Ko Te Kau Kilisitiano Mo Te Sosiete Fakatagata ʼo Te Temi Nei

“ ʼE koutou liliu anai ko he ʼu meʼa ʼe fehiʼaʼinaʼi e te ʼu puleʼaga katoa ʼuhi ko toku huafa.” — Mateo 24:9.

1. Neʼe koteā te fakaʼiloga makehe ʼo te tui faka kilisitiano?

 KO TE mavae ʼaē mai te mālama neʼe ko he fakaʼiloga makehe ʼo te kau kilisitiano ʼo te temi muʼa. ʼI tana faikole ʼaē ki tana Tāmai ʼe ʼi selo, ko Sehova, neʼe ʼui fēnei e Kilisito ʼo ʼuhiga mo tana kau tisipulo: “Neʼe ʼau foaki age kia nātou tau folafola, kae ko te malamanei neʼe fehiʼa ia nātou, koteʼuhi ʼe mole nātou kau ki te malamanei, ohage ko ʼau ʼe mole ʼau kau ʼi te malamanei.” (Soane 17:14). ʼI tana tuʼu ʼaē ia muʼa ʼo Pose Pilato, neʼe tala fēnei e Sesu: “Ko toku puleʼaga ʼe mole kau ia ʼi te mālama ʼaenī.” (Soane 18:36). ʼE fakamoʼoni te mavae ʼa te tui faka kilisitiano ʼo te temi muʼa mai te mālama, e te ʼu Tohi faka kilisitiano faka keleka pea mo te ʼu hahaʼi fai hisitolia.

2. a) ʼAki te temi, neʼe ʼi ai koa he fetogi ʼi te ʼu felogoi ʼa te ʼu tisipulo ʼa Kilisito pea mo te mālama? b) Neʼe tonu koa ke haʼu te Puleʼaga ʼa Sesu ʼaki te maliu ʼa te ʼu puleʼaga?

² Neʼe fakahā koa e Sesu ki muli age ʼe hoko anai he fetogi ʼi te felogoi ʼa tana kau tisipulo pea mo te mālama pea ko tona Puleʼaga ʼe haʼu anai koa ʼaki te maliu ʼa te mālama ki te tui faka  kilisitiano? Kailoa. ʼE mole he meʼa feiā neʼe fakahā ki tana ʼu tisipulo ke nātou tohi hili ʼo te mate ʼo Sesu, peʼe neʼe faka ʼuhiga ki he meʼa feiā (Sake 4:4 [lagi neʼe tohi ʼi muʼa ʼo te taʼu 62 ʼo totatou temi]; 1 Soane 2:15-17; 5:19 [lagi neʼe tohi ʼi te taʼu 98 ʼo totatou temi]). Kae ʼi te tahi leva faʼahi, ko te Tohi-Tapu ʼe ina fakapipiki te “ ʼafio” ʼa Sesu pea mo tana “haʼu” ʼi te pule ʼa te Puleʼaga, ki te “fakaʼosi ʼo te ʼu faʼahiga meʼa ʼo te tuʼu ʼaenī”, ʼaē kua kaku ki tana “fakaʼosi”, peʼe ʼauha (Mateo 24:3, 14, 29, 30; Taniela 2:44; 7:13, 14). ʼI te fakaʼiloga ʼaē neʼe foaki e Sesu ʼo ʼuhiga mo tana parousia, peʼe ʼafio, neʼe ina ʼui fēnei ki tana kau tisipulo moʼoni: “Pea ʼe tuku anai koutou ki te mamahi pea ʼe matehi anai koutou, pea ʼe koutou liliu anai ko he ʼu meʼa ʼe fehiʼaʼinaʼi e te ʼu puleʼaga katoa ʼuhi ko toku huafa.” — Mateo 24:9.

Ko te kau kilisitiano moʼoni ʼo te temi nei

3, 4. a) ʼE feafeaʼi te fakamatalatala ʼo te ʼu ʼuluaki kilisitiano e te encyclopédie katolika? b) ʼAki te ʼu palalau ʼe teitei tatau ʼe feafeaʼi te fakamatalatala ʼa te kau fakamoʼoni a Sehova pea mo te kau kilisitiano ʼo te temi muʼa?

