Ko Ai Ia Te ʼAtua?
Ko te tokolahi ʼe tui ki te ʼAtua kae ʼe kehekehe ʼanatou manatu ʼo ʼuhiga mo tona ʼuluagaaga. ʼE ui e ʼihi ʼe ko he ʼAtua agafefeka he ʼe ʼe ina tauteaʼi te hahaʼi ʼuhi ko ʼanatou aga kovi. Ko ʼihi ʼe ko he ʼAtua ʼe agaʼofa pea ʼe lotofakamolemole gafua ki te ʼu agahala fuli pe. Ki ʼihi leva ʼe ko he ʼAtua ʼe mamaʼo fau pea ʼe mole tokaga mai kia tatou. ʼUhi ko te ʼu tala manatu kehekehe ʼaia, ʼe mole kei iloʼi ai e te hahaʼi pe ko ai moʼoni ia te ʼAtua.
ʼE maʼuhiga koa? ʼEi, ʼe ʼaoga ke ke iloʼi pe ko ai te ʼAtua. Pea ʼe hoki ke maʼu ai anai te ʼuhiga moʼoni ʼo tou maʼuli. (Gaue 17:26-28) ʼE tokagaʼi e te ʼAtua te ʼu faiga ʼae ʼe ke fai ke ke fakaovi ai kia te ia pea ʼe tokoni anai pea mo lahi tona ʼofa kia koe. (Sakopo 4:8) Pea ko te mahino totonu ʼae ʼo ʼuhiga mo te ʼAtua ʼae ka ke maʼu ai te maʼuli heʼe gata.—Soane 17:3.
ʼE feafeaʼi hau iloʼi lelei ia te ʼAtua? ʼE feala ke tou toʼo te faʼifaʼitaki ʼo hou kaumeʼa lelei. Neʼe feafeaʼi tau kamata fakakaumeʼa mo ia? Neʼe ke faiga muʼa ke ke iloʼi tona higoa, pea ki muli age kua ke mahino lelei ki tona ʼuluagaaga, te ʼu meʼa ʼae ʼe ina leleiʼia mo ʼae ʼe fehiʼa ki ai, mo te ʼu gaue neʼe kua ina fai pea mo ʼana fakatuʼutuʼu ki tona ka haʼu. Kua ke iloʼi lelei leva ia ia, ʼo tupu ai tau fia fakaovi ki ai.
Koia, ohage pe ko tou kaumeʼa, ʼe feala ke ke iloʼi lelei ia te ʼAtua ʼaki te ʼu aluʼaga ʼaeni:
ʼI te nusipepa ʼaeni, ʼe maʼu ai te ʼu tali ʼe fakatafito ki te Tohi-Tapu. ʼE tokoni atu anai te ʼu alatike ke ke iloʼi lelei ia te ʼAtua. Pea ʼe ke toe mahino anai ki te ʼu fua lelei ʼo tau felogoi lelei pea mo ia.
Te Tahi ʼu Manatu
TE TULE LE’O
Ko Ai Ia Te Huafa ʼo Te ʼAtua?
ʼE ke iloʼi koa ʼe ko te ʼAtua pe ʼae ʼe ina maʼu te huafa ʼaia?
