Ko Te Maʼuli ʼo Te Kau Faka Mafola ʼo Te Puleʼaga

Neʼe Ina Maʼu Te Ikuʼaga ʼi Tona Maʼuli

NEʼE tala e Sesu ʼe ina ʼiloʼi tana ʼu ōvi (Soane 10:14). Kapau ko he tahi ʼe lotolelei pea mo ʼofa ki te tokalelei pea mo te faitotonu, ko ia ʼaia ka fakaōvi anai ki te ʼu tisipulo ʼa Sesu. Ko he tahi ʼe aga feiā ʼe ina maʼu anai te ikuʼaga ʼi tona maʼuli, ohage ko te meʼa neʼe hoko ki te fafine ʼi Pelesike. Koʼeni tona hisitolia:

“ ʼI te fisifisi ʼo toku matapā e te kau Fakamoʼoni ʼa Sehova, neʼe ʼau mahaki ʼo kovi ʼosi pea neʼe ʼau manatu leva ke ʼau pulihi toku maʼuli. Neʼe ʼau leleiʼia te meʼa ʼaē neʼe ʼui mai e te kau Fakamoʼoni ʼo ʼuhiga mo te tonu ki te ʼu faigataʼaʼia ʼo te mālama mahaki ʼaenī kae neʼe mole ʼau leleiʼia te manatu ʼaē ʼe kau te ʼAtua ki te faʼahi ʼaia. Ia taʼu e valu ki muʼa atu neʼe mole kei ʼau ʼalu ki te ’Ēkelesia, he neʼe ʼau fehiʼa ki te malualoi ʼaē neʼe ʼau sio kiai. Kae, mo te kau Fakamoʼoni, neʼe ʼau ʼiloʼi ai leva te leʼo ʼo te moʼoni ʼi te meʼa ʼaē neʼe nātou ʼui mai ʼi tanatou ʼomai, koia, ʼe faigataʼa ai te maʼuli ʼāteaina mai te ʼAtua.

“Kae, ʼi te ʼosi pe ʼo he ʼu ʼaʼahi, neʼe mole kei ʼau felogoi mo te kau Fakamoʼoni. Neʼe ʼau fakaʼofaʼofa ʼosi. Neʼe ʼau suluka te ʼu pake e lua ʼi te ʼaho pea neʼe ʼau kamata fakaʼaogaʼi te toloke. ʼI taku fia felogoi ʼaē mo taku kui tagata ʼaē kua mate, koia neʼe ʼau faifakalauʼakau ai. Neʼe lahi toku mataku ʼi he po neʼe tauʼi ai ʼau e te temonio ʼuhi ko taku faifakalauʼakau! Neʼe hoko te meʼa ʼaia lolotoga te ʼu māhina. ʼI te afiafi fuli neʼe ʼau mataku ʼi te manatu pe ʼaē ʼe ʼau nofo tokotahi.

“Pea, ʼi te tahi ʼaho neʼe ʼau ʼalu ʼo haʼele, neʼe ʼau toʼo leva te ala mole tatau mo te ala ʼe ʼau māhani kiai, pea neʼe ʼau kaku ki te koga meʼa fakatuʼu fale e lahi ʼaupito. Neʼe ʼau puna’maʼuli he neʼe ʼau sio ki te hahaʼi tokolahi ʼi ai. ʼI taku fakaōvi atu, neʼe ʼau sio neʼe ko te kau Fakamoʼoni ʼa Sehova ʼe nātou laga tonatou Fale ʼo te Puleʼaga. Neʼe ʼau manatuʼi ai leva te ʼu ʼaʼahi ʼa te kau Fakamoʼoni ʼaē ki toku ʼapi, pea neʼe ʼau manatu ai leva ʼe ko he meʼa fakafiafia mokā na pau neʼe feala te maʼuli feiā ʼi te malamanei katoa ohage ko te hahaʼi ʼaia.

“Neʼe ʼau fakaʼamu mamahi ke toe ʼomai te kau Fakamoʼoni ki toku ʼapi, koia neʼe ʼau palalau age ai ki ʼihi ʼi te fale. Neʼe ʼau faikole ki te ʼAtua, pea ʼosi ʼaho e hogofulu ko te tagata ʼaē neʼe ʼuluaki felogoi mo ʼau neʼe ina fisifisi toku matapā. Neʼe ina kole mai ke hoko atu tamā ako faka tohi-tapu, pea neʼe ʼau tali fakafiafia. ʼI te temi pe ʼaia neʼe ina fakaafe ʼau ki te ʼu fono ʼi te Fale ʼo te Puleʼaga. Neʼe ʼau tali. Neʼe mole heʼeki ʼau sio ki he meʼa feiā! Neʼe fualoa foki taku kumi te hahaʼi ʼaē ʼe feʼofaʼaki pea mo loto fiafia. Pea ko nātou ʼaenī neʼe ʼau maʼu fakamuli!

“Ki muli mai neʼe ʼau ʼalu ki te ʼu fono fuli. ʼI te ʼosi ʼo te ʼu vāhaʼa e tolu, neʼe ʼau fakagata ai te aga ʼe mole lelei ʼaē ko te suluka. Neʼe ʼau liaki taku ʼu tohi faifakalauʼakau pea mo taku ʼu pa fakatagi ʼo te ʼu musika fakasatana, pea neʼe feala ai taku tauʼi te ʼu temonio ʼaē ʼe faiga ke nātou maʼu ʼau. Neʼe ʼau fakatokatoka toku maʼuli ke ʼalutahi mo te ʼu fakatuʼutuʼu ʼa Sehova ʼi te Tohi-Tapu, pea ʼosi māhina e tolu pea kamata leva taku fai faka mafola te logo lelei. ʼOsi māhina e ono pea neʼe ʼau papitema. Hili ʼaho e lua ki toku papitema, neʼe kamata ai taku pionie vaeluaʼi temi.

“ ʼE ʼau fakamālo kia Sehova ki te ʼu meʼa lelei fuli neʼe ina fai kia te ʼau. Ko toku maʼuli kua ʼi ai leva tona ikuʼaga. ʼIo, ko te huafa ʼo Sehova ʼe ko he tule mālohi ʼo feala ai taku maʼu he fakatauʼaga pea mo he fakamaluʼaga (Tāʼaga Lea 18:10). Neʼe ʼau fakamoʼoni ai ki te talanoa ʼa te pesalemo ʼi tana tohi te Pesalemo 84:10: ‘Ko he ʼaho e tahi ʼi tou malaʼe ʼe lelei age ia ʼi ni ʼaho e afe ʼi he tahi faʼahi! Neʼe ʼau fili ke ʼau nofo ʼi te muʼa matapā ʼo toku ʼAtua ʼi te feʼaluʼaki ʼaē ʼi te ʼu fale lā ʼo te agakovi.’ ”

Ko te fafine lotovaivai ʼaenī neʼe ina maʼu te ikuʼaga ʼi tona maʼuli. Koia ʼe feala ai ki he tahi ke ina kumi ia Sehova ʼaki he lotolelei.