³ Ko te kaugā lotu fea koa ʼaē kua ʼiloa ʼi tana agatonu ʼaē ki te ʼu fakatuʼutuʼu faka kilisitiano pea mo mavae mai te mālama, pea ko tana ʼu hahaʼi ʼe fehiʼaʼinaʼi pea mo fakatagaʼi? ʼIo, ko te kautahi faka kilisitiano fea koa ʼaē ʼe mafola ʼi te malamanei ʼe ʼalutahi ʼi tana ʼu faʼahi fuli mo te ʼu agaaga faka hisitolia ʼo te kau kilisitiano ʼo te temi muʼa? ʼO ʼuhiga mo nātou ʼaia, tou fakatokagaʼi te meʼa ʼaē ʼe ʼui e te encyclopédie (New Catholic Encyclopedia): “Ko te kautahi faka kilisitiano ʼo te temi muʼa, logope neʼe ʼui ʼuluaki ko he tahi pe magaʼi lotu mai te kau Sutea, neʼe ina fakamoʼoni tana makehe ʼi tana ʼu akonaki faka teolosia, pea tāfito te faiga fakamalotoloto ʼo tana ʼu hahaʼi, ʼaē ʼe nātou gāue ʼi tonatou ʼuhiga kau fakamoʼoni ʼa Kilisito ‘ ʼi Sutea katoa pea mo Samalia, pea mo te potu taupotu ʼo te kele’. (Gāue 1:8.)” — Tohi 3, pasina 694.

⁴ Tou fakatokagaʼi te ʼu kupu “neʼe ʼui (...) ko he tahi pe magaʼi lotu”, “tana makehe ʼi tana ʼu akonaki”, te “faiga fakamalotoloto (...) ʼi tonatou ʼuhiga kau fakamoʼoni”. Tou vakaʼi leva peʼe feafeaʼi te fakamatalatala ʼo te kau Fakamoʼoni ʼa Sehova e te tohi ʼaia: “Ko he magaʼi lotu (...) ʼo he kau Fakamoʼoni ʼe nātou tui papau ko te fakaʼosi ʼo te malamanei ʼe hoko anai ʼi te ʼu taʼu siʼisiʼi ka haʼu. Ko tanatou tui mālohi ʼaia ʼe ʼiloga ia ko te mālohi ʼaupito ʼaia ʼe ina ʼeke tanatou faiga faimate pea mo fakamalotoloto. (...) Ko te maʼua tāfito ʼo te hahaʼi takitokotahi ʼo te magaʼi lotu ʼe ko te fakamoʼoni kia Sehova ʼaki te fagonogono ʼo Tana Puleʼaga kua fakaōviōvi mai. (...) ʼE nātou faka ʼuhiga pe te Tohi-Tapu ko te matapuna ʼo tanatou tui pea mo te takitaki ʼo tanatou maʼuli. (...) Ko he Fakamoʼoni moʼoni ʼe tonu ke faka mafola fakapotopoto ke fua lelei.” — Tohi 7, ʼu pasina 864, 865.

5. a) Ko te ʼu faʼahi fea ʼaē ʼe makehe ai te ʼu akonaki ʼa te kau Fakamoʼoni ʼa Sehova? b) Fakahā he ʼu faʼifaʼitaki ʼe hā ko te ʼu meʼa ʼaē ʼe tui kiai te kau Fakamoʼoni ʼa Sehova ʼe ʼalutahi mo te Tohi-Tapu.

⁵ Koteā te ʼu ʼaluʼaga ʼe makehe ai te ʼu akonaki ʼo te kau Fakamoʼoni ʼa Sehova? Ko te encyclopédie (New Catholic Encyclopedia) ʼe talanoa ki te koga ʼo te ʼu akonaki ʼaia: “ ʼE nātou [te kau Fakamoʼoni ʼa Sehova] tauteaʼi te Tahitolu ko he tauhi tamapua faka pagani (...). ʼE nātou faka ʼuhiga ia Sesu ko te Fakamoʼoni lahi tokotahi ʼa Sehova, ko ‘he ʼatua’ (ʼe nātou fakaliliu feiā ia Soane 1:1), ʼe mālalo age pe ia ia Sehova. (...) Neʼe mate ʼi tona ʼuhiga tagata pea neʼe fakatuʼuake ʼi tona ʼuhiga Foha fakalaumālie tuputupua. Ko tona Mamahi pea mo tona mate neʼe ko te totogi ʼaia neʼe hilifaki moʼo faka fealagia ki te malamanei ke ina toe maʼu te fealagia ʼo te maʼuli ʼo heʼegata ʼi te kele. ʼIo, ko te ‘toe hahaʼi tokolahi’ (Fkhā. 7:9) ʼo te kau Fakamoʼoni moʼoni ʼe nātou ʼamanaki ʼe nātou maʼuli anai ʼi he Palatiso fakakelekele; ʼe gata pe ki te toko 144 000 kau agatonu (Fkhā. 7:4; 14:1, 14) ʼe feala ke nātou maʼu te kolōlia ʼi selo ʼaki ia Kilisito. Ko te kau agakovi ʼe nātou tau anai mo he toe ʼauha. (...) Ko te papitema — ko te kau Fakamoʼoni ʼa Sehova ʼe fakauku katoa nātou (...) [ʼe] ko te fakatā ʼaia ki tuʼa ʼo te foaki ʼo nātou ki te gāue ʼa Sehova ʼAtua. (...) ʼE ʼiloa te kau Fakamoʼoni ʼa Sehova ʼi tanatou fakafisi ki te ʼu foʼi huki toto. (...) Ko tanatou aga ʼaē ʼe tonu ke fai ʼi te maʼuli faka taumatuʼa pea mo te felāveʼi fakasino ʼe teitei fefeka.” ʼE lagi ʼe makehe te kau Fakamoʼoni ʼa Sehova ʼi te ʼu ʼaluʼaga ʼaia, kae ko te fakatuʼu ʼo te ʼu faʼahi ʼaia ʼe fakatafito mālohi ki te Tohi-Tapu. — Pesalemo 37:29; Mateo 3:16; 6:10; Gāue  15:28, 29; Loma 6:23; 1 Kolonito 6:9, 10; 8:6; Fakahā 1:5.

