“Neʼe Mole ʼAu Faʼa Mālama Ki Te ʼAtua”

NEʼE tohi fēnei e te tagata ʼe nofo ʼi Kerala, ʼi Initia: “Lolotoga te taʼu kua hili, neʼe ʼaʼahi ia ʼau e te kau Fakamoʼoni ʼa Sehova pea mo nātou vaevae mai te ʼu logo taulekaleka ʼo ʼuhiga mo te Puleʼaga ʼo te ʼAtua. Neʼe ʼau Katolika lolotoga taʼu e valu, kae neʼe mole ʼau faʼa mālama ki te ʼAtua. Kae ʼi te taʼu pe ʼaenī e tahi, kua lahi te ʼu meʼa kua ʼau ʼiloʼi. ʼE ʼau fiafia ʼaupito ʼi te ʼiloʼi ʼaē ko Te Tule Leʼo neʼe tā ia lea e 139 [ʼi te temi nei ia lea e 146]. Ko he meʼa fakaofoofo hakita sio ki te ʼu hahaʼi mo te ʼu lea kehekehe, ʼe nātou fakaaʼu ʼo ʼiloʼi te logo ʼo ʼuhiga mo te ʼAtua.”

Logope te lau e te kau tagata fai filosofia ʼe mole feala hakita ʼiloʼi te ʼAtua, kae neʼe fakahā lelei e te ʼapositolo ko Paulo ko te meʼa ʼaia ʼe feala ia. ʼI tana palalau ki te hahaʼi ʼo Ateni, ko ʼihi ia nātou neʼe nātou tauhi ʼi te ʼaletale “Ki Te Atua Hee Ilo,” neʼe ʼui fēnei e Paulo: “Ko te mea ae e koutou tauhi kae e mole koutou iloi, e ko ia ae e au fagonogono kia koutou. Ia te Atua ae nee ina fakatupu te atulaulau mo ona naunau fuape . . . e ina foaki ki te mea fulipe te mauli mo te manava pea mo meafuape. Nee ina fakatupu aki he tokotahi te puleaga fuape mo fakanofo natou i te fuga kelekele katoa, nee ina fakatuu te u vaega o te tau mo fakatuakoi te u nofoaga o te tagata.”—Gaue 17:23-26.

Neʼe fakaloto mālohiʼi e Paulo ia te hahaʼi ʼaē neʼe fakalogo age ki ai ke nātou kumi te Tupuʼaga, koteʼuhi “e mole mamao ia maia tatou takitahi.” (Gaue 17:27) ʼE fiafia anai te kau Fakamoʼoni ʼa Sehova ʼi te tokoni atu kia koutou ke koutou ʼiloʼi te ʼAtua moʼoni mo tona ʼu kalitate matalelei.