Te ʼu Fehuʼi ʼa Te Kau Lautohi

He koʼe koa ʼe ʼui e Isaia 30:21, ko te folafola ʼa Sehova ʼe haʼu mai “ ʼou tuʼa,” kae ʼi te vaega ʼi muʼa atu ʼe fakatuʼu ia Sehova ʼi muʼa, ʼaki te ʼui ʼaē “Ko tou ʼu mata ʼe liliu moʼoni anai ko he ʼu mata ʼe sio anai ki tou Faiako Lahi”?

ʼE tou lau fēnei ia Isaia 30:20, 21: “Ko tou Faiako Lahi ʼe mole toe nono anai, pea ko tou ʼu mata ʼe liliu moʼoni anai ko he ʼu mata ʼe sio anai ki tou Faiako Lahi. Pea ʼe logo anai tou ʼu taliga ki he folafola ʼe haʼu mai ʼou tuʼa, ʼo ina ʼui fēnei: ‘Koʼeni te ala. Koutou haʼele ai,’ mo kapau ʼe tonu ke koutou ʼolo ki te faʼahi mataʼu peʼe kapau ʼe tonu ke koutou ʼolo ki te faʼahi hema.”

Kapau ʼe tou mulimuli ki te faka ʼuhiga totonu ʼo te ʼu palalau ʼaia, ʼe sio te tagata lautohi kia Sehova, te Faiako Lahi, ʼi ʼona muʼa kae ʼe logo ia ki Tona leʼo ʼe haʼu mai muli. Kae ʼe ko te ʼu folafola fakatātā ia, pea ʼe tonu ke tou mahino ʼi tona ʼuhiga fakatā ʼaia.

Ko te ʼu palalau fakatā ʼaē ʼe tuʼu ʼi te vaega 20, ko he tagata kaugana ʼe tokalelei ke ina tauhi tona pule, ʼe nofo teuteu ke ina fakahoko te ʼu fakatotonu ʼa te pule. Ohage pe ko he tagata kaugana ʼe tokaga fakalelei ki te nima ʼo tona pule ke mahino ki ai te meʼa ʼaē ʼe loto kiai, ʼo toe feiā pe mo te hahaʼi ʼa Sehova ʼi te temi nei, ʼe nātou sisio fakamaʼumaʼu ki te ʼu fakatotonu ʼaē ʼe fakatafito ki te Tohi-Tapu ʼaē ʼe foaki māmālie mai e Sehova ʼaki tana kautahi ʼi te kele. (Pesalemo 123:1, 2) Ei ʼe nātou muliʼi tana takitaki, ʼo nātou tokakaga ki he faʼahiga meʼa pe ʼe fakahā e Sehova ʼaki “te kaugana agatonu mo fakapotopoto.”—Mateo 24:45-47.

Kae e feafeaʼi ki te folafola ʼaē ʼe logo kiai tana kau kaugana ʼe haʼu mai muli? ʼE ʼiloga ia ʼe tonu ke tou mahino ko te leʼo ʼaē ʼe haʼu mai muli ʼe ko te leʼo ʼo te ʼAtua ʼaē neʼe logo ʼi te temi muʼa, ʼaē ʼe fakamatala ʼi tana Folafola pea kua fakamahino e tana “faifekau agatonu.” (Luka 12:42) ʼE logo te kau kaugana ʼa te ʼAtua ʼo te temi nei ki tona leʼo mokā nātou ako fakalelei te Tohi-Tapu, pea mo fakahoko tana ʼu pelesepeto ʼi tonatou maʼuli, ʼo fakaʼaogaʼi te ʼu tohi ʼaē neʼe teuteuʼi e “te kaugana agatonu mo fakapotopoto,” “te faifekau agatonu.” ʼAki tanatou falala ki te takitaki ʼaē ʼe foaki e te Faiako Lahi ʼi tona temi totonu, pea mo nātou tokakaga kiai, pea ʼaki tanatou ako te Folafola ʼa te ʼAtua, ʼaē neʼe tohi kua hili nei kiai te ʼu sēkulō, ʼi he ʼaluʼaga fakatā, ʼe sisio tana kau kaugana kia ia ʼi ʼonatou muʼa kae nātou logo ki tona leʼo ʼe haʼu mai muli.—Loma 15:4.