6. Koteā te aga neʼe taupau maʼu e te kau Fakamoʼoni ʼa Sehova? Koteā tona tupuʼaga?

⁶ Ko te tohi loma katolika ʼaia ʼe ina toe ʼui ʼi te taʼu 1965, (ʼe ʼiloga ko te taʼu ʼaia ʼaē neʼe tohi ai te alatike) “ko te kau Fakamoʼoni ʼa Sehova neʼe nātou ʼui neʼe mole heʼeki nātou kau ki te mālama ʼaē neʼe nātou maʼuli ai”. ʼE ʼiloga ia ko te tagata faitohi neʼe manatu ia, ʼaki te temi ʼe hahaʼi anai te kau Fakamoʼoni ʼa Sehova pea ʼe nātou maʼu anai “te ʼu agaaga ʼo te ’Ēkelesia ʼaē ʼe kehe mo te ʼu ʼu magaʼi lotu”, ʼo nātou kau anai ki te mālama ʼaenī. Kae, ko te meʼa neʼe fakahā, neʼe mole moʼoni ia. ʼI te temi nei, ʼaki te hahaʼi ʼo te kau Fakamoʼoni ʼa Sehova ʼo laka tuʼa fā ia nātou ʼo te taʼu 1965, ko te kau Fakamoʼoni ʼa Sehova ʼe nātou taupau mālohi aipe tanatou faʼahiga aga ki te mālama ʼaenī. “ ʼE mole nātou kau ʼi te malamanei”, ohage ko Sesu neʼe “mole kau ʼi te malamanei”. — Soane 17:16.

ʼE nātou mavae kae mole nātou fakafeagai

7, 8. Ohage ko te moʼoni ʼo ʼuhiga mo te kau kilisitiano ʼo te temi muʼa, koteā te meʼa ʼaē ʼe toe moʼoni ʼo ʼuhiga mo te kau Fakamoʼoni ʼa Sehova ʼi te temi nei?

⁷ ʼI tana talanoa ki te hāofaki ʼo te kau kilisitiano ʼo te temi muʼa e Justin te leʼoleʼo ʼo te lotu ʼi te lua sēkulō, ko Robert Grant neʼe ina tohi fēnei ʼi tana tohi (Early Christianity and Society): “Kapau ko te kau kilisitiano neʼe ko te kau fakafeagai, ʼe nātou gaohi meʼa fakafūfū anai ʼo faiga ke nātou kaku ki te meʼa ʼe nātou loloto kiai. (...) Ko nātou neʼe ko te kau lagolago lelei ʼaupito ʼo te tuʼi ki te faiga ki te tokalelei pea mo te fakatokatoka.” ʼO toe feiā aipe, ko te kau Fakamoʼoni ʼa Sehova ʼi te temi nei kua ʼiloa ia nātou ʼi te malamanei ko te hahaʼi ʼe pipiki ki te tokalelei pea mo fakatokatoka. Ko te ʼu puleʼaga kehekehe, ʼe nātou ʼiloʼi ʼe mole nātou tuʼania he meʼa mai te kau Fakamoʼoni ʼa Sehova.

