1, 2. Neʼe fakaha feafeaʼi e te apositolo ko Paulo ia tana fakafetaʼi ki te ʼofa makehe ʼo te ʼAtua?

KO TE apositolo ko Paulo neʼe feala ke ina ui fakahagatonu fenei: “Nee mole tonoa tona kalasia kia au.” (Lau ia 1 Kolinito 15:9, 10.) Neʼe iloʼi lelei e Paulo, neʼe mole tuha mo ia te manavaʼofa ʼo te ʼAtua. Koteʼuhi neʼe ina fakatagaʼi ia te kau Kilisitiano.

² ʼI te ʼu temi fakaʼosi ʼo te maʼuli ʼo Paulo, neʼe faitohi fenei kia Timoteo: “E au fakafetai kia ia ae nee ina fakamalohii au, kia Sesu-Kilisito totatou Aliki, i tana sio mai kia au o hage ko he tagata agatonu, o ina fakanofo au ki tana gaue.” (1 Timoteo 1:12-14) Kotea te gaue ʼaia? Neʼe ui fenei e Paulo ki te kokelekasio ʼo Efeso: “ ʼE mole au tokaga ki toku maʼuli ohage ia ko he meʼa ʼe maʼuhiga ʼaupito kia te au, kehe pe ke au fakaʼosi taku lele pea mo te minisitelio ʼae neʼe foaki mai kia au e te ʼAliki ko Sesu: ʼAe ko te fai ʼo he fagonogono ʼe katoa ʼo ʼuhiga mo te logo lelei ʼo te ʼofa makehe ʼo te ʼAtua.”—Gaue 20:24, MN.

3. Kotea ia te gaue makehe ʼae neʼe fakatotonu kia Paulo ke ina fakahoko? (Vakaʼi te ʼuluaki pāki.)

 ³ Kotea te “logo lelei” ʼae neʼe fakamafola e Paulo? Pea ʼe ha feafeaʼi ia te ʼofa makehe ʼo Sehova ʼaki te logo lelei ʼaia? Neʼe ui fenei e Paulo ki te kau Kilisitiano ʼo Efeso: “Kua kotou logo ki te fakatuʼutuʼu gaue ʼo te ʼofa makehe ʼa te ʼAtua ʼae neʼe foaki mai kia au ʼo ʼuhiga mo koutou.” (Efeso 3:1, 2, MN) Neʼe fakatotonu e Sesu kia Paulo ke alu ʼo fakamafola ia te logo lelei kia natou ʼae ʼe mole ko he kau Sutea. Neʼe kua feala leva ʼi te temi ʼaia ki te hahaʼi ʼo te ʼu puleʼaga, ke natou kau ki te Puleʼaga ʼae ʼe takitaki e te Mesia. (Lau ia Efeso 3:5-8.) Ko Paulo neʼe faifakamafola ʼaki he faʼafai pea neʼe ina tuku mai he faʼifaʼitaki lelei ki te kau Kilisitiano ia ʼaho nei. Koia neʼe fakaha ai e Paulo, ko te ʼofa makehe ʼo te ʼAtua neʼe mole “tonoa” kia ia.

4, 5. He koʼe ʼe feala ke tou ui, ko ‘te logo lelei ʼo te puleʼaga,’ ʼe ko “te logo lelei ʼo te ʼofa makehe ʼo te ʼAtua”?

⁴ ʼI te ʼu temi fakaʼosi ʼaeni, ʼe ko te maʼua ʼo te hahaʼi fuli ʼa Sehova ke natou fakamafola te “logo lelei . . . o te puleaga i te malamanei katoa, ke fakamooni ki te u puleaga fuli.” (Mateo 24:14) Ko te logo lelei ʼo te Puleʼaga, ʼe ko “te logo lelei ʼo te ʼofa makehe ʼo te ʼAtua.” Kotea tona tupuʼaga? Koteʼuhi ʼe tou maʼu tapuakina anai ʼaki te Puleʼaga ʼo te ʼAtua, ʼuhi ko te ʼofa makehe ʼo Sehova. (Efeso 1:3) Neʼe fakaha e Paulo ia tona lotofakafetaʼi ki te ʼofa makehe ʼo Sehova ʼaki tana faʼafai ʼi te faifakamafola. Kaʼe ʼe tou faʼifaʼitakiʼi koa ia Paulo?—Lau ia Loma 1:14-16.

