“Ke Hoko Mai Tou Puleʼaga”: Ko He Faikole ʼe Lau Fakaʼatamai e He Toko Lauʼi Miliona Hahaʼi
Neʼe kua ke faikole koa ke hoko mai la te Puleʼaga ʼo te ʼAtua? Talu mai fualoa mo te lau fakaʼatamai e te toko lauʼi miliona hahaʼi te ʼu palalau ʼaeni: “Ke hoko mai tou Puleʼaga.” He koʼe ʼe natou kole te faʼahi ʼaia? He neʼe ui e Sesu ki ʼana tisipulo ke natou faikole ki te Puleʼaga ʼo te ʼAtua.
Neʼe mole mahino atu aipe te ʼu tisipulo ʼa Sesu ki te ʼu meʼa fuli ʼae neʼe ina ui age ʼo ʼuhiga mo te Puleʼaga. ʼI te tahi ʼaho, neʼe natou fehuʼi fenei age kia ia: “ ʼAliki, ʼe ko te temi koa ʼaeni ʼe ke liufaki ai te puleʼaga ki Iselaele?” Neʼe mole tali fakahagatonu age e Sesu. Neʼe lagi natou punamaʼuli ai. (Gaue 1:6, 7) Ko tona fakaʼuhiga koa ʼe mole feala ke tou iloʼi pe kotea te Puleʼaga ʼo te ʼAtua peʼe hoko mai anai ʼafea? Kailoa ia.
ʼI te nusipepa ʼaeni, ʼe ke maʼu ai te tali ki te ʼu fehuʼi ʼaeni:
Kotea ia te Puleʼaga ʼo te ʼAtua?
He koʼe ʼe ʼaoga kia tatou te Puleʼaga ʼo te ʼAtua?
Ko ai te Hau ʼo te Puleʼaga ʼaia?
Ko ʼafea ka pule ai te puleʼaga ʼaia ki te kele?
Kotea ʼae ka ina fakahoko?
He koʼe ʼe tonu ke tou lagolago ki te Puleʼaga ʼo te ʼAtua ia ʼaho nei?
Te Tahi ʼu Manatu
AKONAKI TAFITO ʼO TE TOHI-TAPU
Kotea Te Puleʼaga ʼo Te ʼAtua?
Lolotoga tana faifakamafola ʼi te kele, neʼe palalau tuʼa lahi ia Sesu ʼo ʼuhiga mo te Puleʼaga ʼo te ʼAtua. Pea lolotoga ni lauʼi taʼu neʼe faikole ʼana hahaʼi ke hoko mai la te Puleʼaga ʼaia.
