“Teuteu Ki Te Fai o Te u Gaue Lelei Fuape”

“FAKAMANATU kia natou ke natou fakalogo ki te hahai taki mo te u pule, ke natou talagafua, mo nofo teuteu ki te fai o te u gaue lelei fuape.” (Tito 3:1) Koteā te ʼu gāue lelei ʼaē neʼe manatu kiai ia te ʼapositolo ko Paulo ʼi tana faitohi ki tona ʼu tēhina ʼi te tui? Neʼe talanoa te tagata sivi Tohi-Tapu ko E. F. Scott ʼo ʼuhiga mo te faʼahiga gāue lelei e tahi, ʼo ina ʼui fēnei: “Neʼe mole tonu pe ke fakalogo te kau Kilisitiano ki te ʼu pule, kae neʼe tonu foki ke nātou teuteu ki te fai ʼo te gāue lelei fuli pe. . . . ʼI he temi pe neʼe ʼaoga ai, neʼe tonu ki te kau Kilisitiano ke nātou kau ia nātou tāfito ʼaē neʼe nātou fai he ʼu gāue maʼa te hahaʼi. Neʼe hoko tuʼumaʼu te ʼu vela, mo te ʼu tautea, pea mo te ʼu malaʼia kehekehe, ʼi te ʼu temi ʼaē neʼe fia tokoni ai te hahaʼi lelei fuli ʼo te fenua ki ʼonatou tatau.”

ʼE lagolago te kau Kilisitiano ki te ʼu faʼahiga gāue ʼaē ʼe ʼaoga ki te hahaʼi fuli, mo kapau ʼe mole fakafeagai ki te ʼu lao ʼa te ʼAtua. (Gaue 5:29) Ohage la, ʼo mulimuli ki te fakatotonu ʼa te kau gāue tamate vela ʼo te fenua, ko te pilō ʼa te kau Fakamoʼoni ʼa Sehova ʼi Saponia, ʼaē ʼe tuʼu ʼi Ebina, ʼi te taʼu fuli ʼe ina akoako te ʼu meʼa ʼaē ʼe tonu ke fai mokā hoko he vela, te tāmateʼi ʼo te afi pea mo te faʼahiga puleʼaki ki te feholaki. ʼI te ʼu taʼi ʼaluʼaga ʼaia, ko nātou fuli ʼaē ʼe kau ki te famili ʼo te Petele ʼe nātou ʼōmai ʼo fakalogo ki te ʼu fakatotonu ʼe fai e he tagata fakafofoga ʼo te kau gāue tamate vela ʼo te fenua.

Pea tahi ʼaē meʼa, lolotoga te ʼu taʼu e hogofulu tupu, neʼe gāue fakatahi ia te pilō mo te kau pule takitaki ki te ʼu fakahāhāʼaga meʼa ʼaē neʼe fai ai te ʼu fakatokaga ʼo ʼuhiga mo te tamate vela. ʼI te ʼu fakahāhāʼaga meʼa ʼaia, ko te kau gāue ki te tamate vela ʼe nātou fakahāhā te ʼu puleʼaki moʼo matehi te ʼu afi pea mo te ʼu sivi moʼo teuteu ki he faʼahi feiā. ʼE tautau vikiʼi te filiale ki tana ʼu faiga pea mo te gāue lelei ʼa tana kau gāue. ʼI te taʼu 2001, neʼe nātou maʼu te ʼuluaki fakapale ki te ʼu fakahāhāʼaga meʼa. ʼE nātou nofo teuteu ki te fai ʼo he ʼu gāue lelei moʼo hāofaki te hahaʼi mokā hoko he vela.

Ko He Gāue Maʼuhiga

Kae ʼe tokakaga te kau Fakamoʼoni ʼa Sehova ki te tahi faʼahiga gāue ʼe maʼuhiga age, pea ʼe ina hāofaki ai te maʼuli. ʼE nātou ʼaʼahi tuʼumaʼu te hahaʼi moʼo vaevae age kia nātou ia te logo lelei ʼo te Puleʼaga ʼo te ʼAtua. (Mateo 24:14) ʼE fakaloto mālohiʼi e te kau Fakamoʼoni ia te hahaʼi ke nātou ako pea mo maʼuliʼi ia te ʼu pelesepeto faka Tohi-Tapu ke feala ai hanatou hikihiki tonatou faʼahiga maʼuli, pea ke nātou maʼu ai ia te ʼamanaki ki te maʼuli heʼegata ʼi he mālama ʼe maʼu ai anai ia te tokalelei pea mo te fīmālie moʼoni.