⁵ ʼI te alatike ʼae neʼe hoki ʼosi atu, neʼe tou ako ai pe ʼe fua lelei feafeaʼi kia tatou ʼae ko te hahaʼi agahala, ia te ʼofa makehe ʼo Sehova ʼi te ʼu aluʼaga kehekehe. Neʼe lahi te ʼu fua lelei kua tou maʼu ʼuhi ko te ʼofa makehe ʼo Sehova, koia ʼae ʼe maʼua ai ke tou akoʼi ki te hahaʼi pe ʼe fakaha feafeaʼi e Sehova ia tona ʼofa, pea ʼe feafeaʼi hanatou maʼu ia te ʼofa ʼaia. ʼE feafeaʼi hatatou tokoni ki te hahaʼi ke natou fakaha tonatou lotofakafetaʼi ki te ʼofa makehe ʼo te ʼAtua?

6, 7. Ka tou fakamahino ia te sakilifisio faitotogi ki te hahaʼi, ʼe tou fakamafola feafeaʼi ia te logo lelei ʼo te ʼofa makehe ʼo te ʼAtua?

⁶ Ia ʼaho nei, tokolahi te hahaʼi ʼe mole vevele ʼonatou loto moka natou fai he meʼa ʼe kovi. Koia ʼae ʼe mole natou mahino ai pe koʼe ʼe ʼaoga ki te tagata ia he sakilifisio faitotogi. Pea ʼe toe kaugā malie foki te hahaʼi ʼae kua natou logoʼi ʼe mole natou fiafia, ʼuhi pe ko tonatou faʼahiga maʼuli. Pea ko te tokolahi, ʼi muʼa ʼo tanatou faipalalau mo te kau Fakamoʼoni ʼa Sehova neʼe mole natou iloʼi pe kotea ia te agahala. Neʼe mole natou iloʼi pe kotea ʼona fua kia tatou peʼe kotea ʼae ka ina fakaʼateainaʼi anai tatou mai te maʼuli popula ki te agahala. Koia ʼi te kua ʼosi mahino leva ʼa ʼihi pe kotea ia te agahala, ʼe natou lotofakafetaʼi ʼi tanatou iloʼi ʼae neʼe momoli ifo e Sehova ia tona ʼAlo ki te kele moʼo fakaʼateainaʼi tatou mai te agahala mo te mate. Neʼe fakahoko e Sehova ia te faʼahi ʼaia, ʼuhi pe ko te lahi ʼo tona ʼofa pea mo tona ʼofa makehe ʼae kia tatou.—1 Soane 4:9, 10.

⁷ Tou fakatokagaʼi ia te ʼu palalau ʼaeni ʼa Paulo ʼo ʼuhiga mo te ʼAlo ʼofaina ʼo Sehova: “ ʼAki ia ia ʼe tou maʼu te fakaʼateaina ʼaki te totogi ʼo te taʼataʼa ʼo ia ʼaia, ʼei te fakamolemole ʼo ʼatatou hala, ʼo mulimuli ki te ’u  koloa ʼo tona ʼofa makehe [ʼo Sehova].” (Efeso 1:7, MN) Ko te sakilifisio faitotogi ʼa Kilisito, ʼe ko te fakamoʼoni lahi tokotahi ʼaia ʼo te ʼofa ʼo te ʼAtua kia tatou. Pea ʼe toe ha ai ko Tona ʼofa makehe ʼe mole hona tatau. ʼE ko he meʼa fakalotofimalie hatatou iloʼi ʼe fakamolemole anai ʼatatou agahala pea mo tou maʼu anai he leʼo ʼo loto ʼe maʼa, mo kapau ʼe tou tui ki te sakilifisio ʼa Sesu. (Hepeleo 9:14) Pea ʼe mahino papau ia, ʼe ko he logo lelei ʼe tonu ke tou vaevae mo te hahaʼi.