⁸ Neʼe tohi fēnei e te tagata Amelika fai sulunale ʼo te potu tokelau: “Ko he meʼa fakavale ia te tui ʼaē ko te kau Fakamoʼoni ʼa Sehova ʼe ko he faʼahiga meʼa fakamataku ki he puleʼaga faka politike pe; ʼe mole he kautahi faka lotu ʼe tatau mo ia ʼi te fakalogo pea mo te kumi ʼo te tokalelei.” ʼE ʼui fēnei e Jean-Pierre Cattelain ʼi tana tohi (Lʼobjection de conscience): “Ko te kau Fakamoʼoni ʼa Sehova ʼe nātou fakalogo fakalelei ki te ʼu pule māʼoluga pea mo nātou talagafua ki te ʼu lao; ʼe nātou totogi te ʼu tukuhau, pea ʼe mole nātou kumikumi tupuʼaga, peʼe nātou fetogi, peʼe nātou holoʼi te ʼu puleʼaga, koteʼuhi ʼe mole nātou pipiki ki te ʼu meʼa ʼo te mālama ʼaenī.” ʼE toe ʼui e Cattelain ʼe gata pe mokā ʼe faka ʼui e te puleʼaga tonatou maʼuli, ʼaē neʼe kua nātou foaki katoa ki te ʼAtua, ʼe fakafisi ai leva te kau Fakamoʼoni ʼa Sehova te fakalogo. ʼI tana fai ʼaia ʼe nātou hoko lelei ai leva ki te ʼu ʼuluaki kilisitiano. — Maleko 12:17; Gāue 5:29.

ʼE mahino hāla ki te kau takitaki

9. ʼO ʼuhiga mo te mavae mai te malamanei, koteā te kehekehe maʼuhiga ʼa te kau kilisitiano ʼo te temi muʼa pea mo te kau katolika ʼo te temi nei?

⁹ Tokolahi te ʼu tuʼi loma neʼe nātou mahino hāla ki te ʼu ʼuluaki kilisitiano pea neʼe nātou fakatagaʼi. ʼI tana fakahā te tupuʼaga, ʼe ʼui fēnei e te tohi (The Epistle to Diognetus), ʼe lau e ʼihi neʼe fai ʼi te lua sēkulō: “Ko te kau kilisitiano ʼe nātou maʼuʼuli ʼi te malamanei, kae ʼe mole nātou kau ʼi te malamanei.” ʼI te tahi faʼahi, ko te Lua Fono ʼo te Vatikano, ʼi tana Fakatuʼutuʼu fai akonaki ʼo ʼuhiga mo te ’Ēkelesia, neʼe ina tala ko te kau katolika ʼe tonu ke nātou “kumi te Puleʼaga ʼo te ʼAtua ʼo nātou kau ki te ʼu meʼa ʼo te mālama” pea mo “nātou gāue ki te tāpuhā ʼo te mālama ʼi tanatou faiga ʼaia”.

10. a) Neʼe feafeaʼi te sioʼi ʼa te kau kilisitiano ʼo te temi muʼa e te kau takitaki? b) ʼE feafeaʼi te tau sioʼi ʼo te kau Fakamoʼoni ʼa Sehova, pea ʼe feafeaʼi tonatou aga?

¹⁰ Ko te tagata fai hisitolia ko H. E. Hardy neʼe ina tala ko te ʼu tuʼi loma neʼe nātou ʼui ko te kau kilisitiano “ ʼe hage ko he ʼu hahaʼi ʼe pipiki ki te lotu ʼe fehiʼaʼinaʼi”. Ko te tagata fai hisitolia Falani ko Étienne Trocmé ʼe talanoa ki te “loto fehiʼa ʼa te hahaʼi loma maʼu tuʼulaga pea mo te hahaʼi keleka ki te meʼa ʼe nātou ʼui ko he magaʼi lotu faikehe mai te potu hahake [te kau kilisitiano]”. Ko te tohi ʼa Pline le Jeune, te kovana loma ʼo Bithynie pea mo te tuʼi ko Trajan, ʼe ina fakahā ko te kau takitaki neʼe nātou fakapōʼuli ki te ʼuhiga moʼoni ʼo te tui faka kilisitiano. ʼE toe feiā aipe ʼi temi nei, ko te kau takitaki ʼo te malamanei ʼe nātou tau mahino hāla pea mo fehiʼa ki te kau Fakamoʼoni ʼa Sehova. Kae, ko te meʼa ʼaia ʼe mole fakapuna’maʼuli ia ki te kau Fakamoʼoni ʼa  Sehova peʼe ʼui ʼe nātou lotovaivai ai. — Gāue 4:13; 1 Petelo 4:12, 13.

