Kapau la ʼe mole tupu te ʼu mamahi mai te ʼAtua, he koʼe koa ʼe hoko te ʼu hoge meʼa kai ʼi te kele katoa, te masiva, te ʼu tau fakamataku, te ʼu mahaki ʼae ʼe kovi ʼaupito pea mo te ʼu tuʼutamaki fakanatula? ʼE fakaha ʼi te Folafola ʼa te ʼAtua, te Tohi-Tapu, ia tupuʼaga ʼe tolu ʼo te ʼu mamahi ʼaia:

1. ʼE Kaikovi, ʼe Manumanū Pea ʼe Agakovi Ia Te Tagata. “E pule ai te tagata ki te tagata ke fakamamahii ia ia.” (Ekelesiasi 8:9) ʼE mamahi ʼihi he ʼe gaohi koviʼi natou e te hahaʼi ʼe heʼe haohaoa mo agakovi ʼaupito.

2. He ʼu Aluʼaga ʼe Hoko Fakafokifa. ʼE toe mamahi te hahaʼi “koteuhi e fakalogo te u mea fuli ki te temi pea mo tona u maliuliu.” (Ekelesiasi 9:11) Koia, ʼe feala pe ke hoko he tuʼutamaki fakafokifa ʼi he temi mo he faʼahi neʼe mole tou ʼamanaki ki ai, peʼe ko te mole lototokaga pe ʼa te hahaʼi peʼe ko hanatou faihala.

3. Te Takitaki Agakovi ʼo Te Malama ʼAeni. ʼE fakaha lelei mai pe ʼi te Tohi-Tapu te ʼuluaki tupuʼaga ʼo te ʼu mamahi ʼo te tagata. ʼE tohi fenei ai: “ ʼE nofo te malamanei katoa ʼi te malohi ʼo Satana.” (1 Soane 5:19) Ko Satana ia te Tevolo, neʼe ko he ʼaselo malohi neʼe tauhi ki te ʼAtua kae “neʼe mole haga nofo ia ʼi te moʼoni.” (Soane 8:44) Neʼe toe kau ʼihi atu ʼu ʼaselo mo Satana, ʼo natou fakafeagai ki te ʼAtua. Neʼe natou maʼu he ʼu holi ʼe kovi, pea neʼe natou liliu ko he ʼu temonio. (Senesi 6:1-5) Talu mai tanatou fakafeagai ʼaia ki te ʼAtua mo tanatou faiga ʼae ke natou fakaheʼi te malama ʼaeni. Pea ʼe toe ʼasili kovi age la ʼi totatou temi. Koia, “malaʼia ki te kele” he ʼe ita lahi ia te Tevolo, pea “ ʼe ina fakaheʼi te kele katoa.” (Fakaha 12:9, 12) Ko Satana ʼe ko he takitaki ʼe agamalohi mo agakovi ʼaupito. Pea ʼe fiafia ia moka ʼe mamahi ia te tagata. Koia, ʼe mole ko te ʼAtua ʼae ʼe ina fakamamahiʼi te hahaʼi. Kae ʼe ko Satana te tupuʼaga ʼo te ʼu mamahi.

FAKAKAUKAUʼI AGE MUʼA: Ko he tahi ʼe agakovi mo faifakapo ʼe loto ia ke fakamamahiʼi noa te hahaʼi. Kae ko “te ʼAtua ʼe ko te ʼofa.” (1 Soane 4:8) Pea “e mamao osi i te Atua te mea ae e hala, e mamao osi i te Mafimafi te agakovi!”—Sopo 34:10.

Kae ʼe feala pe ke ke fai te fehuʼi ʼaeni: ‘ ʼE kaku anai koa ki ʼafeā te fakagafua e te ʼAtua ia te takitaki agakovi ʼa Satana?’ Kua tou mahino ʼe fehiʼa ia te ʼAtua ki te agakovi pea ʼe ina logoʼi ʼotatou mamahi. Pea ʼe ʼekenaki fenei tatou ʼi tana Folafola: “Tuku kia te ia ʼakotou tuʼania fuli, he ʼe tokaga ia kia koutou.” (1 Petelo 5:7) ʼE ʼofa te ʼAtua ia tatou, pea ʼaki ia tona malohi, ʼe ina fakagata anai te heʼe faitotonu mo mamahi fuli pe. ʼE talanoa te alatike ʼae ka hoa mai ki tana faʼahiga fakahoko te faʼahi ʼaia. *