8. He koʼe ʼe tonu ke fakatokatoka te hahaʼi agahala pea mo te ʼAtua?

⁸ Kapau ʼe mole tui te hahaʼi ki te sakilifisio ʼa Sesu, pea ʼe natou liliu ai ko te ʼu fili ʼo te ʼAtua. Koia, ʼe ko totatou maʼua ke tou fakaha age kia natou, ʼe feala ke natou liliu ko he ʼu kaumeʼa ʼo te ʼAtua. Neʼe tohi fenei e te apositolo ko Soane: “Ko ʼae ʼe tui ki te ʼAlo, ʼe ina maʼu te maʼuli heʼe gata; ko ʼae ʼe talagataʼa ki te ʼAlo, ʼe mole mamata anai ia ki te maʼuli, kaʼe ʼe nofo te hauhau ʼo te ʼAtua ia ia.” (Soane 3:36, MN) ʼE tou fakafiafia, koteʼuhi ʼe feala ke tou liliu ko he ʼu kaumeʼa ʼo te ʼAtua ʼaki ia te sakilifisio ʼa Kilisito. Neʼe fakamatala fenei e Paulo ia te aluʼaga ʼaia: “Ko koutou ʼae, ʼi te temi muʼa, neʼe kotou mamaʼo pea neʼe ko koutou neʼe ko te ’u fili ʼuhi he neʼe falele ʼakotou manatu ki te ’u gaue ʼae neʼe kovi, ʼi te temi nei kua ina fakatokatoka koutou, ʼaki te sino kakano ʼo ia ʼaia, ʼaki tana mate.”—Kolose 1:21, 22, MN.

9, 10. (1) Kotea te gaue ʼae neʼe foaki e Kilisito ki ʼona tehina fakanofo? (2) ʼE tokoni feafeaʼi te ‘tahi ʼu ovi’ ki te kau fakanofo?

⁹ Neʼe foaki e Kilisito ki ʼona tehina fakanofo ʼae ʼi te kele ia “te gaue o te fakatokatoka.” Neʼe ui fenei e Paulo: “Ko te u mea fuli aena e hau mai te Atua, ae nee natou fakatokatoka tatou mo ia ia Kilisito, pea nee natou foaki kia tatou te gaue [peʼe ko te minisitelio] o te fakatokatoka. Koteuhi nee nofo te Atua ia Kilisito, o ina fakatokatoka te malamanei mo ia totonu, o mole lau ki te u tagata anatou agahala; pea nee ina tuku kia maua te folafola o te fakatokatoka. Pea koeni, e ma fai te gaue a te u tagata fakafofoga o Kilisito, o hage e fakakolekole e te Atua ia maua; e ma kolekole atu kia koutou i te higoa o Kilisito: Koutou fakatokatoka mo te Atua!”—2 Kolinito 5:18-20.

¹⁰ ʼE ko he pilivilesio ki te ‘tahi ʼu ovi’ hanatou tokoni ki te kau fakanofo ʼi te minisitelio ʼaia. (Soane 10:16) Ko te koga lahi ʼo te gaue faifakamafola ʼe fakahoko e te ‘tahi ʼu ovi’ ʼi tonatou ʼuhiga “tagata ʼave logo” ʼa Kilisito. Ko tanatou akoʼi te moʼoni ki te hahaʼi pea mo tokoni ke natou maʼu he ʼu felogoʼi lelei mo Sehova. ʼE ko he koga maʼuhiga ʼaia ʼo te fakamafola ʼo te logo lelei ʼo te ʼofa makehe ʼo te ʼAua.

11, 12. He koʼe ko he logo lelei ki te hahaʼi hanatou iloʼi ʼe feala hanatou faikole kia Sehova?

¹¹ Ko te tokolahi ʼe natou faikole, koteʼuhi ʼe natou logo fimalie ai. Kaʼe ʼe mole natou  tui moʼoni ʼe fakalogo ia te ʼAtua ki ʼanatou faikole. ʼE tonu ke natou mahino, ko Sehova “e fakalogo ki te kole.” Neʼe tohi fenei e te tagata faipesalemo ko Tavite: “Sii koe, ae e fakalogo ki te kole, e omai anai te tagata fuli kia koe, e fakamamahii au e te u agahala: E ke fakamolemole anai amatou hala!”—Pesalemo 65:3, 4.

¹² Neʼe ui fenei e Sesu ki ʼana tisipulo: “Kapau e kotou kole he mea i toku huafa, e au fai anai ia.” (Soane 14:14) Ko tona fakaʼuhiga, ʼe feala ke tou kole “he mea” pe ʼe alu tahi mo te finegalo ʼo Sehova. Pea neʼe tohi fenei e Soane: “E tou mau i ona mua te loto toa aeni, kapau e tou kole he mea o mulimuli ki tona finegalo, e fakalogo mai ia kia tatou.” (1 Soane 5:14) ʼE ko he meʼa lelei hatatou tokoni ki te hahaʼi ke natou mahino ʼe mole tou faikole pe ke tou logo fimalie ai. Kaʼe ʼe tou faikole ke tou fakaovi ai ki “te ʼafioʼaga ʼo te ʼofa makehe” ʼo Sehova. (Hepeleo 4:16, MN) ʼE feala ke tou tokoni ki te hahaʼi ke natou liliu ko he ʼu kaumeʼa ʼo Sehova pea ke natou maʼu he fimalie ʼi te temi mamahi. ʼE tou fakahoko anai te faʼahi ʼaia, mo kapau ʼe tou akoʼi kia natou te faʼahiga faikole ʼae ʼe lelei, ke natou faikole kia ia ʼae ʼe tuha mo ia pea ki te ʼu meʼa ʼae ʼe lelei.—Pesalemo 4:2; 145:18.

