Ko He ʼu Tane Vai ʼe Mole Nātou Matāʼofi Te Vai

ʼI TE ʼu temi muʼa, ko te ʼu tane ʼaē neʼe keli e te tagata ʼi te kele neʼe ko he ʼu luo neʼe fakaʼaogaʼi tāfito moʼo tānaki ai te vai. ʼI ʼihi temi, ʼi te kele ʼo te Fakapapau, neʼe ko te gataʼaga ʼaia ʼo te puleʼaki moʼo tānaki te vai ʼinu.

ʼI tana fakamatala te fakamāu ʼa te ʼAtua, neʼe fai e te polofeta ko Selemia te ʼu palalau fakatā ʼo ʼuhiga mo te tane vai, ʼo ina ʼui fēnei: “Ko meʼa kovi e lua neʼe fai e taku hahaʼi: kua nātou mavae ia te ʼau, ʼaē ko te matapuna ʼo te vai maʼuli, ke nātou faʼu maʼa nātou he ʼu tane vai, he ʼu tane vai kua makafaʼafaʼa, ʼaē ʼe mole nātou matāʼofi te vai.”​—Selemia 2:13.

ʼI tanatou lītuʼa ki tonatou ʼAtua, ia Sehova​—“te matapuna ʼo te vai maʼuli”​—neʼe maliu te kau Iselaele ʼo fai te ʼu fuakava faka solia mo te ʼu puleʼaga pagani pea mo nātou haga ki te tauhi ʼo te ʼu ʼatua loi ʼaē ʼe ko te ʼu ʼatua mate. Kae ohage ko te fakatā ʼaē neʼe fai e Selemia, ko te taʼi nonoʼaga ʼaia neʼe hage ko te ʼu tane vai ʼe makafaʼafaʼa, ʼe mole nātou maʼu honatou mālohi moʼo puipui peʼe moʼo hāofaki he tahi.​—Teutalonome 28:20.

ʼE ʼi ai koa he ako kia tatou mai te faʼifaʼitaki ʼaia ʼo te temi muʼa? Ohage pe ko te temi ʼo Selemia, ko Sehova ʼe kei hoko atu pe tona ʼuhiga ʼAtua heʼegata ʼaē ko te matapuna pe ʼaia e tahi ʼe ina foaki te vai maʼuli. (Pesalemo 36:9; Apokalipesi 4:11) ʼE hoki feala ai ki te hahaʼi ke nātou maʼu te maʼuli heʼegata, ʼaki pe ia ia, ʼo ʼolo ʼi tona ʼAlo ko Sesu Kilisito. (Soane 4:14; 17:3) Kae ohage pe ko te hahaʼi ʼo te temi ʼo Selemia, ʼe kaugamālie te hahaʼi ʼi te temi nei ʼe nātou filifili ke nātou lītuʼa peʼe nātou meʼa noaʼi te folafola ʼa te ʼAtua, te Tohi-Tapu. ʼE nātou tuku tanatou falala ki te ʼu puleʼaki faka politike ʼe ʼiloga ai tanatou manatu pe ʼaē kia nātou totonu, mo te ʼu fakakaukau fakatagata ʼe gaʼasi, mo te ʼu manatu pea mo te ʼu filosofia ʼaē ʼe nātou fakalainoaʼi te ʼAtua. (1 Kolonito 3:18-20; Kolose 2:8) ʼE mahino mai kia tatou te meʼa ʼaē ʼe tonu ke tou fai. ʼE koutou falala anai kiai? ʼE koutou falala anai koa ki “te matapuna ʼo te vai maʼuli,” ia Sehova, peʼe ko “he ʼu tane vai kua makafaʼafaʼa, ʼaē ʼe mole nātou matāʼofi te vai”?

[Paki ʼo te pasina 32]

Ko te kiʼi fakatātā kele ʼo te ʼatua faʼe neʼe maʼu ʼi te faitoka ʼi Iselaele