“ ʼI te potu fuli pe ʼe palalau ʼo fakafeagai kiai”

11. a) Koteā te ʼu meʼa neʼe ʼui ʼo ʼuhiga mo te kau kilisitiano ʼo te temi muʼa, pea koteā te meʼa neʼe ʼui ʼo ʼuhiga mo te kau Fakamoʼoni ʼa Sehova? b) He koʼe koa ʼe mole kau te kau Fakamoʼoni ʼa Sehova ki te ʼu meʼa faka politike?

¹¹ Neʼe ʼui fēnei ʼo ʼuhiga mo te ʼu ʼuluaki kilisitiano: “ ʼO ʼuhiga mo te magaʼi lotu ʼaia, ʼe mahino kia mātou ʼi te potu fuli pe ʼe palalau ʼo fakafeagai kiai.” (Gāue 28:22). ʼI te lua sēkulō ʼo totatou temi, ko te tagata pagani ko Celse neʼe ina tala ko te tui faka kilisitiano ko te ʼu ʼotaʼota ʼo te sosiete fakatagata. Neʼe toe ʼui feiā pe ʼo ʼuhiga mo te kau Fakamoʼoni ʼa Sehova, ʼaē “tokolahi ia nātou ʼe ko te kau māsisiva ʼo totatou sosiete”. Ko te tagata fai hisitolia ʼo te ʼēkelesia ko Johann Neander neʼe ina fakamatala “ko te kau kilisitiano neʼe fakatā ia nātou ko te ʼu hahaʼi mate ki te malamanei, pea fakagaohaʼa ki te ʼu meʼa ʼo te maʼuli; (...) pea neʼe feʼekeʼaki peʼe feafeaʼi anai te fakaʼaluʼalu ʼo te maʼuli, mo kapau ko te hahaʼi fuli neʼe hage ko nātou”? Koteʼuhi ko te kau Fakamoʼoni ʼa Sehova ʼe nātou fakafisi ki te kau ki te ʼu meʼa faka politike, ʼe tau tukuga koviʼi nātou ko te ʼu kavega ʼo te sosiete fakatagata. Kae ʼe feafeaʼi he fealagia kia nātou ke nātou lagolago ki te ʼu meʼa faka politike pea ʼi te moʼi temi pe ʼaia ke nātou lagolago ki te Puleʼaga ʼo te ʼAtua ʼaē ko te ʼamanaki pe ʼaia e tahi ki te malamanei? Ko te kau Fakamoʼoni ʼa Sehova ʼe nātou fakaʼaogaʼi fakamalotoloto te ʼu palalau ʼaenī ʼa Paulo: “Toʼo tou vahe ʼi te mamahi ʼi tou ʼuhiga tagata solia lelei ʼa Kilisito Sesu. ʼE mole he tagata solia ʼe kei lolotoga selevisi ʼe ina fakamaʼumaʼua ia ia ki te ʼu meʼa ʼo te maʼuli faka sivile, koteʼuhi ko tana faiga ke ina fakafiafia ia ia ʼaē neʼe ina fakahū ia ia.” — 2 Timoteo 2:3, 4, Revised Standard Version, ko he Tohi-Tapu faka ekumenike.

12. Ko te faʼahi maʼuhiga fea ʼo te mavae ʼa te kau Fakamoʼoni ʼa Sehova ʼe nātou tatau ai mo te kau kilisitiano ʼo te temi muʼa?

¹² ʼI tana tohi (A History of Christianity), ʼe ʼui e te polofesea ko K. S. Latourette: “ ʼI te ʼu faʼahi ʼaē neʼe mole felogoi ai te ʼu ʼuluaki kilisitiano mo te puleʼaga loma pea mo keleka, neʼe ko te kau ʼaē ki te tau. Lolotoga te ʼu ʼuluaki sēkulō e tolu, ʼe mole he tohi faka kilisitiano neʼe kaku mai ki totatou temi neʼe ina faka lākatonu te kau ʼa te kau kilisitiano ki te tau.” ʼE tala fēnei e Edward Gibbon ʼi tana tohi (The History of the Decline and Fall of the Roman Empire): “Neʼe mole pe feala ki te kau kilisitiano, kae mole nātou liaki he gāue taputapu maʼuhiga ʼaupito, ke nātou gāue ohage ko he kau solia, peʼe hahaʼi fai fakamāu, peʼe pilinise.” ʼE toe feiā pe foki mo te kau Fakamoʼoni ʼa Sehova, ʼe mole hanatou pikipikiga e tahi mo te tau pea, ʼe nātou mulimuli ki te ʼu fakatuʼutuʼu tāfito ʼaē ʼe fakahā lelei ia Isaia 2:2-4 pea mo Mateo 26:52.