13, 14. (1) Kotea ia te pilivilesio fakaofoofo ʼae ka maʼu anai e te kau fakanofo ʼi te ka haʼu? (2) Kotea ia te gaue ʼae ka fakahoko anai e te kau fakanofo maʼa te hahaʼi?

¹³ ʼE fakaha anai e Sehova ia tona ʼofa makehe ʼo laka age “ ʼi te tuʼu ʼo te ʼu faʼahiga meʼa ka haʼu.” ʼO feafeaʼi? ʼE foaki anai e te ʼAtua ki te toko 144 000 ʼae ka ʼafio anai mo Kilisito ʼi selo ia te pilivilesio fakaofoofo. Neʼe fakamahino e Paulo pe kotea anai ia te pilivilesio ʼaia ʼi tana tohi fenei: “Ko te ʼAtua, ʼae ʼe koloaʼia ʼi te manavaʼofa, ʼuhi ko te lahi ʼo tona ʼofa ʼae kia tatou, neʼe ina foaki mai te maʼuli ke tou fakatahi mo Kilisito, ia tatou ʼae neʼe kua tou mamate ʼi ʼatatou agahala, kaʼe ʼaki te ʼofa makehe neʼe haofaki ai koutou, pea neʼe ina fakatuʼuake mo fakaheka fakatahi tatou ʼi te lagi ʼo fakatahi mo Kilisito Sesu, ke fakaha ʼi te tuʼu ʼo te ʼu faʼahiga meʼa ka haʼu ia te koloaʼia fakaofoofo ʼo tona ʼofa makehe ʼi tona agalelei ʼae kia tatou ʼo fakatahi mo Kilisito Sesu.”—Efeso 2:4-7, MN.

¹⁴ ʼE faigataʼa hatatou fakafuafua ia te ʼu meʼa fakaofoofo ʼae kua teuteuʼi e Sehova maʼa te kau fakanofo ki te temi ʼae ka natou kaugā hau anai mo Kilisito ʼi te lagi. (Luka 22:28-30; Filipe 3:20, 21; 1 Soane 3:2) ʼE fakaha anai e Sehova te “koloaʼia fakaofoofo ʼo tona ʼofa makehe” ki te kau fakanofo ʼi hona aluʼaga ʼe makehe. ʼE natou liliu anai ko te “Selusalemi Foʼou,” ia te ʼohoana ʼo Kilisito. (Apokalipisi 3:12; 17:14; 21:2, 9, 10, MN) ʼE natou gaue fakatahi anai mo Sesu ki “te fakamauli o te atu puleaga.” ʼE natou tokoni anai ki te hahaʼi ke natou ʼateaina mai te ʼu kavega ʼo te agahala mo te mate, pea ke natou liliu ʼo haohaoa.—Lau ia Apokalipisi 22:1, 2, 17.

15, 16. ʼE fakaha feafeaʼi anai e Sehova ia tona ʼofa makehe ki te ‘tahi ʼu ovi’ ʼi te ka haʼu?

 ¹⁵ ʼE ui ia Efeso 2:7, MN, ko te ʼAtua ʼe ina fakaha anai ia tona ʼofa makehe “ ʼi te tuʼu ʼo te ʼu faʼahiga meʼa ka haʼu.” ʼI te temi ʼaia, ʼe maʼu anai e te hahaʼi fuli ʼi te kele ia “te koloaʼia fakaofoofo ʼo tona ʼofa makehe.” (Luka 18:29, 30) Ko te aluʼaga ʼae ʼe fakaha ai anai e Sehova ia te lahi ʼo tona ʼofa makehe, ʼe ko tana fakatuʼuake anai ia te hahaʼi mai “te nofoaga o te kau mate.” (Sopo 14:13-15; Soane 5:28, 29) Ko ai ʼae ka fakatuʼuake anai? ʼE ko te hahaʼi tagata mo fafine ʼae neʼe mamate ʼi muʼa ʼo te mate ʼa Kilisito. Pea ʼe toe kau ai mo te tahi ʼu ovi ʼae ʼe mamate agatonu kia Sehova lolotoga te ʼu ʼaho fakamuli. ʼE fakatuʼuake anai te kau agatonu ʼaia, ke natou toe hoko atu ia tanatou tauhi ʼae kia Sehova.