ʼE lagi mole mahino ʼihi ki te maʼuhiga ʼo te gāue ʼaē ʼe fai e te kau Fakamoʼoni ʼa Sehova, maʼa nātou ʼe ko he meʼa fakahohaʼa. Kae ʼe mole ko te manatu ʼaia ʼa te Tuʼi Fakamāu ko Jean Crepeau ʼo te Telepinale Lahi ʼo Québec ʼi Kanata. Neʼe felāveʼi te kau Fakamoʼoni ʼa Sehova mo te faigataʼaʼia ʼi te kolo ko Blainville, ʼi Québec, ʼaē neʼe ina fakamaʼua he fakagafua ki tanatou feʼoloʼaki ʼi te ʼu ʼapi. ʼI te tonu ʼaē neʼe fai e te Tuʼi Fakamāu ko Crepeau, neʼe ina ʼui fēnei: “Ko te ʼu ʼaʼahi ʼaē ʼe fai e te kau Fakamoʼoni ʼa Sehova ʼe ko he gāue faka Kilisitiano ʼe ʼaoga ki te kolo, pea . . . ko te ʼu tohi ʼaē ʼe tufa e te kau Fakamoʼoni ʼe ko he ʼu tohi  maʼuhiga ʼe palalau ai ki te lotu, mo te Tohi-Tapu, mo te toloke, mo te ʼinu kava, pea mo te akoʼi ʼo te kau tūpulaga, mo te ʼu fihifihia faka taumatuʼa pea mo te mavete.” Neʼe toe hoko atu fēnei te tonu: “Neʼe fakaʼosi fēnei te tonu ʼa te telepinale, ʼo ina ʼui ʼe ko he manuki, mo he fakatō laloʼi pea mo fasituʼu, te fakatatau ʼo te kau Fakamoʼoni ʼa Sehova ki he kau fai fakatau feʼoloʼaki.”

ʼE tokoni te kau Fakamoʼoni ʼa Sehova ki te hikihiki ʼo te maʼuli ʼo te koga meʼa ʼaē ʼe nātou nonofo ai, ʼo nātou tokoni ki te hahaʼi ke nātou tauʼi te ʼu fihifihia ʼo tonatou maʼuli ʼi te ʼaho fuli, pea mo nātou foaki ki te hahaʼi ia he ʼamanaki ki te ka haʼu. ʼE teuteuʼi ia nātou e te Tohi-Tapu ke nātou fakahoko te gāue ʼaia. “E fakamalamai e te Atua te Tohi-tapu katoa, pea e aoga ia ki te faiʼakonaki, mo te fakailoilo o te hala, mo te fakatonutonu, pea mo te fakaʼako i te susitisia, koteuhi ke katoa te tagata a te Atua, kua teuteu o uhiga mo te gaue lelei fuape.”​—2 Timoteo 3:16, 17.

ʼE koutou fia ʼiloʼi koa peʼe koteā ʼaē ʼe liliu ai te kau Fakamoʼoni ʼa Sehova ko he ʼu hahaʼi kua “teuteu ki te fai o te u gaue lelei fuape”? ʼE mātou fakaafe atu ke koutou tali ke nātou tokoni atu ke lahi age hakotou mālama ki te Tohi-Tapu, pea mo feala ai kia koutou ke koutou kau ki te fakahoko ʼo te gāue maʼuhiga ʼaia ki tokotou nofoʼaga pea mo te malamanei katoa.

[Paki ʼo te pasina 30]

ʼE faiga te kau Fakamoʼoni ʼa Sehova ke nātou lagolago ki te ʼu puleʼaga fakamālama

[Paki ʼo te pasina 31]

ʼE tokagaʼi te kau Fakamoʼoni ʼi tanatou tokoni ki tonatou ʼu kāiga