13. Koteā te fakakoviʼi ʼe fai ki te kau Fakamoʼoni ʼa Sehova, kae koteā ʼaē ʼe fakahā e te ʼu meʼa ʼaē ʼe hoko?

¹³ Ko te kau Fakamoʼoni ʼa Sehova ʼe fakakoviʼi e tanatou ʼu fili ʼo ʼuhiga mo te fakamavete ʼo te ʼu famili. ʼE moʼoni, ʼe ʼi ai te ʼu famili ʼe mavete ʼi te liliu ʼo he tahi peʼe ko he tokolahi ʼo te famili ʼaia ko he kau Fakamoʼoni ʼa Sehova. Neʼe fakakikite e Sesu ko te meʼa ʼaia ʼe hoko anai (Luka 12:51-53). Kae, ko te ʼu sivisivi, ʼe nātou fakahā ko te ʼu ʼohoana ʼaē ʼe mavete ʼuhi ko te faʼahi ʼaia ʼe tahitahiga ia. Ohage la, ʼi te kau Fakamoʼoni ʼa Sehova ʼaē ʼi Falani, ʼi he ʼu taumatuʼa e tolu, ʼe ʼi ai te taumatuʼa e tahi ko te ʼohoana ʼe mole ko he Fakamoʼoni. Pea tahi ʼaē meʼa, ko te mavete ʼi te ʼu taʼi taumatuʼa ʼaia (ko te ʼohoana tagata peʼe fafine ʼe mole ko he Fakamoʼoni) ʼe mole laka age ia ʼi te fakafuafua ʼo te ʼu mavete ʼi te fenua katoa. Koteā tona tupuʼaga? Neʼe foaki e te ʼu ʼapositolo ko Paulo pea mo Petelo te tokoni poto ki te kau kilisitiano ʼaē ʼe ʼohoana mo te hahaʼi ʼe mole tui, pea ko te kau Fakamoʼoni ʼa Sehova ʼe nātou faiga te mulimuli ki tanā ʼu palalau (1 Kolonito 7:12-16; 1 Petelo 3:1-4). Kapau ko he faʼahiga nofo faka taumatuʼa feiā ʼe mavete, ʼe teitei pe ke hoko te faʼahi ʼaia ʼuhi ko ʼaē ʼe mole tui kia Sehova. ʼI te tahi faʼahi, ko te ʼu ʼohoana ʼe lauʼi afe neʼe hāofaki koteʼuhi ko te tagata pea mo te fafine neʼe nā liliu ko te ʼu Fakamoʼoni ʼa Sehova pea neʼe nā kamata maʼuliʼi te ʼu fakatuʼutuʼu faka tohi-tapu.

Ko te kau kilisitiano, kae mole ko he kau lagolago ʼo te tahitolu

14. Koteā te tukuga koviʼi neʼe fai ki te kau kilisitiano ʼo te temi muʼa, pea he koʼe koa ʼe ko he meʼa fakaniania?

¹⁴ Ko te meʼa ʼe fakaniania ʼi te Puleʼaga loma,  ʼi te ʼu tukuga koviʼi neʼe fai ki te ʼu ʼuluaki kilisitiano neʼe ʼui ko nātou ko te ʼu hahaʼi ʼe mole tui ʼatua. ʼE tohi fēnei e Johann Neander: “Ko te kau fakafisi ʼatua, ko te hahaʼi ʼe mole tui ʼatua, (...) neʼe ko te higoa ʼaia neʼe fakatoʼo ki te kau kilisitiano e te hahaʼi.” Meʼa faikehe foki ko te kau kilisitiano, ʼaē neʼe atolasio ki te Tupuʼaga maʼuli, neʼe fakahigoaʼi leva nātou ko te hahaʼi ʼe mole tui ʼatua, e te hahaʼi pagani ʼaē ʼe nātou atolasio ki te meʼa ʼaē ʼe “mole ko te ʼu ʼatua, kae ko te gāue ʼa te ʼu nima ʼa te tagata, ko te ʼakau pea mo te maka”. — Isaia 37:19.

15, 16. a) Koteā te meʼa neʼe ʼui e ʼihi hahaʼi lotu ʼo ʼuhiga mo te kau Fakamoʼoni ʼa Sehova, kae koteā te fehuʼi ʼe malaga ai? b) Koteā te meʼa ʼe hā ʼaki mai ai ko te kau Fakamoʼoni ʼa Sehova ʼe ko te kau kilisitiano moʼoni?

