Ka pule anai ia te Puleʼaga ʼo te ʼAtua ki te malamanei katoa, ʼe liliu anai ia te kele ko he palatiso, pea ʼe maʼuli fiafia anai te hahaʼi ʼi te logo tahi. Neʼe fakanofo e te ʼAtua ia Sesu Kilisito ke pule ki te kele katoa. ʼE mole hage ia Sesu ko te kau taki ʼo te temi nei, ʼe tokaga lelei ia ki tana hahaʼi. ʼE ko he Hau manavaʼofa mo agalelei.—Esaia 11:4.

ʼE logo tahi anai te hahaʼi ʼi te malamanei katoa. ʼE mole toe fakakehekeheʼi anai natou ʼuhi ko tonatou lanu peʼe ko tonatou fenua. ʼE liliu anai ia te malamanei ko he hahaʼi pe ʼe tahi pea mo logo tahi. (Fakaha 7:9, 10) ʼE ʼoʼofa anai ia te hahaʼi fuli ki te ʼAtua pea mo ʼonatou kaiga. ʼE natou gaue fakatahi anai ʼo fakahoko ia te ʼuluaki fakatuʼutuʼu ʼa te ʼAtua, ʼae ko te tokaga ki te kele.—Pesalemo 115:16.

Ka tokaga anai te Puleʼaga ʼo te ʼAtua ki te kele, ʼe puleʼi katoa anai e te ʼAtua ia te ʼu malohi ʼo te natula. (Pesalemo 24:1, 2) ʼI te temi ʼae neʼe kei nofo ai Sesu ʼi te kele, neʼe ina fakaha ia te malohi ʼo te ʼAtua, ʼi tana fakagona te matagi ʼi te toe afā fakamataku. (Maleko 4:39, 41) Ka ʼafio anai Sesu ki te kele katoa, ʼe mole toe tuʼania anai he tahi ki he tuʼutamaki fakanatula. ʼE toe fakafealagia anai e te Puleʼaga ʼo te ʼAtua ke mauli fimalie ia te tagata ʼi te kele.—Oseo 2:20.

ʼE maʼuli malolo anai ia te hahaʼi fuli. ʼE mole he tahi ʼe mahaki anai, peʼe liliu ʼo matuʼa, peʼe mate anai. (Esaia 35:5, 6) ʼE maʼuli fiafia anai te hahaʼi ʼi he kele ʼe maʼa mo matalelei, ʼo hage pe ko te oloto ʼo Eteni ʼae neʼe maʼuli ai ia Atama mo Eva. ʼE hage anai ia te malama foʼou ko te oloto ʼo Eteni, ʼe maʼuli lelei anai te kele pea mo mahu te meʼa kai pea ʼe makokona anai te hahaʼi fuli. (Senesi 2:9) ʼE hage pe anai ko te fenua ʼo Iselaele ʼo te temi muʼa, ‘ ʼe tou kai anai tatatou pane ʼo makokona pea ʼe tou nonofo anai ʼi totatou fenua ʼi te fimalie.’—Levitike 26:4, 5.

Ka takitaki anai te Puleʼaga ʼo te ʼAtua ia te kele, ʼe maʼuʼuli anai te hahaʼi ʼi te tokalelei pea mo natou feagaleleiʼaki mo fefakaʼapaʼapaʼaki. ʼE mole toe ʼi ai anai ni tau, mo ni agamalohi, pea ʼe mole tou gaue kinakina anai ke tou maʼu te ʼu meʼa ʼae ʼe ʼaoga ki ʼotatou maʼuli. ʼE fakapapau fenei ʼi te Tohi-Tapu: “E natou nonofo anai te tagata i lalo o tona fuu vite mo tona fuu fiki, pea e mole toe fakamamahii anai natou e he tahi.”—Mikea 4:3, 4.

ʼE tahi maʼu anai e te famili tona ʼapi pea ʼe mole tuʼania anai naʼa kapu natou. ʼE fiafia anai te hahaʼi fuli ʼi te ʼu gaue ʼae ka natou fakahoko ʼi te malama foʼou. Ohage pe ko tona ui ʼi te Tohi-Tapu, “e mole natou gaue anai ki te noa.”—Esaia 65:21-23.

ʼE fakapapau fenei ʼi te Tohi-Tapu: “ ʼE fonu anai te kele ko te ʼatamai malama ʼo Sehova.” (Esaia 11:9, NWT) ʼE akoʼi anai ki te hahaʼi fuli ia te poto ʼo Sehova. ʼE natou ako anai ia te ʼu meʼa matalelei ʼae neʼe ina fakatupu. ʼE mole toe fakaʼaogaʼi anai e te tagata tona poto moʼo faʼu he ʼu mahafu tau pea mo fakamamahiʼi he tahi. (Esaia 2:4) Kae ʼe natou ako anai ke natou maʼuʼuli ʼi te tokalelei pea mo tokaga lelei ki te kele.—Pesalemo 37:11.

Neʼe fakatupu e te ʼAtua ia te kele ke maʼuli fiafia tuʼumaʼu pe te tagata. Ko te ʼuluaki fakatuʼutuʼu ʼa te ʼAtua, ke maʼuli te tagata ʼo heʼe gata. (Pesalemo 37:29; Esaia 45:18) Pea ʼe ina fakahoko anai tana fakatuʼutuʼu ʼaia, koia ʼe ui ai “e ina folo anai te mate o talu osi.” (Esaia 25:8) ʼE ui ʼi te Tohi-Tapu: “ ʼE mole toe ʼi ai anai te mate, mo te putu, mo te lauga pea mo te mamahi.” (Fakaha 21:4) ʼE haofaki anai e te ʼAtua ni hahaʼi ʼi te fakaʼosi ʼo te malama agakovi ʼaeni, pea mo fakatuʼuake ia te toe hahaʼi kaugamalie ki te maʼuli ʼi te malama foʼou. Pea ʼe ina foaki anai kia natou fuli ʼaia ia te maʼuli heʼe gata.—Soane 5:28, 29; Gaue 24:15.

 ʼI te temi nei, ko te toko lauʼi miliona hahaʼi ʼe natou teuteu nei ke natou maʼuʼuli ʼi te malama foʼou ʼae kua ovi mai. Logo la tonatou ʼuhiga heʼe haohaoa, kae ʼe natou faiga fakamalotoloto ke natou fakaʼapaʼapa ki te ʼu lao ʼa te ʼAtua, ke ina tali natou ʼi tona malama foʼou. Kotea ʼae ʼe natou fai? ʼE natou ako ke natou iloʼi ia Sehova ʼAtua pea mo ia ʼae neʼe ina fekauʼi mai, ia Sesu Kilisito.—Soane 17:3.

ʼE kotou fia iloʼi koa pe kotea ʼae ʼe tonu ke kotou fai ke kotou hao ʼi te fakaʼosi ʼo te malama ʼaeni pea mo maʼuli ʼi te malama foʼou ʼae kua ovi mai? Kapau ko ia, kotou kole he ako Tohi-Tapu ki he Fakamoʼoni ʼa Sehova ʼo te tohi Ke Ke Fiafia ʼo Heʼe Gata.