʼE ʼi ai te fakatuʼutuʼu tafitō ʼo te olo ʼae ʼa natou ki selo. ʼE natou faʼufaʼu fakatahi anai mo Sesu ia te Puleʼaga ʼae ka pule anai ki te kele katoa pea ʼe foaki anai e te Puleʼaga ʼaia ni tapuakina ki te hahaʼi. Ko te Puleʼaga ʼaia ʼae neʼe ui age e Sesu ki ʼana tisipulo ke natou kole ʼi te faikole faʼifaʼitaki. ʼE ui fenei: “Tamatou Tamai ae e nofo i te atu lagi! Ke tapuha tou huafa; ke aumai tau pule; ke fai tou finegalo i te kele o hage ko selo.”—Mateo 6:9, 10.

“Nee au [apositolo ko Soane] logo leva mai te hekaaga fakahau ki he leo malohi ae nee ui: Koeni te tapenakulo o te Atua mo te u tagata! . . . E ina holoholoi anai te u loimata fuli mai onatou mata, pea e mole toe mau anai te mate: E mole toe mau anai he tagi, mo he lauga, mo he mamahi, koteuhi kua puli leva te u uluaki mea.”—Apokalipisi 21:3, 4.

ʼI te fakakikite ʼaia neʼe ha, ʼe talanoa ki te temi ʼae ka fakagata anai te pule ʼa Satana pea mo te fakaliliu ʼae ʼo te kele ko he palatiso. ʼE fakahoko anai te faʼahi ʼaia e Sesu pea mo natou ʼae neʼe fakatuʼuake mai te kele. ʼE pulihi anai te ʼu meʼa fuli ʼae ʼe ina fakatupu te mamahi ʼa te tagata. ʼO toe feia pe ki te mate ʼe pulihi anai ʼo talu ai.

Kaʼe feafeaʼi anai ki te toko lauʼi miliale hahaʼi ʼae kua mamate pea ʼe mole fakatuʼuake anai ki selo? Kua vave fakatuʼuake pe natou mo te ʼamanaki ʼae ke natou maʼuʼuli ʼo heʼe gata ʼi te kele ʼae kua liliu ko he Palatiso.—Luka 23:43.