¹⁵ ʼE toe feiā aipe ʼi te temi nei, ko ʼihi kau takitaki ʼo te keletiate ʼe nātou fakafisi ki te ʼuhiga kilisitiano ʼo te kau Fakamoʼoni ʼa Sehova. Koteā tona tupuʼaga? Koteʼuhi ko te kau Fakamoʼoni ʼa Sehova ʼe nātou fakafisi ki te Tahitolu. Ki te faka ʼuhiga ʼo te keletiate, “ko te kau kilisitiano ko nātou ʼaē ʼe nātou tali ia Kilisito ʼi tona ʼuhiga ʼAtua”. Kae ʼo fakafeagai ki te faʼahi ʼaia, ʼe fēnei te faka ʼuhiga ʼo te kupu ʼaē “kilisitiano, ko he tahi ʼe tui kia Sesu Kilisito pea ʼe mulimuli ki tana ʼu akonaki” pea ʼe fēnei leva tana faka ʼuhiga te kupu “tui faka kilisitiano, ko he lotu ʼe fakatafito ki te ʼu akonaki ʼa Sesu Kilisito pea mo te tui ʼaē ko ia (ia Sesu) ko te ʼalo ʼo te ʼAtua”. Ko ai ia nātou ʼaē ʼe tau mo te fakamatala ʼaenī?

¹⁶ Ko te kau Fakamoʼoni ʼa Sehova ʼe nātou tali te ʼuhiga tonu ʼo Sesu. Neʼe ina tala fēnei: “Ko ʼau ko te ʼAlo ʼo te ʼAtua”, kae neʼe mole: “Ko ʼau ko te ʼAtua, te ʼAlo.” (Soane 10:36; vakaʼi mo Soane 20:31). ʼE nātou tali te talanoa ʼaē ʼa Paulo ʼo ʼuhiga mo Kilisito: “Ia ia ʼaē neʼe ʼaluʼaga fakaʼatua, neʼe mole ina fakamaʼumaʼu ʼaki he loto maheka te tuʼulaga ʼaē neʼe fakatatau ai ki te ʼAtua *.” (Filipe 2:6, The New Jerusalem Bible). ʼE ʼui fēnei e te tohi (The Paganism in Our Christianity): “Neʼe mole heʼeki talanoa ia Sesu Kilisito ki he faʼahi feiā [ko he Tahitolu ʼe nātou tatau], pea ʼe mole he faʼahi ʼi te Tauhi Foʼou ʼe maʼu ai te kupu ‘Tahitolu’. Ko te manatu ʼaia neʼe hoki taupau e te ’Ēkelesia hili te sēkulō e tolu ki te mate ʼo Totatou ʼAliki; pea ko te haʼuʼaga ʼo te manatu ʼaia ʼe ko he haʼuʼaga faka pagani.” Ko te kau Fakamoʼoni ʼa Sehova ʼe nātou tali te ʼu akonaki faka tohi-tapu ʼo ʼuhiga mo Kilisito. Ko nātou ko te kau kilisitiano, kae mole ko he kau lagolago ʼo te Tahitolu.

ʼE mole ʼi ai he faʼahi faka ekumenike

17. He koʼe koa ʼe mole faifaitahi te kau Fakamoʼoni ʼa Sehova mo te kautahi faka ekumenike, peʼe ko he kautahi ʼe fefio ai te ʼu faʼahiga tui kehekehe?

¹⁷ Ko te tahi ʼu fakakoviʼi e lua ʼe fai ki te kau Fakamoʼoni ʼa Sehova ko tanatou fakafisi ʼaē ki te kau ki he kautahi faka ekumenike pea mo tanatou kau ʼaē ki te meʼa ʼe fakahigoaʼi “ko te kau fai fakamaliu hahaʼi fakakinau”. Ko te ʼu fakakoviʼi ʼaia e lua neʼe toe fai pe foki ki te kau kilisitiano ʼo te temi muʼa. Ko te keletiate, ʼaki tona ʼu koga katolika, orthodoxe pea mo polotesita, ʼe ko he koga moʼoni ia ʼo te mālama ʼaenī. Ohage pe ko Sesu, ko te kau Fakamoʼoni ʼa Sehova “ ʼe mole nātou kau ʼi te malamanei”. (Soane 17:14.) ʼE feafeaʼi honatou fakatahi ki te ʼu kautahi ʼe fio ai te ʼu faʼahiga tui ki he ʼu kautahi faka lotu ʼe nātou fakaneke te ʼu aga ʼe mole ko he ʼu aga faka kilisitiano, feiā mo tonatou ʼu tui?

18. a) He koʼe koa ʼe mole feala he fakaʼāgaʼi tonu te kau Fakamoʼoni ʼa Sehova ʼi tanatou ʼui ʼaē ʼe ko nātou pe ʼe nātou maʼuliʼi te lotu moʼoni? b) Logope tanatou tui ʼaē ko nātou ʼe nātou maʼu te lotu moʼoni, koteā te meʼa ʼe mole maʼu e te kau katolika?