¹⁶ ʼE toe kau anai ʼi te fakatuʼuake ia te toko lauʼi miliona hahaʼi ʼae neʼe mamate kaʼe neʼe heʼeki natou iloʼi ia te ʼAtua. Neʼe tohi fenei e Soane: “Nee au sio leva ki te kau mate, lalahi mo liliki, nee tutuu ia mua o te hekaaga fakahau. Pea nee avahi leva ni tohi. Pea nee avahi leva mo he tahi age tohi, ae ko te tohi o te mauli. Pea nee fakamaaui leva te kau mate o mulimuli ki anatou gaue, o mulimuli ki te mea ae e tuu i te u tohi aena. Pea nee tuku ake leva e te tai te kau mate ae nee ina mau. Pea nee tuku ake leva e te mate mo te nofoaga o te kau mate te kau mate ae nee na mau. Pea nee fakamaaui leva te tagata taki toko tahi o mulimuli ki ana gaue.” (Apokalipisi 20:12, 13) Ko natou ʼae ka fakatuʼuake, ʼe natou maʼu anai te faigamalie ʼae ke natou iloʼi ia Sehova pea ke natou tali tana  pule. ʼE natou ako anai ia te ʼu pelesepeto Fakatohi-tapu mo te ʼu fakatotonu foʼou ʼae ʼe tuʼu ʼi “te u tohi” pea ʼe natou maʼuliʼi anai. Ko te ʼu fakatotonu foʼou ʼaia, ʼe ko te tahi aluʼaga ʼe fakaha ai anai e Sehova ia tona ʼofa makehe.

17. Kotea ʼae ʼe tonu ke tou manatuʼi moka tou faifakamafola?

¹⁷ ʼI te temi nei, kua maʼuhiga ʼaupito ke tou fakamafola ia te logo lelei ʼo te Puleʼaga, koteʼuhi kua tau ovi mai pe ia te fakaʼosi. (Maleko 13:10) ʼE tonu ke tou manatuʼi, ko tatatou fakatuʼutuʼu moka tou faifakamafola, ʼe ko te fakakololiaʼi ʼo Sehova. ʼO feafeaʼi? ʼE tonu ke tou fakaha ki te hahaʼi, ʼe feala ke tou maʼu ia te ʼu tapuakina fuli ʼi te malama foʼou ʼaki pe ia te ʼofa makehe ʼo Sehova.

18, 19. ʼE feafeaʼi hatatou fakakololiaʼi ia te ʼofa makehe ʼo Sehova?

¹⁸ ʼE feala hatatou fakamahino ki te hahaʼi ʼi te faifakamafola, ʼe maʼu anai e te tagata ia te ʼu fua lelei ʼo te sakilifisio ʼi te temi ʼae ka ʼafio ai ia te Puleʼaga ʼo Kilisito. Pea ʼe natou liliu mamalie anai ʼo haohaoa. ʼE ui fenei ʼi te Tohi-Tapu: “Ko te ʼu meʼa ʼae neʼe fakatupu ʼe toe fakaʼateaina anai natou mai te popula ki te meʼa ʼae ʼe popo pea ʼe natou maʼu anai te ʼateaina fakakololia ʼo te ʼu fanau ʼa te ʼAtua.” (Loma 8:21, MN) ʼE feala anai te aluʼaga ʼaia ʼuhi pe ko te ʼofa makehe ʼo Sehova.

¹⁹ ʼE tou maʼu ia te pilivilesio ʼae ke tou tala ki te hahaʼi ia te fakapapau fakafiafia ʼaeni ʼo Apokalipisi 21:4, 5: “E . . . holoholoi anai [e te Atua] te u loimata fuli mai onatou mata, pea e mole toe mau anai te mate: e mole toe mau anai he tagi, mo he lauga, mo he mamahi, koteuhi kua puli leva te u uluaki mea.” Pea ko Sehova ʼae ʼe heka ʼi tona hekaʼaga fakahau, ʼe ina ui fenei: “Koeni, kua au fakafoou te u mea fuli. Pea nee ina ui mai leva kia au: Tohi; koteuhi e mooni mo totonu te u folafola aeni.” Ka tou fakamafola ia te logo lelei ʼaki he faʼafai, ʼe tou fakakololiaʼi moʼoni ia te ʼofa makehe ʼo Sehova.