 ¹⁸ Ko ai ʼe feala ke ina fakaʼāgaʼi tonu te kau Fakamoʼoni ʼa Sehova ki tanatou tui ʼaē, ohage pe ko te ʼu ʼuluaki kilisitiano, ko nātou ʼāteaina pe ʼaē ʼe nātou maʼuliʼi te lotu moʼoni? Māʼiape la mo te ’Ēkelesia katolika, ʼaē ʼe ina kalagaʼi fakamalualoi tana faifaitahi mo te kautahi faka ekumenike, ʼe ina tala fēnei: “ ʼE mātou tui ko te lotu moʼoni pe ʼaenī e tahi ʼe hoko atu tana maʼuli ʼi te ’Ēkelesia katolika pea mo faka apositolika, ʼaē neʼe tuku age kiai e te ʼAliki ko Sesu te gāue ʼaē ko tana faka mafola ʼi te hahaʼi fuli, ʼi tana ʼui age ki tana kau ʼapositolo: ‘Koutou ʼolo pea mo koutou fai he kau tisipulo ʼi te hahaʼi ʼo te fenua fuli pe.’ ” (Fono Lua ʼo te Vatikano, “Talanoa ki te ʼāteaina faka lotu”). ʼE ʼiloga ia, ko te taʼi tui ʼaia ʼe mole feʼauga moʼo fakahū ki te kau katolika te fakamalotoloto faimate ʼi te haʼele moʼo fai ʼo he ʼu tisipulo.

19. a) Koteā te meʼa ʼaē kua fakatotonu e te kau Fakamoʼoni ʼa Sehova ke nātou fai, pea koteā te tupuʼaga ʼo tanatou faiga feiā? b) Koteā anai ka vakaʼi ʼi te alatike ʼaē ka hoa mai?

¹⁹ Ko te kau Fakamoʼoni ʼa Sehova ʼe nātou maʼu te taʼi fakamalotoloto ʼaia. Kua nātou fakatotonu ʼo ʼuhiga mo te loaloaga ʼo tanatou fagonogono ʼe mulimuli pe ki te loto ʼo te ʼAtua (Mateo 24:14). Ko tanatou fagonogono ʼe fai fakamalotoloto kae mole fai fakakinau. ʼE tupu mai tonatou ʼofa ki te kāiga, kae mole ko te fehiʼa ki te hahaʼi. ʼE nātou ʼamanaki ʼe hāofaki anai te hahaʼi tokolahi ʼaupito (1 Timoteo 4:16). Ohage ko te kau kilisitiano ʼo te temi muʼa, ʼe nātou faiga ke nātou “maʼuli tokalelei mo te tagata fuli pe”. (Loma 12:18.) ʼO ʼuhiga mo te ʼaluʼaga ʼo tanatou haʼele, ko te meʼa ʼaia ʼe vakaʼi anai ʼi te alatike ka hoa mai.

[Nota ʼi te lalo pasina]

Ko te faʼahiga fakamanatu

◻ Koteā neʼe fakaʼiloga ʼaki te kau kilisitiano ʼo te temi muʼa, pea ko te ʼu potu fea ʼaē ʼe tatau ai te kau Fakamoʼoni ʼa Sehova pea mo nātou?

◻ Ko te ʼu faʼahi fea ʼaē ʼe fakahā e te kau Fakamoʼoni ʼa Sehova ko nātou ko te ʼu hahaʼi lelei?

◻ Neʼe feafeaʼi te sioʼi ʼo te kau kilisitiano ʼo te temi muʼa e te kau takitaki, pea koteā tona kehekehe mo te temi nei?

◻ ʼI tanatou ʼiloʼi papau ʼaē ko nātou ʼaē ʼe nātou maʼu te moʼoni, koteā ʼaē ʼe ina ʼeke nātou ke nātou fai?

[ʼU fehuʼi ʼo te ako]

[Paki ʼo te pasina 12]

Ko te kau Fakamoʼoni ʼa Sehova ʼe nātou loto faiga koteʼuhi ʼe loto e te ʼAtua ke nātou fai feiā.

[Paki ʼo te pasina 17]

Neʼe ʼui e Pilato: “Koʼeni! Te tagata” — ia Ia ʼaē neʼe mole kau ʼi te malamanei. — Soane 19:5.

[Haʼuʼaga ʼo te paki]

“Ecce Homo” by A. Ciseri: Florence, Galleria dʼArte Moderna / Alinari/Art Resource, N.Y.